MIKA
1 Yanga ndi mazu ngo Yehova wangukambiya Mika*+ wa ku Moresheti, mu mazuŵa ngaku Yotamu,+ Ahazi+ kweniso Hezekiya,+ mafumu nga ku Yuda,+ ndipuso ngo wangumukambiya mu chiwona chakukwaskana ndi Samariya kweniso Yerusalemu:
2 “Vwani, yimwi mwaŵanthu mosi!
Vwisiya, yiwi charu chapasi ndi vosi vo ve mwaku yiwi,
Yehova, Ambuya Fumu Yikulu waje kaboni wakukususkani,+
Yehova waje kaboni kutuliya munyumba yaki yakusopiyamu yakupaturika.
3 Pakuti awonani! Yehova watuwaku kumalu ngaki;
Wasikengi ndi kukandakanda pamalu ngapachanya nga charu chapasi.
4 Mapiri ngazamusongonoka pasi paki,+
Ndipu madambu ngazamugaŵikana*
Nge phula pafupi ndi motu,
Nge maji ngo angapunguliya pamalu ngakusendemuka.
5 Vosi venivi vazamuchitika chifukwa cha kugaruka kwaku Yakobe,
Chifukwa cha ubudi wa nyumba yaku Isirayeli.+
Ndiyani yo wachitiska kuti Yakobe wagaruki?
Asi ndi Samariya?+
Kumbi malu ngapachanya nga ku Yuda ndi nanga?+
Asi ndi Yerusalemu?
6 Samariya ndazakumusambusa ndundu ya mahami ngamudondu,
Malu ngakulimaku minda ya mphereska;
Mya yaki ndazakuyiponya* mudambu,
Ndipu ndazamufukuwa mafawundeshoni ngaki.
7 Vikozgu vaki vosi vakujoba vazamuvikitika,+
Ndazamukuswa angoza ŵaki wosi.
Pakuti wanguŵasaniya kutuliya pa malipiru nga uhuli,
Ndipu angoza wo azamukuŵa so malipiru nga mahuli kunyaki.”
Ndazamutenje nge akambwi,
Ndipu ndazamuliya nge nthiŵatiŵa.
Mulili wasapaliya kugeti la ŵanthu ŵangu, ku Yerusalemu.+
10 “Mungapharazganga cha venivi ku Gati;
Mungaliyanga cha chinanga nkhamanavi.
Mukunkhuluki mufuvu ku Beti-afira.*
11 Yimwi ŵanthu a ku Shafiri, yambukani mwe nkhuli kweniso mwalengeseka.
Ŵanthu a ku Zanani atuwa cha.
Ku Beti-ezeli kwazamukuŵa kutenje, ndipu Beti-ezeli wazamuleka kukuwovyani.
12 Pakuti ŵanthu a ku Maroti alindizga vinthu vamampha,
Kweni Yehova wawisiya vinthu viheni pageti la Yerusalemu.
13 Mangani magaleta ku gulu la mahachi, yimwi ŵanthu a ku Lakishi.+
Yimwi ndimwi munguchitiska kuti mwana munthukazi wa ku Ziyoni wabudi,
Pakuti kugaruka kwaku Isirayeli kungusanirika mwaku yiwi.+
14 Sonu yiwi wazamupereka mphasu kwaku Moresheti-gati uchilayirana nayu.
Nyumba za ku Akizibu+ zingupusika mafumu nga ku Isirayeli.
15 Ndazakukutumiyani munthu yo wazakukuthereskani,*+ yimwi ŵanthu a ku Maresha.+
Unkhankhu waku Isirayeli wazamufika ku Adulamu.+
16 Jimeteni phala kweniso sengani sisi linu chifukwa cha ŵana ŵinu akwanjiwa.
Jimeteni phala kuti muŵi nge nombu,
Pakuti ŵana ŵinu atoleka kwaku yimwi ndipu aluta nawu ku ukapolu.”+
2 “Soka ŵanthu wo anozga viŵembu,
Wo aŵanaŵana vinthu viheni pamabedi ngawu!
Asani kwacha yiwu achita vinthu vo aŵanaŵananga,
Chifukwa chakuti ŵe ndi nthazi zakuvichitiya.+
2 Yiwu akhumbira minda ndipu aphanga;+
Kweniso akhumbira nyumba ndipu atizito;
Yiwu aphanga nyumba ya munthu+
Ndipuso chihara chaki.
