HOSEYA
1 Yehova wangulongoro ndi Hoseya* mwana waku Beri mu mazuŵa ngaku Uziya,+ Yotamu,+ Ahazi+ ndi Hezekiya,+ mafumu nga ku Yuda+ ndipuso mu mazuŵa ngaku Yerobowamu+ mwana waku Yowashi,+ fumu ya ku Isirayeli. 2 Yehova wati wayamba kulongoro mazu ngaki kuporote mwaku Hoseya, Yehova wangukambiya Hoseya kuti: “Luta, ukato munthukazi yo wazamuchita uhuli,* ndipu iyu wazakukubaliya ŵana a uhuli,* pakuti charu ichi chaleke limu kulondo Yehova chifukwa cha uhuli.”*+
3 Mwaviyo, Hoseya wanguluta ndipu wanguchito Gomeri mwana munthukazi waku Dibilayimu. Gomeri wangume nthumbu ndipu wangubala mwana munthulumi.
4 Pavuli paki, Yehova wangukambiya Hoseya kuti: “Mwana yo umudani zina lakuti Yezereli, pakuti kwaja kamanavi kuti ndimbi mulandu nyumba yaku Yehu+ chifukwa cha kudira ndopa kwaku Yezereli, ndipu ndazamumalisa ulamuliru wa nyumba yaku Isirayeli.+ 5 Mu zuŵa lo, ndazamufyo uta waku Isirayeli mu Dambu la* Yezereli.”
6 Gomeri wangume so nthumbu ndipu wangubala mwana munthukazi. Ndipu Chiuta wangukambiya Hoseya kuti: “Mwana yo umudani zina lakuti Lo-ruhama,* chifukwa chakuti nyumba yaku Isirayeli ndazakuyilongo so lisungu cha,+ pakuti ndazakuŵadikisiya kutali.+ 7 Kweni nyumba yaku Yuda+ ndazakuyilongo lisungu ndipu ini Yehova Chiuta wawu ndazakuŵataska;+ ndazakuŵataska ndi uta cha pamwenga lipanga, pamwenga nkhondu, pamwenga mahachi, pamwenga ŵanthu akukwera pamahachi.”+
8 Gomeri wati walumula Lo-ruhama, wangume so nthumbu yinyaki ndipu wangubala mwana munthulumi. 9 Pavuli paki, Chiuta wangukambiya Hoseya kuti: “Mwana yo umudani zina lakuti Lo-ami,* chifukwa chakuti ndimwi ŵanthu ŵangu cha ndipu ini ndazamuja winu cha.
10 “Ndipu Ayisirayeli azamuja anandi nge mchenga wa kunyanja, wo ungapimika cha pamwenga kuŵerengeka.+ Pamalu ngo ndinguŵakambiya kuti, ‘Ndimwi ŵanthu ŵangu cha,’+ ndazakuŵakambiya kuti, ‘Ndimwi ŵana aku Chiuta wamoyu.’+ 11 Ŵanthu a ku Yuda ndi a ku Isirayeli azamuwunganisika pamoza kuti aje amoza,+ ndipu azakujisankhiya mulongozgi yumoza ndi kutuwamu mucharu cho, pakuti zuŵa laku Yezereli lazamukuŵa likulu.+
2 “Kambiyani abali ŵinu kuti, ‘Ŵanthu ŵangu!’*+
Ndipu kambiyani azichi ŵinu kuti, ‘Munthukazi yo walongoreka lisungu!’*+
2 Mbani mulandu nyinamwi; mumbeni mulandu,
Pakuti iyu ndi muwolu wangu cha+ ndipu ini nde mulumu waki cha.
Watuzgeku uhuli* waki kwaku iyu mweneku
Ndipuso watuzgepu chigololu chaki pakati pa maŵe ngaki,
3 Asani walekengi kuchita viyo, ndazakumuzuwa kuti waje nkhuli kweniso ndazakumuchitiska kuti waje nge mo wenge pa zuŵa lo wanguwiya,
Ndazakumuchitiska kuti waje nge chipululu,
Ndazakumusambusa charu chambula maji,
Ndipu ndazakumubaya ndi nyota.
4 Ŵana ŵaki ndazakuŵalongo lisungu cha,
Chifukwa mbana a uhuli.*
5 Pakuti nyinawu wachita uhuli.*+
Munthukazi yo wakuŵabala wachita vinthu vakulengesa,+ pakuti wangukamba kuti,
‘Ndilondongi vibwezi vangu,+
Ŵanthu wo atindipaska chiŵandi kweniso maji,
Vakuvwala vaweya wa mbereri kweniso vasalu, mafuta ndipuso vinyu.’
6 Mwaviyo, ndazamujala nthowa yaku ndi mpanda waminga;
Ndipu ndazakumuzenge mpanda wamya,
Kuti waleki kusaniya nthowa zaki.
7 Wazamutchimbiriya vibwezi vaki, kweni wazakuviko cha;+
Wazakuvipenjapenja kweni wazakuvisaniya cha.
Pavuli paki, wazamukamba kuti, ‘Ndiweriyengi ku mulumu wangu wakwamba,+
Pakuti vinthu vandiyendiyanga umampha pa nyengu yeniyo kuluska sonu.’+
8 Wanguziŵa cha kuti ini ndini ndingumupaska mbewu,+ vinyu wasonu ndipuso mafuta,
Ndipuso wanguziŵa cha kuti ini ndini ndingumupaska siliva munandi
Kweniso golidi yo angumugwiriskiya ntchitu pakusopa Bala.+
9 ‘Mwaviyo, ndazamuwelere ndi kuto mbewu zangu mu nyengu yaki
Ndipuso vinyu wasonu mu nyengu yaki,+
Ndazamuphanga vakuvwala vangu vaweya wa mbereri kweniso vasalu vo vabisanga nkhuli yaki.
10 Viŵalu vaki vakubisika ndazakuviŵika pakweru kuti vibwezi vaki viwoni,
Ndipu palivi munthu yo wazakumutaska mu janja langu.+
11 Ndazamumalisa likondwa laki losi,
Maphwandu ngaki,+ myezi yaki yifya, masabata ngaki ndipuso nyengu zaki zosi za maphwandu.
12 Ndazamunanga vimiti vaki va mphereska kweniso va mkuyu, vo wakamba kuti:
“Vimiti ivi ndi malipiru ngangu, ngo vibwezi vangu vikundipaska”;
Ndazakuvisambusa lisuwa,
Ndipu nyama zamudondu zazakuvimeza.
