AMOSI
1 Yanga ndi mazu ngaku Amosi,* yo wenga yumoza wa aliska a mbereri a ku Tekowa.+ Iyu wangulonde mazu yanga mu chiwona chakukwaskana ndi Isirayeli mu mazuŵa nga Fumu Uziya+ ya ku Yuda kweniso mu mazuŵa ngaku Yerobowamu+ mwana waku Yowashi,+ fumu ya ku Isirayeli, vyaka viŵi chidilirisi chechendachitiki.+ 2 Iyu wangukamba kuti:
“Yehova wazamuwuluma kutuliya mu Ziyoni,
Ndipu wazamukweza mazu ngaki kutuliya ku Yerusalemu.
Malu ngakuliskaku viŵetu nga aliska ngazamuliya,
Pachanya pa phiri la Karimeli pazamumira.”+
3 “Yehova wakamba kuti,
‘“Chifukwa cha maubudi ngatatu nga Damasiko, kweniso nganayi, ndazamusintha cha chilangu chaki,
Pakuti yiwu angukhwema Giliyadi ndi vidya vakukhweme vachisulu.+
4 Mwaviyo, ndazamutuma motu pa nyumba yaku Hazayeli,+
Ndipu wazamukotcha tinyumba takuthopoka takukho taku Beni-hadadi.+
5 Ndazamufyo akabali a ku Damasiko;+
Ndazamunanga ŵanthu a ku Bikati-aveni
Kweniso wakulamuliya* wa ku Beti-edeni;
Ndipu ŵanthu a ku Siriya azamutoleke ku ukapolu ku Kiri,”+ Yehova ndiyu wakamba.’
6 Yehova wakamba kuti,
‘“Chifukwa cha maubudi ngatatu nga Gaza,+ kweniso nganayi, ndazamusintha cha chilangu chaki,
Pakuti yiwu anguto gulu losi la ŵanthu akutoleke ku ukapolu+ kuti aŵapereki mu manja mwaku Edomu.
7 Mwaviyo, ndazamutuma motu pampanda wa Gaza,+
Ndipu wazamuwotcha tinyumba taki takuthopoka takukho.
8 Ndazamunanga ŵanthu a ku Ashidodi,+
Kweniso wakulamuliya* wa ku Ashikeloni;+
Ndazamulanga Ekironi,+
Ndipu Afilisiti wo akujaku azamumala,”+ Yehova, Ambuya Fumu Yikulu ndiyu wakamba.’
9 Yehova wakamba kuti,
‘Chifukwa cha maubudi ngatatu nga Turo,+ kweniso nganayi, ndazamusintha cha chilangu chaki,
Pakuti yiwu angupereka kwaku Edomu gulu losi la ŵanthu akutoleke ku ukapolu,
Kweniso chifukwa chakuti angukumbuka cha phanganu la ubali.+
10 Mwaviyo, ndazamutuma motu pampanda wa Turo,
Ndipu wazamuwotcha tinyumba taki takuthopoka takukho.’+
11 Yehova wakamba kuti,
‘Chifukwa cha maubudi ngatatu nga Edomu,+ kweniso nganayi, ndazamusintha cha chilangu chaki,
Pakuti iyu wanguskera mubali waki ndi lipanga,+
Kweniso chifukwa chakuti wangukana kumulongo lisungu;
Iyu walutirizga kuŵapaluwa kwambula kulekeza chifukwa cha ukali waki,
Ndipuso waleka cha kuŵakwiyiya.+
12 Mwaviyo, ndazamutuma motu ku Temani,+
Ndipu wazamuwotcha tinyumba takuthopoka takukho ta ku Bozira.’+
13 Yehova wakamba kuti,
‘“Chifukwa cha maubudi ngatatu nga Aamoni,+ kweniso nganayi, ndazamusintha cha chilangu chaki,
Pakuti yiwu anguphwatuwa pamoyu anthukazi anthumbu a ku Giliyadi kuti asanuzgi chigaŵa chawu.+
14 Mwaviyo, ndazamubuska motu pampanda wa Raba,+
Ndipu wazamuwotcha tinyumba taki takuthopoka takukho,
Kwazamukuŵa chiwawa cha nkhondu mu zuŵa la nkhondu,
Kweniso chimphepu chikulu mu zuŵa la chimphunga.
15 Ndipu fumu yawu yazamuluta ku ukapolu limoza ndi alongozgi ŵaki,”+ Yehova ndiyu wakamba.’
2 “Yehova wakamba kuti,
‘“Chifukwa cha maubudi ngatatu ngaku Mowabu,+ kweniso nganayi, ndazamusintha cha chilangu chaki,
Pakuti iyu wanguwotcha viwanga va mafumu nga ku Edomu kuti wapangiyi layimu.
2 Mwaviyo, ndazamutumiza motu mu Mowabu,
Ndipu wazamuwotcha tinyumba takuthopoka takukho ta ku Keriyoti;+
Mowabu wachifwa kwazamukuŵa chivulupi,
Chiwawa cha nkhondu, kweniso kuliya kwa mbata.+
3 Ndazamutuzgapu wakulamuliya* pakati paki
Ndipuso ndazamubaya alongozgi ŵaki limoza ndi iyu,”+ Yehova ndiyu wakamba.’
