Go Rutiwa ke Jehofa go tla go Fitlha Jaanong

“Morena Modimo o nneile loleme lwa ba ba rutegileng.”—ISAIA 50:4.

1, 2. (a) Jehofa o ne a baakanyetsa moithuti wa gagwe yo a neng a mo rata thata eng, mme seo se ne sa felela ka eng? (b) Jesu o ne a bolela Motswedi wa se a se rutang jang?

JEHOFA MODIMO o ntse a le Morutisi fa e sale a nna Rre. Nakwana morago ga gore bangwe ba bana ba gagwe ba tsuologe, o ne a baakanya moithuti wa gagwe yo o neng a mo rata thata, Leitibolo la gagwe, gore a tle go dira bodiredi mo lefatsheng. (Diane 8:30) Isaia kgaolo 50 e bolela ka tsela ya boperofeti ka moithuti yono a re: “Morena Modimo o nneile loleme lwa ba ba rutegileng, gore ke tle ke itse go kamatlela ka puo ene yo o lapileng.” (Isaia 50:4) E re ka a ne a dirisa thuto ya ga Rraagwe fa a ne a le mo lefatsheng, Jesu o ne a lapolosa botlhe ba ba neng ba ‘lapile e bile ba imelwa.’—Mathaio 11:28-30.

² Jesu o ne a dira ditiro di le dintsi tse di supang maatla mo lekgolong la ntlha la dingwaga. O ne a bula matlho a difofu a bo a tsosa baswi, lefa go ntse jalo, batho ba motlha wa gagwe ba ne ba mo itse thata jaaka morutisi. Balatedi ba gagwe le baganetsi ba gagwe ba ne ba mmitsa jalo. (Mathaio 8:19; 9:11; 12:38; 19:16; Johane 3:2) Jesu o ne a se ke a itseela tlotla ka ntlha ya dilo tse a neng a di ruta mme o ne a bolela jaana ka boikokobetso: “Thuto ya me, ga se ya me; ke ya yo o nthomileng.” “Ke bua dilo tse fela jaaka Rara a nthutile.”—Johane 7:16; 8:28; 12:49.

Kamano e Ntle ya Morutisi le Moithuti

3. Boperofeti jwa ga Isaia bo bontsha jang gore Jehofa o na le kgatlhego mo bathong ba a ba rutang?

³ Morutisi yo o dirang sentle o nna le kgatlhego mo baithuting ba gagwe motho ka namana, ka kelotlhoko e bile e le ka tsela e e lerato. Isaia kgaolo 50 e senola gore Jehofa Modimo o na le kgatlhego e e ntseng jalo mo bathong ba a ba rutang. Boperofeti bo bolela jaana: “O tlaa a ntsose ka moso moso, a tsosetse tsebe ya me go utlwa jaaka ba ba rutegileng.” (Isaia 50:4) Mafoko a a dirisitsweng fano a fa mogopolo wa morutisi yo o tsosang baithuti ba gagwe go sa le moso gore a ba rute. Mokanoki mongwe wa Baebele o ne a bolela jaana a akgela ka tiragatso ya boperofeti jono: “Kgang ke gore, Morekolodi e ne e tla nna . . . mongwe yo re ka tshwantshetsang ka gore o ne a le mo sekolong sa Modimo; e bile o ne a tla tshwanelega gore a ka neela ba bangwe thuto. . . . Mesia e ne e tla nna ene a tshwanelegang ka tsela e e tlhomologileng, a thusitswe ke thuto ya Modimo, gore a ka ruta batho.”

4. Jesu o ne a amogela thuto ya ga Rraagwe jang?

⁴ Kafa tshwanelong, baithuti ba amogela thuto ya mokaedi wa bone. Jesu o ne a amogela jang thuto ya ga Rraagwe? Tsela eo a e amogetseng ka yone e dumalana le se re se balang mo go Isaia 50:5: “Morena Modimo o nkabolotse tsebe, mme ga ke a ka ka dira setloontheng le fa e le go ithuhulela kwa morago.” Ee, Jesu o ne a tlhagafaletse go ithuta. O ne a le tsebentlha go utlwa, jaaka go a tle go tualo. Go feta moo, o ne a iketleeleditse go dira sengwe le sengwe fela se Rraagwe a neng a se mo kopa. O ne a se setsuolodi; go na le moo o ne a re: “E seng go rata ga me, mme a go rata ga gago go dirale.”—Luke 22:42.