13 Ndazakumumba mulandu chifukwa cha mazuŵa ngo waperekanga sembi ku vikozgu vaku Bala,+
Po wajidyoŵanga ndi mpheti kweniso vakujitowese ndi kulondo vibwezi vaki,
Ndipu iyu wanguluwa ini,’+ Yehova ndiyu wakamba.
14 ‘Mwaviyo, ndazakumunyengere,
Ndazakumulongozge muchipululu,
Ndipuso ndazamulongoro nayu kuti ndimuchonthi mtima.
15 Ndazakumuweze minda yaki ya mphereska kutuliya nyengu yeniyo mpaka munthazi,+
Ndipu ndazakumupaska Dambu la* Akori+ nge geti la chilindizga;
Iyu wazakundimuka kweniko nge mo wanguchitiya mu mazuŵa nga usungwana waki,
Nge mo wanguchitiya pa zuŵa lo wangutuliya mucharu cha Ijipiti.+
16 Pa zuŵa lenilo,’ Yehova ndiyu wakamba,
‘Wazakundidana kuti mulumu Wangu, ndipu wazakundidana so kuti Ambuya* cha.’
17 ‘Ndazamutuzgamu mazina nga vikozgu vaku Bala mumulomu mwaku,+
Ndipu mazina nga vikozgu vo ngazamukumbukika so cha.+
18 Mu zuŵa lo, ndazamuchita phanganu ndi vinyama vamudondu kuti ndiŵawovyi,+
Ndazamuchita phanganu ndi viyuni vamude kweniso vamoyu vo vikwaŵa pacharu chapasi;+
Mucharu cho ndazamutuzgamu uta, lipanga kweniso nkhondu,+
19 Ndazakukulayizga kuti ndikutongi nthengwa kuti uzije wangu mpaka muyaya;
Ndipu ndazakukulayizga kuti ndikutongi nthengwa mwakukoliyana ndi urunji, cheruzgu chakunyoloka,
Chanju chambula kumala kweniso lisungu.+
20 Ndazakukulayizga kuti ndikutongi nthengwa mwakugomezgeka,
Ndipu wazakumuziŵa nadi Yehova.’+
21 ‘Mu zuŵa lenilo ndazamumuka,’ Yehova ndiyu wakamba,
‘Ndazamumuka machanya,
Ndipu machanya ngazamumuka charu chapasi;+
22 Charu chapasi chazamumuka mbewu, vinyu wasonu kweniso mafuta;
23 Ndazakumupanda nge mbewu yangu pacharu chapasi,+
Ndazamulongo lisungu munthukazi yo wangulongoreka lisungu cha;*
Ndazamukambiya ŵanthu wo ŵenga ŵangu cha* kuti: “Ndimwi ŵanthu ŵangu,”+
Ndipu yiwu azamukamba kuti: “Ndimwi Chiuta widu.”’”+
3 Pavuli paki, Yehova wangundikambiya kuti: “Luta so, kayanji munthukazi yo wayanjika ndi munthulumi munyaki kweniso yo wachita chigololu,+ nge mo Yehova watanjiya Ayisirayeli+ wo ang’anamukiya kwa achiuta anyaki+ ndipuso wo atanja makeki nga mphereska zakumira.”*
2 Mwaviyo, ndingumugula ndi ndalama 15 zasiliva kweniso ndi balire wakukwana mwesu umoza ndi hafu wa homeri.* 3 Pavuli paki, ndingumukambiya kuti: “Ujengi wangu kwa mazuŵa nganandi. Ungachitanga uhuli* cha, ndipuso ungagonananga ndi munthulumi munyaki cha, ndipu nani ndigonanengi nawi cha.”*
4 Ve viyo chifukwa chakuti kwa nyengu yitali* Ayisirayeli azamuja kwambula fumu,+ kwambula mulongozgi, kwambula sembi, kwambula ntchindamilu, kwambula efodi+ ndipuso kwambula vikozgu va aterafi.*+ 5 Pavuli paki, Ayisirayeli azamuwelere ndi kupenja Yehova Chiuta wawu+ kweniso Davidi fumu yawu,+ ndipu mu mazuŵa ngakumaliya azamukuza kwaku Yehova achimbwambwanthiya kuti waŵachitiyi vinthu vamampha.+
4 Vwani mazu ngaku Yehova, yimwi Ayisirayeli,
Pakuti Yehova watumba mulandu ŵanthu wo aja mucharu ichi,+
Chifukwa chakuti mucharu ichi mulivi uneneska, chanju chambula kumala ndipuso ŵanthu atimuziŵa cha Chiuta.+
2 Kulapizga vinthu vaboza, kupusika,+ kubaya ŵanthu,+
Kuba, chigololu,+ ve peposi,
Ndipu nyengu zosi ŵanthu adira ndopa.+
3 Ndichu chifukwa chaki charu cho chazamuliya+
Ndipu munthu weyosi yo waja mwenimo wazamuwonda;
Nyama zamudondu, viyuni vamude,
Kweniso somba za munyanja, vazamumala.
4 “Kweni munthu weyosi wangasuskanga munyaki cha pamwenga kumuchenya.+
Pakuti mwe nge ŵanthu wo asuskana ndi wasembi.+
5 Mwaviyo, mwazamuguŵa lumwi le nyee,
Mchimi wazamuguŵiya namwi limoza, nge kuti mbusiku.
Ndipu ndazamuchetamisa* nyinamwi.
6 Ŵanthu ŵangu azamuchetamisika* chifukwa chakuti atindiziŵa cha.
Pakuti mwakana kundiziŵa,+
Nani so ndazakukukanani ndipu mwazakunditeŵete cha nge asembi;
Ndipuso chifukwa chakuti mwaluwa dangu laku* Chiuta winu,+
Nani so ndazamuluwa ŵana ŵinu.
7 Po ayandananga ukongwa, andibudiyanga so ukongwa.+
Unkhankhu wawu ndazakuwusambusa chilengesu.*
8 Yiwu aturya ubudi wa ŵanthu ŵangu,
Ndipu akhumba kuti ŵanthu abudiyengibudiyengi.
9 Vo vazamuchitikiya ŵanthu ndivu so vazamuchitikiya wasembi;
Ndazakuŵamba mulandu chifukwa cha nthowa zawu,
Ndipu ndazakuŵalanga mwakukoliyana ndi vakuchita vawu.+
10 Azamukurya kweni azamuguta cha.+
11 Uhuli,* vinyu kweniso vinyu wasonu
Vichitiska kuti munthu waleki kuja ndi mtima wakukhumba kuchita cho ntchamampha.*+
12 Ŵanthu ŵangu afumba ku vikozgu vawu vavimiti,
Achita vo nthonga* yitiŵakambiya;
Chifukwa chakuti jalidu la uhuli* litiŵalandizga,
Ndipu chifukwa cha uhuli* wawu akana kujithereska kwaku Chiuta.
