Etawɔ nɔmbwama la kanyi yaki Nzambi lo dikambo dia wanu

AHA la taamu, wɛ ngɛnangɛnaka la weshasha wotshikitanyi w’oma le Jehowa mbidja ndo lotshungɔ layɛ la mbɔsa yɛdikɔ ya ngɛnangɛna la weshasha ɛsɔ. Dui dia dimɛna ko, Bible mɛnyaka dia wanu ekɔ woshasha ɔmɔtshi w’oma le Nzambi. Tɔ mbutaka ɔnɛ: “Mbo ya ndɛ salemaka dikambo dia tɔɔla, ndo wanu mbetɛka lɔsɛnɔ ɔngɛnɔngɛnɔ.” (Ond. 10:19; Os. 104:15) Ondo wɛ akɛnyi di’anto amɔtshi wakayongaka l’ekakatanu woye oma lo wanu. Ndo nto, anto wa l’andja w’otondo wekɔ la tokanyi totshikitanyi lo dikambo di’ɔnwɛlɔ wa wanu. Kakɔna kakoka nkimanyiya Akristo dia mbɔsa tɛdikɔ ta lomba lo kɛnɛ kendana l’ɔnwɛlɔ wa wanu?

Oyadi dihole diakɔna diadjasɛso kana mbekelo ka lɛnɛ akatole, etena kɔsaso tɛdikɔ, sho pombaka ndjaɛkɛ l’ekanelo ka yimba ka Nzambi, koko aha kanyi y’anto akina wotodingi. Yoho shɔ ayotokimanyiya dia monga la lɔsɛnɔ l’ɔngɛnɔngɛnɔ.

Oko wamboyodiɛna, anto efula wa l’andja ɔnɛ nɔka wanu mbala la mbala ndo lo yɛdikɔ y’efula. Amɔtshi nɔka wanu nɛ dia vɔ mbaakimanyiyaka dia vɔ ndjaoka dimɛna. Akina nɔka wanu dia vɔ ndɔshana l’ekakatanu. L’ahole amɔtshi, anto fɔnyaka di’onto la nnɔ wanu efula ekɔ onto lambotshunda kana ekɔ la wolo.

Koko, Akristo ndjelaka dako dia lomba di’oma le Otungi awɔ wa ngandji. Ɛnyɛlɔ, nde tɔhɛmɔlaka oma l’etombelo wa kɔlɔ waya l’ɔnwɛlɔ wa wanu wa tshambandeko. Sho mbeyaka mbadia Tokedi 23:​29-35, lɔkɔ mɛnyaka tolembetelo takɛnɛmɔla onto ladjɔ wanu ndo etombelo waya oma lo dui sɔ.a Daniel, ekumanyi kɛmɔtshi ka l’Europe, mbohɔka woho waki lɔsɛnɔ lande la ntondo kande ndjeka akambo wendana la Jehowa ndo nde akakambe la dako diande. Nde mbutaka ate: “Lakanɔka wanu efula ndo dui sɔ diakakonyaka dia mbɔsa tɛdikɔ ta kɔlɔ, l’ɔtɛ wa dui sɔ lakahomana l’awui wa kɔlɔ ndo laakatetemala ndjakiyanya etena kohɔmi awui asɔ.”

Ngande wakoka Akristo nkamba la lotshungɔ lawɔ ndo mbewɔ ekakatanu waya lo nnɔ wanu lo tshambandeko? Dui di’ohomba ele mbetawɔ dia kanyi ya Nzambi nɔmbɔla ekanelo kaso ka yimba ndo etsha aso.

Nyɛsɔ tende kɛnɛ kata Bible lo dikambo dia wanu ndo kɛnɛ katshutshuya anto amɔtshi dia nnɔ wanu.

ATƆNDƆ WA LO BIBLE

Ɔtɛkɛta wa Nzambi hashimbe ɔnwɛlɔ wa wanu wa la wɛdimo. Bible mbetawɔka dia wanu koka mbisha onto ɔngɛnɔngɛnɔ. Sho mbadiaka ɔnɛ: “Tshɔka tole diangɔ diayɛ l’ɔngɛnɔngɛnɔ, ndo tɔnɔ wanu ayɛ l’otema w’ɔngɛnɔngɛnɔ.” (Ond. 9:7) Yeso akanɔ wanu lo diaaso dimɔtshi, ndo ekambi ekina wa kɔlamelo wa Jehowa wakanɔ.—Mat. 26:​27-29; Luka 7:34; 1 Tim. 5:23.