4 Yehova wakamba kuti,
‘Chifukwa cha maubudi ngatatu ngaku Yuda,+ kweniso nganayi, ndazamusintha cha chilangu chaki,
Pakuti yiwu angukana dangu laku* Yehova,
Kweniso chifukwa chakuti angusunga cha marangu ngaki;+
Kweni alandizgika ndi maboza ngo apapi ŵawu akali alondonga.+
5 Mwaviyo, ndazamutumiza motu mu Yuda,
Ndipu wazamuwotcha tinyumba takuthopoka takukho ta ku Yerusalemu.’+
6 Yehova wakamba kuti,
‘Chifukwa cha maubudi ngatatu ngaku Isirayeli,+ kweniso nganayi, ndazamusintha cha chilangu chaki,
Pakuti yiwu agulisa ŵanthu arunji kuti asaniyi siliva,
Kweniso akavu kuti asaniyi sapatu.+
7 Yiwu akanda mitu ya ŵanthu akuyuyulika mufuvu la pacharu chapasi,+
Ndipuso ajala nthowa ya ŵanthu akufwasa.+
Munthu ndi awisi agonana ndi msungwana yumoza,
Ndipu afipiska zina langu lakupaturika.
8 Yiwu agona pasi pafupi ndi guŵa la sembi+ lelosi pavakuvwala vo anguphanga nge chikoli;+
Angugula vinyu ndi ndalama zo alipirisanga ŵanthu ndipu amwiya vinyu yo panyumba* ya achiuta ŵawu.’
9 ‘Kweni ini ndini ndingupulutuwa Aamori pa masu pawu,+
Wo ŵenga atali nge vimiti va sidara* kweniso wo ŵenga anthazi nge vimiti va oku;
Ndingunanga vipasu vawu kweniso misisi yawu.+
10 Ndingukutuzgani mucharu cha Ijipiti,+
Ndipu ndingukuyendesani muchipululu kwa vyaka 40,+
Kuti muto charu cha Aamori kuja chinu.
11 Ŵana ŵinu anthulumi anyaki ndinguŵasankha kuti aje achimi+
Ndipu anyaki mwa anyamata ŵinu ndinguŵasankha kuti aje Anaziri.+
Kumbi ndi viyo cha, yimwi Ayisirayeli?’ Yehova ndiyu wakamba.
12 ‘Kweni mwaŵapaskanga vinyu Anaziri kuti amwi,+
Ndipuso mwalamulanga achimi kuti: “Mungakambanga mauchimi cha.”+
13 Mwaviyo, ndazakukuvikitani mumalu nginu,
Nge mo ngolu yakuzaza ndi tirigu yo wavunika, yivikitiya chechosi cho yakandapu.
14 Munthu yo watchimbiya ukongwa wazamusoŵa malu ngakuthaŵiyaku,+
Munthu wanthazi wazamuja so ndi nthazi cha,
Ndipu chinkhara chazamuthaŵa cha kuti chitaski umoyu waki.
15 Munthu wakuponya uta wazamutchintha cha,
Phazi la munthu yo watchimbiya ukongwa lazamuthaŵa cha,
Ndipu munthu wakukwera pahachi wazamuthaŵa cha kuti wataski umoyu waki.
16 Chinanga ndi munthu wachiganga ukongwa pakati pa vinkhara,
Wazamuthaŵa we nkhuli mu zuŵa lo,’+ Yehova ndiyu wakamba.”
3 “Vwani mazu ngo Yehova wakamba ngakukwaskana ndi yimwi Ayisirayeli, mazu ngakukwaskana ndi banja losi lo ndikulituzga mucharu cha Ijipiti. Iyu wakamba kuti:
2 ‘Yimwi pe ndimwi ndiziŵa pa mabanja ngosi nga pacharu chapasi.+
Ndichu chifukwa chaki ndikumbeningi mulandu chifukwa cha kunanga kwinu.+
3 Kumbi ŵanthu ŵaŵi angayende limoza kwambula kupangana?
4 Kumbi nkharamu yingabangula mulisuwa kwambula kuti yako nyama?
Kumbi nkharamu yimana* yingawuluma kumphanji yaki kwambula kuko kanthu kekosi?
5 Kumbi chiyuni chingawira muchiŵana pasi kwambula kuti munthu wathya chiŵana?*
Kumbi mtazi ungandindimiya kwambula kuti nyama yawira muchiŵana?
6 Asani mbata yaliya mutawuni, asi ŵanthu ambwambwanthiya?
Asani soka lawa mutawuni, asi ndi Yehova yo wachitiska?
7 Pakuti Yehova, Ambuya Fumu Yikulu wachita cha kanthu
Kwambula kuti wavumbuwa chisisi chaki kwa ateŵeti ŵaki achimi.+
8 Nkharamu yabangula!+ Ndiyani yo walekengi kuchita mantha?
Yehova, Ambuya Fumu Yikulu walongoro! Ndiyani yo walekengi kukamba uchimi?’+
9 ‘Pharazgani patinyumba takuthopoka takukho ta ku Ashidodi
Ndipuso patinyumba takuthopoka takukho ta ku Ijipiti.
