Abo ba ba Bonolo ba Itumela Jang Ne!

“Go segō ba ba [bonolo, “NW”]: gonne ba tla rua lehatshe.”—MATHAIO 5:5.

1. Bonolo joo Jesu a neng a bua ka bone mo Thutong ya gagwe ya kwa Thabeng ke bofe?

JESU KERESETE o ne a bolela jaana mo Thutong ya gagwe ya kwa Thabeng: “Go segō ba ba [bonolo, NW]: gonne ba tla rua lehatshe.” (Mathaio 5:5) Go ritibala maikutlo gono, kana go nna bonolo, ga se seipipo sa go nna bonolo e le boitimokanyi fela, kana gone gore ke selo se motho a nnang le sone fela ka tlholego. Go na le moo, ke bonolo jo bo mo mothong le go nna le kagiso tseo di dirwang segolobogolo ke go bo motho a batla go dira go rata ga Jehofa Modimo ebile a batla go kaelwa ke ene. Batho bao ruri ba leng bonolo ba nna ba ikaega ka Modimo ka metlha mme seo se bontshiwa ke go itshwara ga bone ka bonolo mo bathong ba bangwe.—Baroma 12:17-19; Tito 3:1, 2.

2. Ke ka ntlha yang fa Jesu a ne a bolela gore batho ba ba bonolo ba a itumela?

² Jesu o ne a bolela gore ba ba bonolo ba a itumela gonne ba tla rua lefatshe. Jaaka Morwa yo o bonolo ka tsela e e feletseng wa Modimo, Jesu ke ene Morui yo Mogolo wa lefatshe. (Pesalema 2:8; Mathaio 11:29; Bahebera 1:1, 2; 2:5-9) Mme jaaka “morwa motho” wa Mesia, o ne a tlile go nna le babusi ka ene mo Bogosing jwa gagwe jwa selegodimo. (Daniele 7:13, 14, 22, 27) Jaaka “baruaboshwa mmōgō” le Keresete, batho bano ba ba bonolo ba ba tloditsweng ba tla rua lefatshe le ene. (Baroma 8:17) Batho ba bangwe ba ba bonolo ba sekadinku ba tla itumelela botshelo jo bo sa khutleng mo Paradaiseng mo lefelong la selefatshe le le tla bong le busiwa ke Bogosi joo. (Mathaio 25:33, 34, 46; Luke 23:43) Selo se ba lebeletseng go se bona seo se ba itumedisa eleruri.

3. Modimo le Keresete ba ne ba tlhoma sekao sefe sa go nna bonolo?

³ Morui yo Mogolo yo o bonolo o newa lefatshe ke Rraagwe ebong Jehofa, yoo e leng sekao se segolo thata sa go nna bonolo. Abo Dikwalo di bolela kgapetsa jang ne gore Modimo ‘o bonya go galefa, ebile o letlotlo la boutlwelobotlhoko’! (Ekesodo 34:6; Nehemia 9:17; Pesalema 86:15) O na le maatla a magolo mme o supa bonolo jwa gagwe ka tsela e e leng gore baobamedi ba gagwe ba kgona go mo atamela ba sa mmoife. (Bahebera 4:16; 10:19-22) Morwa Modimo, yoo a neng a le “bonōlō le boiñōtlō mo peduñ,” o ne a ruta barutwa ba gagwe gore ba nne bonolo. (Mathaio 11:29; Luke 6:27-29) Batlhanka bano ba ba bonolo ba Modimo le ba Morwawe le bone gape ba ne ba mo etsa ba bo ba kwala kaga “bopelonolōlō, le ka bopelonomi yoa ga Keresete.”—2 Bakorintha 10:1; Baroma 1:1; Yakobe 1:1, 2; 2 Petere 1:1.

4. (a) Go ya ka Bakolosa 3:12, ke eng seo se ileng sa dirwa ka batho bao ka boammaaruri ba leng bonolo? (b) Ke dipotso dife tse re tshwanetseng go di sekaseka?

