Awui wakete
Tooke weho w’anto tshɛ kɛtshi
Lushi lɔmɔtshi, kadiyɛso ka la Nouvelle-Zélande akendaka vidɛo mɔtshi ya lo jw.org yakɛnyaka dia Jehowa hoke tsho kɛtshi, koko ndo nto nde kiɛnyaka. (Isa. 63:7-9) Nde akakambe la kɛnɛ kakandeke dia mbisha ekimanyielo ka shikaa. L’ɔkɔngɔ wa lushi lakɔ, lam’akandatasombaka diangɔ lo lobingu, nde akahomana la womoto ɔmɔtshi laki komonga la dihole dia mbidjasɛ ndo laki wola ko nde akalɔmbɛ womoto akɔ dia nde mbosombe yangɔ ya ndɛ. Womoto akɔ aketawɔ. Etena kakaye kadiyɛso la mbo ya ndɛ, nde akawosambisha lo tshena pe, lo nkamba la traktɛ kele l’ɔtɛ a dui ɔnɛ: Onde asui wayokomɛ lushi lɔmɔtshi?
Womoto akɔ akatatɛ ndela. Nde akalembetshiya kadiyɛso dia nde akole oko Ɔmɛnyi wa Jehowa, koko akatshike akambo wa mɛtɛ l’edja k’ɛnɔnyi efula. Atete edja nde akalɔmbaka Jehowa dia mbokimanyiya dia nde mbokalolɛ. Kadiyɛso kakɔ akasha womoto akɔ Bible ndo wakɔshi yɛdikɔ ya vɔ ntatɛ mbeka.a
L’ɛnyɛlɔ ka Jehowa, sho koka mɛnya anto kɛtshi, mbidja ndo ase nkumbo kaso ndo anangɛso l’akadiyɛso wa l’etshumanelo. Ndo sho koka mɛnya kɛtshi lo nyanga waaso wa nsambisha anto akina.
a Dia mbeya woho wa nkimanyiya wanɛ wambɔla lo nyuma, enda sawo diele l’ɔtɛ a dui ɔnɛ: “Nyokalole le mi” sawo dia lo Tshoto y’Etangelo ya Ngɔndɔ ka samalo 2020.