Kambani kuti: “Wunganani pamoza kuti muyukiyi mapiri nga ku Samariya;+
Wonani chimtimbaheka cho che pakati paki
Ndipuso kubiyana ko kwe mwaku iyu.+
10 Pakuti wo asunga chiwawa ndipuso pharanyiku mutinyumba tawu takuthopoka takukho,
Aziŵa cha mo angachitiya cho ntchamampha,” Yehova ndiyu wakamba.’
11 Mwaviyo, Yehova, Ambuya Fumu Yikulu wakamba kuti,
‘Murwani wazamuzingiliza charu cho,+
Iyu wazakukumalani nthazi,
Ndipu wazamuphanga vinthu mutinyumba tinu takuthopoka takukho.’+
12 Yehova wakamba kuti,
‘Nge mo mliska wataskiya malundi ngaŵi pamwenga gutu mumulomu mwa nkharamu,
Ndimu so Ayisirayeli azamutaskikiya,
Ŵanthu wo sonu aja ku Samariya pamabedi ngamampha ukongwa kweniso pamipandu yamampha.’*+
13 ‘Vwani ndi kutcheŵeska nyumba yaku Yakobe,’ Yehova Ambuya Fumu Yikulu, Chiuta wa mizinda ndiyu wakamba.
14 ‘Pakuti pa zuŵa lo ndazamumbiya mulandu Isirayeli chifukwa cha maubudi ngaki ngosi,+
Ndazamukumba so mulandu maguŵa nga sembi nga ku Beteli;+
Masengwi nga guŵa la sembi ngazamudumulika ndi kuwa pasi.+
15 Ndazamuwisa nyumba yakujamu mu chipwepwi kweniso nyumba yakujamu mu chihanya.’
‘Nyumba za minyanga ya njovu zazamumala,+
Ndipu nyumba zikuluzikulu* zazamumala,’+ Yehova ndiyu wakamba.”
4 “Vwani mazu yanga, yimwi ng’ombi zinthukazi za ku Bashani,
Yimwi mwe paphiri la ku Samariya,+
Yimwi anthukazi wo abiya ŵanthu akuyuyulika+ kweniso wo apweteka akavu,
Wo akambiya alumu ŵawu* kuti, ‘Tipaskeni vakuti timwi!’
2 Nge mo Yehova, Ambuya Fumu Yikulu waliri mtuŵa, walapizga kuti,
‘“Awonani! Mazuŵa ngatuza paku yimwi, po wazakukunyamuwani ndi vakukoloŵekapu nyama
Ndipu mwanyaki mosi wazakukunyamuwani ndi mbeja.
3 Mwazamutuliya pamalumwa nga mpanda, weyosi po walazgiya;
Ndipu mwazamuponyeka ku Harimoni,” Yehova ndiyu wakamba.’
4 ‘Zani ku Beteli ndipu chitani mphulupulu,*+
Lutani ku Giligala ndipu kachiteni ukongwa mphulupulu!+
5 Wotchani sembi yakuwonga ya chiŵandi chakusazgaku chakutupisa;+
Pharazgani mwakukweza sembi zinu zo mupereka mwakukhumba mwija!
Pakuti venivo ndivu mutanja kuchita, yimwi Ayisirayeli,’ Yehova, Ambuya Fumu Yikulu ndiyu wakamba.
6 ‘Ndinguchitiska kuti mufwi ndi nja mumatawuni nginu ngosi*
Ndipuso ndinguchitiska kuti chiŵandi chisoŵi munyumba zinu zosi;+
Kweni munguwere cha kwaku ini,’+ Yehova ndiyu wakamba.
7 ‘Ndingukunolani so vuwa kwati kwaja myezi yitatu kuti muvuni;+
Ndinguchitiska kuti vuwa yiwi mutawuni yimoza, kweni mutawuni yinyaki ndinguwisamu vuwa cha.
Mumunda unyaki mwawanga vuwa,
Kweni munda unyaki wamiranga chifukwa chakuti mwawanga vuwa cha.
8 Ŵanthu a mumatawuni ngaŵi pamwenga ngatatu+ ambendyangambendyanga achiluta kutawuni yimoza kuti akamwi maji,
Kweni nyota yawu yamalanga cha;
Chinanga kuti venga viyo, munguwere cha kwaku ini,’+ Yehova ndiyu wakamba.
9 ‘Ndingukulangani ndi chifundizi kweniso kodikodi.+
Munguyandanisa minda yinu kweniso minda ya mphereska,
Kweni azombi angurya vimiti vinu va mkuyu kweniso vimiti vinu va maolivi;+
Chinanga kuti venga viyo, munguwere mbwenu cha kwaku ini,’+ Yehova ndiyu wakamba.
10 ‘Ndingutuma mulili pakati pinu nge wa ku Ijipiti.+
Ndingubaya anyamata ŵinu+ ndi lipanga kweniso ndinguphanga mahachi nginu.+
Ndinguchitiska kuti mwefu wa mumisasa yinu uyupukiyi kumphunu zinu;+
Kweni munguwere cha kwaku ini,’ Yehova ndiyu wakamba.