⁴ Gompieno, Bakeresete ba batlodiwa mmogo le ditsala tsa bone tsa mo lefatsheng ba tlhoka go nna bonolo. Ereka ba tlogetse boikepo, tsietso, boitimokanyi, lefufa, le dikgogakgogano, ba ile ba thusiwa ke moya wa Modimo o o boitshepo gore ba nne basha mo ‘moyeng wa dipelo tsa bone.’ (Baefesia 4:22-24; 1 Petere 2:1, 2) Ba kgothalediwa go apara “pelotlhomogi, le pelonomi, le boikokobeco, le bonōlō, le bopelotelele.” (Bakolosa 3:12) Mme totatota bonolo bo akaretsa eng? Ke ka ntlha yang fa go le mosola go nna bonolo? Mme nonofo eno e ka oketsa boitumelo jwa rona jang?

Go Sekaseka Bonolo

5. Re ka tlhalosa bonolo jang?

⁵ Motho yo o bonolo o na le boikutlo jo bo ritibetseng ebile o itshwara sentle. Mo dithanolong dingwe tsa Bibela, letlhaodi pra·ysʹ le ranolwa jaaka “boikokobetso,” “bonolo,” “go nna le maikutlo a a ritibetseng,” le “go neneketsa.” Mo Segerikeng sa bogologolo, letlhaodi pra·ysʹ le ka dirisediwa moya o o fokang ka iketlo kana lentswe le le kwa tlase. Gape le ka kaya motho mongwe yo o bonolo. Mokanoki W. E. Vine o bolela jaana: “[Leina pra·yʹtes] thatathata le ka makgetlo a mantsi le dirisediwa Modimo. Re dumela gore O dirisana le rona sentle ka ntlha ya boikutlo jwa moya oo, mme ka gone ga re lwe kana gone go gana; le amana thata le lefoko tapeinophrosunē [boikokobetso].”

6. Ke ka ntlha yang fa go ka bolelwa gore bonolo ga se bokoa?

⁶ Go nna bonolo ga go reye gore o na le bokoa bongwe. “Praus e bonolo,” go ne ga kwala jalo mokanoki William Barclay, “mme mo bonolong joo go na le nonofo e e jaaka tshipi.” Motho o tlhoka go bo a nonofile gore a nne bonolo. Ka sekai, go tlhokega bonolo gore motho a sale a ntse a le bonolo fa a gwetlhiwa kana fa a bogisiwa. Morwa yo o bonolo wa Modimo, Jesu Keresete, o ne a tlhoma sekao se se molemo mo go seno. “Eo e rileñ a kgōywa, a se ka a ba a kgōba; eo e rileñ a boga botlhoko, a se ka a bōpa; me a ineèla hèla mo go [Jehofa Modimo] eo o atlholañ ka tshiamō.” (1 Petere 2:23) Jaaka Jesu yo o bonolo, re ka tlhomamisega gore Modimo o tla dira sengwe ka bakgadi le ba ba re bogisang. (1 Bakorintha 4:12, 13) Re ka nna fela re ritibetse, jaaka Setefane a ne a ntse fa a ne a bogisiwa, re lemoga gore fa re ikanyega, Jehofa o tla re tshegetsa mme ga a kitla a letla gore re diragalelwe ke sengwe se se tla re gobaletsang ruri.—Pesalema 145:14; Ditihō 6:15; Bafilipi 4:6, 7, 13.

7. Ke eng seo Diane 25:28 e se bontshang ka motho yo o seng bonolo?

⁷ Jesu o ne a le bonolo, lefa go le jalo o ne a itshupa a nonofile tota mo go emeleng se se siameng. (Mathaio 21:5; 23:13-39) Mongwe le mongwe yo o nang le “mogopolō oa Morèna” o tla tshwana le ene mo go seno. (1 Bakorintha 2:16) Fa motho a se bonolo, ga a tshwane le Keresete. Go na le moo, o tshwanela go tlhalosiwa ka mafoko ano: “Motho eo mōea oa gagwè o senañ bothibō, o chwana le motse o o thubegileñ, me o sena lorakō.” (Diane 25:28) Motho yo o ntseng jalo yo o seng bonolo a ka nna a nna le dikgopolo tse di phoso tseo di ka mo dirang gore a itshware ka ditsela tse di sa siamang. Ereka Mokeresete yo o bonolo a se bokoa, lefa go le jalo o itse gore “phetolō e e bonōlō e thibosa bogale: me lehoko ye le tlhokohatsañ le tle le tlhotlheletse bogale.”—Diane 15:1.