Ɔtɛkɛta wa Nzambi mɛnyaka hwe otshikitanu wele lam’asa nnɔ yema ya wanu ndo mbidjɔ. Vɔ mbutaka hwe ɔnɛ: “Tanyodjɔke wanu.” (Ɛf. 5:18) Ndo vɔ mɛnyaka dia “ambidjɔki wa wanu . . . hawotokita Diolelo dia Nzambi.” (1 Kɔr. 6:10) Eelo, Jehowa hetawɔ ɔnwɛlɔ wa wanu wa tshambandeko ndo wodjwelo. Lo dihole dia mbɔsa tsho tɛdikɔ lo kɛnɛ kendana l’ɔnwɛlɔ wa wanu lo ndjela kɛnɛ kata mbekelo yaso, sho mbɔsaka tɛdikɔ takoka ngɛnyangɛnya Nzambi.

Amɔtshi fɔnyaka dia vɔ koka nnɔ wanu efula aha la mbidjɔ. Koko dui sɔ koka monga waale w’efula. Afundelo mɛnyaka hwe dia “monga omunga wa wanu” koka nkonya onto, pami (kana womoto) dia nsala awui wa kɔlɔ kana salɛ Jehowa pɛkato. (Tito 2:3; Tok. 20:1) Yeso akasha dako diɛnya dia “nɔshi dia tshambandeko” koka nkonya onto ɔmɔtshi diaha nde mbɔtɔ l’andja w’oyoyo waki Nzambi. (Luka 21:​34-36) Kakɔna kakoka nkimanyiya Okristo dia mbewɔ tolonga takonya esadi eto l’ɔnwɛlɔ wa wanu wa tshambandeko?

SƐDINGOLA EYANGO NDO MBEKELO YAYƐ

Etena kɔsaso tɛdikɔ lo kɛnɛ kendana l’ɔnwɛlɔ wa wanu, ekɔ waale naka tekɔ lo ndjela kɛnɛ kasala anto wa lo mbekelo yaso. La lomba tshɛ Akristo salaka kɛnɛ kangɛnyangɛnya Jehowa etena kɔsawɔ tɛdikɔ lo kɛnɛ kendana l’awui wele oko ndɛ ndo nnɔ. Bible toholaka ɔnɛ: “Oyadi nyekɔ lo ndɛ kana nyekɔ lo nnɔ kana nyekɔ lo nsala dikambo dikina tshɛ, nyosale akambo tshɛ dia lotombo la Nzambi.” (1 Kɔr. 10:31) Tɔsɛdingole ambola amɔtshi ndo atɔndɔ wa lo Bible wayela anɛ:

Onde dimi nɔka wanu diaha anto akina sɔkami? Etombelo 23:2 mbutaka ɔnɛ: “Toyelake olui w’anto.” Lanɛ Jehowa akahɛmɔlaka ase Isariyɛlɛ diaha vɔ ndjela anto waki kombɔngɛnyangɛnyaka. Ɔhɛmwɛlɔ ɔsɔ mendanaka ndo l’Akristo ɛlɔ kɛnɛ. Naka sho mbetawɔ nsɛngiyama oma le anto akina lo mbɔsa tɛdikɔ ta nnɔ wanu, kete sho koka ndjanganya la Jehowa ndo atɔndɔ ande.—Rɔmɔ 12:2.

Onde dimi nɔka wanu dia mɛnya anto akina ɔnɛ laya pami? Lo mbekelo mɔtshi, ɔnwɛlɔ wa wanu wa mbala la mbala ndo ɔnwɛlɔ w’efula wa wanu ekɔ dui diambekɔnɛ ndo mbetawɔmaka. (1 Pe. 4:3) Koko lembetɛ dui dia lomba diatanema lo 1 Kɔrɛtɔ 16:13 diata ɔnɛ: “Nyɔsɛnake, nyotshikale nge lo mbetawɔ, nyosale akambo oko apami, ndo nyonge la wolo.” Onde ɔnwɛlɔ wa wanu koka nkonya onto dia nde monga pami ka wolo? Ndooko. Wanu koka nkitshakitsha esadi eto akoka w’amɛna w’ekanelo ka yimba w’onto ndo mbokonya diaha nde mbɔsa tɛdikɔ t’amɛna. Ɔnwɛlɔ wa wanu wa tshambandeko hɛnya dia onto ekɔ la wolo, koko vɔ mɛnyaka dia onto akɔ ekɔ enginya. Isaya 28:7 mɛnyaka dia ɔnɛ langanyiyama oma lo ɔnwɛlɔ wa wanu tshingatshingaka ndo takanaka.