11 ‘Ndingubwanganduwa charu chinu
Nge mo ndingubwanganduliya Sodomu ndi Gomora.+
Ndipu mwenga nge chisindi chakusonkholeka kumotu;
Kweni munguwere cha kwaku ini,’+ Yehova ndiyu wakamba.
12 Ndimu so ndazamuchitiya ndi yiwi Isirayeli.
Chifukwa chakuti venivi ndivu ndazakukuchitiya,
Nozgeka kuti ukumani ndi Chiuta waku, yiwi Isirayeli.
13 Pakuti awona! iyu ndiyu wakupanga mapiri+ kweniso ndiyu wakulenga mphepu;+
Wakambiya munthu maŵanaŵanu ngaki,
Wasambusa matandakucha kuja mdima,+
Wakanda pamalu ngapachanya nga charu chapasi;+
Zina laki ndi Yehova Chiuta wa mizinda.”
5 “Vwani mazu yanga ngo ndilongoro namwi nge sumu yakumba pakuliya, yimwi a munyumba yaku Isirayeli:
2 ‘Isirayeli yo ndi mwali, wawa;
Wangayuka so cha.
Wajowoleka mucharu chaki;
Palivi wakumuyuska.’
3 “Pakuti Yehova, Ambuya Fumu Yikulu wakamba kuti:
‘Tawuni yo yalutanga ku nkhondu ndi asilikali 1,000 yazamuja ndi asilikali 100 pe;
Ndipuso tawuni yo yalutanga ku nkhondu ndi asilikali 100 yazamuja ndi asilikali 10 pe. Venivi ndivu vazamuchitikiya a munyumba yaku Isirayeli.’+
4 “Pakuti Yehova wakambiya a munyumba yaku Isirayeli kuti:
‘Ndipenjeni kuti mulutirizgi kuja ndi umoyu.+
5 Mungapenjanga Beteli cha,+
Mungalutanga ku Giligala cha+ pamwenga kuyambukiya ku Beresheba,+
Pakuti Giligala wazamutoleke ku ukapolu kwambula kutondeka,+
Ndipu Beteli wazamumala.*
6 Penjani Yehova, ndipu lutirizgani kuja ndi umoyu,+
Kuti waleki kukole nge motu pa nyumba yaku Yosefi,
Ndi kuwotcha Beteli kwambula munthu wakuwuzimwa.
7 Musambusa urunji kuja kamiti kakuŵaŵa,
Ndipu urunji mutiwuponya pasi.+
8 Yo wakupanga gulu la nyenyezi la Kima kweniso gulu la nyenyezi la Kesili,*+
Yo wasambusa mduzi ukulu kuja mlenji,
Yo wapanga msana kuja mdima nge usiku,+
Yo wadana maji nga munyanja
Kuti wangapunguliyi pacharu chapasi,+
Zina laki ndi Yehova.
9 Iyu wazamunanga munthu wanthazi,
Wazamunanga malu ngakuvikilirika.
10 Yiwu atinkha ŵanthu wo atiŵachenya pageti la tawuni,
Ndipuso aseruka ndi ŵanthu wo akamba uneneska.+
11 Chifukwa mulamula akavu kuti akupaskeningi msonkhu wa munda
Ndipu muto tirigu wawu nge msonkhu,+
Mulutirizgengi cha kuja munyumba zamya yakusema zo mukuzenga+
Kweniso mwazamukumwa cha vinyu wakutuliya muminda ya mphereska yamampha ukongwa yo mwapanda.+
12 Pakuti ndiziŵa unandi wa maubudi nginu
Kweniso ndiziŵa ukulu wa maubudi nginu
Musuzga ŵanthu arunji,
Mulonde vinyeda,
Ndipuso mulonda wanangwa wa akavu pageti la tawuni.+
13 Mwaviyo, ŵanthu wo aziŵa vinthu azamuja cheti pa nyengu yo,
Pakuti yazamuja nyengu ya soka.+
Ndipu Yehova, Chiuta wa mizinda waŵengi namwi,
Nge mo mukambiya kuti we namwi.+
Kuti panyaki Yehova, Chiuta wa mizinda
Wangachitiya lisungu akujaku aku Yosefi.’+
16 “Mwaviyo, Yehova, Chiuta wa mizinda, Yehova wakamba kuti:
‘Mumabalaza ngosi nga mumatawuni mwazamuja kuliya,
Ndipu mumisewu yosi azamukamba kuti, “Kotu ama, kotu ama!”
Azamudana alimi kuti aliyi
Kweniso azamudana ŵanthu akuziŵa kuliya kuti atenje.’
17 ‘Mumunda wewosi wa mphereska mwazamukuŵa kuliya;+
Pakuti ndazamujumpha pakati pinu,’ Yehova ndiyu wakamba.
18 ‘Soka ku ŵanthu wo akhumba ukongwa zuŵa laku Yehova!+
Kumbi mulindizga kuti ndi vinthu wuli vo vazamuchitika pa zuŵa laku Yehova?+
Lazamuja zuŵa la mdima, kwazamuŵavi ukweru.+
19 Lazamuja nge munthu yo wathaŵa nkharamu mbwenu wakumana ndi chinyama cha biyere,
Ndipu asani wasere munyumba yaki ndi kunyekeza janja laki kuchimati, mbwenu njoka yitimuluma.