8. Ke ka ntlha yang fa go se motlhofo go nna bonolo?

⁸ Ga go motlhofo go nna bonolo, gonne re ruile bosaitekanelang le boleo. (Baroma 5:12) Fa e le gore re batlhanka ba ga Jehofa, re tshwanetse gape ra lwa le maatla a meya e e boikepo eo e ka nnang ya leka bonolo jwa rona ka go lere pogiso. (Baefesia 6:12) Mme bontsi jwa rona bo dira le batho ba ba bogale ba lefatshe le le laolwang ke Diabolo leno. (1 Yohane 5:19) Ka jalo re ka dira jang gore re nne bonolo?

Kafa Re ka Dirang ka Gone Gore Re Nne Bonolo

9. Ke kgopolo efe e e ka re thusang go nna bonolo?

⁹ Dipolelo tse di tlhatswang pelo tse di theilweng mo Bibeleng tsa gore re tshwanetse go nna bonolo di tshwanetse tsa re thusa gore re nne le nonofo eno. Re tshwanetse ra tlhagolela go nna bonolo letsatsi le letsatsi. Go sa nneng jalo, re tla tshwana le batho ba ba akanyang gore go nna bonolo ke bokoa le go akanya gore motho o tshwanetse gore a ikgogomose, a nne thata le eleng go nna setlhogo gore a kgone go atlega. Lefa go ntse jalo, Lefoko la Modimo le kgala boikgogomoso, ebile seane sengwe se bolela jaana ka botlhale: “Motho eo o boutlwèlō botlhoko o itihèla mōea oa gagwè molemō: me eo o selalome o ichwenya nama ea gagwè.” (Diane 11:17; 16:18) Batho ga ba batle go nna gaufi le motho yo o bogale, yo o seng pelonomi, le eleng lefa ba dira jalo segolobogolo fela ka gore ba sa batle go utlwa botlhoko ka ntlha ya bosetlhogo jwa gagwe kana go bo a se bonolo.

10. Re tshwanetse ra ineela mo go eng gore re nne bonolo?

¹⁰ Re tshwanetse ra letla gore moya wa Modimo o o boitshepo, kana maatla a gagwe a a dirang a re tlhotlheletse, fa re batla go nna bonolo. Fela jaaka Jehofa a ne a dira gore lefatshe le kgone go ntsha dijalo, ka jalo o dira gore batlhanka ba gagwe ba kgone go ungwa maungo a moya wa gagwe, go akaretsa le bonolo. Paulo o ne a kwala jaana: “Me louñō loa Mōea ke loratō, le boitumèlō, le kagishō, le bopelotelele, le bopelonomi, le molemō, le boikañō, Le boiñōtlō, le boikgapō: dilō tse, ga di añwe ke molaō opè.” (Bagalatia 5:22, 23) Ee, bonolo ke lengwe la maungo a moya wa Modimo le le bontshiwang ke batho ba ba mo itumedisang. (Pesalema 51:9, 10) Mme abo bonolo bo kgona go fetola jang ne! Go tshwantsha seno: Go ne go na le modipa mongwe a bidiwa Tony yo a neng a lwa, a thukhutha batho, yo a neng a tsenya diokobatsi le go di romela kwa ntle a tlola molao, e le moeteledipele wa setlhopha sengwe se se tsamayang ka dithuthu, ebile a kile a nna lobaka mo kgolegelong. Lefa go ntse jalo, o ne a fetoga motlhanka yo o bonolo wa ga Jehofa ka go nna le kitso ya Bibela le ka go thusiwa ke moya wa Modimo. Kgang ya ga Tony e tlwaelegile. Ke eng he, se motho a ka se dirang fa bonolo e le selo se segolo se a se tlhokang mo bothong jwa gagwe?

