Bidio ya Jehovah’s Witnesses—Organized to Share the Good News
Mo dingwageng tse di fetang 100, Basupi ba ga Jehofa ba ntse ba rulaganyeditswe go rera dikgang tse di molemo. Mo go se e nnileng letsholo le legolo go gaisa mo lefatsheng, re rera molaetsa ono ka dipuo di le makgolokgolo le mo dinageng tse di fetang 230. (Math. 24:14) Ke eng fa go tlhokega gore tiro eno e dirwe? E dirwa jang go ralala lefatshe? Bidio ya Jehovah’s Witnesses—Organized to Share the Good News e araba dipotso tseno ka go tlhalosa ka botlalo dikarolo tse dintsi tsa tiro e re e dirang mo lefatsheng lotlhe. Fa o sena go lebelela bidio eno, araba dipotso tse di latelang.
Bidio eno e go thusitse jang gore o tlhaloganye le go anaanela (1) maiteko a phuthego ya ga Jehofa e a dirang gore go rerwe dikgang tse di molemo? (2 Tim. 4:2) (2) malapa a Bethele go ralala lefatshe? (3) thapiso e e newang balebedi le barongwa? (2 Tim. 2:2) (4) botlhokwa jwa go simolola letsatsi lengwe le lengwe ka go sekaseka temana ya Baebele le go baakanyetsa dipokano tsa phuthego beke le beke? (Dit. 17:11) (5) melemo ya go nna gone mo dipokanong tsa rona tsa Bokeresete? (Baheb. 10:24, 25) (6) masego a o tla nnang le one fa lefatshe e nna Paradaise gape? (Isa. 11:9) (7) tshiamelo ya go nna le seabe mo tirong e e tswelelang pele ya thobo?—Joh. 4:35.
Bidio eno e itshupile e le sedirisiwa se se molemolemo sa go dira gore batho ba ba kgatlhegang ba tlwaelane le tiro e e dirwang ke Basupi ba ga Jehofa mo lefatsheng lotlhe. (8) Ke leng go tla bong go le molemo gore re bontshe batho ba re ithutang Baebele le bone, ba masika le batho ba bangwe bidio eno? (9) Batho ba ile ba tsiboga jang ka tsela e e molemo fa o ne o ba bontsha bidio eno?
Fa re ntse re akanya ka se Jehofa a se fitlhelelang, re tlhotlheletsega go bua mafoko ano a a tshwanang le a mopesalema: “O dirile dilo di le dintsi, wena Jehofa Modimo wa me, le eleng ditiro tsa gago tse di gakgamatsang le dikakanyo tsa gago mo go rona; ga go na ope yo o ka tshwantshiwang le wena.” (Pes. 40:5) E kete re ka dirisa bidio eno ka tsela e e molemo go thusa batho ba bangwe gore ba anaanele Jehofa le phuthego ya gagwe!