5. (a) Ke eng se se bontshang gore Jesu o itsile go sale pele gore o ne a tla kopana le diteko dife mo lefatsheng? (b) Boperofeti jwa Isaia 50:6 bo ne jwa diragadiwa jang?

⁵ Boperofeti bo bontsha gore Morwa o ne a boleletswe ka ditlamorago tse di neng di tla diragala fa a dira thato ya Modimo. Seno se bontshiwa ke mafoko a yo o rutilweng: “Baditei ka ba neela motlhana wa me, le marama a me ka a neela ba ba khumolang ditedu; sefatlhogo sa me ga ke a ka ka se subela ditlhong le kgwelo ya mathe.” (Isaia 50:6) Jaaka boperofeti bo bontsha, Jesu o ne a tshwarwa setlhogo mo lefatsheng. “Ba mo kgwela mathe mo sefatlhogong,” go ne ga kwala jalo moaposetoloi Mathaio. “Ba bangwe ba mo phaila ka diatla.” (Mathaio 26:67) Seno se ne se dirwa ke baeteledipele ba bodumedi ka bosigo jwa Tlolaganyo ya 33 C.E. Letsatsi le le latelang Jesu o ne a ineela mo baiteing, fa masole a Baroma a ntse mo itaya mo go setlhogo ba ise ba mo kokotele mo koteng gore a swe.—Johane 19:1-3, 16-23.

6. Ke eng se se bontshang gore Jesu ga a ise a ko a tlhoke go tshepa Morutisi wa gagwe, mme o ne a duelwa jang ka ntlha ya tshepo ya gagwe?

⁶ Morwa, yo o neng a rutilwe sentle go sale pele, ga a ise a ko a tlhoke go ikanya Morutisi wa gagwe. Seno se supiwa ke se a se bolelang morago ga moo go ya ka boperofeti joo: “Morena Modimo o tlaa nthusa; ke gone ka fa ke sa sosobaganang ka teng.” (Isaia 50:7) Jesu o ne a duelwa thata ka ntlha ya go ikanya thuso ya Morutisi wa gagwe. Rraagwe o ne a mo goletsa, a mo segofatsa ka go mo naya maemo a a kwa godimo ga a batlhanka ba bangwe botlhe ba Modimo. (Bafilipi 2:5-11) Le rona re tla segofadiwa thata fa re ka ngaparela thuto ya ga Jehofa ka kutlo mme ra se ka ra “ithuhulela kwa morago.” A re boneng gore thuto eno e ntse e le teng jang go fitlha mo motlheng wa rona.

Thulaganyo e Kgolwane ya go Ruta

7. Jehofa o ntse a tswelela pele jang go ruta mo lefatsheng?

⁷ Jaaka re bone pelenyana, Jehofa o ne a dirisa Moemedi wa gagwe wa mo lefatsheng, Jesu Keresete, gore a diragatse thuto ya bomodimo mo lekgolong la ntlha la dingwaga. (Johane 16:27, 28) Jesu ka metlha o ne a supa Lefoko la Modimo gore ke lone le tshotseng thuto ya gagwe, a tlhomela bao a neng a ba ruta sekao. (Mathaio 4:4, 7, 10; 21:13; 26:24, 31) Morago ga foo, thuto ya ga Jehofa e ne ya tsweledisiwa mo lefatsheng ke bodiredi jwa batho bao ba ba rutilweng. Gakologelwa gore Jesu o ne a ba laela jaana: “Ke gone tsamayang, lo dire merafe yotlhe barutwa, . . . lo ba rute go tlhokomela dilo tsotlhe tse ke di lo laoletseng.” (Mathaio 28:19, 20, mokwalo o o sekameng ke wa rona.) Fa go ne go dirwa barutwa, ba ne ba nna karolo ya ‘ntlo ya Modimo, . . . phuthego ya Modimo o o tshedileng.’ (1 Timotheo 3:15) Gape ba ne ba bopiwa go nna diphuthego tse di farologaneng tse ba neng ba rutiwa ke Jehofa mo go tsone. (Ditiro 14:23; 15:41; 16:5; 1 Bakorinthe 11:16) A thuto ya bomodimo e tsweletse pele ka tsela e e ntseng jalo go tla go tsena mo motlheng wa rona?

