Bidio e re Tlhokang go e Akanyetsa ka Kelotlhoko
“Bidio eno e dira gore motho a akanye tota!”
“E ne ya nkama pelo tota!”
“Bidio eno e ne ya nkama maikutlo tota!”
1 A ke tsela e o ileng wa ikutlwa ka yone fa o se na go lebelela bidio ya Young People Ask—How Can I Make Real Friends? lekgetlho la pele? Dingwaga di le mmalwa tse di fetileng, mokaulengwe mongwe yo mosha o ne a na le mathata mo botshelong jwa gagwe, seno sotlhe e le ka ntlha ya ditsala tse a neng a di tlhophile. Di ne tsa dira gore a se ka a tlhola a kgatlhegela boammaaruri mme o ne a latlhegelwa ke kamano ya gagwe le Jehofa. Morago ga moo go ne ga gololwa bidio ya Real Friends. O ne a kwala jaana: “Fa ke ntse ke lebeletse bidio eno gangwe le gape, ke ne ka tshologa dikeledi. Ke ne ka leboga Jehofa go re neela thuso ka nako e e tshwanetseng.” Bidio eno e ne ya mo tlhotlheletsa go fetola botshelo jwa gagwe le go nna le ditsala tse di siameng. O ne a oketsa jaana: “Go a bonala gore lo itse dilo tse di amang basha.” Batsadi le basha, ke eng fa lo sa lebelele bidio eno gape mo thutong ya lona e e latelang ya lelapa? Emisang bidio eno morago ga karolo nngwe le nngwe, mme lo tlotle mmogo ka dipotso tse di mo dirapeng tse di latelang.
2 Matseno: Tsala ya boammaaruri ke motho yo o ntseng jang?—Dia. 18:24.
3 Dilo Tse di Kgoreletsang Botsala: O ka fenya jang go ikutlwa o kgapetswe kwa thoko? (Bafil. 2:4) Ke ka ntlha yang fa o tshwanetse go iketleeletsa go tokafatsa botho jwa gago mme ke bomang ba ba ka go thusang go dira jalo? Ke eng se se ka go bulelang ditshono tsa go nna le ditsala tse dintsi, mme o ka di bona kae?—2 Bakor. 6:13.
4 Go Nna Tsala le Modimo: O ka nna jang tsala le Jehofa mme ke ka ntlha yang fa go le molemo go dira jalo? (Pes. 34:8) Ke mang yo o ka go thusang botoka go nonotsha botsala jwa gago le Modimo?
5 Ditsala Tse di sa Siamang: Ditsala tse di sa siamang ke batho ba ba ntseng jang? (1 Bakor. 15:33) Ditsala tse di sa siamang di ka senya bomoya jwa motho jang? Pego ya Baebele ka Dina e go ruta eng?—Gen. 34:1, 2, 7, 19.
6 Terama ya Motlha wa Gompieno: Bodutu bo ne jwa ama Tara jang? O ne a buelela go tlwaelana ga gagwe le basha ba lefatshe jang? Ba ne ba mo tsenya mo dikotsing dife? Ke ka ntlha yang fa batsadi ba gagwe ba ne ba se ka ba bona kotsi e a neng a le mo go yone, mme ba ne ba nna le boikutlo bofe fa ba ne ba mo thusa gore a boe a nonofe gape semoyeng? Kgaitsadi mongwe wa mmulatsela o ne a supa jang gore e ne e le tsala ya mmatota ya ga Tara? Ke ka ntlha yang fa Bakeresete ba tshwanetse go tsaya Diane 13:20 le Jeremia 17:9 tsia? Tara o ne a ithuta thuto efe e e botlhokwa?
7 Konelo: O ithutile dithuto dife mo bidiong eno? O ka e dirisa jang go thusa ba bangwe?—Pes. 71:17.