Lande na kata anto ɔnɛ Nzambi ekɔ kanga esehe?

ONDE dimbola diele lo lohoso la periodikɛ kɛnɛ konyangiyaka? Anto amɔtshi mbutaka dia ekɔ ngasɔ, koko akina mbutaka ɔnɛ Nzambi hakoke monga kanga esehe. Lande na?

Anto amɔtshi wakahande oma lo mpokoso y’oma lo diangɔ diakatongama ndjambolaka ɔnɛ: “Lande na ketawɔ Nzambi di’awui anɛ salema? Onde nde mbidjaka yimba l’awui akɔ, ko kana nde ekɔ kanga esehe?”

Anto akina ndjaokaka dimbola sɔ etena kadiawɔ Bible. Ɛnyɛlɔ, etena kadiawɔ ɔkɔndɔ wa Nɔa ndo Mvula k’elola, vɔ ndjambolaka ɔnɛ: ‘Lande na kakadiake Nzambi ka ngandji anto tshɛ wa lo nshi shɔ? Shi kɛsɔ mɛnyaka dia nde ekɔ kanga esehe?’

Onde wɛ amboyaokaka dimbola sɔ lushi lɔmɔtshi? Ko kana wɛ ndjaokaka dia wɛ keema l’akoka wa mbisha anto okadimwelo wa dimbola sɔ? Oyadi ngasɔ mbediɔ kana bu, ɛsɔ tɔsɛdingole dimbola dimɔtshi diakoka kokimanyiya.

LANDE NA KAHETSHASO AWUI W’ESEHE?

Lo tshena pe, sho petshaka awui w’esehe nɛ dia takotɔ la dikoka dia mbeya ntshikitanya ɔlɔlɔ la kɔlɔ. Sho ntshikitana etale la waa nyama lo kɛnɛ kendana la dikoka sɔ, nɛ dia takatongama lo ‘efanelo ka Nzambi.’ (Etatelu 1:27) Kakɔna kalembetshiya dui sɔ? Diɔ nembetshiyaka dia Nzambi akatosha dikoka dia nkɛnɛmɔla waonga ande, ndjela ɛlɛmbɛ ande wendana la lɔkɛwɔ ndo ntshikitanya ɔlɔlɔ la kɔlɔ. Ohokana yimba la dikambo nɛ: Naka takalongola dikoka dia ntshikitanya ɔlɔlɔ la kɔlɔ oma le Nzambi ndo naka sho petshaka awui w’esehe, kete hoke Nzambi! Shi kɛsɔ mɛnyaka dia Nzambi mboleki mpetsha awui w’esehe?

Nzambi toshikikɛka dui sɔ lo Bible lo mbuta ɔnɛ: ‘Ditshelo diami la ditshelo dianyu, ndo tokanyi tami la tokanyi tanyu ntshikitana etale.’ (Isaya 55:9) Ko naka sho mbuta ɔnɛ Nzambi ekɔ kanga esehe, shi kete tekɔ lo ndɔshana la kɛnɛ kata Bible ndo tekɔ lo mbuta dia tokanyi taso ndeka taki Nzambi? Ayonga mɛtɛ dui dia lomba dia sho teyi akambo efula wendana la Nzambi la ntondo ka sho ndjota ngasɔ. Ondo lo ndjambola, aha lo woho wele Nzambi kanga esehe, koko lo woho wɛnama akambo amɔtshi wasalande oko nde ekɔ kanga esehe. Dia tokimanyiya, nyɛsɔ tɔsɛdingole kɛnɛ kalembetshiya tshɛkɛta “esehe.”

Etena kelɛso onto ɔmɔtshi ɔnɛ kanga esehe, kɛsɔ nembetshiyaka dia nde ekɔ la tokanyi ta kɔlɔ ndo nde hoke anto kandji. Kanga esehe kɛdikɛdi onto langɛnangɛna mɛna anto akina wasowa ko lahadje yimba l’ekiyanu awɔ. Ɔnkɔnɛ, ombutshi washa ɔnande dilanya la ngala lo yoho ya mbosoya ekɔ kanga esehe. Koko ombutshi washa ɔnande dilanya l’oyango wa mbongola kana wa mbokokɛ ekɔ ombutshi w’ɔlɔlɔ. Lam’ele mbala efula, sho hatoteyaka kɛnɛ katshutshuya anto dia vɔ nsala akambo lo yoho mɔtshi, sho kokaka ndjakesa esadi eto lo mbaɛndja onongo w’akambo akɔ.

Nyɛsɔ tɔsɛdingole ɛkɔkɔ ehende watshutshuya anto amɔtshi dia vɔ mfɔnya ɔnɛ Nzambi ekɔ kanga esehe: Mpokoso y’oma lo diangɔ diakatongama yɛnaso ɛlɔ kɛnɛ ndo dombwelo dia lo Bible diɛnya woho wakalanya Nzambi anto wa kɔlɔ lo nshi yakete. Onde akambo asɔ ahende mɛnyaka dia Nzambi ekɔ kanga esehe?