Kgaolo 12

Kgolagano e Ntšha ya Modimo e Atamela Tiragatso ya Yone

1. (a) Ke eng se se ka diragalelang lefatshe la rona fa Modimo a ne a ka se tshegetse kgolagano ya gagwe mabapi le motshegare le bosigo? (b) Ereka jaana Modimo a kgomarela dikgolagano tsa gagwe ka boikanyego, ke eng seo re ka tlhomamisegang ka sone?

RE NE re ka dirang fa Modimo a ne a ile a seka a tshwarelela mo kgolaganong ya gagwe mabapi le letsatsi le bosigo? Mo boemong jwa go fapaana ga letsatsi le bosigo, lefatshe la rona le ne le tla phatsimelwa ruri ke lesedi kana le apesiwe ke lefifi le le sa kgaotseng. (Genesise 1:1, 2, 14-19) Mme Modimo ka boikanyegi o kgomarela mo dikgolaganong tsa gagwe. Jalo re ka tlhomamisega gotlhelele gore kgwedi, letsatsi, le masomosomo a dinaledi tsa legodimo ga di kitla di senngwa; lefa e le yone polanete ya rona Lefatshe.

2. Ke eng se Jehofa a neng a se bolelela Bajuda malebana le kgolagano ya gagwe ya motshegare le ya bosigo?

² Fa a ne a bua ka kgolagano ya gagwe ya motshegare le bosigo, Modimo o ne a raya Bajuda ba ba neng ba busiwa ke bogosi jwa ntlo ya segosi ya ga Dafide a re: “Ha lo ka senya kgōlaganō ea me ea motshegare, le kgōlaganō ea me ea bosigo, gore go se ka ga nna motshegare le bosigo mo metlheñ ea cōna; Hoñ le eōna kgōlaganō ea me le Dafide motlhanka oa me, e ka senyèga, a ba a tla a tlhōka ñwana oa mosimane eo o tla busañ mo setuloñ sa gagwè sa bogosi.”—Yeremia 33:20, 21.

3. Ke eng seo se supiwang ke mafoko ano mabapi le kgolagano ya gagwe le Dafide ya Bogosi jo bo sa khutleng?

³ Ka mafoko ao re na le bosupi jo bo sa tlhamalalang jwa gore lefatshe la rona, gammogo le letsatsi le kgwedi, di tla nnela ruri. (Moreri 1:4) Batho ba tla nnela ruri mo lefatsheng la rona, gore ba itumelele bontle jwa motshegare le jwa bosigo kafa tlase ga Modimo yo o bolokang kgolagano, Mmopi wa motho. Mme fela jaaka Jehofa a ile a tshwarelela ka go tiya mo kgolaganong ya gagwe ya motshegare le bosigo, o ile a ikanyega fela jalo mo kgolaganong ya gagwe le Kgosi Dafide wa bogologolo gore moralo wa losika lwa ga Dafide o nnele ruri mo Bogosing. Seno se ntse jalo lemororo bonno jwa Bogosi bo ne jwa tshwanelwa ke go fudutshiwa mo lefatsheng go ya magodimong a a sa bonaleng.—Pesalema 110:1-3.

4. (a) Kgolagano ya Modimo le Dafide ya Bogosi jo bo sa khutleng e nyalanngwa le kgolagano efe e nngwe? (b) Ke eng se Jesu Keresete a neng a se bua mabapi le yone, mme e le tlase ga maemo afe?

⁴ Kgolagano ya Modimo ya Bogosi jo bo sa khutleng mo moralong wa dikokomana tsa ga Dafide e nyalanngwa le kgolagano e nngwe, “kgōlaganō e ncha.” Kgolagano eno e e neng e tshwanetse go tseela e kgologolo sebaka e ne ya umakiwa ke Jesu. Seno e ne e le morago ga a sena go keteka Tlolagano ya Sejuda le barutwa ba gagwe ba ba ikanyegang mo bosigong jwa Nisane 14 ka 33 C.E. O ne a tlhoma seo se neng sa bidiwa “selalèlō sa Morèna.” O ne a itse gore, mo go lone letsatsi leo la Tlolagano, o ne a tla tsholola madi a gagwe mo setlhabelong. Jalo he, o ne a tsaya senwelo sa beine e khibidu, mme pele ga fa a ka e fetisetsa mo baaposetoloing ba gagwe ba ba ikanyegang, o ne a re: “Senwèlō se, ke kgōlaganō e ncha mo madiñ a me.”—Luke 22:20; 1 Bakorintha 11:20, 23-26.

5. Tsholofetso ya Modimo kaga kgolagano e ntšha e ne ya dirwa go bomang, mme a Repaboliki ya Iseraele e iphaka gore e mo kgolaganong e?