Wolo wa mɛtɛ ndjaka oma le Jehowa ndo vɔ kimanyiyaka di’onto nsungukala ndo ntshikala nge lo mbetawɔ. (Os. 18:32) Okristo wa mɛtɛ koka nsala dui sɔ lo ntetemala monga la yewo ndo lo mbɔsa tɛdikɔ ta ndjaakokɛ oma lo waale wa lo nyuma. Yeso akɛnya wolo ɔsɔ etena kakinde la nkɛtɛ ndo anto efula wakɔlɛmiyaka l’ɔtɛ wakinde la dihonga ndo wakandayashikikɛ dia nsala kɛnɛ kele ɔlɔlɔ ndo la dihonga.

Onde dimi nɔka wanu dia mbewɔ ekiyanu? Ofundji w’osambo akasambiyama dia mfunda ɔnɛ: “Etena kakamamɛnama l’ekiyanu, wɛ [Jehowa] akansambe ndo akambɔladia.” (Os. 94:19) Naka tambɔmɛnama l’ekiyanu, tende le Jehowa dia nde tokimanyiya koko aha lo wanu. Yoho mɔtshi ya dimɛna yakokaso nsala dui sɔ ele nɔmbaka Jehowa mbala la mbala. Ndo nto, anto efula wakɛnyi dia nyanga dako oma le ɔngɛnyi awɔ ɔmɔtshi wambotshunda lo nyuma wa l’etshumanelo ekɔ la wahɔ efula. Ɔnkɔnɛ, nnɔ wanu dia mendjola ekakatanu koka nkonya onto diaha nde ntetemala mbɔsa yɛdikɔ ya nsala kɛnɛ kele ɔlɔlɔ. (Hɔs. 4:11) Daniel, lakatatɛkɛtshi l’etatelo mbetawɔka ɔnɛ: “Lakalɔshanaka l’ekiyanu ndo la nsaki ka ndjaɛndja onongo. Lakanɔka wanu dia ndɔshana la dui sɔ, koko ekakatanu wakanyomoleka efula ndo lakayashishɛ angɛnyi efula ndo dilɛmiɛlɔ diami dimɛ.” Kakɔna kakayokimanyiyaka Daniel l’ekomelo? Nde mbetawɔka ɔnɛ: “Lakayoshihodiaka dia laki l’ohomba wa Jehowa lo lokondo lami, koko aha wanu. L’ekimanyielo ka Jehowa lakalɔshana l’ekakatanu waki la mi ndo l’ekomelo lakayatondoyaka.” Kɛnɛ kele mɛtɛ ele Jehowa ekɔ suke wonya tshɛ dia mbisha ekimanyielo kaanga naka okakatanu wele laso wɛnama dia taya bu l’elongamelo.—Flpɛ. 4:​6, 7; 1 Pe. 5:7.

Naka wɛ nɔka wanu mbala la mbala, lande na keyɛ hasɛdingola ɔnwɛlɔ ayɛ wa wanu lo ndjela ambola anɛ: ‘Onde ose nkumbo kami kana ɔngɛnyi ami wa ma ma ekɔ lo nkiyana lo kɛnɛ kendana la mbekelo kami ka nɔka wanu?’ Naka ngasɔ mbediɔ, kete kɛsɔ mɛnyaka dia wɛ ambotatɛ nkɛnɛmɔla mbekelo kɛmɔtshi kana aya l’okakatanu ɔmɔtshi weyɛ hashihodia. ‘Onde lekɔ lo nnɔ wanu efula oleki woho wakamanɔka ntondo?’ Ngasɔ mbakoka monga ndo le onto ɔmɔtshi lafɔnya dia nde hakoke nkoma omunga wa wanu koko ɔnwɛlɔ wa wanu kokaka ndjookonya omunga wa wanu. ‘Onde laya l’okakatanu wa mbetsha nshi ngana kana nshi efula aha la nnɔ wanu?’ Naka ngasɔ kediɔ, kete ɔnwɛlɔ wa wanu kokaka ndjokokonya lo mbekelo kamboka edio kana wɛ ndjokoma omunga a wanu. Ondo dui sɔ koka mɛnya dia ondo wɛ ekɔ l’ohomba w’onto ɔmɔtshi lele manyi dia kokimanyiya dia wɛ ntondoya okakatanu ɔsɔ.