8. Jesu o ne a bontsha jang gore tiro ya go rera e ne e tla kaelwa mo lefatsheng pele bokhutlo bo tla?

⁸ Ee ruri! Jesu o ne a bolelela pele malatsi a le mararo pele a tlhokafala gore, pele ga bokhutlo jwa tsamaiso eno ya dilo, go ne go tla nna le tiro e kgolo ya go rera. O ne a re: “Mafoko a a Molemo a, a bogosi, a tlaa rerwa mo lefatsheng lotlhe, go nna tshupo mo merafeng yotlhe; foo ke gone bokhutlo bo tlaa tlang.” Go tswa foo Jesu o ne a tlhalosa tsela e tiro eno ya go rera le go ruta mo lefatsheng lotlhe e neng e tla kaelwa ka yone. O ne a bua ka “motlhanka yo o boikanngo le yo o botlhale” yo o neng a tla nna jaaka mosele, kana sedirisiwa seo a se dirisang go neela batlhanka ba Gagwe dijo tsa semoya. (Mathaio 24:14, 45-47) Jehofa Modimo o ntse a dirisa “motlhanka” yono gore a okamele dilo tse di direlwang Bogosi mo lefatsheng lotlhe.

9. Ke bomang ba ba bopang setlhopha sa motlhanka yo o boikanngo le yo o botlhale?

⁹ Gompieno, motlhanka yo o boikanngo le yo o botlhale o bopilwe ka masalela a baruaboswa ba Bogosi. Bano ke Bakeresete ba ba tloditsweng, masalela a a mo lefatsheng a ba ba 144-000, ba e leng “ba ga Keresete” e bile ba le karolo ya “losika lwa ga Aberahame.” (Bagalatia 3:16, 29; Tshenolo 14:1-3) O ka tlhaola jang motlhanka yo o boikanngo le yo o botlhale? Segolobogolo ka tiro e ba e dirang le tsela e ka yone ba ngaparelang Lefoko la Modimo e leng Baebele.

10. Setlhopha sa motlhanka se dirisa didirisiwa dife go anamisa dithuto tsa ga Jehofa?

¹⁰ Jehofa o dirisa “motlhanka” yono jaaka sedirisiwa sa gagwe sa go ruta batho gompieno. Ba setlhopha sa motlhanka ba ne ba simolola go dirisa leina Basupi ba ga Jehofa ka 1931. Fa e sale ka nako eo batho ba le dimilione ba ile ba kopanela le bone e bile ba amogetse leina leo le gone ba simolotse go bolela ka Bogosi jwa Modimo le bone. Makasine ono, Tora ya Tebelo E Itsise Bogosi jwa ga Jehofa, ke sedirisiwa se segolo sa “motlhanka” mo tirong ya go ruta. Lefa go ntse jalo, go dirisiwa le dikgatiso tse dingwe gape, go akaretsa dibuka, dibukana, diboroutšhara, dipampitshana, le makasine wa Tsogang!

11. “Motlhanka” o ntse a tlhokometse dikolo dife, mme sengwe le sengwe sa dikolo tseno se diragatsa boikaelelo bofe?

¹¹ Mo godimo ga moo, “motlhanka” o tlhokometse dikolo tse di farologaneng. Tseno di akaretsa Sekolo sa Baebele sa Watchtower sa Gileate, se e leng khoso ya dikgwedi tse tlhano eo e baakanyetsang badiredi ba basha tirelo ya borongwa kwa dinageng di sele, le khoso ya dikgwedi tse pedi ya Sekolo sa Thapiso sa Bodiredi, seo se thapisetsang bagolwane le batlhanka ba bodiredi ba ba sa nyalang gore ba kgone go dira dikabelo tse di kgethegileng tsa puso ya Modimo. Gape go na le Sekolo sa Bodiredi jwa Bogosi, se mo go sone bagolwane ba Bakeresete le batlhanka ba bodiredi ba nnang ba rutiwa kgapetsakgapetsa ka maikarabelo a bone mo phuthegong, le Sekolo sa Tirelo ya Bobulatsela, seo se thusang baefangedi ba nako e e tletseng gore ba nne le matswela a a botoka mo tirong ya bone ya go rera.

12. Karolo nngwe ya beke le beke ya thulaganyo ya go ruta ke efe?

¹² Karolo e nngwe ya thulaganyo ya go ruta ke dipokano tse tlhano tsa beke le beke tse di tshwarwang mo diphuthegong tsa batho ba ga Jehofa tse di fetang 75 500 mo lefatsheng lotlhe. A dipokano tseno di go solegela molemo ka botlalo ka mo go ka kgonegang ka gone? A tsela e o reetsang thuto e e neelwang ka yone e bontsha gore tota o a dumela gore o mo sekolong sa Modimo, ka tsela ya tshwantshetso? A tsela e o gatelang pele ka yone semoyeng e dira gore go bonale mo go ba bangwe gore o na le “loleme lwa ba ba rutegileng”?—Isaia 50:4; 1 Timotheo 4:15, 16.