⁵ Jaaka kgolagano e kgologolo, kgolagano e ntšha e dirilwe le morafe mme eseng le ope wa merafe ya La-Bodumedi. Lemororo tsholofetso ya kgolagano e ntšha e ne ya dirwa ka moperofeti Jeremia go morafe wa Iseraele mo e ka nnang dingwaga tse 2 500 tse di fetileng, Repaboliki ya Iseraele gompieno ga e iphake gore e mo kgolaganong e ntšha. Go na le moo, Repaboliki ya Iseraele e ile ya nna leloko la UN.

6. Go ya ka Yeremia kgaolo 31, ke ka ntlhayang fa Modimo a ile a bona go tlhokafala go dira kgolagano e ntšha, mme e ne e tla felela ka eng?

⁶ Ke ka ntlhayang fa Modimo a ile a batla kgolagano e ntšha? Yeremia 31:31-34, ea tlhalosa: “Bōnañ, metlha ee tla, go bua Yehofa, e ke tla dihañ kgōlaganō e ncha ka eōna le ba ntlo ea Iseraela, le ba ntlo ea Yuda: E señ kaha kgōlaganoñ e nkileñ ka e diha le borrabō yale mo motlheñ o ke ba chwereñ ka lecōgō ka ōna, ka ba ntsha mo lehatshiñ ya Egepeto; me kgōlaganō euō ea me ba ne ba e senya, leha ke ne ke le monna oa bōnè, go bua Yehofa. Me kgōlaganō e ke tla e dihañ le ba ntlo ea Iseraela moragō ga metlha euō ke e, go bua Yehofa; ke tla tsenya molaō oa me mo teñ ga bōnè, ke o kwala mo peduñ tsa bōnè; ke tla nna Modimo oa bōnè, le bōnè ba tla nna batho ba me: Me ga ba ketla ba tlhōla ba ruta moñwe le moñwe oa ga gabō, le moñwe le moñwe ñwana a rragwè, ba re, Itse Yehofa: gonne ba tla nkitse botlhe hèla, go simolola ka eo mmōtlana go ea go eo mogolo mo go bōne, go bua Yehofa: gonne ke tla ba ichwarèla boikèpō yoa bōnè, le boleo yoa bōnè ga nketla ke tlhōla ke bo gakologèlwa gopè.”

Kgolagano e e Molemo Bogolo ka Motseriganyi yo o Molemo Bogolo

7. A kgolagano e ntšha ke tsosoloso ya kgolagano e Baiseraela ba neng ba e senya, mme ke ka ntlhayang fa e le molemo bogolo go na le kgolagano ya Molao?

⁷ Kgolagano e ntšha ga se go tsosolosa fela kgolagano ya pelenyana eo Baiseraela ba neng ba e senya. Nnyaa, le eseng! Ka gonne moaposetoloi Paulo o kwalela Bakeresete mo Roma, a re: “Ka go bo ga lo mo thateñ ea molaō, lo mo thateñ ea tshegōhaco.” (Baroma 6:14) Tota ruri ke kgolagano e ntšha, mme e ne e tshwanetse go lebelelwa jaaka e e tla nnang molemo bogolo, ka go bo Modimo Mothatayotlhe Jehofa o kgona go tokafatsa dikgang mabapi le bao a ba amogelang mo kgolaganong e ntšha. Bonnete ke gore, o ne a tsosa motseriganyi yo o molemo bogolo, kana moletlanyi, mo go tlhomeng kgolagano e ntšha. Motseriganyi yono e ne e se motho fela yo o sa itekanelang, yo o nang le boleo jaaka moperofeti Moshe.

8. (a) Ke eng se kgolagano e ntšha e nang le sone seo se e dirang e e molemo bogolo go na le kgolagano ya Molao? (b) Ke mang yo e leng Motseriganyi wa kgolagano e ntšha e e molemo bogolo? (c) Ke eng se Bahebera 8:6, 13 e se buang kaga kgolagano e ntšha le bokwagodimo jwa Motseriganyi wa yone, mme e le ka phelelo efe mo kgolaganong ya pele?

⁸ Kgolagano ya Molao e e neng e tsereganngwa ke moperofeti Moshe e ne e le molemo ka boyone. Lefa go ntse jalo, kgolagano eo e ne e baakanyetsa ka ditlhabelo tsa diphologolo tseo madi a tsone a neng a ka seka a tlosa maleo a batho. Jalo gore Jehofa Modimo a tlhome kgolagano e e molemo bogolo, go ne go tshwanetse ga nna le motseriganyi yo o molemo bogolo yo o nang le setlhabelo se se molemo bogolo. Motseriganyi yono yo o tlhokafalang thata o ne a itshupa e le Jesu Keresete. Fa e ne e supa bokwa-godimo jwa Motseriganyi yono fa a bapisiwa le moperofeti Moshe, Bibela e re neela tlhaloso e e latelang: “Me yanoñ, èna [Jesu] o bonye tihèlō e e gaisañ, yaka a bile a le motsereganyi oa kgōlaganō e e molemō bogolo, e e theilweñ mo dipoleloñ tsa choloheco tse di molemō bogolo. . . . Ereka o bua, o re, kgōlaganō e ncha, ke go re, ea pele o e dihile kgologolo.”—Bahebera 8:6, 13.