13 Yiwu apereka sembi pachanya pa mapiri,+
Ndipuso atotcha sembi kuti zisunkhi josi pamitunthu,
Kusi kwa vimiti va oku, vimiti va sitorakisi kweniso chimiti chechosi chikulu,+
Chifukwa chakuti ve ndi mduzi wamampha.
Ndichu chifukwa chaki ŵana ŵinu anthukazi achita uhuli*
Ndipuso akumwana ŵinu achita chigololu.
14 Ndazamukumba mulandu ŵana ŵinu anthukazi chifukwa cha uhuli* wawu,
Ndipuso ndazamukumba mulandu akumwana ŵinu chifukwa cha chigololu chawu.
Pakuti anthulumi atoriyana kwakuŵija ndi mahuli
Ndipu apereka sembi ndi mahuli nga panyumba yakusopiyamu;
Ŵanthu ambula kuvwisa vinthu+ ŵenaŵa azamumala.
Mungazanga ku Giligala cha+ pamwenga ku Beti-aveni,+
Ndipu mungalapizganga cha kuti, ‘Nge mo Yehova waliri wamoyu!’+
16 Isirayeli waja ndi mtafu, nge ng’ombi yamtafu.+
Kumbi Yehova waŵaliskengi nge mwana wa mbereri munthulumi pamalu ngakuliskapu viŵetu ngasani?
17 Efurayemu wakoliyana ndi angoza.+
Mulekeni!
Ndipu alongozgi ŵaki atanja* vinthu vakuchitiska soni.+
19 Mphepu yazakumuvunga* mumapapa ngaki
Ndipu azamuchita soni chifukwa cha sembi zawu.”
5 “Vwani ivi, yimwi asembi,+
Khazaniku gutu, yimwi a munyumba yaku Isirayeli,
Vwisiyani, yimwi a munyumba ya fumu,
Pakuti cheruzgu chikwaska yimwi;
Chifukwa ndimwi chiŵana ku Mizipa
Kweniso ndimwi chilepa cho chabenekere Tabori.+
3 Efurayemu nditimuziŵa,
Ndipu Isirayeli wabisika cha kwaku ini.
4 Vo achita vitiŵazomereza cha kuti awere kwaku Chiuta wawu,
Chifukwa chakuti pakati pawu pe jalidu la uhuli;*+
Ndipu atimuziŵa cha Yehova.
5 Kunyada kwaku Isirayeli kwamuchitiya ukaboni;+
Isirayeli ndi Efurayemu aguŵa chifukwa cha kunanga kwawu,
Ndipu Yuda nayu waguŵiya nawu limoza.+
6 Yiwu anguluta kuchipenja Yehova ndi mbereri kweniso ng’ombi zawu,
Kweni angumusaniya cha.
Iyu wangutuwaku kwaku yiwu.+
7 Yiwu agomezgeka cha kwaku Yehova,+
Pakuti abala ŵana achilendu.
Sonu mwezi wazakuŵameza limoza ndi vihara vawu.*
8 Mbani sengwi+ mu Gibeya, mbani mbata* mu Rama!+
Danirizani chiwawa cha nkhondu pa Beti-aveni,+ danjiyapu yiwi Benjamini!
9 Yiwi Efurayemu, wazamusambuka chinthu chakuchitiska mantha mu zuŵa la chilangu.+
Ndaziŵisa mafuku ngaku Isirayeli vo vazamuchitika.
10 Alongozgi a ku Yuda ŵe nge ŵanthu wo andereza mphaka.+
Ndazakuŵapunguliya ukali wangu nge maji.
11 Efurayemu wakandirizgika, wapwetekeka ndi cheruzgu,
Pakuti wangusimikiza mtima kulondo murwani waki.+
12 Mwaviyo, ndenga nge nyenji* kwaku Efurayemu
Ndipuso ndenga nge chinthu chakuvunda ku nyumba ya ku Yuda.
13 Efurayemu wati wawona kuti watama, ndipu Yuda wati wawona kuti we ndi chilonda,
Efurayemu wanguluta kucharu cha Asiriya+ ndipuso wangutuma uthenga ku fumu yikulu.
Kweni yingutondeka kukuchizgani,
Ndipu yingupozga cha chilonda chinu.
14 Pakuti ndijengi nge nkharamu yimana* kwaku Efurayemu,
Ndipu ku nyumba yaku Yuda ndijengi nge nkharamu yanthazi.
15 Ndazamuluta ndi kuwere kumalu ngangu mpaka po alangikiya chifukwa cha kunanga kwawu,
Ndipu pavuli paki, azakundipenja kuti ndiŵachitiyi lisungu.*+
Azakundipenja asani azikumana ndi masuzgu.”+
6 “Zani, tiyeni tiwere kwaku Yehova,
Pakuti iyu watipaluwapaluwa,+ kweni wazakutichizga.
Wangutipweteka, kweni wazamumanga vilonda vidu.
2 Asani pajumpha mazuŵa ngaŵi, wazakutipaska nthazi.
Pa zuŵa lachitatu wazakutiyuska,
Ndipu tazamuja ndi umoyu pa masu paki.
3 Tazamuziŵa, tazamufwiyapu kuti tiziŵi Yehova.
Iyu watondekengi cha kuza nge matandakucha;
Wazamukuza kwaku isi nge vuwa yo yituwa,
Nge vuwa yakumaliya yo yizumbwisa charu.”
4 “Kumbi ndichitenji nawi yiwi Efurayemu?
Ndichitenji nawi yiwi Yuda?
Pakuti chanju chinu chambula kumala che nge mitambu ya kumlenji,
Che nge dungwi lo liswera cha kukamuka.
5 Ndichu chifukwa chaki ndazakuŵadumuliya pasi mwakugwiriskiya ntchitu achimi;+
Ndazakuŵabaya ndi mazu nga mumulomu mwangu.+
Ndipu vyeruzgu vangu vazamuŵala paku yiwi nge ukweru.+
6 Pakuti ndikondwa ndi sembi cha, kweni ndikondwa ndi chanju chambula kumala,*
Ndipuso ndikondwa ndi sembi zakupiriza zamphumphu cha, kweni ndikondwa ndi kuziŵa Chiuta.+
7 Kweni yiwu nge ŵanthu ŵaka, aswa phanganu.+
Agomezgeka cha kwaku ini.