Dia mbewɔ waale kana ekakatanu waya lo nnɔ wanu, Akristo amɔtshi wakasɔnɛ diaha ndɛta kaanga ndɛta wanu. Akina mbeyaka nsɔna diaha nnɔ wanu l’ɔtɛ wewɔ bu la dɛtɔ dia dimɛna. Naka ɔngɛnyi ayɛ ɔmɔtshi ambɔsa yɛdikɔ ya ngasɔ, kete wɛ koka mbɛnya ɔlɔlɔ ayɛ w’otema lo nɛnya yɛdikɔ yande aha la mbɔnyɔla.

Kana ondo wɛ akɛnyi dia ekɔ dui dia lomba lo ndjadjɛ elelo ɛmɔtshi. Okristo ɔmɔtshi mbeyaka ndjadjɛ elelo lo woho wa lofulo lakɔna la wanu layondɔnɔka. Kana nde mbeyaka ndjadjɛ ɔlɛmbɛ wendana la mbala ngana yayondɔnɔka wanu, mbeyaka monga mbala ɔtɔi lo lomingu kana nɔka yema yakoka etena kalɛnde yangɔ ya ndɛ. Akina ndjadjɛka elelo lo kɛnɛ kendana la weho ekina wa wanu wayowɔnɔ, ɛnyɛlɔ oko wanu wa wolo kana wanu wa lɔsɔhanya. Naka onto ndjadjɛ elelo lo kɛnɛ kendana la ɔnwɛlɔ wa wanu, kete dui sɔ diayonga wɔdu le nde dia nɛmiya yɛdikɔ shɔ. Ndo Okristo wambotshunda lo nyuma bu l’ohomba ndjakiyanya lo kɛnɛ kakoka anto amɔtshi mfɔnya lo dikambo diande l’ɔtɛ w’ɛsɔnwɛlɔ wamondosala kana lo yɛdikɔ yande yaha nnɔ wanu.

Etena kɔsaso tɛdikɔ lo kɛnɛ kendana l’ɔnwɛlɔ wa wanu, sho pombaka nto nkanyiya woho wayaoka anto akina. Rɔmɔ 14:21 mbutaka ɔnɛ: “Ndeka dimɛna aha ndɛ onatshi kana nnɔ wanu kana nsala dikambo dikina tshɛ diakoka ntakanya ɔnanyɔ.” Ngande wakokayɛ nkamba la dako nɛ? Ɛnya ngandji k’onto l’ɔnango. Naka wɛ mbɔsaka dia ɔnwɛlɔ wa wanu mbeyaka ntakanya onto ɔmɔtshi, onde ngandji hakoke kotshutshuya dia nsala kɛnɛ kele ɔlɔlɔ? Wɛ ayɛnya dia wɛ ndjakiyanyaka ndo nɛmiyaka nsaki y’anto akina, lo nyanga wahɔ awɔ koko aha wayɛ hita.—1 Kɔr. 10:24.

Ndo nto, lɛɛta mbeyaka mbidja ɛlɛmbɛ ɛmɔtshi wakoka nɔmbɔla tɛdikɔ t’Okristo. Ɛlɛmbɛ ɛsɔ mbeyaka mɛnya lofulo l’ɛnɔnyi lakoka onto nkoma lo nnɔ wanu kana aha nnɔ wanu ndo lahakɛndjakɛndja kana nkamba la mashinyi ɛmɔtshi.—Rɔmɔ 13:​1-5.

Jehowa akatosha nɛmɔ lo tosha lotshungɔ la sho ngɛnangɛna la weshasha efula wakandatosha. Dui sɔ mendanaka ndo la woshasha wa nkamba la lotshungɔ lele laso etena kasɔnaso kɛnɛ kayotɔlɛ kana kɛnɛ kayotɔnɔ. Ɛsɔnwɛlɔ aso wɛnya dia sho mbɔsaka la nɛmɔ lotshungɔ lɔsɔ lo nkamba la lɔ dia ngɛnyangɛnya Shɛso lele l’olongo.