Go Rutiwa Kwa Dipokanong Tsa Phuthego

13. (a) Jehofa o ruta batho ba gagwe ka tsela efe e e botlhokwa gompieno? (b) Re ka bontsha jang gore re anaanela Tora ya Tebelo?

¹³ Jehofa o ruta batho ba gagwe segolobogolo ka thuto ya beke le beke ya Baebele, go dirisiwa Tora ya Tebelo jaaka sedirisiwa sa go ruta. A o leba pokano eno jaaka lefelo le mo go lone o ka rutiwang ke Jehofa? Lefa Isaia 50:4 e dira segolobogolo mo go Jesu, e ka dira gape mo bathong botlhe ba ba dirisang dithuso tsa Modimo gore ba amogele “loleme lwa ba ba rutegileng.” Tsela e nngwe e o ka bontshang ka yone gore o rata Tora ya Tebelo ke ka go bala tokololo nngwe le nngwe ka bonako fela fa o sena go e amogela. Go tswa foo, fa Tora ya Tebelo e ithutiwa kwa phuthegong, o ka bontsha gore o rata Jehofa ka go nna gone le go tla o baakanyeditse gore o bolele phatlalatsa ka tsholofelo ya gago.—Bahebere 10:23.

14. (a) Ke ka ntlha yang fa go akgela kwa dipokanong e le tshiamelo ya botlhokwa jaana? (b) Dikarabo tsa basha tse di kgothatsang thata ke tsa mofuta ofe?

¹⁴ A o lemoga gore fa o akgela kwa dipokanong, o ka nna le seabe mo thulaganyong e e molemo ya ga Jehofa ya go ruta? Kwantle ga pelaelo, go akgela kwa dipokanong ke tsela ya botlhokwa e ka yone re ka tlhotlheletsanyang “mo loratong le mo ditirong tse di molemo.” (Bahebere 10:24, 25) A bana le bone ba ka nna le seabe mo thulaganyong eno ya go ruta? Ee, ba ka nna le sone. Gantsi dikakgelo tsa bana tse di tswang mo pelong di kgothatsa ba ba godileng. Ka dinako tse dingwe, ba basha mo dipokanong tsa rona ba ile ba tlhotlhelediwa ke dikakgelo tsa bana gore ba nne le kgatlhego thata mo boammaaruring jwa Baebele. Bana bangwe ba tlwaela go bala dikarabo tsa bone go tswa fela mo serapeng kana go bua se batsadi ba bone ba se ba sebeditseng. Lefa go ntse jalo, go kgothatsa thata fa dikakgelo tsa bone di baakanyeditswe sentle. Go akgela jalo eleruri go tlisa tlotlo kwa go Morutisi wa rona yo Mogolo le thulaganyo ya gagwe e e tlhomologileng ya go ruta.—Isaia 30:20, 21.

15. Batsadi ba ka dira eng go thusa bana gore ba akgele ka tsela e e nang le matswela thata?

¹⁵ Go a itumedisa go bona bana ba batla go nna le seabe mo go bakeng Modimo wa rona. Jesu o ne a itumelela mafoko a pako a a tswang mo baneng. (Mathaio 21:15, 16) Mogolwane mongwe wa Mokeresete o bolela jaana: “Fa ke ne ke le ngwana, ke ne ke batla go akgela mo Thutong ya Tora ya Tebelo. Fa ntate a sena go nthusa go baakanyetsa kakgelo, o ne a mpatla gore ke boaboeletse kakgelo ya me bobotlana makgetlho a le supa.” Gongwe lona batsadi fa lo tshwere thuto ya lelapa ya Baebele, lo ka thusa bana ba lona gore ba baakanyetse dikakgelo ka mafoko a bone mo dirapeng dingwe tsa Tora ya Tebelo. Ba thuse gore ba anaanele tshiamelo e kgolo e ba nang le yone ya go nna le seabe mo thulaganyong ya ga Jehofa ya go ruta.

