Go Anaanela “Ntlo ya Modimo”

“KE LOPILE selō señwe mo go Yehofa, ke shōna se ke tla se senkañ; ke gore ke tlè ke agè mo tluñ ea ga Yehofa ka malatsi aotlhe a botshelō yoa me, go leba bontlè yoa ga Yehofa, le go [anaanela tempele ya gagwe, NW].”—Pesalema 27:4.

Ka go leboga Kgosi Dafide o ne a leba tempele ya ga Jehofa ka boitumelo kana ka boipelo. A le wena o ikutlwa ka tsela e e tshwanang ka mafelo a segompieno a kobamelo ya boammaaruri? Magae a a fetang 95 a Bethele mo makaleng a Mokgatlho wa Watch Tower ke mangwe a mafelo a a amanang le kobamelo ya ga Jehofa mo nakong ya rona.

“Fa ke akanya ka dingwaga tse dintsi tsa me ke ntse ke dira mo Bethele, ke nna le tebogo le kanaanelo e kgolo, tseo di ileng tsa gola ngwaga le ngwaga,” go tlhalosa jalo Helga, yo o neng a simolola go dira mo legaeng leno kwa Jeremane ka 1948. Helga ke mongwe wa badiri ba ba itumetseng ba Bethele ba ba 13 828 lefatshe ka bophara bao ba ileng ba ‘leba bontle yoa ga Yehofa’ ka ngwaga wa tirelo wa 1993. Leina Bethele le raya eng totatota? Ke jang mongwe le mongwe wa Basupi ba ga Jehofa, yo o direlang Modimo mo teng kana kwa ntle ga Bethele, a ka bontshang gore o anaanela thulaganyo eno?

Leina Le Le Tshwanetseng Go Obamelwa

“Bethele” ke leina le le tshwanetseng tota, e re ka lefoko la Sehebera Behth-ʼElʹ le raya “Ntlo ya Modimo.” (Genesise 28:19, ntlhanyana e e kwa tlase mo go NW) Ee, Bethele e tshwana le ntlo e e rulagantsweng sentle, kana ‘ntlo e e agilweng ka botlhale,’ e Modimo le go rata ga gagwe go tlang pele mo go yone. (Diane 24:3) “Go ntse jaaka go nna mo lelapeng. Re na le tsamaiso ya letsatsi le letsatsi e e rulagantsweng sentle,” go rialo Herta ka kanaanelo. O ntse a dira ka dingwaga tse di fetang 45 mo Bethele eo Helga a ntseng a dira mo go yone. Leloko lengwe le lengwe la lelapa leno le legolo le na le tiro ya lone le mo le nnang gone, se se dira gore le itumele le go ikutlwa le bolokesegile. Tumalanong le leina Bethele, lephata lengwe le lengwe le na le tsamaiso le thulaganyo e e molemo. Seno se dira gore go nne le kagiso, gore mafoko a a molemo a kgonwe go ka rerwa ka tsela e e mosola, mme go naya diphuthego lebaka le le utlwalang go tlotla “Ntlo ya Modimo” fela thata.—1 Bakorintha 14:33, 40.

Ke eng fa mafelo a a ntseng jalo a le botlhokwa? Ka sekai, makasine ono o ile wa gatisiwa mo bogatisetsong jwa Bethele. Go rerwa ga molaetsa wa Bogosi le go anamisiwa ga dijo tsa semoya, tse di laolwang ke Jesu Keresete ka bobedi jwa tsone, go dira gore tsamaiso eno e e rulagantsweng e e tshwanang le Bethele e e botlhokwa thata—e tshegediwe ke badiri ba ba ithaopileng mme e tlotliwe thata ke baobamedi botlhe ba ga Jehofa.—Mathaio 24:14, 45.

A o rata go ithuta mo go oketsegileng ka tsamaiso ya tiro ya letsatsi le letsatsi mono? Kwa Helga le Herta ba nnang gone, molodi o o monate o lela mo diphaposing tsotlhe tsa bonno ka 6:30 a.m., lefa ba le bantsi ba badiri ba ka metlha ba ba fetang 800 ba tsoga go sa le phakela go ipaakanyetsa letsatsi. Ka 7:00 a.m., Mantaga go fitlha ka Matlhatso, lelapa le kopana mmogo go tla temaneng ya letsatsi kana kobamelong ya mo mosong. Morago ga moo go jewe dijo tse di monate tsa mo mosong. Tiro ya letsatsi le letsatsi e simolola ka 8:00 a.m. mme e nne diura di le robedi, moo tiro e emisiwang fela go ya go ja dijo tsa motshegare. (Ka tlwaelo lelapa ga le dire letsatsi lotlhe ka Matlhatso.) Go na le tiro e ntsi go dirwa go sa kgathalesege gore a ke mo kitsing, mo bogatisetsong, moo diaparo di tlhatswiwang gone, mo diofising, mo go direlwang dilo, mo go direlwang dibuka, kana lephata lepe fela.

