Ko e Hā ʻa e ʻUhinga ke Fakamolemole Aí?
“KUO kamata ʻe he kau faisaienisí ʻa e fekumi ʻa ia kuo kamata ke fakahaaʻi ai ko e fakamolemolé ʻoku malava ke ne fakatupulekina ʻa e moʻui lelei—fakaeongó pea mātuʻaki malava—fakaesino,” ko e līpooti ia ʻa e Toronto Star ʻo Kānatá. Neongo ia, ko Palōfesa Carl Thoresen ʻo e ʻUnivēsiti Stanford, U.S.A., ko e tokotaha fekumi ʻoku takimuʻa ʻi he Stanford Forgiveness Project, naʻá ne tohi ʻoku “tokosiʻi ʻaupito ʻa e kakai ʻoku nau mahinoʻi pe ko e hā ʻa e fakamolemolé pea mo e anga ʻo ʻene ngaahi ngāué.”
ʻOku vakai ki he fakamolemole moʻoní ko ha tafaʻaki mātuʻaki mahuʻinga ia ʻo e lotu faka-Kalisitiané. ʻOku fakamatalaʻi ia ʻe he līpooti ʻa e The Toronto Star “ko hono ʻiloʻi kuo fai mai ha hala kiate koé, liʻaki kotoa ʻa e loto-ʻita ʻoku tupu mei aí, pea faai atu pē ʻo taliʻaki ki he tokotaha fakatupu ʻitá ʻa e manavaʻofa pea naʻa mo e ʻofá.” Kuo pau ke fakafaikehekeheʻi ia mei he loto pē ke fakatonuhiaʻí, fakaʻatā mei ha hala, fakangaloʻi, pe ko hono fakaʻikaiʻi ha fakalotomamahi; pea ʻoku ʻikai ʻuhinga iá ko hono ʻai kita ki ha tuʻunga ke ngāuekovia. ʻOku pehē ʻe he līpōtí ko e kī ki he fakamolemole moʻoní ko e “tukuange atu ʻa e ʻitá pea mo e ngaahi ongoʻi taʻepaú.”
ʻOku pehē ʻe he kau fekumí ʻoku fiemaʻu ʻa hono sivisiviʻi lahi ange ʻo e ngaahi ʻaonga fakaesino ʻo e fakamolemolé. Kae kehe, ʻoku nau līpooti mai ʻa e ngaahi ʻaonga fakaeʻatamai, ʻo kau ai ʻa e “siʻi ange ʻo e loto-taʻomiá, loto-moʻuá mo e loto-mafasiá.”
Ko ha ʻuhinga māʻolunga ki he hoko ʻo fakamolemolé ʻoku fakahaaʻi mai ia ʻi he Efeso 4:32, ʻa ia ʻoku pehē: “Mou angaʻofa muʻa ʻi hoʻomou feangai, mo manavaʻofa, pea mou fefakamolemoleʻaki, ʻo hange foki ko e ʻOtua ne ne fakamolemole kimoutolu ʻia Kalaisi.” (Fakaʻītali ʻamautolu.) ʻI he fekauʻaki mo e fakamolemolé, ʻo hangē ko ia ʻi he ngaahi tafaʻaki kehé, ʻoku enginakiʻi kitautolu ke tau hoko ko e kau faʻifaʻitaki ki he ʻOtuá.—Efeso 4:32 (5:1, PM).
Ko e fakafisi ke fakamolemoleʻi ʻa e niʻihi kehé ʻi he taimi ʻoku ʻi ai ai ha makatuʻunga ki he mēsí te ne lava ke uesia kovi ai hotau vahaʻangatae tonu mo e ʻOtuá. ʻOku ʻamanekina mai ʻe Sihova kitautolu ke tau fefakamolemoleʻaki. Pea te tau malava leva ai ʻo lotu pea te ne fakamolemoleʻi kitautolu.—Mātiu 6:14; Maake 11:25; 1 Sione 4:11.