Dia ntondoya ekiyanu waya oma l’odiakelo wa diwala

Anto amɔtshi ndjakaka awala lo mfɔnya ɔnɛ vɔ wayoyoleka monga l’ɔngɛnɔngɛnɔ etena kele, akina kombolaka dia diwala diawɔ nomba koko, hawokoke nsɛngiya elonganyi awɔ diaha ndjaka diwala. Lo mɛtɛ, suke l’anto tshɛ wadiaka awala ndjɛnaka dia lɔsɛnɔ ndjokomaka edika otshikitanyi la woho wakawalongamɛka. Naka wɛ eke kandjaka diwala, kete wɛ ayɛna dia ɔsɔ ekɔ dui dimɔtshi l’atei w’awui waleka mbela ekiyanu. Diakɔ diele, ayonga dimɛna wɛ nsɛdingola alako amɔtshi w’ohomba wele lo Bible wakoka kokimanyiya dia wɛ ntondoya ekakatanu waya oma l’odiakelo wa diwala.

OKAKATANU 1: TOKANYI TA KƆLƆ.

Ekakatanu wendana l’ekondjelo, woho wa mbodia ana ndo ndjaoka opoko koka ndeka fulanɛ ndo tokanyi tonga l’onto l’ɔkɔngɔ wa ndjaka diwala hatoshile esadi. Judith Wallerstein lele manyi l’akambo wa lo yimba akɛnya dia l’ɔkɔngɔ wa ndjaka diwala, anto amɔtshi tetemalaka monga l’ekiyanu ndo ndjaokaka oko ekalema lo mbɔsa ɔnɛ “lɔsɛnɔ lekɔ anyanya, vɔ kɔmɔka ndo ndjaokaka opoko.”

KƐNƐ KAKOKAYƐ NSALA

• Wɛ koka ndjakiyanya l’ɔtɛ wa kɛnɛ kamboyoshisha. Koka monga ko wɛ amboshisha lɔngɛnyi l’onto lakayoke ngandji. Ekɔ mɛtɛ dia kaanga nyu komongaka la diɔtɔnganelo dia dimɛna, wɛ koka ndjakiyanya nɛ dia wɛ aya bu l’ɔngɛnɔngɛnɔ wakayalongamɛka monga la wɔ lo diwala. (Tukedi 5:18) Tokake sɔnyi mbɔsa yema y’“etena ka ndela.”​—Undaki 3:1, 4.

• Ewɔ dia ndjanganya l’anto akina. Kaanga mbakokayɛ monga lo dihole dimɔtshi wɛmɛ dia ndela, hatonga dui dia lomba dia wɛ ntshikala edja lɛkɔ. (Tukedi 18:1) Etena kasawolayɛ l’angɛnyi ayɛ, nkamba l’ɛtɛkɛta wakeketsha, nɛ dia ndjakiyanyaka mbala la mbala lo dikambo di’olonganyi ayɛ kaanga l’akambo weyɛ la shadiya, koka ndjokonya anto akina dia kewewɔ. Naka wɛ oyanga mbɔsa tɛdikɔ t’ohomba yema tshitshɛ l’ɔkɔngɔ wa ndjaka diwala, kete yanga alako oma le onto ɔmɔtshi lɛkɛyɛ otema.

• Dja yimba lo yoonge yayɛ. Ndjakiyanyaka mbala la mbala l’ɔtɛ wambovɔ diwala, mbelaka hemɔ efula yele oko hemɔ ka dikila mbudɛka kana ɔtɛ wa wolo efula. Ekɔ ohomba wɛ ndɛka dimɛna, kɔkɔlaka demba ndo ndalaka dimɛna.​—Ɛfɛsɔ 5:29.

• Nya diangɔ diakoka ndjokomadia, kana dieyɛ bu l’ohomba diakinyu wɛ l’olonganyi ayɛ wa ntondo, koko wɛ koka ntetemala nama mikanda w’ohomba. Naka diangɔ dimɔtshi, ɛnyɛlɔ oko fɔtɔ ya diwala koshaka paa l’asolo, kete wɛ mbeyaka diomba di’ananyu ndjodiendaka.