Mo maitsiboeng le mo mafelobekeng, maloko a lelapa a kopana le diphuthego tse di gaufi kwa dipokanong le mo go rereng phatlalatsa. Bakaulengwe ba bantsi ba Bethele ke bagolwane kana batlhanka ba bodihedi mo diphuthegong tseno. Basupi ba ba mo mafelong ano ba anaanela tirisanommogo eno, ditlhopha tsoopedi di dira mmogo ka bongwefela jaaka mmele o le mongwe, ba bontshana tlotlo le go utlwana. (Bakolosa 2:19) Modiri mongwe le mongwe wa Bethele o itse gore tiro e a e abetsweng mo “Ntlong ya Modimo” e tla pele ga ditiro tse dingwe. Lefa go ntse jalo, go tlhagafalela go rera le go kopanela le phuthego, le go nna le boikutlo jo bo lekalekanyeng, go nonotsha bomoya jwa modiri wa Bethele, go dira gore a itumele thata, e bile go dira gore a nne leloko la lelapa le le mosola thata. A bo dinonofo tseno di le botlhokwa jang ne fa o dira mo “ntlong” eo leina la yone le amanang le go ineela ka pelo yotlhe!

Go Dira Gore Tirelo ya Bethele E Atlege

Ke eng se se ileng sa thusa ba le bantsi ba Basupi ba ga Jehofa go dira gore tirelo ya bone ya Bethele e atlege? Maloko a lelapa la Bethele kwa Fora ao a nang le maitemogelo a dingwaga di le dintsi a akgela jaana: “Go rata Jehofa. Go ikemisetsa go itshokela gongwe le gongwe mo a re bayang teng; go ikokobetsa, go ineela, le go latela kaelo e re e newang ke Mokgatlho.” (Denise) “Nna ke lemogile ka tsela eo go leng botlhokwa ka teng go tlotla molaomotheo o o umakilweng ke Paulo mo go Baroma 12:10: ‘Mo tlotloñ a moñwe a beè eo moñwe kwa pele.’ Lokwalo lono lo re bontsha botlhokwa jwa gore, re se ka ra gatelela gore dipono tsa rona di amogelwe, mme bogolo, re akanyetse dipono tsa ba bangwe. Ka mafoko a mangwe, re se ka ra batla go nna le maemo.” (Jean-Jacques) “Go tlotla ga rona tirelo ya Bethele go ka senyega fa re leba dilo ka tsela ya senama, ya batho,” go rialo Barbara, “ka gonne seno se ka dira gore re lebale gore ke Jehofa yo o kaelang phuthego ya gagwe. Re ka nna ra latlhegelwa ke tlotlo e e ntseng jalo fa re kgopisiwa ke bosaitekanelang jwa ba bangwe.”

Botlhe mo Bethele ga ba itekanela, ka jalo go dira ditsala go tshwanetse ga akanyediwa sentle. Batho ba babotlana le ba ba sa tswang go fitlha ba tla bo ba dira sentle fa ba sa itirele ditsala fela le balekane ba bone. Ba ba bontshang gore ba rata go ngongorega kana go nna le megopolo e e phoso ga ba nne ditsala tse di ka agelelang mo Bethele kana mo phuthegong. Mo letlhakoreng le lengwe, go etsa “botlhale yo bo cwañ kwa godimo,” jo bo tlhalosiwang mo go Yakobe 3:17, go tlisa masego. Bo “simologa bo le boitshèkō, hoñ bo nne kagišho, bo bonōlō, bo rapèlèsège ka boheho, bo tletse kutlwèlō botlhoko le mauñō a a molemō, bo sena kakabalō, bo sena boitimokanyō.” Dinonofo tseno, gammogo le bopelotelele le molemo, tse di leng mo “Ntlong ya Modimo,” mme di dira gore o itumele le go tlhotlheletsega go nna teng. Le e leng batho ba ba etang ba e seng Basupi gantsi ba bontsha fa ba rata boitshwaro jo bontle, botsalano, le moya wa boitumelo wa badiri.

Anny, yo o nang le dingwaga tse di fetang 70 mme a ntse a le leloko la lelapa la Bethele mo Jeremane go tloga ka 1956, o tlhalosa tsela e a nnang a ntse a ikemiseditse go direla: “Go boloka bomoya jwa me, ke dira maiteko a magolo go nna ke bala dikgatiso tsa Mokgatlho ka dinako tsotlhe, ke nna teng kwa dipokanong ka metlha, le go nna le seabe mo go rereng ka metlha. Gape ke leka go nna le botsogo jwa mmele jo bo siameng ka go itshidila mmele moso mongwe le mongwe, ka go sa dirise lifiti ka dinako tsotlhe, le go tsamaya thata, segolobogolo mo tirelong ya tshimo.”