9 Gulu la asembi le nge gulu la vigeŵenga lo likhaza ŵanthu.
Abaya ŵanthu pa nthowa ku Sekemu,+
Pakuti jalidu lawu ndakuchitiska soni.
10 Ndawona vinthu vaukazuzi vo vichitika munyumba yaku Isirayeli.
11 Kweniso yiwi Yuda, nyengu yakuti uvuniki yaŵikika,
Nyengu yo ndazamuwunganisa so ŵanthu ŵangu wo akutoleke ku ukapolu.”+
7 “Pa nyengu yo ndikhumba kuchizga Isirayeli,
Kunanga kwaku Efurayemu kuvumbulika,+
Uheni waku Samariya+ nawu so uvumbulika.
Pakuti achita vinthu mwachinyengu;+
Ankhungu atuswa nyumba ndipuso magulu nga vigeŵenga ngananga vinthu kubwalu.+
2 Kweni akamba cha mumtima mwawu kuti ndazamukumbuka uheni wawu wosi.+
Sonu vo achita vaŵazunguliya;
Ve pa masu pangu.
3 Yiwu akondwesa fumu ndi uheni wawu,
Ndipuso akondwesa alongozgi ndi chinyengu chawu.
4 Wosi mbachigololu,
Akole nge motu wa mu uvunu wo wapembeka ndi wakupanga viŵandi,
Yo asani wakasa fulawu waleka kusonkha motu mpaka po fulawu yo watutumukiya.
5 Pa zuŵa la fumu yidu, alongozgi atama,
Yiwu akwiya ukongwa chifukwa cha vinyu.+
Fumu yatambasuliya janja laki ŵanthu akunyoza.
6 Pakuti yiwu atuza ndi mitima yakukole nge motu wa mu uvunu.*
Wakupanga viŵandi wagona usiku wosi;
Ndi mlenji uvunu ukole nge motu wo ulipuka.
7 Wosi akole nge motu wa mu uvunu,
Ndipu ameza alongozgi* ŵawu.
8 Efurayemu wasazgikana ndi ŵanthu amitundu yinyaki.+
Efurayemu we nge chiŵandi chakuzunguliya chambula kung’anamuwa.
9 Alendu amala nthazi zaki,+ kweni iyu waziŵa cha.
Kumutu kwaki kwe nyivu* zinandi, kweni iyu waziŵa cha.
10 Kunyada kwaku Isirayeli kwamuchitiya ukaboni,+
Kweni awere cha kwaku Yehova Chiuta wawu,+
Ndipuso amupenja cha chinanga kuti vosi ivi vaŵachitikiya.
11 Efurayemu we nge njiŵa yakupusa, yambula zeru.+
Yiwu apempha chovyu ku Ijipiti;+ aluta kucharu cha Asiriya.+
12 Kwekosi ko azamuluta ndazakuŵabenekere ndi chilepa changu.
Ndazakuŵawisiya pasi nge viyuni vamude.
Ndazakuŵalanga mwakukoliyana ndi vo ndingutcheŵesa gulu lawu.+
13 Soka kwaku yiwu, pakuti athaŵaku kwaku ini!
Yiwu azamubwangandulika pakuti andinangiya!
Ndenga wakunozgeka kuŵawombo, kweni akamba vinthu vaboza vakukwaskana ndi ini.+
14 Yiwu angundipempha ndi mtima wosi cha kuti ndiŵawovyi,+
Chinanga kuti aliyanga pamabedi ngawu.
Pakuti atijicheka chifukwa cha chakurya kweniso vinyu wasonu;
Yiwu atindigarukiya.
15 Chinanga kuti ndinguŵalanga ndi kukholesa manja ngawu,
Yiwu andiyukiya, anozga chiŵembu.
16 Yiwu angung’anamuka, kweni angung’anamukiya ku chinthu chapachanya cha;*
Ŵenga ambula kuthembeka nge uta wakulepetuka.+
Alongozgi ŵawu azamubayika ndi lipanga chifukwa cha malilimi ngawu ngamtafu.
Chifukwa cha venivi, azamusambuka chinthu chakunyozeka mucharu cha Ijipiti.”+
8 “Ŵika mbata* kumulomu kwaku!+
Munthu munyaki watuza nge nombu kuti waziyukiyi nyumba yaku Yehova,+
Pakuti yiwu aswa phanganu langu+ ndipuso anangiya dangu langu.+
2 Yiwu atindiliriya, akamba kuti, ‘Chiuta widu, isi Ayisirayeli titikuziŵani!’+
3 Isirayeli wakana cho ntchamampha.+
Mwaviyo, murwani wamutchimbizi.
4 Yiwu asankha mafumu, kweni kuziya mwaku ini cha.
Asankha alongozgi, kweni ini ndaŵaziŵanga cha.
5 Tholi* laku ndalikana, yiwi Samariya.+
Ukali wangu wakole paku yiwu.+
Kumbi aŵengi ndi mulandu mpaka zuŵanji?*
6 Pakuti ichi chatuliya ku Isirayeli.
Chikupangika ndi munthu walusu, ndi Chiuta cha;
Tholi la ku Samariya lazamuvikitika.
7 Pakuti yiwu amija mphepu,
Ndipu azamuvuna chimphunga.+
Tirigu wawu wakuwa cha kuti wapasi mbewu;+
Ndipu tirigu yo wakuwa wapereka ufwa cha.
Asani tirigu wapasa, alendu azakumumeza.+
8 Isirayeli wazamumezeka.+
Yiwu azamuja pakati pa mitundu ya ŵanthu,+
Nge chiyaŵi chambula ntchitu.
9 Pakuti yiwu akwere kucharu cha Asiriya,+ nge bulu wamudondu yo watenda yija.
Efurayemu walipira anthukazi kuti aje vibwezi vaki.+
10 Chinanga kuti alipira anthukazi a mu mitundu ya ŵanthu,
Ndiŵawunganisengi pamoza;
Yiwu azamukwamba kusuzgika+ chifukwa cha mphingu yo azamupingizika ndi fumu kweniso alongozgi.