Kgolagano e “Kgologolo” e Tseetswe Sebaka

9. (a) Kgolagano e kgologolo e ne ya nyelela mo letsatsing lefe? (b) Ke eng se se neng sa diragala mo mosong oo, mme e le go rurifatsa eng?

⁹ Kgolagano e “kgologolo” eo, kana e e feletsweng ke nako, e ne ya nyelela malatsi a le 50 morago ga go tsosiwa ga Motseriganyi wa kgolagano e ntšha. Seno se ne sa diragala ka letsatsi la Pentekosete. Mo mosong wa letsatsi leo, setshwani sa Modiho wa Sejuda wa Go Rora se ne sa simolola go diragala. Jang? Mme kana, barutwa ba ba ikanyegang ba le 120 ba Motseriganyi wa kgolagano e ntšha ba ne ba kokoana mo ntlwaneng e e kwa godimo mo Jerusalema mme ba amogela moya o o boitshepo o o neng o solofeditswe, e le tiragatsong ya polelelopele e e go Yoele 2:28-32. E ne e rurifatsa tshimologo ya kgolagano e ntšha ka go neela bosupi jo bo utlwiwang le jo bo bonalang mo babogeding.

10. Mo letsatsing leo la Pentekosete, go ne ga bontshiwa jang gore barutwa ba ga Jesu ba ne ba tloditswe ka moya o o boitshepo?

¹⁰ E ne ya re fa Jesu a tlhatloga mo metsing a a neng a kolobediwa mo go one, le moya o o boitshepo o goromelediwa mo go ene, moya o ne wa tshwantshiwa ka kgakgamatso ke setshwano sa lephoi le le fofa-fofang mo godimo ga tlhogo ya gagwe. Mme mo kgannyeng ya barutwa ba Bahebera ba ba 120 mo letsatsing la Pentekosete, go tlodiwa ga bone ka moya o o boitshepo go ne ga bonadiwa jang? Ka go bonala ga diteme jaaka ekete ke tsa molelo mo ditlhogong tsa bone le ka go fiwa kgono ya go bolela Lefoko la Modimo ka dipuo tsa seeng tseo ba neng ba ise ba ke ba di ithute.—Mathaio 3:16; Ditihō 2:1-36.

11. (a) Ke eng se se tshwanetseng go phepafalela Bajuda, mme ka ntlhayang? (b) Re itse jang gore Bajuda ga ba raane ba re, “Itse Yehofa,” mme ke boitumelo bofe jo ba senang najo?

¹¹ Go tshwanetse ga phepafala sentle mo Bajudeng le go borabi ba bone gore kgolagano ya Molao wa ga Moshe ga e sa tlhole e dira. Fa e sale Jerusalema a senngwa ke mephato ya Baroma ka 70 C.E., ga ba ise ba ke ba nne le tempele. Ka nako eo, direkoto tsa bone tsa masika a lotsalo di ne tsa latlhega kana tsa senngwa. Jalo gompieno ga ba itse gore ke mang yo eleng wa lotso lwa Lefi le gore ke mang yoo eleng setlogolwana sa ga Arone e le gore a tle a direle mo boemong jwa go nna moperesiti yo mogolo wa morafe wa Bajuda. Go na le go raana ba re, “Itse Yehofa” ba tsaya gore go bitsa leina la bomodimo ke selo se se masisi. Jalo ga ba tlhakanele mo boitumelong jwa Basupi ba ga Jehofa mo bonneteng jwa gore kgolagano e “kgologolo” e ile ya tseelwa sebaka ke kgolagano e ntšha.

“Kgōlaganō e e sa Khutleñ”

12. (a) Ke thapelo efe eo Basupi ba ga Jehofa ba ka kopanelang mo go yone go tswa dipelong tsa bone? (b) Jesu o ne a tsosiwa mo baswing ka eng?