Ba le bantsi ba ba nang le maitemogelo ka botshelo jwa Bethele ba tla dumalana le Anny. Ga ba ke ba tlogela go ithuta, ga ba ke ba emisa go bereka. Go nna le botsogo jwa mmele jo bo siameng go batla gore ba nne le boroko jo bo lekaneng le go itshidila mme ba lekanyetse go ja le go nwa. Se se botlhokwa le go feta, ga ba tlhokomologe go rapela le go nna le thuto ya Bibela ya motho ka namana.

Go Tlotla Tirelo E E Boitshepo ya Bethele

“O bereka fa kae?” ke potso e gantsi e bodiwang maloko a Bethele. Go na le dikabelo tsa tiro tse di farologaneng, mme mongwe le mongwe o tshwanetse go leba nngwe le nngwe ya tsone jaaka e e leng botlhokwa thata. Ka ntlha yang? Ka gonne tiro nngwe le nngwe—a e ka ne e le go dirisa motšhine o o gatisang dijo tsa semoya, go tlhatswa diaparo, go phepafatsa le go apeela lelapa, kana go dira mo ofising—gotlhe ke tirelo e e boitshepo. Jaaka go umakilwe fa godimo, Bakeresete ga ba tlhaole sepe. Gakologelwa gore ditiro tsotlhe tse di neng di tshwanetse go dirwa ke baperesiti le Balefi kwa tempeleng, mo lolwapeng le mo diphaposing tsa bojelo, di ne di lebiwa tsotlhe jaaka tirelo e e boitshepo mo go Jehofa. Seo se ne se akaretsa go tlhaba le go baakanya diphologolo tsa setlhabelo, go tlatsa dilampa ka lookwane, le e leng go phepafatsa le go dira ditiro tsa balebedi. Ka mo go tshwanang, kabelo nngwe le nngwe mo Bethele ke tiro e e kgotsofatsang le e e botlhokwa “mo tihoñ ea Morèna,” ka jalo ke tshiamelo e e kgethegileng.—1 Bakorintha 15:58.

Akanyetsa selo se le sengwe se se ka dirang gore re seka ra anaanela “Ntlo ya Modimo.” Bakeresete ba ba leng mo teng le kwa ntle ga Bethele ba tshwanetse go itisa gore ba seka ba fufega le go nna pelotshetlha, tse e leng “podishō ea marapō.” (Diane 14:30) Ga go tlhokege gore ope a fufegele ditshiamelo tsa tirelo tsa badiri ba Bethele. Go feta moo, ga go batlege bopelotshetlha mo lelapeng la Bethele, e e leng nngwe ya ditiro tsa nama. Leta ka boikokobetso—ke kgakololo e e molemo go mongwe yo go bonalang a ile a lebalwa fa ba bangwe ba newa ditshiamelo tse di oketsegileng. Se se fetang moo, batho ba le bantsi ba ba nang le maemo a a farologaneng a madi ba nna mmogo mo Bethele. A bo go tla bo go swabisa jang ne fa motho a lekanya maemo a gagwe “kaga oa ga gabo”! Go kgotsofalela go nna le “diyō le diaparō” go ile ga thusa batho ba le bantsi go tswelela ka boikanyegi ka dingwaga di le dintsi mo “Ntlong ya Modimo.”—Bagalatia 5:20, 26; 6:4; 1 Timotheo 6:8.

Basupi ba ga Jehofa le dimilione tsa batho ba bangwe ba sologelwa molemo thata ke ditiro tse di dirwang ka boithaopo mo Bethele—tiro e e dirwang kwantle ga bopelotshetlha ka ntlha ya go rata Modimo le moagisani. Magae a Bethele le magatisetso a Mokgatlho wa Watch Tower, go tshwana le mafelo a mangwe a puso ya Modimo, a tshegediwa ka madi ka meneelo ya boithatelo. (2 Bakorintha 9:7) Go tshwana le Kgosi Dafide le dikgosana le balaodi ba Iseraele, re ka bontsha fa re kgatlhegela le go anaanela “Ntlo ya Modimo” ka go tshegetsa Mokgatlho ka go thusa ka sebele le ka meneelo ya madi. (1 Ditihalō 29:3-7) A re sekasekeng jaanong gore re ka “leba bontlè yoa ga Yehofa” jang mo Bethele.