11 Pakuti Efurayemu wayandanisa maguŵa nga sembi kuti wabudengi.+
Watingagwiriskiya ntchitu kuti wabudengi.+
13 Apereka sembi kwaku ini nge mphasu, ndipuso aturya nyama,
Kweni Yehova wakondwa navu cha.+
Sonu iyu wazamukumbuka kunanga kwawu ndipu wazakuŵalanga chifukwa cha maubudi ngawu.+
14 Isirayeli waluwa yo wakumupanga+ ndipu wazenga nyumba zakusopiyamu,+
Ndipu Yuda wayandanisa matawuni nga mipanda yakukho.+
Kweni ndazamutumiza motu mumatawuni ngaki,
Ndipu motu wo wazamuwotcha tinyumba takuthopoka ta mutawuni yeyosi.”+
9 “Ungakondwanga cha yiwi Isirayeli,+
Ungakondwanga cha nge mo achitiya ŵanthu amitundu yinyaki.
Pakuti watuwaku kwaku Chiuta waku chifukwa cha uhuli.*+
Wayanja malipiru nga huli pamalu ngakukhwemiyapu mbewu ngengosi.+
2 Kweni malu ngakukhwemiyapu mbewu kweniso malu ngakukandiyapu mphereska ngazakuŵaryisa cha,
Ndipu iyu wazamusoŵa vinyu wasonu.+
3 Yiwu azamulutirizga cha kuja mucharu chaku Yehova;+
Mumalu mwaki, Efurayemu wazamuwere ku Ijipiti,
Ndipu amukurya vinthu vakufipiskika mucharu cha Asiriya.+
Sembi zo, ze nge chiŵandi cho ŵanthu aturya pa maliru;
Ndipu wosi wo aturya chiŵandi cho, atijifipiska.
Pakuti chiŵandi chawu ntchawu pe;
Chiserengi cha munyumba yaku Yehova.
5 Kumbi mwazamuchitanji mu zuŵa la unganu,*
Mu zuŵa la phwandu laku Yehova?
6 Pakuti awonani! yiwu azamuthaŵa chifukwa cha kubwangandulika.+
Ijipiti wazakuŵawunganisa pamoza,+ ndipu Mefisi wazakuŵawundiya.+
Vakume vakunyenye vazamuto vinthu vawu vakuzirwa vasiliva,
Ndipu vivwati vaminga vazamume mumahema ngawu.
Mchimi wawu wazamupusa, ndipu munthu yo walongoro mazu ngakukambilika wazamufuntha;
Chifukwa chakuti yiwi wabuda ukongwa kweniso watinkhika ukongwa.”
8 Mulonda+ waku Efurayemu wenga ndi Chiuta wangu.+
Kweni sonu nthowa za achimi ŵaki+ ze nge viŵana va munthu yo watuthya tiyuni;
Munyumba yaku Chiuta waki mwe kutinkhana.
9 Yiwu anangika ukongwa nge mo venge mu mazuŵa ngaku Gibeya.+
Iyu wazamukumbuka kunanga kwawu ndipu wazakuŵalanga chifukwa cha maubudi ngawu.+
10 “Isirayeli ndingumusaniya nge mphereska muchipululu.+
Ndinguwona apapi ŵinu akali nge vipasu va mkuyu vakwamba kucha muchimiti cha mkuyu.
Kweni yiwu anguluta kwaku Bala wa ku Piyori;+
Angujipereka ku chinthu chakuchitiska soni,*+
Ndipu yiwu angusambuka akuseruska nge chinthu cho atanja.
11 Unkhankhu waku Efurayemu waphululukiya kutali nge chiyuni;
Kulivi kubala, nthumbu pamwenga kume nthumbu.+
12 Chinanga kuti yiwu angalera ŵana,
Ndazakuŵabaya mpaka po wosi azamumaliya;+
Soka kwaku yiwu asani ndazituwaku kwaku yiwu!+
13 Efurayemu wangupandika pamalu ngakuliskapu viŵetu, ndipu iyu wenga nge Turo kwaku ini;+
Sonu Efurayemu watenere kuza ndi ŵana ŵaki kuti azibayiki.”
14 Yimwi Yehova, apaskeni vo atenere kupaskika;
Apaskeni nthumbu yo yibala ŵana akufwa kweniso maŵe ngambula mkaka.*
15 “Uheni wawu wosi wenga ku Giligala,+ pakuti kweniko ndiku ndinguŵatinkhiya.
Ndazakuŵadikisa munyumba yangu chifukwa cha vinthu viheni vo achita.+
Ndazakuŵayanja so cha;+
Alongozgi ŵawu wosi mbamtafu.
16 Efurayemu wazamubayika.+
Msisi wawu wazamumira ndipu azamubala chipasu chechosi cha.
Chinanga kuti angabala, ndazamubaya ŵana ŵawu akwanjiwa.”
17 Chiuta wangu wazakuŵakana,
Pakuti amuvwiya cha,+
Ndipu yiwu azamusambuka ŵanthu akuthaŵathaŵa pakati pa mitundu ya ŵanthu.+
10 “Isirayeli we nge chimiti cha mphereska chaku nangika* cho chipasa vipasu.+
Asani vipasu vaki vija vinandi, wayandanisa maguŵa ngaki nga sembi;+
Asani charu chaki chipasa ukongwa, vipilala vaki vakupaturika vitowa ukongwa.+
2 Mtima wawu ngwachinyengu;*
Sonu asanirikengi ndi mulandu.
Pe munthu munyaki yo wazamukuswa maguŵa ngawu nga sembi kweniso kunanga vipilala vawu.
3 Yiwu azamukamba kuti, ‘Tilivi fumu,+ pakuti tamuwopa cha Yehova.
Kumbi fumu yingatichitiyanji?’
4 Yiwu akamba mazu ngaŵaka, alapizga vinthu vaboza+ kweniso achita mapanganu;
Mwaviyo, cheruzgu cho chibuka che nge dondu lapoyizoni mumizeri ya mumunda.+
5 Ŵanthu wo aja mu Samariya azamuchita mantha chifukwa cha ngoza wa tholi* wa ku Beti-aveni.+
Ŵanthu ŵaki azakumuliya,
Nge mo azamuliriya asembi a chiuta wachilendu, wo akondwanga nayu kweniso wo akondwanga ndi unkhankhu waki,
Pakuti ngoza yo wazamutuwaku kwaku yiwu ndi kuluta ku ukapolu.
6 Azamuluta nayu kucharu cha Asiriya ndi kumupereka nge mphasu ku fumu yikulu.+
Efurayemu wazamulengeseka,
Ndipu Isirayeli wazamuchita soni chifukwa cha ulongozgi wo wangulondo.+
7 Samariya ndi fumu yaki azamubwangandulika,*+
Nge mphukira yakudumulika kuchimiti yo yiyanjama pamaji.
