“Aparañ Diaparō tsa Phemèlō Cotlhe tsa Modimo”

ABAKERESETE ba apere diaparo tsa tlhabano? Ke ka ntlha yang fa ba tshwanetse go tshola didirisiwa tse di ntseng jalo tse di tshwanang le tsa ntwa? A ga se batho ba ba ratang kagiso? (2 Timotheo 2:24) Ee, go ntse jalo. Lefa go ntse jalo, Bakeresete botlhe ba boammaaruri ba mo ntweng—ntwa e mo go yone ba sa lweleng go bolaya, mme ba lwela go fenya.

Fa Satane a ne a se kile a tsuologa, ntwa e e ntseng jalo e ne e se kitla e tlhokega. Mme o ne a tsuologa, a bo a tsietsa Adame le Efa gore ba tsuologe nae. Mme go tloga fela ka nako eo go ne ga nna le tsamaiso ya lefatshe e e ileng ya laolwa ke “eo o boshula,” Satane Diabolo. (1 Yohane 5:19) Bao ba ineelang mo go yo o tshwanelwang ke go nna Molaodi ebong Jehofa ba tshwanetse ba gana go tlhotlhelediwa ke lefatshe leno le mmusi wa lone. Ba tshwanetse ba lwela matshelo a bone a semoya. Bakeresete ba kgothadiwa jaana gore ba kgone go dira seo: “Aparañ diaparō tsa phemèlō cotlhe tsa Modimo, gore lo tlè lo itse go ganèla le maanō a boherehere a diabolo.”—Baefesia 6:11.

Diaparo tsa Phemelo

Tlhokomela gore re tlhoka “diaparō tsa phemèlō cotlhe tsa Modimo” gore re sireletsege sentle. A he re sekasekeng karolo nngwe le nngwe ya diaparo tseno jaaka moaposetoloi Paulo a di tlhalosa mme re itlhatlhobe ka boikanyegi go bona gore a re tshotse ditlhabano tsotlhe tsa ntwa eno ya semoya.—Baefesia 6:14-17.

“Ke gōna, lo èmeñ lo itlamile mo dithekeñ ka boamarure.” (Baefesia 6:14a) Mo metlheng ya Bibela masole a ne a ipofa ka lebanta la letlalo le le bophara jwa disentimetara di le 15. Lebanta leno le ne le sireletsa dinoka. Fa lesole le ne le gagamatsa lebanta la lone, seno se ne se supa gore le siametse go lwa.

Abo go tshwanela jang ne he gore boammaaruri jwa bomodimo bo tshwantshiwe le lebanta la lesole! Seno se supa sentle gore re tshwanetse go tshola Lefoko la Modimo la boammaaruri le le gaufi thata le rona, jaaka ekete re ipofile ka lone. Re tshwanetse ra akanya ka tsela e e boteng tota ka dikgopolo tse di leng mo Lefokong la Modimo. Seno se tla re sireletsa gore re se ka ra tsiediwa ke maaka le maretshwa. Mo godimo ga moo, dilo tse Jehofa a di bolelang di tla re tshegetsa le go re nonotsha semoyeng le go oketsa tsela e re bolokang bothokgami ka yone.

“Lo bile lo apere letlatla ya tshiamō ya sehuba.” (Baefesia 6:14b) Letlatla la sehuba la lesole le ne le sireletsa serwe se se botlhokwa thata sa mmele—pelo. Ka jalo he, tshiamo ke yone e sireletsang pelo mo diaparong tsa tlhabano tsa semoya tse re di filweng ke Modimo. Go ya ka Dikwalo, pelo e tshwantshetsa se re leng sone mo teng—maikutlo, dikgopolo, le dilo tse re di eletsang. Ereka Bibela gape e bolela gore pelo e sekametse mo bosuleng, go botlhokwa gore re tlhagolele go iketleetsa go ngaparela melao ya ga Jehofa ya tshiamo. (Yeremia 17:9) Ga re a tshwanela go supa go ikobela ga rona Modimo ka tsela ya boitimokanyi re go supa fela ka kwantle; go tshwanetse ga tswa mo teng. Seno se re tlhoka gore re rate tshiamo tota mme re ile bosula ka tsela e e tshwanang re nonofile. (Pesalema 45:7) Fa re dira jalo dipelo tsa rona di tla sireletsega.

