Onde wɛ aakohɔ?

Onde wɛ akadia la yambalo tshɛ numɛlɔ ya Tshoto y’Etangelo y’ɔnɔnyi ɔnɛ? Naka ngasɔ, kete enda kana wɛ koka nkadimola ambola wayela anɛ:

Wahɔ akɔna wayotokondja naka sho mbetshaka wenya aso dia nsawola la Jehowa, mbohokamɛ ndo kanaka yimba l’awui wendana la nde?

Tayonga l’akoka wa mbɔsa tɛdikɔ t’amɛna efula, monga embetsha wa tomanamana, monga la mbetawɔ ka nge ndo tayofudia ngandji kokaso Jehowa.—w22.01, lk. 30-31.

Ekimanyielo kakɔna kayotokondja naka sho mbeka dia ndjaɛkɛ le Jehowa ndo le enyimpala ande?

Ɔnɛ ekɔ etena ka ndjaɛkɛ lo woho wa nsala Nzambi akambo aha la mvɔ ɛlɔmbwɛlɔ ndo tɛdikɔ ta dikumanyi tshɔda. Etena kayoya mfɔnu ka woke, tayonga suke dia nkitanyiya oyadi tambolongola ɛlɛmbɛ wɛnama oko eyoyo kana wahatashihodia.—w22.02, lk. 4-6.

Oyango akɔna waki l’ondjelo etena kakandatɛ Zɛkariya awui wendana la “ɔkɔdi wa wɛdikelo [wele] lo lonya la [nguvɛrnɛrɛ] Zerubabɛlɛ”? (Zɛk. 4:8-10)

Ɛnɛlɔ kɛnɛ kakashikikɛ ekambi waki Nzambi dia tɛmpɛlɔ kaha kawotake kayoshila mbikama ndo kayɔtɔnɛ l’ɛlɛmbɛ waki Nzambi.—w22.03, lk. 16-17.

Ngande wakokaso monga “ɛnyɛlɔ . . . lo ɛtɛkɛta”? (1 Tim. 4:12)

Sho tɛkɛtaka la wɔlamu ndo la dilɛmiɛlɔ l’olimu aso w’esambishelo, sho membaka esambo l’otema aso tshɛ, sho mbishaka kɔmatɛrɛ lo nsanganya mbala la mbala, sho mbitaka mɛtɛ ndo sho keketshaka anto akina, ndo lo mbewɔ ɛtɛkɛta wa kɔlɔ.—w22.04, lk. 6-9.

Lande na kele tolembetelo ta nyama nyɛi (waolelo) tɔtɛkɛtami lo Danyɛlɛ tshapita 7 sanganyema lo nyama ɔtɔi, oko wɔtɛkɛtamidiɔ l’Ɛnyɛlɔ 13:1, 2?

Nyama kɔtɛkɛtshiwɔ l’Ɛnyɛlɔ 13 bu didjidji dia lowandji ɔtɔi la shikaa, ɛnyɛlɔ oko Rɔmɔ. Koko tɔ kekɔ didjidji dia mandji ya pɔlitikɛ tshɛ yambɔlɔmbɔla anto.—w22.05, lk. 9.

Naa yoho yoleki dimɛna ya mɛnya dia sho ndjaɛkɛka lo losembwe laki Nzambi?

Naka onto ɔmɔtshi akatɔtɛngɛ, akatonyangiya, kana akatosalɛ kɔlɔ, kete tonya nkɛlɛ ndo tokumbɛkumbɛ. Totshike akambo l’anya wa Nzambi. Nde ayonya etombelo tshɛ wa kɔlɔ w’oma lo pɛkato.—w22.06, lk. 10-11.

Ɔnangɛso la nsala dɔmbɛlɔ lo losanganya lɔmɔtshi pombaka nama dui diakɔna lo yimba?

Hatohombe nkamba la dɔmbɛlɔ dia mbisha etshumanelo alako kana mbisha waewoyelo. Djekoleko l’etatelo ka nsanganya yaso, bu ohomba nkamba ‘l’ɛtɛkɛta efula.’ (Mat. 6:7)—w22.07, lk. 24-25.

Lo yoho yakɔna yele “wanɛ wakasalaka akambo wa kɔlɔ” wayolɔ lo “eolwelo ka kilombo”? (Jni. 5:29)

Kilombo kawɔ hatonga ka kɔlɔ l’ɔtɛ wa kɛnɛ kakawasale lo lɔsɛnɔ lawɔ lakete. Vɔ wayolomboshama lo ndjela etsha ndo lɔkɛwɔ lawɔ l’ɔkɔngɔ wa vɔ mbolwama.—w22.09, lk. 18.

Naa dako dia dimɛna efula diakasha ɔnangɛso J. F. Rutherford lo losanganya lɔmɔtshi la woke lakasalema lo Ngɔndɔ ka divwa 1922?

Lo losanganya lɔmɔtshi la woke lakasalema la Cedar Point, Ohio, l’États-Unis, nde akate ate: “Nkumekanga ekɔ lo mbolɛ! Nyu pombaka mbutɛ anto dui sɔ. Laasɔ, nyewoya, nyewoya, nyewoya, awui wa Nkumekanga la Diolelo diande!”—w22.10, lk. 3-5.

Isaya tshapita 30 tɛkɛtaka dia toho takɔna tosato tatokimanyiya Nzambi dia mbikikɛ?

Tshapita nyɛ mɛnyaka dia nde tokimanyiyaka lo 1) tohokamɛ la yambalo tshɛ ndo lo nkadimola alɔmbɛlɔ aso, 2) lo tosha ɛlɔmbwɛlɔ, ndo 3) lo tosha ɛtshɔkɔ kakianɛ ndo lo nshi yayaye.—w22.11, lk. 9.

Lande na kakokaso mbuta di’ɛtɛkɛta wa l’Osambo 37:10, 11, 29 wakakotshama lo nshi yakete ndo wayokotshama lo nshi yayaye?

Ɛtɛkɛta wa Davidɛ mɛnyaka lɔsɛnɔ la dimɛna laki l’Isariyɛlɛ, ɛnyɛlɔ lo ɛlɔmbwɛlɔ kaki Sɔlɔmɔna. Yeso akatɛkɛta dia paradiso ka lo nshi yayaye ndo akashile ɛtɛkɛta wa lo divɛsa 11. (Mat. 5:5; Luka 23:43)—w22.12, lk. 8-10, 14.