20 Asi pa zuŵa laku Yehova pazamukuŵa mdima, ukweru cha;
Asi pazamukuŵa mdima ukulu, kuŵala cha?
21 Nditinkha, kweniso ndiyuyuwa maphwandu nginu,+
Ndipuso ndikondwa cha ndi fungu la maunganu nginu ngapade.
22 Chinanga kuti mutindipaska sembi zakupiriza zamphumphu kweniso sembi zo mupereka nge mphasu,
Ndikondwa nazu cha;+
Ndipu sembi zinu za chimangu za nyama zakututuŵa ndikondwa nazu cha.+
23 Lekani kundimbiya sumu za viwawa;
Ndipu ndikhumba cha kuvwa sumu za vakumbiya vinu va vingwi.+
24 Cheruzgu chakunyoloka chiyendi nge maji,+
Ndipuso urunji uyendi nge msinji wambula kuphwa.
25 Kumbi mungundipaska sembi kweniso sembi zo mupereka nge mphasu
Kwa vyaka 40 muchipululu, yimwi a munyumba yaku Isirayeli?+
26 Sonu mwazamunyamuwa Sakuti, fumu yinu kweniso Kayiwani,*
Vikozgu vo mukujipangiya va nyenyezi yaku chiuta winu,
27 Ndipu ndazakukutumani ku ukapolu kutali ndi Damasiko,’+ Chiuta yo zina laki ndi Yehova Chiuta wa mizinda, ndiyu wakamba.”+
6 “Soka ku ŵanthu wo atijithemba* mu Ziyoni,
Ku ŵanthu wo awona kuti mbakuvikilirika muphiri la ku Samariya,+
Ŵanthu akutchuka a mtundu wakuzirwa pakati pa mitundu ya ŵanthu,
Ŵeniwo nyumba yaku Isirayeli yituza kwaku yiwu!
2 Yambukiyani ku Kaline kuti mukawoni.
Kutuwa kwenuku lutani ku Hemati Mukulu,+
Ndipuso sikiyani ku Gati wa Afilisiti.
Kumbi maufumu ngenanga ngakulu kuluska maufumu yanga,*
Kweniso kumbi chigaŵa chawu ntchikulu kuphara chinu?
4 Yiwu agona mumabedi nga minyanga ya njovu+ ndipuso agona kang’a mumipandu,+
Aturya mbereri zinthulumi za mumskambu kweniso matholi ngakututuŵa;*+
5 Yiwu apanga sumu kuti ambiyi bangu,*+
Nge Davidi, yiwu apanga vipangizu vakumbiya;+
6 Atumwa vinyu ndi makapu ngakulu+
Ndipuso apaka mafuta ngamampha ukongwa.
Kweni afipa mtima cha* ndi soka laku Yosefi.+
7 Mwaviyo, azamuja ŵanthu akwamba pakati pa ŵanthu wo azamutoleke ku ukapolu,+
Ndipu chiwawa cha ŵanthu akuzaya wo agona kang’a chazamumala.
8 Yehova Chiuta wa mizinda wakamba kuti: ‘Yehova, Ambuya Fumu Yikulu walapizga kuti,+
“Ndiseruka ndi kunyada kwaku Yakobe,+
Nditinkha tinyumba taki takuthopoka takukho,+
Ndipu ndazamupereka tawuni ndipuso vinthu vosi vo ve mwenimo mu manja mwa arwani.+
9 “‘“Ndipu asani ŵanthu 10 ajaku munyumba yimoza, nawu azamukufwa. 10 Mubali* wazakuŵanyamuwa ndi kuchiŵawotcha yumozayumoza. Wazamutuzga viwanga vawu munyumba; pavuli paki wazamufumba weyosi yo we muvipinda va mukati va nyumba yo kuti, ‘Kumbi mwe munthu weyosi mwenimo?’ Ndipu iyu wazamumuka kuti, ‘Mulivi!’ Pavuli paki wazamukamba kuti, ‘Ja cheti! Pakuti iyi ndi nyengu yakuzumbuliya zina laku Yehova cha.’”
11 Pakuti Yehova ndiyu walamula,+
Wazamubwanganduwa nyumba yikulu ndipu yazamuja vimya vakuvikitika,
Kweniso wazamubwanganduwa nyumba yimana ndipu yazamusambuka viswaswa.+
12 Kumbi mahachi ngatchimbiya pajalawi,
Ndipuso kumbi munthu wangalimapu ndi ng’ombi?
Pakuti mwasambusa urunji kuja chakume chapoyizoni,
Ndipuso chipasu chaurunji mwachisambusa kamiti kakuŵaŵa.+
13 Mukondwa ndi vinthu vabwekabweka,
Ndipu mukamba kuti, “Asi te ndi mazaza* chifukwa cha nthazi zidu?”+
14 Mwaviyo, yiwi nyumba ya ku Isirayeli, ndikutumiyengi ŵanthu a mtundu unyaki,+ Yehova Chiuta wa mizinda ndiyu wakamba,
‘Yiwu azakukukandirizga kutuliya ku Lebo-hemati*+ kusikiya ku Dambu* la Araba.’”