11. Thapelo e thusa jang mo go tlhagoleleng bonolo?

¹¹ Go rapelela moya wa Modimo go tswa mo pelong le loungo lwa one eleng bonolo go tla re thusa go tlhagolela nonofo eno. Re ka nna ra tshwanelwa ke ‘go nna re lopa,’ fela jaaka Jesu a ne a bolela, mme Jehofa Modimo o tla re naya se re se kopang. Fa a sena go tlhalosa gore borre ba batho ba naya bana ba bone dilo tse di molemo, Jesu o ne a bolela jaana: “Ha lona, lo le boshula, lo itse go naea bana ba lona dinèō tse di molemō; bogolo yañ Rra eno oa legodimo o tla naea ba ba mo lōpañ Mōea o o Boitshèpō.” (Luke 11:9-13) Thapelo e ka re thusa gore re dire gore bonolo e nne karolo ya botho jwa rona go ya go ile—nonofo e e dirang gore re itumele mmogo le bao re kopanang le bone.

12. Ke ka ntlha yang fa go nna o gakologetswe gore batho ga ba a itekanela go ka re thusa gore re nne bonolo?

¹² Go nna re gakologetswe gore batho ga ba a itekanela go ka re thusa gore re nne bonolo. (Pesalema 51:5) Ga re kake ra akanya kana ra dira dilo sentle ka botlalo, go feta batho ba bangwe, ka jalo re tshwanetse go nna pelotlhomogi mme re dirisane le bone jaaka re ne re ka rata go dirwa ka rona. (Mathaio 7:12) Go nna re gakologetswe gore rotlhe re dira diphoso go tshwanetse ga re dira gore re itshwarele le go nna bonolo fa re dirisana le ba bangwe. (Mathaio 6:12-15; 18:21, 22) Mo godimo ga moo, a ga re batle go leboga Modimo go bo o re bontshitse lorato le bonolo?—Pesalema 103:10-14.

13. Re ka thusiwa jang gore re tlhagolele bonolo fa re dumela gore Modimo o dirile batho ba kgona go itlhophela se ba se ratang?

¹³ Go dumela gore Modimo o dirile batho gore ba kgone go itlhophela sengwe le sengwe go ka re thusa gore re tlhagolele go nna bonolo. Seno ga se letle ope gore a itlhokomolose melao ya ga Jehofa a e nyatsa, mme go letla gore batho ba gagwe ba itlhophele go dira dilo tse di farologaneng, ba rate tse di rileng, kana ba se ka ba rata tse di rileng. Ka jalo a re dumeleng gore ga go na motho ope yo a patelediwang gore a nne le botho bongwe joo rona re akanyang gore ke jone jo bo siameng thata. Go nna le moya o o ntseng jalo go tla re thusa gore re nne bonolo.

14. Re tshwanetse go iketleetsa go dira eng fa re batla go nna bonolo?

¹⁴ Go iketleetsa go nna bonolo ka metlha go tla re thusa gore re nne re ntse re tlhagolela nonofo eno. Go ineela gore moya wa ga Jehofa o re tlhotlheletse go ile ga fetola tsela e re akanyang ka yone. (Baroma 12:2) Moya o o bonolo o o tshwanang le wa ga Keresete jaanong o re thusa gore re ithibe gore re se ka ra dira ditiro tsa “go tsamaea mo bopepeñ, le mo dithatoñ, le mo go nweñ boyalwa, le mo ditlhapeloñ, le mo ditagoñ, le mo ditiheloñ tse di makgapha tsa medimo ea disètwa.” Ga re a tshwanela go tlogela go nna bonolo ka ntlha ya madi, ditsala, kana ka mabaka a mangwe fela kana gonne batho ba re kgala go bo re le batho ba bomodimo. (1 Petere 4:3-5) Ga re a tshwanela go letla sepe gore se re tlhotlheletse gore re dire “ditihō tsa nama,” re bo re sa tlhole re nna batho ba ba bonolo mme re bo re palelwa ke go rua Bogosi jwa Modimo kana gone go itumelela masego a jone. (Bagalatia 5:19-21) A ka metlha re itumelele tshiamelo ya go nna batho ba ba bonolo ba Modimo, re le batlodiwa ba ba tla bonang botshelo jwa selegodimo kana re solofetse go tshela mo lefatsheng. Gore re kgone go bona seo a re sekasekeng melemo mengwe e e bonwang ka go nna bonolo.