¹² Phapaanong e e feletseng le boemo jwa Bajuda gompieno, Basupi ba ga Jehofa ba na le Moperesiti yo Mogolo, yo o tlhagafetseng, yo o direlang kafa letsogong le legolo la Modimo kwa legodimong. Ke Motseriganyi wa kgolagano e ntšha, motseriganyi yo o botoka thata mo go Moshe. Go tswa mo dipelong, basupi bano ba ga Jehofa ba ka kopanela mo thapelong ya mokwadi wa Bahebera 13:20, 21: “Me yana, Modimo oa kagishō o o bileñ o bositse Modisa eo Mogolo oa dinku mo bashwiñ, ka madi a kgōlaganō e e sa khutleñ, eboñ Morèna oa rona Yesu, A o lo dihè go nna boitekanèlō mo go señwè le señwe se se molemō, go diha go rata ga ōna.” Ereka “modisa eo mogolo” yoo a ne a ntshetsa “dinku” botshelo jwa gagwe jwa motho, o ne a ka tsosiwa mo baswing ka mmele wa bosasweng, wa moya o o senang madi mme ka molemo wa madi a kgolagano e ntšha eo e bolokiwang ka boikanyego le eo eleng ya bosakhutleng mo diphelelong tsa yone tse di molemo.

13. (a) Loso lwa Motseriganyi wa kgolagano e ntšha lo gopolwa jang ngwaga le ngwaga ke Basupi ba ga Jehofa? (b) Ke eng seo ditshwantshetso di se emelang?

¹³ Loso lwa setlhabelo lwa Motseriganyi wa kgolagano e ntšha, Jesu Keresete, lo gopolwa mo ngwageng nngwe le nngwe ke Basupi ba ga Jehofa mo segopotsong sa “selalèlō sa Morèna.” Senkgwe se se sa bidisiwang se se jewang ke ba ba leng mo kgolaganong e ntšha mo ‘selalelong’ seo se tshwantshetsa nama e e itekanetseng ya Motseriganyi, mme beine yone e tshwantshetsa madi a a itshekileng, a a sa kgotlelwang ke sepe ao, go ya kafa Dikwalong, a tshotseng molemo wa jone botshelo jwa Motseriganyi.—1 Bakorintha 11:20-26; Lefitiko 17:11.

14. Fa ba ba leng mo kgolaganong e ntšha ba ja ditshwantshetso tsa Segopotso, ba a bo ba dirang ka tsela ya tshwantshetso?

¹⁴ Fa bao ba leng mo kgolaganong e ntšha ba nwa beine mo senwelong sa Segopotso mo ‘selalelong sa Morena,’ ke ka tsela fela ya tshwantshetso ba nwang madi, a Motseriganyi wa kgolagano e ntšha. Ebile ke ka tsela ya tshwantshetso ba jang nama ya gagwe fa ba ja senkgwe se se sa bedisiwang sa Segopotso. Ka go dira seno, ka tsela ya tshwantshetso, ba bontsha tumelo ya bone mo setlhabelong sa thekololo sa Morwa Modimo, Mogolodi wa setho sotlhe.

15. (a) Kgolagano e ntšha e setse e ile ya nna gone ka lobaka lo lo kae, mme ke jang ruri e ileng ya itshupa e le kgolagano e e molemo bogolo? (b) Ke ka ntlhayang fa kgolagano e ntšha e ka kaiwa jaaka “kgōlaganō e e sa khutleñ”?

¹⁵ Kgolagano e ntšha, e jaanong e nang le dingwaga tse 1 950, e atamela go diragatsa boikaelelo jwa yone. E setse jaanong e ile ya nna gone ka makgolokgolo a dingwaga tse di fetang kgolagano ya Molao wa ga Moshe ka bontsi. Ereka e theilwe mo ditsholofetsong tse di molemo bogolo le setlhabelong se se molemo bogolo ka Motseriganyi yo o molemo bogolo, e ile ya supiwa fa tota e le kgolagano e e molemo bogolo. Ka go bo e sa tlhoke gore e emisediwe kana e tseelwe sebaka ke kgolagano e ntšha le e e molemo bogolo, kgolagano e ntšha e e atlegileng e lebisiwa jaaka “kgōlaganō e e sa khutleñ.”—Bahebera 13:20.

16. Ke eng seo re tshwanetseng go se lebogela Jehofa Modimo?

¹⁶ Malebogo a ya go Modimo Mothatayotlhe, Jehofa, ka go bo a tsositse Motseriganyi yo o molemo bogolo go na le Moshe, yoo ka ene A ka tlosang kgolagano ya Molao wa ga Moshe kafa molaong ka go e kokothela mo thupeng ya tlhokofatso le go baakanyetsa ka madi a kgolagano e ntšha e e sa khutleng!

[Setshwantsho mo go tsebe 105]

Kgolagano e ntšha e motseriganyi wa yone e leng Jesu e feta kgakala-kgakala kgolagano e kgologolo e Moshe e neng e le motseriganyi wa yone