“Le mo dinaoñ lo bo lo rwele iketleeco ea Mahoko a a Molemō a kagishō.” (Baefesia 6:15) A dinao tsa gago di rwele ka tsela eno? A di go isa kwa bodiheding jwa tshimo ka metlha go ya go rera mafoko a a molemo? A o leka ka natla go tokafatsa tsela e o rerang le go ruta ka yone? Ke boammaaruri gore batho ba ba mo ditshimong tse dingwe ga ba tshikhinyege le eseng. Batho ba teng ba ka nna ba se itshupe gore ba eme fa kae, ba bangwe ga ba kgatlhege, kana ba a ganetsa. Re ka nna ra bogisediwa go rera. Bakeresete ba kgona go itshoka gonne ba le pelotelele eleng leungo le le ba sireletsang kgatlhanong le go tlhaselwa ke Satane. Paulo o ne a rera ka botlhaga le mororo a ne a bogisiwa mme re kgothalediwa gore re ‘nne baetsi ba gagwe, jaaka le ene a ne a etsa Keresete.’—1 Bakorintha 11:1.

Go nna re tshwaregile thata mo tirong ya go rera ka Bogosi go nonotsha tsela e re tlhomamisegileng ka yone ka mafoko a a molemo. Mo godimo ga moo, go letla moya wa ga Jehofa gore o dire ka rona mo go fitlheleleng go rata ga gagwe. Ebile tota, tiro e e ntseng jalo e re dira gore re dire mmogo le baengele—le eleng le Jehofa Modimo ka boene. (1 Bakorintha 3:9; Tshenolō 14:6) Ebile fa re “totahetse mo tihoñ ea Morèna” go tla dira gore re ‘tlhomame, re bo re nitame.’ (1 Bakorintha 15:58) Abo seno se sireletsa ka tsela e e molemo jang ne!

“Le mo godimo ga cotlhe lo bo lo tseè thèbè ea tumèlō.” (Baefesia 6:16) Lesole la metlha ya bogologolo le ne le itshireletsa ka thebe e kgolo mo marumong le mo metswing. Fa a ne a ka palelwa ke go dirisa thebe ya gagwe, o ne a ka gobadiwa botlhoko thata kana a bolawa. Bakeresete ba lebane le ditlhabano tse di bolayang go feta tseo—“mecwi eotlhe e e molelō ea eo o boshula.” E akaretsa dilo tsotlhe tse Satane a di dirisang go koafatsa tumelo ya rona le go re bolaya semoyeng. Di akaretsa go bogisiwa, maaka, matlhale a maretshwa a lefatshe leno, dilo tse di kgatlhang tse di bonalang, le go raelwa go dira boitsholo jo bo sa siamang. Re tlhoka thebe e kgolo go itshireletsa mo dilong tsotlhe tseno. Ga go na karolo epe ya rona e re ka e tlogelang fela re sa e sireletsa mme ya se ka ya tlhaselwa.

Aberahame le mosadi wa gagwe Sara ba ne ba na le tumelo e e nonofileng. Ba ne ba dumela tsholofetso ya Modimo ya gore ba ne ba tla nna le ngwana ba setse ba fetile dingwaga tsa go tshola bana. Moragonyana, Aberahame o ne a itshupa a na le tumelo e kgolo e e sa tlwaelegang fa a ne a reetsa taolo ya go ntsha Isake setlhabelo, morwawe yo e neng e le ene fela yo a mo tsholetsweng ke Sara yo a neng a mo rata thata. Jehofa o ne a thiba letsogo la ga Aberahame mme a mo naya sengwe se sele go se ntsha setlhabelo. Mme lefa go ntse jalo Aberahame o ne a iketleeditse go dira jaaka a laelwa. Ka ntlha yang? Gonne o ne a dumela fela thata gore Jehofa o ne a ka tsosa morwawe mo baswing mme a dire se a se mo solofeditseng ka ene.—Baroma 4:16-21; Bahebera 11:11, 12, 17-19.