Melemo E E Bonwang ka go Nna Bonolo

15. Go ya ka Diane 14:30, ke ka ntlha yang fa go le botlhale go nna bonolo?

¹⁵ Motho yo o bonolo o nna a ritibetse pelo, tlhaloganyo le mmele. Seno se ntse jalo gonne ga a tsene mo dikgogakgoganong, a galefisiwa ke dilo tse ba bangwe ba di dirang, kana a ipogisa ka matshwenyego a a sa feleng. Bonolo bo dira gore a nne a gapile maikutlo a gagwe, mme seno se solegela tlhaloganyo ya gagwe le mmele wa gagwe molemo. Seane sengwe se bolela jaana: “Pelo e e thethebetseñ hèla ke botshelō yoa nama.” (Diane 14:30) Go palelwa go nna bonolo go ka dira gore motho a galefe mme seo se ka dira gore kgatelelo ya madi a gagwe e ye kwa godimo kana ga dira gore thulaganyo ya gagwe ya tshilo ya dijo e se ka ya dira sentle, a tshwarwe ke asema, malwetsi a matlho, le mathata a mangwe. Mokeresete yo o ritibetseng maikutlo o ipelela melemo e mentsi go akaretsa le “kagishō ea Modimo” eo e disang pelo ya gagwe le kakanyo ya gagwe. (Bafilipi 4:6, 7) Abo go le botlhale jang ne go nna bonolo!

16-18. Bonolo bo mosola jang mo kamanong ya rona le ba bangwe?

¹⁶ Nonofo ya go nna bonolo e tokafatsa kamano ya rona le ba bangwe. Gongwe re kile ra bo re na le mokgwa wa go gatelela dilo go fitlha re bona se re se batlang. Batho ba ka tswa ba ne ba re galefela gonne re ne re sa ikokobetse ebile re se bonolo. Mo maemong a a ntseng jalo, re ne re sa tshwanela go gakgamala fa re ne re tlhola re le mo dikgannyeng. Lefa go ntse jalo, seane sengwe sa re: “Molelō o tima ka go tlhōka dikgoñ: me kwa go senañ mosebi, gōna komañ e khutle. Yaka a e leñ magala hèla a nntse mo magaleñ a a molelō, le yaka dikgoñ di nntse mo molelōñ; motho eo o ōmanañ o ntse yalo mo go tukiseñ kgañ.” (Diane 26:20, 21) Fa re le bonolo, go na le gore re ‘tukise molelo’ le go gwetlha ba bangwe, re tla nna le kamano e e molemo le bone.

¹⁷ Motho yo o bonolo gantsi o tla nna le ditsala tse di siameng. Batho ba itumelela go nna le ene gonne o na le boikutlo jo bo siameng, mme mafoko a gagwe a a lapolosa ebile a botshe jaaka tswina. (Diane 16:24) Jesu o ne a ntse fela jalo, ka go bo o ne a kgona go bolela jaana: “Ipeleseñ yokwe oa me, lo ithutè ga me; gonne ke bonōlō le boiñōtlō mo peduñ: me lo tla bōnèla meōea ea lona tapologō. Gonne yokwe oa me o monate, le morwalō oa me o motlhoho.” (Mathaio 11:29, 30) Jesu o ne a se bogale le jokwe ya gagwe e ne e se bokete. Bao ba neng ba tla kwa go ene ba ne ba tshwarwa sentle le go lapolosiwa semoyeng. Boemo e nna jo bo tshwanang fa re kopana le tsala ya Mokeresete e e bonolo.