8 Malu ngapachanya nga ku Beti-aveni,+ ngo ngabudisa Isirayeli,+ ngazamubwangandulika.+
Minga kweniso vimadondu vaminga vazamume pamaguŵa ngawu nga sembi.+
Ŵanthu azamukambiya mapiri kuti, ‘Tibenekeriyeni!’
Ndipuso azamukambiya mitunthu kuti, ‘Tiwiyeni!’+
9 Yiwi Isirayeli waja uchibuda+ kutuliya mu mazuŵa ngaku Gibeya.
Yiwu alutirizga kubuda kweniko.
Nkhondu yinguŵamaliya limu cha ŵana ambula urunji ku Gibeya.
10 Ndazakuŵalanga po ndazamukhumbiya.
Ndipu mitundu ya ŵanthu yazamuwungana pamoza kuti yiŵayukiyi,
Pa nyengu yo mphulupulu zawu ziŵi zazamumangika paku yiwu.*
11 Efurayemu wenga ng’ombi yinthukazi yambula kubalapu yakusambizika umampha, yo yayanjanga kukhwema mbewu,
Mwaviyo, ndingumuvwalika cha goli mukhosi laki lamampha.
Sonu ndazamuchitiska kuti munthu munyaki wakweri* pamsana paku Efurayemu.+
Yuda wazamulima; Yakobe wazakumupopote.
12 Jimijiyeni mbewu mu urunji ndipu vunani chanju chambula kumala.
Jilimiyeni minda panyata+
Po nyengu yakupenje Yehova yecheŵaka,+
Mpaka po waziyengi ndi kukusambizani mu urunji.+
13 Kweni mwapanda vinthu viheni,
Mwavuna vinthu vambula urunji,+
Ndipu mwarya vipasu vachinyengu;
Pakuti mwathemba nthowa yinu,
Mwathemba asilikali ŵinu anandi.
14 Chiwawa cha nkhondu chazamuyukiya ŵanthu ŵaku,
Ndipu matawuni ngosi nga mipanda yakukho ngazamubwangandulika,+
Nge mo Shalimani wangubwanganduliya nyumba ya ku Aribelu,
Mu zuŵa la nkhondu, po anthukazi anguŵavikita limoza ndi ŵana ŵawu.
15 Venivi ndivu vazakukuchitikiya, yiwi Beteli,+ chifukwa cha vinthu viheni ukongwa vo uchita.
Fumu ya ku Isirayeli yazamubwangandulika* nadi kumatandakucha.”+
11 “Pa nyengu yo Isirayeli wenga mnyamata, ndingumuyanja,+
Ndipu ndingudana mwana wangu kuti watuwi mu Ijipiti.+
3 Kweni ini ndini ndingusambiza Efurayemu kwenda,+ ndamunyamuwanga mumanja mwangu;+
Ndipu yiwu anguziŵa cha kuti ini ndini ndinguŵachizga.
4 Ndingulutirizga kuŵaguza ndi nthambu za ŵanthu,* ndi vingwi va chanju;+
Kwaku yiwu ndenga nge munthu yo watuzgamu goli mukhosi mwawu,*
Ndipu weyosi ndamupaskanga chakurya mwachanju.
5 Yiwu azamuwere kucharu cha Ijipiti cha, kweni charu cha Asiriya ndichu chazamuja fumu yawu,+
Chifukwa chakuti angukana kuwere kwaku ini.+
6 Lipanga lazamuzunguliya kuti linangi matawuni ngaki+
Ndipu lazamunanga akabali ŵaki ndi kumeza ŵanthu a mumatawuni ngo chifukwa cha viŵembu vawu.+
7 Ŵanthu ŵangu asimikiza mtima kuti aleki kuja akugomezgeka kwaku ini.+
Chinanga kuti atiŵadaniya pachanya,* palivi yo wasoka.
8 Kumbi ndingakuleka wuli, yiwi Efurayemu?+
Kumbi ndingakupereka wuli, yiwi Isirayeli?
Ndichitiyenji nawi nge mo ndinguchitiya ndi Adima?
Kumbi ndikusambusiyenji nge Zeboyimu?+
9 Ndazamulongo cha ukali wangu.
Ndazakumunanga so cha Efurayemu,+
Pakuti ndini Chiuta, ndini munthu cha,
Ndini Mtuŵa pakati pinu;
Ndipu ndizengi cha kwaku yiwi ndakwiya.
10 Yiwu azamulondo Yehova, ndipu iyu wazamuwuluma nge nkharamu;+
Asani iyu wawuluma, ŵana ŵaki azamukuza kutuliya kuzambwi* achinjekeme.+
11 Yiwu azamunjekeme nge chiyuni achituwa mucharu cha Ijipiti,
Azamunjekeme nge njiŵa achituwa mucharu cha Asiriya;+
Ndipu ndazakuŵaŵika munyumba zawu,” Yehova ndiyu wakamba.+
12 “Efurayemu wandizingiliza ndi maboza,
Ndipu nyumba yaku Isirayeli yandizingiliza ndi uryarya.+
Kweni Yuda weche kwenda ndi Chiuta.
Ndipu weche wakugomezgeka ku Mtuŵa Ukongwa.”+
12 “Efurayemu waturya mphepu.
Watchimbiza mphepu ya kuvuma* zuŵa losi.
Wayandanisa maboza ndi viwawa.
Yiwu achita phanganu ndi charu cha Asiriya+ kweniso atole mafuta ku Ijipiti.+
2 Yehova watumba mulandu Yuda;+
Wazamukumba mulandu Yakobe mwakukoliyana ndi nthowa zaki,
Ndipu wazakumuweze mwakukoliyana ndi ntchitu zaki.+
3 Mumoyu mwa anyina wanguko chiphundulu cha mku waki,+
Ndipu ndi nthazi zaki zosi wangulimbana ndi Chiuta.+
4 Wangulutirizga kulimbana ndi mungelu ndipu wangupunda.
Wanguliya ndipuso wangupempha kuti wamuchitiyi lisungu.”+
Wangumusaniya ku Beteli, ndipu kweniko Chiuta wangulongoro nasi,+
6 “Mwaviyo, were kwaku Chiuta waku,+
Lutirizga kuja ndi chanju chambula kumala kweniso urunji,+
Ndipu nyengu zosi ulindizgengi Chiuta waku.