Masego mo “Ntlong ya Modimo”

Fa o le kwa kopanong, a o ikutlwa o ritibetse, fa o le fa gare ga baobamedi ba ba itumetseng ba ga Jehofa? Akanya fela, modiri wa Bethele o na le tshiamelo ya go direla Jehofa fa gare ga setlhopha se segolo sa bakaulengwe letsatsi lengwe le lengwe! (Pesalema 26:12) A bo seo se go fa sebaka sa go gola semoyeng jang ne! Mokaulengwe mongwe o ne a re o ne a ithuta mo gontsi go bopa botho jwa gagwe mo ngwageng o le mongwe fela fa a le mo Bethele go feta mo a ileng a go ithuta mo dingwageng di le tharo felo gongwe. Ka ntlha yang? Ka gonne ga go na gope moo a ileng a kgona go bona le go etsa tumelo ya Bakeresete ba ba godileng ba bantsi jaana.—Diane 13:20.

Fa motho a le mo Bethele o fa gare ga bagakolodi ba ba nang le maitemogelo, jaaka go ka tualo. Se se oketsegileng, re solegelwa molemo ke dikakgelo tse di baakanyeditsweng sentle tse di neelwang mo kobamelong ya mo mosong le mo Thutong ya Tora ya Tebelo ya lelapa la Bethele le go reetsa dipuo ka Mantaga maitsiboa. Ba ba sa tswang go goroga ba newa kaelo mo Sekolong sa Ba Ba Tlileng go Tsena mo Bethele mme ba laelwa go bala Bibela yotlhe mo dikgweding di le 12 tsa ntlha.

Dipego le maitemogelo a baeti ba ba tswang kwa dinageng tse dingwe a naya kgothatso e e oketsegileng. Go feta moo, maloko a Setlhopha Se Se Laolang kana baemedi ba bone ba etela diofisi tsa makala. “Lefa ba na le tiro e ntsi,” go tlhalosa jalo Helga, “bakaulengwe bano ba na le nako ya go bua sengwe se se botsalano kana go nyenya ka dinako tsotlhe.” A bo go kgothatsa jang ne go bona botho jo bo lapolosang le mokgwa wa boingotlo wa banna ba ba ikanyegang jaana!

Motho o kgona go bona segolobogolo mo Bethele ka moo phuthego ya Modimo e dirang ka gone le ka moo moya wa gagwe o o boitshepo o tlhotlheletsang dipelo le diatla tse di ratang go dira ka gone. “Fa motho a le mo Bethele o ikutlwa a le gaufi thata le ‘mo tiro tota e leng teng,’” go tlhalosa jalo mokaulengwe mongwe, yo a saleng a dira mo Bethele kwa Fora fa e sale ka 1949. O tswelela ka gore: “Ruri nka re mo go nna Bethele ke mofuta wa tirelo ya nako e e tletseng e e dirang gore ke kgone go senya bontsi jwa nako ya me le nonofo mo tirelong ya ga Jehofa le go direla bakaulengwe ba bantsi.” A mme seo ga se lebaka la go bo re tshela—go dira go rata ga Modimo? Fa motho a le mo Bethele o kgona go ‘kgana letsatsi jotlhe.’ A bo e le lesego jang ne!—Pesalema 44:8.

Jaaka re setse re lemogile, motho yo o dirang mo legaeng la Bethele o kgona go leba bontle jwa ga Jehofa le go bona masego a mantsi. (Bahebera 6:10) A go direla mo “Ntlong ya Modimo” e ka nna selo se se mosola mo go wena? Batho bao ba ka nnang le dingwaga di le 19 gareng ga Basupi ba ga Jehofa, ba ba nonofileng sentle mo semoyeng le mo mmeleng, mme gape, bao jaaka Timotheo, ba bo ba “bolèlwa ka molemō ke bakaulengwe” ba ka nna ba ikopela go direla mo Bethele. (Ditihō 16:2) Ba le bantsi go tshwana le ba ba umakilweng fa godimo, ba ile ba dira tirelo ya Bethele go nna tiro ya botshelo jwa bone. Mo go bone tlhoafalo ya mopesalema—ya go ‘aga mo ntlong ya ga Jehofa ka malatsi otlhe a botshelo jwa gagwe’—e ile ya nna selo sa mmatota.

Basupi ba ga Jehofa ba tlotla moya wa go intsha setlhabelo o o bontshiwang ke bakaulengwe le bokgaitsadi mo Bethele, ba ba dirang ditiro tsa bone ka go rata le ka boitumelo. Lefa re direla Jehofa re le mo Bethele kana go sele, rotlhe re na le lebaka le le nonofileng la go ikutlwa jaaka Kgosi Dafide a ile a ikutlwa—go anaanela, kana go itumelela, “Ntlo ya Modimo.”

[Setshwantsho mo go tsebe 31]

Bakeresete bano ba ile ba itumelela tirelo e e boitshepo kwa Bethele e e kwa Jeremane ka dingwaga tse dintsi