16. Mosola wa Sekolo sa Bodiredi sa Puso ya Modimo e ntse e le ofe, mme ke bomang ba ba ka ikwadisang mo sekolong seo?

¹⁶ Dithuto tse di neelwang kwa dipokanong tse dingwe tsa Bokeresete le tsone di tshwanetse go akanyediwa ka tsela e e masisi, ke bao ba nang le tshiamelo ya go neela tshedimosetso mmogo le bao ba reetsang thuto e e neelwang. Ka dingwaga di feta 50 jaanong, Jehofa o ntse a dirisa Sekolo sa Bodiredi sa Puso ya Modimo sa beke le beke go thapisa dimilione tsa banna le basadi gore ba anamise molaetsa wa Bogosi ka tsela e e nang le matswela thata. Batho ba ba kopanelang ka metlha le phuthego ba ka ikwadisa, go akaretsa le batho ba ba sa tswang go simolola go nna gone kwa dipokanong bosheng, fa fela ba tshela botshelo jo bo dumalanang le melaometheo ya Bokeresete.

17. (a) Pokano ya Phatlalatsa e tlhometswe boikaelelo bofe segolobogolo? (b) Dibui tsa phatlalatsa di tshwanetse tsa gopola dintlha dife?

¹⁷ Karolo e nngwe e e tswang kgakala ya thulaganyo ya go ruta ke Pokano ya Phatlalatsa. Fela jaaka leina la yone le bontsha, pokano eno e ne ya tlhomiwa segolobogolo gore e tlwaelanye batho ba e seng Basupi le dithuto tsa motheo tsa Baebele. Ka jalo, yo o neelang puo o tshwanetse go neela tshedimosetso gore ba ba utlwang molaetsa ono e le la ntlha ba kgone go o tlhaloganya. Seno se kaya gore ba tlhalose mafoko a a jaaka “dinku di sele,” “bomonnawe,” le “masalela,” mafoko a batho ba e seng Basupi ba ka nnang ba se ka ba a tlhaloganya. E re ka batho ba ba nnang gone kwa Pokanong ya Phatlalatsa ba ka nna ba bo ba na le ditumelo le mekgwa ya botshelo e e sa dumalaneng gotlhelele le Dikwalo—lefa e amogelwa mo setšhabeng sa gompieno—sebui se tshwanetse gore ka metlha se nne botlhale mme se se ka sa sotla ka ditumelo tseo kana mekgwa eo.—Bapisa 1 Bakorinthe 9:19-23.

18. Go na le dipokano dife tse dingwe tsa beke le beke tsa phuthego, mme di diragatsa maikaelelo afe?

¹⁸ Pokano ya Thuto ya Buka ya Phuthego ke pokano e mo go yone dikgatiso tse di baakantsweng ka kaelo ya motlhanka yo o boikanngo le yo o botlhale di ithutiwang beke le beke mmogo le Baebele. Buka ya Tshenolō—Konelo ya Yone E E Molemolemo e Atametse! ke yone e e ithutiwang gone jaanong mo dinageng di le dintsi. Pokano ya Tirelo e rulaganyeditswe go thusa batho ba ga Jehofa gore ba kgone go nna le seabe ka botlalo mo go rereng mafoko a a molemo a Bogosi le go dira barutwa.—Mathaio 28:19, 20; Mareko 13:10.

Go Rutiwa Kwa Dipokanong Tse Dikgolwane

19. “Motlhanka” o rulaganya gore go nne le dikokoano dife tse dikgolwane ngwaga le ngwaga?

¹⁹ Ka dingwaga di feta lekgolo, ‘motlhanka yo o boikanngo’ o ntse a rulaganya dikopano tse dikgolo le tse dipotlana gore Bakeresete ba boammaaruri ba rutiwe le go kgothadiwa ka tsela e e kgethegileng. Jaanong dipokano tse di ntseng jalo tse dikgolwane di le tharo di tshwarwa ngwaga le ngwaga. Go na le kopano ya letsatsi le le lengwe fela e e iwang ke setlhopha sa diphuthego tse di bopang potologo. Mo ngwageng, potologo nngwe le nngwe gape e nna le pokano ya malatsi a le mabedi e e bidiwang kopano ya potologo. Mo godimo ga moo, go na le kokoano e e bidiwang kopano ya kgaolo, e e iwang ke dipotologo di le mmalwa. Gangwe le gape morago ga dingwaganyana go ka nna le dikopano tsa ditšhabatšhaba. Dikopano tseno tse dikgolo tse di nang le Basupi ba ba etileng go tswa kwa dinageng di le dintsi eleruri di nonotsha tumelo ya batho ba ga Jehofa!—Bapisa Duteronome 16:16.