Moshe le ene o ne a na le mofuta o re tlhokang go nna le one wa tumelo. O ne a gana dikhumo tsa Egepeto, a itlhophela go gatelelwa le batho ba Modimo. Ka ntlha yang? Gonne a ne a dumela gore Jehofa o teng le gore o tla golola Baiseraele. Tumelo ya ga Moshe e ne e nonofile tota mo e leng gore “o na a ichōka yaka moñwe eo o tlhomileñ matlhō mo go èna eo o sa bōnaleñ.”—Bahebera 11:6, 24-27.

A re dumela mo go Jehofa ka tsela e e tshwanang? A re atamalane thata le Jehofa mo e leng gore go ntse jaaka ekete re kgona go mmona? A re iketleeditse go intsha setlhabelo ka tsela epe fela kana go itshokela mathata ape fela gore re ipoloke re ntse re atamalane le Modimo? A re dumela mo go Jehofa ka botlalo? (Bahebera 11:1) Fa go ntse jalo, metswi e e tukang ya ga Satane ga e kitla e phunyeletsa thebe ya rona ya tumelo.

“Me lo tseè tlhoro ea phemèlō ea polokō.” (Baefesia 6:17a) Tlhoro ya lesole e ne e sireletsa tlhogo ya lone mme ka jalo e sireletsa boboko jwa lone—serwe se se dirang gore methapo e dire sentle ebile se laola mogopolo. Tsholofelo ya Mokeresete ya poloko e tshwantshiwa le tlhoro gonne e sireletsa tlhaloganyo. Tlhaloganyo ya Mokeresete e ntšhafaditswe ka kitso e e tlhomameng, mme lefa go ntse jalo e sa ntse e le ya motho yo o bokoa yo o sa itekanelang. (Baroma 7:18; 12:2) Fa re letla ditlhaloganyo tsa rona gore di iphepe ka dikgopolo tse di leswe tse di senyang tumelo tseo di tswang mo moyeng wa lefatshe leno, tsholofelo ya rona ya gore re tla bolokiwa e tla nyelela mme kgabagare e swe. Kafa letlhakoreng le lengwe, fa re fepa dikakanyo tsa rona ka mafoko a a nonotshang a Modimo ka metlha, tsholofelo ya rona e tla nna e phatshima ebile e itshekile. A o nna o apere tlhoro ya gago ya poloko sentle?

“Chaka ea Mōea, e e leñ lehoko ya Modimo.” (Baefesia 6:17b) Polelo e e reng go lwa pele go botoka go na le go iphemela e boammaaruri mo ntweng ya Bakeresete. Jaaka fa dinao tsa rona tse di rweleng mafoko a a molemo a kagiso di re isa kwa bathong ba ba sa dumeleng, seo ga se reye gore re tsamaya fela re sa tshola dibolao. Lefoko la Modimo eleng Bibela le dira jaaka tšhaka e e maatla e e nyeletsang maaka a semoya le dikgopolo tse di phoso gape e thusa batho ba ba dipelo di siameng gore ba bone kgololesego ya semoya.—Yohane 8:31, 32.

Jesu o ne a supa gore sebolao seno se nonofile go le kana kang ka nako ya fa tota a ne a lwa le Satane Diabolo. Ka nako ya fa a ne a lekwa kwa gare ga naga, Jesu o ne a iphemela fa Satane a ne a mo tlhasela ka makgetlo a mararo ka go dirisa Lefoko la Modimo ka matsetseleko a bo a bolela jaana: “Go kwadilwe, ga twe.” (Mathaio 4:1-11) Fa re ithuta go dirisa tšhaka eno ka botswerere, re ka thusa batho ba ba bonolo go intsha kafa tlase ga taolo ya ga Satane. Bagolwane ba phuthego le bone ba dirisa Lefoko la Modimo go sireletsa letsomane mo bathong ba ba lekang go senya tumelo ya ba ba bokoa.—Ditihō 20:28-30.