7 Ivi ndivu Yehova, Ambuya Fumu Yikulu wangundilongo: Awonani! Wangutumiza azombi pa nyengu yo mbewu zakumaliya* zabukanga. Yeniyi yenga mbewu yo yingumaliya kupandika, ŵati apha uteka wa fumu. 2 Azombi ati amaliza kurya vakume va mucharu cho, ndingukamba kuti: “Yimwi Yehova, Ambuya Fumu Yikulu, chondi agowokiyeni!+ Kumbi Yakobe wangapona* wuli? Pakuti walivi nthazi!”+
3 Mwaviyo, Yehova wangusintha maŵanaŵanu.*+ Yehova wangukamba kuti, “Vichitikengi cha.”
4 Ivi ndivu Yehova, Ambuya Fumu Yikulu wangundilongo: Awonani! Yehova, Ambuya Fumu Yikulu wangulamula kuti charu chilangiki ndi motu. Motu wo ungukamuska ndimba za maji kweniso ungunanga chigaŵa cha charu. 5 Pavuli paki ndingukamba kuti: “Yimwi Yehova, Ambuya Fumu Yikulu, chondi mungachitanga cha venivi.+ Kumbi Yakobe wangapona* wuli? Pakuti walivi nthazi!”+
6 Mwaviyo, Yehova wangusintha maŵanaŵanu.*+ Yehova, Ambuya Fumu Yikulu wangukamba kuti, “Venivi navu vichitikengi cha.”
7 Wangundilongo ivi: Awonani! Yehova wanguma pachimati cho chinguzengeka mwakugwiriskiya ntchitu chingwi chakupimiya, ndipu mujanja laki mwenga chingwi chakupimiya. 8 Pavuli paki, Yehova wangundikambiya kuti: “Amosi, kumbi uwonanji?” Sonu ndingumuka kuti: “Ndiwona chingwi chakupimiya.” Pavuli paki Yehova wangukamba kuti: “Ndiŵika chingwi chakupimiya pakati pa ŵanthu ŵangu Ayisirayeli. Ndazakuŵagowoke so cha.+ 9 Malu ngapachanya ngaku Isaki+ ngazamubwangandulika, ndipuso malu ngakupaturika ngaku Isirayeli ngazamubwangandulika;+ ndipu ndazamuyukiya nyumba yaku Yerobowamu ndi lipanga.”+
10 Amaziya, wasembi wa ku Beteli+ wangutumiza uthenga kwaku Yerobowamu,+ fumu yaku Isirayeli kuti: “Amosi watikunozgiyani chiŵembu pakati pa nyumba yaku Isirayeli.+ Charu chingazizipizga cha mazu ngaki ngosi.+ 11 Pakuti Amosi wakamba kuti, ‘Yerobowamu wazamukufwa ndi lipanga ndipu Isirayeli wazamutoleke ku ukapolu kutuliya mucharu chaki.’”+
12 Pavuli paki, Amaziya wangukambiya Amosi kuti: “Yiwi wakuwona viwona, luta, tchimbiriya kucharu cha Yuda, ukasaniyi* chiŵandi chaku kweniko, ndipuso ukakambi uchimi kweniko.+ 13 Kweni ungakambanga so uchimi cha ku Beteli,+ pakuti ndi malu ngakupaturika nga fumu+ kweniso ndi nyumba yachifumu.”
14 Amosi wangumuka Amaziya kuti: “Ndenga mchimi cha ndipuso ndenga mwana wa mchimi cha; kweni ndenga wakuliska viŵetu,+ ndipuso ndaphweriyanga vimiti va mkuyu.* 15 Kweni Yehova wangundito ko ndaphweriyanga mskambu, ndipu Yehova wangundikambiya kuti, ‘Luta ku ŵanthu ŵangu Ayisirayeli kuti ukakambi uchimi.’+ 16 Sonu vwani mazu ngaku Yehova: ‘Yimwi mukamba kuti, “Ungakambanga cha uchimi wakukwaskana ndi Isirayeli,+ ndipuso ungapharazganga cha+ vakukwaskana ndi nyumba yaku Isaki.” 17 Mwaviyo, Yehova wakamba kuti: “Muwolu waku wazamusambuka huli mutawuni. Ŵana ŵaku anthulumi ndi anthukazi azamubayika ndi lipanga. Charu chaku chazamugaŵika ndi chingwi chakupimiya, yiwi wazamufwiya mucharu chakufipiskika; ndipu Isirayeli wazamutoleke ku ukapolu kutuliya mucharu chaki.”’”+
8 Ivi ndivu Yehova, Ambuya Fumu Yikulu wangundilongo: Awonani! Ndinguwona sokola ya vipasu va mu chihanya. 2 Pavuli paki, wangundifumba kuti, “Uwonanji Amosi?” Ndingumuka kuti, “Ndiwona sokola ya vipasu va mu chihanya.” Pavuli paki, Yehova wangundikambiya kuti: “Umaliru wa ŵanthu ŵangu Ayisirayeli wafika. Ndiŵagowokiyengi so cha.+ 3 ‘Sumu za munyumba yakusopiyamu zazamusambuka chitenje mu zuŵa lo,’+ Yehova, Ambuya Fumu Yikulu ndiyu wakamba. ‘Mathupi nganandi nga ŵanthu ngazamuponyeka peposi.+ Kwazamukuŵa kuti yii!’