• Ahemɛ tokanyi ta kɔlɔ. Olga lakadiake diwala l’ɔtɛ wakasale omɛnde loseka mbutaka ate: “Lakatetemalaka ndjambola ɔnɛ ‘kakɔna mɛtɛ kele la womoto ɔsɔ kemi bu la tɔ?’” Koko, oko wakayodiɛnaka Olga, naka onto ntetemala monga la tokanyi ta kɔlɔ, kete nde koka ndjonga ko hayokoka ‘nkeketsha otema.’​—Tukedi 18:14.

  Anto efula wakɛnyi dia mfunda akambo amɔtshi waayɛ lo yimba, mbakimanyiyaka dia monga la tokanyi t’amɛna ndo tisɛdingola. Etena kasalayɛ ngasɔ, hemba dia mpɛnya tokanyi ta kɔlɔ la tokanyi t’eyoyo. (Ɛfɛsɔ 4:23) Sɛdingola bɛnyɛlɔ pende nɛ:

  Kanyi ya kɔlɔ: Olonganyi ami komonga la kɔlamelo l’ɔtɛ wa wandja ami.

  Kanyi y’oyoyo: Wandja ami kokoka nkonya olonganyi ami dia nshisha kɔlamelo.

  Kanyi ya kɔlɔ: Laketsha nshi yami y’ɔlɔngɔlɔngɔ wetshetsha l’olonganyi wa kɔlɔ.

  Kanyi y’oyoyo: Layoleka monga l’ɔngɛnɔngɛnɔ lo mbidja yimba l’awui w’otsha la ntondo, aha wambetaka.

• Todjake yimba lo ditakataka di’anto. Kaanga angɛnyi ndo ewotɔ ayɛ mbeyaka kotɛ awui amɔtshi wayokosha paa l’asolo ɔnɛ: ‘Wɛ kɔsɔna olonganyi wa dimɛna’ kana ɔnɛ ‘Nzambi petshaka odiakelo wa diwala.’b Diakɔ dialaka Bible onto tshɛ ɔnɛ: “Tuhukamaki aui tshe watutaka antu.” (Undaki 7:21) Martina lakadiake diwala aya ɛnɔnyi ehende mbutaka ate: “Lo dihole dia mbidja yimba lo ɛtɛkɛta washa paa l’asolo, dimi salaka la wolo dia mɛna akambo oko awaɛna Nzambi, nɛ dia tokanyi taki Nzambi ‘ndeka taso la fwa.’”​—Isaya 55:8, 9.

• Kosalake dɔmbɛlɔ. Nzambi keketshaka atɛmɔdi ande dia vɔ ‘nkitsha ekiyanu awɔ tshɛ le nde,’ djekoleko etena kewɔ l’ekakatanu efula.​—1 Petero 5:7.

OKAKATANU 2: DIƆTƆNGANELO DIA LAM’ASAYƐ L’OLONGANYI AYƐ WA NTONDO.

Juliana lakasale ɛnɔnyi 11 lo diwala, mbutaka ate: “Lakasɛngasɛnga omɛmi diaha sho ndjaka diwala. Koko, l’ɔkɔngɔ wa diwala mvɔ, lakayotatɛ mbaoka nde la womoto lakatodjasɛ la nde kɛlɛ k’efula.” Anto efula wakadiake awala tetemalaka mboka elonganyi awɔ wa ntondo kɛlɛ kaanga l’ɔkɔngɔ w’ɛnɔnyi efula. Koko, vɔ tshutshuyamaka dia sawolaka la wɔ mbala la mbala, djekoleko naka wakote ana.