3 Mwaviyo, Yehova wakamba kuti:
‘Ndinozga kuti ndiwisiyi soka banja ili,+ ndipu palivi yo wazakulithaŵa.+
Mwazamukwenda so mwakujikuzga cha,+ pakuti yazamukuŵa nyengu ya soka.+
4 Mu zuŵa lo, ŵanthu azamukamba nthanthi yakukwaskana ndi yimwi,
Ndipu azamuliya ukongwa chifukwa chaku yimwi.+
Yiwu azamukamba kuti: “Tasakazikiya limu!+
Iyu wanguchitiska kuti chihara cha ŵanthu ŵidu chiperekeki ku ŵanthu anyaki, watichituzgaku kwaku isi!+
Munthu wambula kugomezgeka wamugaŵiya minda yidu.”
5 Mwaviyo, mu mpingu waku Yehova mwazamuŵavi munthu wakuti watambasuwi chingwi chakupimiya,
Kuti wagaŵi charu.
6 Yiwu apharazga kuti: “Lekani kupharazga,
Atenere cha kupharazga venivi;
Tichitengi soni cha isi!”
7 Yimwi a munyumba yaku Yakobe, kumbi ŵanthu akamba kuti:
“Mzimu waku Yehova waleka kuzikira?
Kumbi izi ndi ntchitu zaki?”
Asi mazu ngangu ngachitiska kuti ŵanthu akwenda mwakunyoloka atumbikiki?
8 Kweni pambula kuswera yapa ŵanthu ŵangu chayiwu andiyukiya nge murwani.
Muzuwa vakujitowese vakuzirwa limoza ndi vakuvwala*
Va ŵanthu wo ajumpha mwachiganga, nge ŵanthu wo atuwa ku nkhondu ndipu muchita venivi pamtandasanya.
9 Mudikisa anthukazi a ŵanthu ŵangu munyumba zawu zo akondwa nazu;
Ku ŵana ŵawu mutuzgaku unkhankhu wangu kwamuyaya.
10 Sokani ndipu lutani, pakuti yanga ndi malu ngakupumuliyapu cha.
Chifukwa chakuti ngafipiskika,+ ngabwangandulikengi, ngabwangandulikengi ukongwa.+
11 Asani munthu walondo mphepu kweniso uryarya ndipu wakamba boza lakuti:
“Ndikupharazgiyeningi vakukwaskana ndi vinyu kweniso chakumwa chakuloŵeresa,”
Mbwenu waŵengi ŵaka mupharazgi wa ŵanthu yaŵa!+
12 Yimwi a munyumba yaku Yakobe, mosi ndazakukuwunganisani;
Ndazamuwunganisa pamoza ŵanthu akujaku a munyumba yaku Isirayeli.+
Ndazakuŵaŵika pamoza, nge mbereri mukhola,
Nge mskambu pamalu ngaki ngakuliskapu viŵetu;+
Kweniko kwazamukuŵa chiwawa cha ŵanthu.’+
13 Wakuswa mpanda wazamukuŵa panthazi pawu;
Yiwu azamukuswa ndi kujumpha pageti ndipu azamutuliya penipo.+
Fumu yawu yazamukuŵa panthazi pawu,
Ndipu Yehova wazakuŵalongozga.”+
3 Ndingukamba kuti: “Vwani, yimwi mitu ya mabanja ngaku Yakobe
Ndipuso yimwi alongozgi a nyumba yaku Isirayeli.+
Asi mutenere kuziŵa urunji?
2 Kweni mutinkha vinthu vamampha+ ndipu mutanja vinthu viheni;+
Mufyopo khungu la ŵanthu ŵangu kweniso muswaluwa mnofu kuviwanga vawu.+
3 Muturya so mnofu wa ŵanthu ŵangu+
Ndipuso mufuŵa khungu lawu,
Muphwanya viwanga vawu, ndipu mutivivikita,+
Nge vinthu vo vabikika mumumphika,* nge nyama yo ye mumumphika.
4 Pa nyengu yeniyo, azamudana Yehova kuti waŵawovyi,
Kweni wazakuŵamuka cha.
5 Ivi ndivu Yehova wakambiya achimi wo alandizga ŵanthu ŵangu,+
Wo apharazga kuti ‘Chimangu’+ pa nyengu yo aluma* ndi minyu ngawu+
Kweni apharazga nkhondu ku ŵanthu wo aŵikamu kanthu cha mumulomu mwawu, iyu wakamba kuti:
6 ‘Mwazamukuŵa ndi usiku;+ kweni kwazamuŵavi viwona;+
Kwaku yimwi kwazamukuŵa mdima pe, kwazamuŵavi kuloska vamunthazi.
Lumwi lazakuŵaselere achimi,
Ndipu msana wazakuŵasambukiya mdima.+
7 Akuwona viwona azamulengeseka,+
Ndipu akuloska vamunthazi azamuguŵa.
Wosi azamubenekere mwembi wawu wapamphunu,*
Pakuti Chiuta wazakuŵamuka cha.’”