¹⁸ Bonolo bo dira gore badumedi ba bangwe ba re rate. Kwantle ga pelaelo, Bakeresete ba bantsi kwa Korintha ba ne ba gogelwa kwa go Paulo gonne a ne a ba tshwara ka “bopelonōlō le ka bopelonomi yoa ga Keresete.” (2 Bakorintha 10:1) Eleruri Bathesalonia ba tshwanetse ba bo ba ne ba rata moaposetoloi, ereka e ne e le moruti yo o bonolo le yo o ba ngomaelang. (1 Bathesalonia 2:5-8) Ga re kake ra ganela gore bagolwane ba Efeso ba ne ba ithuta go le gontsi mo go Paulo ebile ba ne ba mo rata fela thata. (Ditihō 20:20, 21, 37, 38) A o supa bonolo jo bo dirang gore ba bangwe ba go rate?

19. Bonolo bo thusa batho ba ga Jehofa jang go nna ba itse maemo a bone mo phuthegong?

¹⁹ Bonolo bo thusa batho ba ga Jehofa gore ba nne bonolo le go nna mo maemong a bone mo phuthegong ya gagwe. (Bafilipi 2:5-8, 12-14; Bahebera 13:17) Bonolo bo re kganela gore re se ka ra batla tlotlomalo, eo e bakiwang ke boikgogomoso ebile Modimo ga a bo rate. (Diane 16:5) Motho yo o bonolo ga a itebe a feta badumedi ba bangwe, ebile ga a leke go itlotlomatsa ka bone. (Mathaio 23:11, 12) Go na le moo, o dumela gore o na le boleo le gore o tlhoka thulaganyo ya Modimo ya thekololo.

Bonolo bo Oketsa Boitumelo

20. Bonolo bo ama botshelo jwa lelapa jang?

²⁰ Batlhanka botlhe ba Modimo ba tshwanetse go gakologelwa gore bonolo ke loungo lwa moya wa gagwe lo lo lereng boitumelo. Ka sekai, batho ba ga Jehofa ba na le malapa a mantsi a a itumetseng gonne ba supa dinonofo tse di tshwanang le lorato le bonolo. Fa monna le mosadi ba dirisana ka tsela e e bonolo, bana ba bone ba golela mo tikologong e e ritibetseng, eseng mo lelapeng le go kgagolanwang ka mafoko le ditiro. Fa rre a gakolola bana ba gagwe ka bonolo, seno se kgona go ama ditlhaloganyo tsa bone ka tsela e e molemo, mme le bone ba tla nna bonolo. (Baefesia 6:1-4) Bonolo bo thusa banna go nna ba ntse ba rata basadi ba bone. Bo thusa basadi go ikobela banna ba bone ebile bo tlhotlheletsa bana go dira jaaka batsadi ba bone ba ba laela. Bonolo gape bo dira gore maloko a lelapa a itshwarelane mme seo se oketsa boitumelo.—Bakolosa 3:13, 18-21.

21. Totatota, moaposetoloi Paulo o naya kgakololo efe mo go Baefesia 4:1-3?

²¹ Malapa a a ritibetseng le batho ba ba ritibetseng ba dira gore phuthego e ba kopaneng le yone e itumele. Ka gone, batho ba ga Jehofa ba tlhoka go iteka ka tlhoafalo gore ba nne bonolo. A o dira jalo? Moaposetoloi Paulo o ne a rapelela Bakeresete ba bangwe ba ba tloditsweng gore ba tshele ka tsela e e tshwanelang pitso ya bone ya selegodimo, ba dira jalo “ka boikokobeco yotlhe le bonōlō, le ka bopelotelele, ka go iphapaanyana mo loratoñ; Le ka go tlhōahalèla go tshegetsa boñwe hèla yoa Mōea mo tumalanoñ ea kagishō.” (Baefesia 4:1-3) Bakeresete ba ba nang le tsholofelo ya go tshela mo lefatsheng le bone ba supa bonolo le dinonofo tse dingwe tsa bomodimo. Eno ke tsela e e lereng boitumelo jwa mmatota. Eleruri go itumela ba ba bonolo!

O Ne O Tla Araba Jang?

◻ Ke ka ntlha yang fa batho ba ba bonolo ba nna ba itumetse?

◻ Go nna bonolo go kaya eng?

◻ Bonolo bo ka tlhagolelwa jang?

◻ Go nna bonolo go ka solegela molemo jang?