KƐNƐ KAKOKAYƐ NSALA

• Ongaka la dilɛmiɛlɔ lo diɔtɔnganelo diasayɛ l’olonganyi ayɛ wa ntondo. Etena kasawolayɛ la nde, dja yimba l’akambo woleki ohomba, ntɛkɛta lo tshena pe ndo nsembɔ tɔɔ lo dikambo. Anto efula wakɛnyi dia nsala ngasɔ, mbakimanyiyaka dia monga la wɔladi.​—Rɔmɔ 12:18.

• Ewɔ mbotondjiyɛ ɛtɛkɛta wa kɔlɔ. Djekoleko etena kɔsayɛ oko nde ambokonyangiya, wɛ koka nkamba la dako dia lo Bible nɛ: “One latuyakimelaka lu aui andi, eli kanga yimba.” (Tukedi 17:27) Naka sawo dianyu diotatshu otsha lo kɔlɔ, wɛ koka mbuta ntsho ɔnɛ: “Tokotokana yimba la kɛnɛ kotshiyɛ, tayoyosawola lushi lokina.”

• Kakitola diangɔ diayɛ la diaki olonganyi ayɛ wa ntondo, mbidja ndo ekanda wa laka lɛɛta, wendana l’okanda ndo wendana l’aseka enganga.

OKAKATANU 3: WOHO WA NKIMANYIYA ANA DIA VƆ MBIKIKƐ ETSHIKITANU.

Maria mbohɔka woho wakayonga akambo l’ɔkɔngɔ wa ndjaka diwala lo mbuta ate: “Ɔnami la womoto akalelaka wonya tshɛ ndo akayotatɛ nkusɔ nto. Ndo etena kakashɛshɛka ɔnami l’enondo tokanyi tande, lakashihodiɛka ɔnɛ ondo l’ɔtɛ waya ombutshi ande okina bu lawɔ.” Lonyangu ko, wɛ koka ndjaoka oko onto laya bu la wenya ndo wolo wa nkimanyiya anayɛ, ko tetele vɔ wekɔ l’ohomba ayɛ efula.

KƐNƐ KAKOKAYƐ NSALA

• Keketsha anayɛ dia vɔ kotɛka tokanyi tawɔ, oyadi etena kɛnama oko vɔ wekɔ lo ntondja “awui w’utundjatundja.”​—Jobo 6:2, 3.

• Tetemala nkotsha ɔkɛndɛ ayɛ. Kaanga l’etena keye l’ohomba w’ekimanyielo k’efula ndo kɛnamadiɔ di’ɔnayɛ kokaka kokimanyiya, kema ohomba nɔmba ɔna dia nde kokimanyiya l’akambo wamboleka wolo. (1 Kɔrɛtɔ 13:11) Ewɔ dia mbutɛka anayɛ toseke tayɛ kana nkamba la wɔ oko tɛmba awui lam’asayɛ l’olonganyi ayɛ wa ntondo.

• Tetemala mbodia ana dimɛna. Ekɔ ohomba mbidjasɛ lo dihole diakɔ diamɛ ndo monga l’ekongelo ka dimɛna, koko kɛnɛ koleki ohomba ele ntetemala ndjasha l’akambo wa lo nyuma, ɛnyɛlɔ wadielo wa Bible ndo ɔtɛmwɛlɔ wa lo nkumbo.​—Euhwelu k’Elembe 6:6-9.

Wɛ koka ntondoya lɔsɛnɔ layɛ l’ɔkɔngɔ wa diwala diayɛ mvɔ. Melissa lakayotshukamaka nto l’ɔkɔngɔ w’ɛnɔnyi 16, mbutaka ate: “L’ɔkɔngɔ wa ndjaka diwala, lakayota nte, ‘aha woho ɔnɛ mbakamakombolaka dia lɔsɛnɔ lami monga.’” Koko kakianɛ, nde ɔngɛnangɛna la lɔsɛnɔ lele lande. Nde kotshaka ate: “Lam’ele lamboshihodia ɔnɛ hakoke ntshikitanya awui wambetaka, loyaoka dimɛna.”