7 Kweni mujanja la wamalonda mwe masikelu ngachinyengu;
Iyu watanja kubiya ŵanthu.+
Ndipu mu kufukafuka kwangu azamusaniyamu chiheni chechosi cha pamwenga ubudi.’
9 Kweni ini ndini Yehova Chiuta waku kutuliya pa nyengu yo wenga mucharu cha Ijipiti.+
Ndazamuchitiska so kuti uje mumahema
Nge mo vaŵiyanga mu mazuŵa nga nyengu yakuŵikika.*
10 Ndingulongoro ndi achimi,+
Ndinguyandanisa viwona vawu,
Ndipu ndingukamba ntharika kuporote mwa achimi.
11 Mu Giliyadi mwe uryarya*+ kweniso boza.
Yiwu apereka ng’ombi nge sembi mu Giligala,+
Ndipu maguŵa ngawu nga sembi nge nge milu ya mya mumizeri ya mumunda.+
12 Yakobe wanguthaŵiya kuchigaŵa cha* Aramu;*+
Isirayeli+ wanguteŵete kweniko kuti wato munthukazi,+
Ndipu wanguphwere mbereri kuti wato munthukazi.+
13 Yehova wangutuzga Isirayeli mucharu cha Ijipiti+ mwakugwiriskiya ntchitu mchimi,
Ndipu wanguvikilirika ndi mchimi.+
14 Efurayemu wapalamula mulandu ukulu;+
Mulandu waki wa ndopa we paku iyu;
Mbuyaki wazakumuweze chifukwa cha kunyoza kwaki.”+
13 “Asani Efurayemu walongoro, ŵanthu anjekemiyanga;
Iyu wenga wakutchuka mu Isirayeli.+
Kweni wenga ndi mulandu chifukwa cha kusopa Bala+ ndipu wangufwa.
2 Sonu asazgiyapu ubudi unyaki pa ubudi wawu
Ndipu apanga vikozgu vachisulu* kutuliya ku siliva wawu;+
Apanga angoza mwalusu, vosi ndi ntchitu ya ŵanthu alusu.
Atiŵakambiya kuti, ‘Ŵanthu wo apereka sembi afyofyonthi matholi.’*+
3 Mwaviyo, yiwu azamuja nge mitambu ya kumlenji,
Azamuja nge dungwi lo liswera cha kumira,
Azamuja nge mwere wo waputisika ndi chimphepu kutuliya pamalu ngakukhwemiyapu mbewu,
Ndipuso azamuja nge josi lo lituwa pa zenji la pachanya pa nyumba.
4 Kweni ini ndini Yehova Chiuta waku kutuliya pa nyengu yo wenga mucharu cha Ijipiti.+
Waziŵanga Chiuta munyaki cha kupatuwaku ini,
Ndipu palivi mtaski munyaki kupatuwaku ini.+
5 Ndingukuziŵa muchipululu,+ mucharu chambula maji.
6 Angukhorwa ndi malu ngawu ngakuliskaku viŵetu,+
Angukhorwa ndipu mtima wawu ungujikuzga.
Mwaviyo, angundiluwa.+
7 Ndazamuja nge nkharamu yimana kwaku yiwu,+
Nge nyalubwi yo wakhaza panthowa.
8 Ndazakuŵalotoke nge nyama ya biyere yo yaphangika ŵana,
Ndipu ndazamuphwatuwa nganga yawu.
Ndazakuŵameza kweniko nge nkharamu;
Chinyama cha mudondu chazakuŵapaluwapaluwa.
9 Ndazakukunanga, yiwi Isirayeli,
Chifukwa chakuti ungundigarukiya, ungugarukiya yo watikuwovya.
10 Sonu ye pani fumu yaku kuti yikutaski mumatawuni ngaku ngosi,+
Ndipu ŵe pani alongozgi* ŵaku, wo ungakamba kuti,
‘Ndipaskeni fumu kweniso alongozgi’?+
12 Kunanga kwaku Efurayemu kwavungika;*
Ubudi waki wasungika.
13 Urwirwi wa pakubala wazakumuziya.
Kweni iyu ndi mwana wambula zeru;
Watuwa cha asani nyengu yakuti wabaliki yakwana.
Yiwi Nyifwa, maliwoza ngaku nge pani?+
Yiwi Dindi, kusakaza kwaku kwe pani?+
Lisungu lazamubisika mu masu mwangu.
15 Chinanga kuti wangatipitiya pakati pa mateti,
Mphepu ya kuvuma* yazamukuza, mphepu yaku Yehova,
Yituza kutuliya kuchipalamba kuti yizimizgi chisimi chaki kweniso kuti yizikamuski kasupi waki.
Munthu munyaki wazamuphanga vinthu vaki vosi vakuzirwa.+
16 Samariya wazamumbika mulandu+ pakuti wagarukiya Chiuta waki.+
Yiwu azamubayika ndi lipanga,+
Ŵana ŵawu azamuvikitika,
Ndipu anthukazi anthumbu azamuphwatulika pamoyu.”
14 “Yiwi Isirayeli, were kwaku Yehova Chiuta waku,+
Pakuti waguŵa chifukwa cha kunanga kwaku.
2 Were kwaku Yehova ndipu ukambi mazu yanga,
Umukambiyi kuti, ‘Tigowokiyeni kunanga kwidu,+ londiyani cho ntchamampha,
Ndipu tikuthamikeningi ndi milomu yidu+ nge mo tingapereke matholi* nge sembi.
3 Charu cha Asiriya chazakutitaska cha.+
Tazamukwera pamahachi cha,+
Ndipuso ntchitu ya manja ngidu tazakuyikambiya so cha kuti, “Chiuta widu!”
Pakuti yimwi ndimwi mulongo lisungu ŵana ambula awusewu.’+
4 Ndazamuchizga kuleka kugomezgeka kwawu.+
5 Ndazamuja nge dungwi kwaku Isirayeli;
Iyu wazamuchita maluŵa
Ndipu wazamusereza pasi misisi yaki nge vimiti va ku Lebanoni.
6 Mphanda zaki zazamuthaza,
Unkhankhu waki wazamuja nge unkhankhu wa chimiti cha maolivi,
Ndipu iyu wazamununkhira nge vimiti va ku Lebanoni.
7 Yiwu azamuja so mu mduzi waki.
Azamupanda mbewu ndipuso azamuphuka nge chimiti cha mphereska.+
Wazamutchuka nge vinyu wa ku Lebanoni.
