bone ba kgone go itsise mokaulengwe yo o tshwarang dibuka. Tsweetswee gakologelwang gore ke dikgatiso dife tse e leng dilwana tsa dikopo tse di kgethegileng.

◼ Dikgatiso Tse Disha Tse di Leng Gone:

Ela Tlhoko Boporofeti Jwa ga Daniele! (Mokwalo o Mogolo)—Seesemane, Sepotokisi le Se-China se se Tlhofofaditsweng (Pinyin)

Thanolo ya Lefatshe le Lesha ya Dikwalo Tse di Boitshepo (e kgolo)—Se-China se se Tlhofofaditsweng (Pinyin)

◼ Dikhasete Tsa Bidio Tse Disha Tse di Leng Gone:

Sing Praises to Jehovah—On Videocassette, Volume 3—Puo ya Diatla ya Amerika

◼ Di-DVD Tse Disha Tse di Leng Gone: Sing Praises to Jehovah—On DVD, Volume 3—Puo ya Diatla ya Amerika

Karolo 6: Fa Moithuti a Botsa Potso

Go Tshwara Dithuto Tsa Baebele Tse di Gatelang Pele

¹ Fa thuto ya Baebele e setse e tshwarwa ka metlha, gantsi go botoka gore dithuto tsa Baebele di ithutiwe ka go latelana go na le gore go buiwe ka dilo di le dintsi ka nako e le nngwe. Seno se thusa moithuti gore a nne le kitso ya boammaaruri le go gatela pele semoyeng. (Bakol. 1:9, 10) Le fa go ntse jalo, gantsi baithuti ba botsa dipotso tse di farologaneng fa go tshwerwe thuto. Ke eng se se tshwanetseng sa dirwa mo kgannyeng eno?

² Nna le Temogo: Dipotso tse di amanang le se se ithutiwang gantsi di ka arabiwa ka yone nako eo. Fa e le gore go tla tlotliwa ka potso eo moragonyana mo bukeng, o ka nna wa mo tlhalosetsa jalo fela. Le fa go ntse jalo, fa potso e sa amane le se se ithutiwang kana go tla tlhokega gore go dirwe dipatlisiso go araba potso eo sentle, go ka nna botoka go tlotla ka kgang eo morago ga thuto kana ka nako e nngwe. Bangwe ba fitlhela gore go kwala potso go dira gore moithuti a tlhomamisege gore potso ya gagwe e tsewa masisi mme gape go thusa le gore lo se ka lwa tlhoma mogopolo mo dintlheng tse di sa amaneng le thuto.

³ Dithuto di le dintsi tsa Baebele di tlotlwa fela ka bokhutshwane mo dikgatisong tse re ithutang Baebele le batho ka tsone. Go tweng fa e le gore moithuti o na le bothata jwa go dumela thuto nngwe kana ga a kgone go tlogela tumelo nngwe ya maaka? Go ka nna mosola gore re bale kgatiso nngwe e e tlhalosang sentle gore Baebele ya reng ka kgang eo. Fa e le gore moithuti ga a ise a tlhatswege pelo le ka nako eo, tswelelang ka thuto mme lo tlotle ka kgang eo ka nako e nngwe. (Joh. 16:12) Fa kitso ya gagwe ya Baebele e ntse e oketsega e bile a gatela pele semoyeng, a ka nna a simolola go tlhaloganya dithuto tsa Baebele.

⁴ Nna Boikokobetso: Fa o sa tlhomamisega ka karabo ya potso nngwe, o se ka wa e araba ka tsela e wena o akanyang ka yone. (2 Tim. 2:15; 1 Pet. 4:11) Mo tlhalosetse gore o tla e batlisisa mme o boe go tla go araba potso eo. Gongwe o ka dirisa tshono eo go ruta moithuti kafa a ka dirang dipatlisiso ka gone. Fa nako e ntse e ya, mmontshe kafa a ka dirisang dilwana tse di farologaneng tse re dirang dipatlisiso ka tsone tse re di neilweng ke phuthego ya ga Jehofa. Ka go dira jalo kgabagare moithuti o tla kgona go araba dipotso tse a nang le tsone.—Dit. 17:11.

Kafa re ka Buelelang Dimakasine ka Gone

Tora ya Tebelo Feb. 15

“Ka dinako tse dingwe re utlwa dipego tse mo go tsone go tweng go diragetse kgakgamatso. [Umaka sekai sengwe.] Batho bangwe ba dumela dipego tseno. Ba bangwe ba a di belaela. Makasine ono o sekaseka gore a tota dikgakgamatso tse di kwadilweng mo Baebeleng di ile tsa direga le gore a dilo tse di ntseng jalo di a direga gompieno.” Bala Jeremia 32:21.

Tora ya Tebelo Mar. 1

“A o akanya gore lefatshe le ka bo le le botoka fa mongwe le mongwe a ne a dirisa kgakololo eno? [Bala Baroma 12:17, 18. Morago ga moo, mo letle gore a arabe.] Ka maswabi, ka dinako tse dingwe batho ga ba utlwane. Makasine ono o bontsha kafa go dirisa kgakololo ya Baebele go ka re thusang go rarabolola dikgotlhang ka gone le go dira kagiso.”

Tsogang! Mar. 8

“Mo dinakong tsa bogologolo, Modimo o ne a laela bana gore ba tlotle bommaabone mmogo le borraabone. [Bala Ekesodo 20:12.] A o akanya gore bommè ba tlotlwa ka tsela e e tshwanetseng gompieno? [Mo letle gore a arabe.] Makasine ono o sekaseka dikgwetlho tse bommè ba ba mo dinageng tse di farologaneng ba lebaneng le tsone le kafa ba lepalepanang le tsone ka teng.”

“Ngwaga le ngwaga, batho ba tlhoka maatla a a oketsegileng a motlakase. O akanya gore go ne go tla diregang fa letsatsi lengwe maatla otlhe a motlakase a re a tlhokang a ne a ka fela? [Mo letle gore a arabe.] Makasine ono o bua ka kgatelopele e e dirilweng go dira gore go nne le metswedi e e phepa ya maatla ano. E tlhalosa gape gore Motswedi wa maatla otlhe ke mang.” Bala Isaia 40:26.