Lesole ga le ke le kgona ka gangwe fela go dirisa tšhaka ka botswerere. Go ikatisa le go nna o dira se o se ithutileng ka lobaka lo loleele ka botlhaga di botlhokwa thata gore o kgone go e dirisa ka botswerere. Ka tsela e e tshwanang, ntwa eno ya semoya le yone e tlhoka gore motho a ithute tota a bo a ikatise ka metlha mo bodiheding gore a kgone go dirisa Lefoko la Modimo ka botswerere. A ruri re direng maiteko a a tlhokegang gore re nne masole a moya a a tshotseng ditšhaka a a kgonang go “bua lehoko ya boamarure ka tshiamō.”—2 Timotheo 2:15.

Rapelang ka Metlha, Lo Nitame

Dikarolwana tsotlhe tsa diaparo tsa rona tsa semoya tsa phemelo di a tlhokega gore re kgone go nna re ntse re thokgame mo Modimong. Mme re ka nna re ntse re apere diaparo tsa phemelo tseno jang? Fa re ithuta Bibela ka metlha, re baakanyetsa dipokano tsa Bokeresete nako e santse e le teng, mme morago re bo re reetsa ka kelotlhoko le go nna le seabe ka botlhaga mo go tsone seo se tla re thusa gore re nne re ntse re apere diaparo tseno tsa rona tsa phemelo. (2 Timotheo 3:16; Bahebera 10:24, 25) Go dira ka metlha le ka botlhaga mo tshimong o na le ditsala tse di molemo tsa Bakeresete le gone gape go tla re thusa go nna re ntse re apere diaparo tsa rona tsa phemelo tsa semoya tse re lwang ka tsone le tse re itshireletsang ka tsone di siame sentle.—Diane 13:20; Baroma 15:15, 16; 1 Bakorintha 15:33.

Go botlhokwa gape gore re nne le ditlhaloganyo tse di akanyang ka tsela e e siameng. Re tshwanetse ra gana go letla dilo tsa lefatshe leno tse di kgatlhang go re itaya ditsebe. Go na le moo, a re direng gore re nne le ‘leitlho le le bonang sentle.’ (Mathaio 6:19-24) Re tshwanetse ra etsa Jesu Keresete mme ra ithuta go rata tshiamo le go ila boikepo. (Bahebera 1:9) Dilo tseno tsotlhe di re thusa gore re ipoloke re ntse re apere diaparo tsa rona tsa phemelo tsa semoya tse re di filweng ke Modimo.

Paulo o konela ka go bolela jaana fa a sena go tlotla ka karolwana nngwe le nngwe ya diaparo tsa phemelo tsa semoya. “Lo nntse lo rapèla ka metlha eotlhe mo Moeeñ, ka thapèlō eotlhe le kokotlèlō, lo nntse lo nnetse gōna ka bocwèlèlō pele yotlhe, lo nntse lo kokotlèlèla baitshepi botlhe.” (Baefesia 6:18) Masole a a ikanyegang a nna ka metlha a buisana le masole a a kwa ntlongkgolo ya masole ebile a dira kafa a a laelang ka teng. Jaaka masole a Bakeresete, re tlhoka go nna ka metlha re buisana le Molaodi, Jehofa Modimo kana ‘molaodi wa gagwe wa ditšhaba,’ Jesu Keresete. (Isaia 55:4) Seno ga se kake sa dirwa ka dithapelo tse di motlhofo fela tse di sa kaeng sepe, mme se ka dirwa ka go kokotlela go tswa mo pelong goo go supang gore o atamalane le Jehofa ebile o ineetse mo go ene ka botlalo. Re kgona go bona nonofo e e re tshegetsang mo ntweng letsatsi le letsatsi fa re nna ka metlha re bua nae.

Jesu o ne a re: “Ke hentse lehatshe.” (Yohane 16:33) Jehofa gape o batla gore re fenye. Moaposetoloi Paulo o ne a kgona go bolela jaana fela fa a tla tloga a swa: “Ke tlhabanye ntwa e e molemō, ke digetse sebaka sa tshianō, ke bolokile tumèlō.” (2 Timotheo 4:7) Ekete re ka kgona go bolela mafoko a a tshwanang ka seabe sa rona mo ntweng eno. Fa e le gore ruri re eletsa seno, a re ‘ganeleng le maano a boferefere a diabolo’ ka go nna re apere diaparo tsotlhe tsa phemelo tse re di filweng ke Modimo.—Baefesia 6:11.