8 Efurayemu wazamukamba kuti, ‘Ndingachitanji nawu so angoza?’+
Ndazamumuka ndi kumuwonere.+
Ndazamuja nge chimiti cha junipa chakubiriŵira.
Vipasu vaku vazamutuliya kwaku ini.”
9 Ndiyani yo we ndi zeru? Wavwisi vinthu venivi.
Ndiyani yo ngwakuwamu? Waviziŵi.
Pakuti nthowa zaku Yehova zakunyoloka,+
Ndipu ŵanthu arunji azamuyendamu;
Kweni ŵanthu wo ananga azamuguŵa mu nthowa zo.
Zina lakuti Hoseya likutuliya ku zina lakuti Hoshaya ndipu ling’anamuwa kuti, “Kutaskika ndi Ya; Ya Wataska.”
Pamwenga kuti, “ureŵi.”
Pamwenga kuti, “ureŵi.”
Pamwenga kuti, “ureŵi.”
Pamwenga kuti, “Chidika cha.”
Kung’anamuwa kuti, “Walongoreka Lisungu Cha.”
Kung’anamuwa kuti, “Ndimwi Ŵanthu Ŵangu Cha.”
Wonani mazu ngamumphata pa Hos 1:9.
Wonani mazu ngamumphata pa Hos 1:6.
Pamwenga kuti, “ureŵi.”
Pamwenga kuti, “ureŵi.”
Pamwenga kuti, “ureŵi.”
Pamwenga kuti, “Chidika cha.”
Pamwenga kuti, “Bala wangu.”
Mazu ngaki chayingu, “azigonengi pasi.”
Kung’anamuwa kuti, “Chiuta Wazamupanda Mbewu.”
Wonani mazu ngamumphata pa Hos 1:6.
Wonani mazu ngamumphata pa Hos 1:9.
Kung’anamuwa makeki ngo agwiriskiyanga ntchitu pa kusopa kwaboza.
Mwesu umoza wa homeri wayanananga ndi malita 220. Wonani Fundu Zakukumaliya B14.
Pamwenga kuti, “ureŵi.”
Mazu ngaki chayingu, “nani ndichitengi viyo ndi yiwi.”
Mazu ngaki chayingu, “kwa mazuŵa nganandi.”
Pamwenga kuti, “achiuta a banja; angoza.”
Pamwenga kuti, “ndazamunanga.”
Pamwenga kuti, “azamunangika.”
Pamwenga kuti, “ulongozgi waku.”
Yapa pangafwatulikiya so kuti, “Unkhankhu wangu awusinthisa ndi chilengesu chawu.”
Pamwenga kuti, “Azamuchita ukongwa ureŵi; Azamuchita uhuli.”
Pamwenga kuti, “ureŵi.”
Mazu ngaki chayingu, “Vituzgapu mtima.”
Pamwenga kuti, “nthonga ya akuloska vamunthazi.”
Pamwenga kuti, “ureŵi.”
Pamwenga kuti, “ureŵi.”
Pamwenga kuti, “ureŵi.”
Pamwenga kuti, “ureŵi.”
Pamwenga kuti, “ureŵi.”
Pamwenga kuti, “moŵa wakupangika kutuliya ku tirigu.”
Mazu ngaki chayingu, “Ndipu vishangu vaki vitanja.”
Pamwenga kuti, “yazakumuputisiya kutali.”
Pamwenga kuti, “atangwanika ndi kubaya ŵanthu.”
Pamwenga kuti, “nditiŵachenya.”
Pamwenga kuti, “uhuli.”
Pamwenga kuti, “ureŵi.”
Pamwenga kuti, “ndi minda yawu.” Yapa pangafwatulikiya so kuti, “Sonu yiwu limoza ndi vihara vawu azamumezeka mu mwezi umoza.”
Anyaki akamba kuti “lipenga.”
Mazu ngo ngafwatulikiya kuti nyenji ngang’anamuwa kachidononu kakuphululuka ko katurya vakuvwala.
Pamwenga kuti, “nkharamu yimana yanthazi.”
Mazu ngaki chayingu, “azamupenja chisku changu.”
Pamwenga kuti, “ndikondwa ndi lisungu.”
Yapa pangafwatulikiya so kuti, “Pakuti mitima yawu ye nge uvunu asani atuza ndi uryarya wawu.”
Pamwenga kuti, “akweruzga.”
Anyaki akamba kuti, “mbuha.”
Kung’anamuwa kusopa kwapachanya cha.
Mazu ngaki chayingu, “sengwi.”
Tholi ndi mwana wa ng’ombi.
Pamwenga kuti, “Kumbi atondekengi mpaka zuŵanji kujitowesa ku mulandu wawu?”
Pamwenga kuti, “ulongozgi wangu.”
Yapa pangafwatulikiya so kuti, “azamuwere.”
Pamwenga kuti, “ureŵi.”
Pamwenga kuti, “mu zuŵa la phwandu linu lakuŵikika.”
Pamwenga kuti, “chiuta wakuchitiska soni.”
Pamwenga kuti, “maŵe ngakuphapha.”
Yapa pangafwatulikiya so kuti, “chakutambasuka.”
Pamwenga kuti, “ngwakutelemuka; ngwakusilirika.”
Tholi ndi mwana wa ng’ombi.
Mazu ngaki chayingu, “azamuchetamisika.”
Kung’anamuwa pa nyengu yo azamupinga chilangu chawu nge goli.
Pamwenga kuti, “wamangi.”
Mazu ngaki chayingu, “yazamuchetamisika.”
Kung’anamuwa achimi kweniso ŵanthu anyaki wo atumikanga kuti akasambizi Ayisirayeli.
Pamwenga kuti, “nthambu za lisungu,” nge nthambu za mpapi.
Mazu ngaki chayingu, “munjegheyu zawu.”
Kung’anamuwa kusopa kwapachanya.
Mazu ngaki chayingu, “lawotcha.”
Pamwenga kuti, “ko kuselere lumwi.”
Pamwenga kuti, “ko kutuliya lumwi.”
Yapa pangafwatulikiya so kuti, “mu mazuŵa nga phwandu.”
Pamwenga kuti, “vinthu vakuziziswa.”
Mazu ngaki chayingu, “kumunda wa.”
Pamwenga kuti, “Siriya.”
Pamwenga kuti, “vikozgu vachisulu chakusongono.”
Matholi mbana a ng’ombi.
Mazu ngaki chayingu, “akweruzga.”
Pamwenga kuti, “kwasungika.”
Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
Pamwenga kuti, “ko kutuliya lumwi.”
Matholi mbana a ng’ombi.