4 Vwani ivi, yimwi mukandirizga akavu
Kweniso yimwi mumala ŵanthu akufwasa a mucharu ichi,+
5 Yimwi mukamba kuti, ‘Kumbi phwandu la mwezi wufya limalengi nyengu wuli,+ kuti tigulisi mbewu zidu,
Kweniso Sabata+ limalengi nyengu wuli, kuti tigulisi mbewu?
Kuti tiwezeku mwesu wa efa*
Ndipuso tisazgiyeku mwesu wa sekeli,*
Kuti tisinthi masikelu ngidu ndi chilatu chakuti tibiyengi ŵanthu;+
6 Kuti tiguli ŵanthu akusuzgika ndi siliva
Kuti tiguli akavu ndi sapatu,+
Kweniso kuti tigulisi mbewu zabwekabweka.’
8 Pa chifukwa chenichi charu chazamunjekeme,
Ndipu munthu weyosi wa mucharu cho wazamuliya.+
Asi charu cho chazamuyuka nge msinji wa Nayelu,
Ndipuso chazamututuma ndi kuphwa nge msinji wa Nayelu wa ku Ijipiti?’+
9 ‘Mu zuŵa lo,’ Yehova, Ambuya Fumu Yikulu ndiyu wakamba,
‘Ndazamuchitiska kuti lumwi lizisere msana pakati,
Kweniso ndazamuchitiska kuti mucharu cho muzije mdima lumwi le nyee.+
10 Maphwandu nginu ndazakungasambusa kuliya+
Ndipu sumu zinu zosi ndazakuzisambusa sumu zakumba pakuliya.
Munthu weyosi ndazakumuvwalika chigudulu muchiwunu kweniso munthu weyosi ndazakumumeta phala;
Ndazamuchitiska kuti vizije nge mo viŵiya asani ŵanthu aliya nyifwa ya mwana wawu yumoza pe,
Ndipu zuŵa la phwandu lazamumala nge zuŵa la vakuŵaŵa.’
11 ‘Awonani! Mazuŵa ngatuza,’ Yehova, Ambuya Fumu Yikulu ndiyu wakamba,
‘Po ndazamutuma nja mucharu,
Nja ya chiŵandi cha pamwenga nyota ya maji,
Kweni nja ya kuvwa mazu ngaku Yehova.+
Yiwu azamukwendakwenda kupenja mazu ngaku Yehova, kweni azakungasaniya cha.
13 Mu zuŵa lo, amwali akutowa kweniso anyamata,
Azamukufwa chipoyu chifukwa cha nyota;
14 Wo alapizga mu zina la achiuta aboza a ku Samariya+ ndipuso wo akamba kuti,
“Nge mo chiuta waku waliri wamoyu, yiwi Dani!”+
Kweniso, “Nge mo nthowa ya ku Beresheba+ yiliri yamoyu!”
Yiwu azamukuwa ndipu azamuyuka so cha.’”+
9 Ndinguwona Yehova+ wama pachanya pa guŵa la sembi, ndipu wangukamba kuti: “Puma kumutu kwa ntchindamilu, ndipu pasi pasukunyikengi. Dumuwa mitu yawu, ndipu ini ndibayengi ndi lipanga munthu yo wajaku. Palivi yo wathaŵengi pamwenga kupona.+
2 Asani angakumba pasi kuti abisami mu Dindi,*
Janja langu lazakuŵato mwenimo;
Ndipu asani angakwere kuchanya,
Ndazakuŵasisiya pasi kutuliya kweniko.
3 Ndipu asani angabisama pachanya pa phiri la Karimeli,
Ndazakuŵapenja kweniko ndi kuŵato.+
Asani angabisama pasi pa nyanja kuti masu ngangu ngaleki kuŵawona,
Ndazamulamula njoka kuti yiŵalumi kweniko.
4 Asani arwani ŵawu angaŵatole ku ukapolu,
Ndazamulamula lipanga kweniko ndipu lazakuŵabaya;+
Masu ngangu ngazamukuŵa paku yiwu kuti ndiŵachitiyi vinthu viheni, vamampha cha.+
5 Pakuti Yehova wa mizinda, Ambuya Fumu Yikulu, ndiyu wakwaska charu,*
Kuti chisongonoki,+ ndipu ŵanthu wosi wo aja mucharu cho azamuliya;+
Charu chosi chazamuyuka nge msinji wa Nayelu,
Ndipuso chazamukuphwa nge msinji wa Nayelu wa ku Ijipiti.+
6 ‘Yo wazenga masitepusi ngaki kuchanya
Ndi kujalikiska nyumba yaki pacharu chapasi;
Yo wadana maji nga munyanja,
Kuti wangapunguliyi pacharu chapasi,+
Zina laki ndi Yehova.’+
7 ‘Asi mwe nge ŵana a ŵanthu a ku Kushi, yimwi Ayisirayeli?’ Yehova ndiyu wakamba.