20. Ke eng se se ileng sa gatelelwa ka metlha kwa dikokoanong tse dikgolwane tsa Basupi ba ga Jehofa?

²⁰ Ka 1922, fa batho ba ka nna 10 000 ba ne ba kopane kwa Cedar Point, Ohio, U.S.A., ba ba neng ba tlile ba ne ba tlhotlhelediwa ke kgothatso ya sebui: “Leno ke letsatsi mo malatsing otlhe. Bonang, Kgosi e a busa! Lona lo baboledi ba yone. Ka gone itsiseng, itsiseng, itsiseng, Kgosi le bogosi jwa gagwe.” Dikopano tse dikgolo jalo ka metlha di ile tsa bua thata ka tiro ya go rera. Ka sekai, kwa kopanong e kgolo ya New York City ka 1953, go ne ga dirwa kitsiso ka ga go simololwa ga thulaganyo ya go thapisetsa batho tiro ya ntlo le ntlo mo diphuthegong tsotlhe. Go simololwa ga yone go ne ga nna le matswela a a molemo thata mo tirong ya go rera ka Bogosi mo dinageng di le dintsi.

Go Rutiwa ke Modimo go Ruta

21. Re batla go amogela tshiamelo efe, re sa tlhokomologe boikaelelo jwa yone?

²¹ Eleruri, Jehofa o na le thulaganyo e ntle thata ya go ruta mo lefatsheng gompieno! Botlhe ba ba e solang molemo ba ka rutiwa ke Modimo, ee, ba ka nna bangwe ba batho ba ba filweng “loleme lwa ba ba rutegileng.” A bo e le tshiamelo jang ne go nna mo sekolong sa Modimo, ka tsela ya tshwantshetso! Lefa go ntse jalo, fa re amogela tshiamelo eno, ga re a tshwanela go tlhokomologa boikaelelo jwa yone. Jehofa o rutile Jesu gore a kgone go ruta ba bangwe, mme Jesu o rutile barutwa ba gagwe gore ba kgone go dira yone tiro e a neng a e dira mme jaanong e le ka selekanyo se segolwane thata. Ka tsela e e tshwanang, re thapisiwa mo thulaganyong e e molemo ya ga Jehofa ya go ruta gore re rute ba bangwe.—Johane 6:45; 14:12; 2 Bakorinthe 5:20, 21; 6:1; 2 Timotheo 2:2.

22. (a) Moshe le Jeremia ba ne ba na le bothata bofe, mme bo ne jwa rarabololwa jang? (b) Re ka tlhomamisa jang gore Modimo o tla dira gore go rerwa ga Bogosi go wediwe?

²² A le wena o bolela jaaka Moshe a ne a bolela a re, “Ga ke motho yo o itseng go bua sentle,” kana jaaka Jeremia fa a ne a re, “Ga ke itse go bua”? Jehofa o tla go thusa fela jaaka a ba thusitse. O ne a raya Moshe a re: “Ke tlaa nna le molomo wa gago.” Mme a raya Jeremia a re: “O se ka wa boifa . . . Ke na nao.” (Ekesodo 4:10-12; Jeremia 1:6-8) Fa baeteledipele ba bodumedi ba ne ba batla go didimatsa balatedi ba gagwe, Jesu o ne a re: “Fa ba, ba ka didimala, maje a tlaa akofa a goa.” (Luke 19:40) Mme lefa go ntse jalo maje ga a ka a tlhoka go goa ka nako eo, e bile ga a tlhoke go goa gone jaanong ka gonne Jehofa o dirisa loleme lwa batho ba gagwe ba ba rutegileng gore ba anamise molaetsa wa gagwe wa Bogosi.

A o Ka Araba?

◻ Isaia kgaolo 50 e gatelela kamano efe ya sekao fa gare ga Morutisi le moithuti?

◻ Jehofa o ntse a tsamaisa thulaganyo e kgolo ya go ruta jang?

◻ Dikarolo dingwe tsa thulaganyo ya ga Jehofa ya go ruta ke dife?

◻ Ke ka ntlha yang fa go nna le seabe mo thulaganyong ya ga Jehofa ya go ruta e le tshiamelo e e molemo?

[Setshwantsho mo go tsebe 16]

Dikakgelo tsa bana tse di tswang mo pelong gantsi di kgothatsa batho ba ba godileng