‘Asi ndingutuzga Ayisirayeli mucharu cha Ijipiti,+
8 ‘Awonani! Masu ngaku Yehova, Ambuya Fumu Yikulu nge pa ufumu wakubuda,
Ndipu wazakuwubwanganduwa kuti utuwepu pacharu.+
Kweni a munyumba yaku Yakobe ndazakuŵamaliya limu cha,’+ Yehova ndiyu wakamba.
9 ‘Pakuti awonani! ndilamula,
Ndipu ndazamusukunyisa nyumba yaku Isirayeli pakati pa mitundu yosi ya ŵanthu,+
Nge mo munthu wasukunyisiya sefa,
Ndipu chinanga nkhamwa kamoza katuwa pasi cha.
10 Ŵanthu ŵangu wosi akubuda azamubayika ndi lipanga,
Wo akamba kuti, “Soka lizengi cha kufupi ndi isi pamwenga kutisaniya.”’
11 ‘Mu zuŵa lenilo, ndazamujintha msasa waku Davidi*+ wo ukuwa,
Ndazamujala malumwa,*
Ndipu ndazamuzenga so mahami ngaki;
Ndazakuwuzenga so kuti uje nge mo wenge mu mazuŵa ngakali,+
12 Kuti ato vinthu va ku Edomu+ vo vikujaku,
Ndipuso mitundu yosi yo yidanika ndi zina langu,’ Yehova, yo wachita venivi, ndiyu wakamba.
13 ‘Awonani! Mazuŵa ngatuza,’ Yehova ndiyu wakamba,
‘Po munthu yo walima ndi pulawu wazamujumpha wakuvuna,
Ndipuso po wakukanda mphereska wazamujumpha yo wapinga mbewu;+
Mapiri ngazamunthonya vinyu wakunong’ome,+
14 Ndazamuwunganisa so ŵanthu ŵangu Ayisirayeli wo akutoleke ku ukapolu,+
Ndipu azamuzenga so matawuni ngo ngakubwangandulika ndi kujamu;+
Azamupanda minda ya mphereska ndi kumwa vinyu waki,+
Ndipuso azamupanda minda ndi kurya vipasu vaki.’+
15 ‘Ndazakuŵapanda mucharu chawu,
Ndipu azamuchesulika so cha
Mucharu chawu cho ndaŵapaska,’+ Yehova Chiuta winu ndiyu wakamba.”
Kung’anamuwa kuti, “Kuja Mphingu” pamwenga “Kupinga Mphingu.”
Mazu ngaki chayingu, “yo wakoleze nthonga.”
Mazu ngaki chayingu, “yo wakoleze nthonga.”
Mazu ngaki chayingu, “wakweruzga.”
Pamwenga kuti, “ulongozgi waku.”
Pamwenga kuti, “panyumba yakusopiyamu.”
Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
Pamwenga kuti, “nkharamu yimana yanthazi.”
Yapa pangafwatulikiya so kuti, “kwambula kuti mwe nyambu?”
Pamwenga kuti, “pamipandu ya ku Damasiko.”
Yapa pangafwatulikiya so kuti, “zinandi.”
Pamwenga kuti, “ambuyawu.”
Pamwenga kuti, “ndipu garukani.”
Pamwenga kuti, “Ndingukupaskani cha chakurya mumatawuni nginu ngosi.”
Yapa pangafwatulikiya so kuti, “wazamuja chinthu chakuziziswa.”
Yanga ndi mazina nga magulu nga nyenyezi, zo asani mwaziwone patali, zosi pamoza ziwoneka nge nyama yinyaki pamwenga chinthu chinyaki.
Achiuta ŵaŵi yaŵa amiya pulaneti la Saturn, lo alisopanga nge chiuta.
Pamwenga kuti, “wo aja ŵaka phee.”
Viwoneka kuti akamba ufumu wa Yuda kweniso wa Isirayeli.
Mazu ngaki chayingu, “mpandu.”
Pamwenga kuti, “matholi nganthulumi,” Matholi mbana a ng’ombi.
Pamwenga kuti, “chakumbiya cha vingwi.”
Mazu ngaki chayingu, “atama cha.”
Mazu ngaki chayingu, “Mku wawu wa awisi pamwenga mvurwa wawu wa awisi.”
Mazu ngaki chayingu, “Asi tajitole masengwi.”
Pamwenga kuti, “pakuselere ku Hemati.”
Ili ndi dambu lo lija ndi maji mu nyengu ya vuwa pe.
Kung’anamuwa mu mwezi wa January ndi February.
Mazu ngaki chayingu, “wangayuka?”
Pamwenga kuti, “wanguchita chitima.”
Mazu ngaki chayingu, “wangayuka.”
Pamwenga kuti, “wanguchita chitima.”
Mazu ngaki chayingu, “ukaryi.”
Pamwenga kuti, “ndatolonga vipasu va mkuyu.”
Wonani Fundu Zakukumaliya B14.
Wonani Fundu Zakukumaliya B14.
Anyaki akamba kuti, “kumpotu.”
Pamwenga kuti, “ko kutuliya lumwi.”
Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
Pamwenga kuti, “charu chapasi.”
Pamwenga kuti, “hema laku Davidi; chigongwi chaku Davidi.”
Pamwenga kuti, “malumwa ngawu.”
Mazu ngaki chayingu, “mitunthu yosi yazamusongonoka.”