8 Kweni ini, ndazazika ndi nthazi chifukwa cha mzimu waku Yehova,
Ndazazika so ndi urunji kweniso chiganga,
Kuti ndikambiyi Yakobe kugaruka kwaki kweniso Isirayeli ubudi waki.
9 Vwani ivi, yimwi mitu ya mabanja ngaku Yakobe
Ndipuso yimwi alongozgi a nyumba yaku Isirayeli,+
Wo aseruka ndi urunji kweniso wo abendezga vinthu vosi vakunyoloka.+
10 Wo azenga Ziyoni mwakugwiriskiya ntchitu kudira ndopa kweniso wo azenga Yerusalemu mwakugwiriskiya ntchitu vinthu vambula urunji.+
11 Alongozgi ŵaki alonde vinyeda asani ayeruzga milandu,+
Asembi ŵaki asambiza kuti alonde malipiru,+
Kweni akamba kuti athemba Yehova, ndipu atiti:
“Asi Yehova we nasi?+
Palivi soka lo lazakutiwiya.”+
12 Mwaviyo, chifukwa chaku yimwi,
Ziyoni wazamulimika nge munda,
Yerusalemu wazamusambuka ndundu ya mahami,+
Ndipu phiri la Nyumba* lazamukuŵa nge malu ngapachanya nga mulisuwa.+
4 Mu mazuŵa ngakumaliya,
Phiri la nyumba yaku Yehova+
Lazamujalikiskika pachanya pa mapiri,
Ndipuso lazamukwezeka pachanya pa mitunthu,
Ndipu mitundu ya ŵanthu yazamundonde kweniko.+
2 Ŵanthu akutuliya mu mitundu yakupambanapambana azamuluta kweniko ndi kukamba kuti:
“Zani, tiyeni tikwere ku phiri laku Yehova
Kweniso kunyumba yaku Chiuta waku Yakobe.+
Iyu wakutisambiza nthowa zaki,
Ndipu isi tamukwenda mu nthowa zaki.”
Pakuti dangu lazamutuwa* mu Ziyoni,
Ndipuso mazu ngaku Yehova ngazamutuwa mu Yerusalemu.
3 Iyu wazamuyeruzga mitundu yinandi ya ŵanthu+
Ndipu wazamunyoloska* vinthu vakukwaskana ndi mitundu yanthazi yakutali.
Yiwu azamusula malipanga ngawu kuti ngaje mayembi nga pulawu
Ndipuso azamusula mikondu yawu kuti yije vidya vakuphatiya vimiti.+
Mtundu wazamunyamuwa lipanga cha kuti uyukiyi mtundu unyaki,
Ndipu ŵanthu azamusambira so nkhondu cha.+
4 Weyosi wazamuja pasi pa chimiti chaki cha mphereska kweniso pasi pa chimiti chaki cha mkuyu,+
Ndipu palivi munthu yo wazakuŵawofya,+
Chifukwa mulomu waku Yehova wa mizinda walongoro.
5 Pakuti mitundu yosi ya ŵanthu yazamukwenda mu zina laku chiuta wawu,
Kweni isi tazamukwenda mu zina laku Yehova Chiuta widu+ muyaya mpaka muyaya.
6 Yehova wakamba kuti: “Mu zuŵa lo,
Ndazamuwunganisa ŵanthu wo aganthiyanga,
Ndipuso ndazamuwunganisa pamoza ŵanthu wo angumbininika,+
Limoza ndi ŵanthu wo ndinguŵasuzga.
7 Ndazamuwunganisa so akujaku a ŵanthu wo aganthiyanga,+
Ŵanthu wo angutoleke kutali ndazakuŵasambusa mtundu wanthazi;+
Ndipu Yehova wazakuŵalamuliya nge fumu mu Phiri la Ziyoni
Kwamba sonu mpaka muyaya.
8 Kweni yiwi kanyumba kakuthopoka ka mskambu,
Chimbumira cha mwana munthukazi wa ku Ziyoni,+
Ulamuliru wazamuwere kwaku yiwi, hinya, ulamuliru wakwamba* wazamuwere kwaku yiwi,+
Ufumu wa mwana munthukazi waku Yerusalemu.+
9 Sonu ntchifukwa wuli udaniriza?
Kumbi ulivi fumu,
Pamwenga kumbi wakukulunguchizga wakufwa,
Mwakuti utuvwa urwirwi nge wa munthukazi yo wabala?+
10 Yiwi mwana munthukazi wa ku Ziyoni, kulunthuka ndi kutamantha,
Nge munthukazi yo wabala,
Pakuti sonu utuwengemu mutawuni ndipu wamujanga kudondu.
Ulutengi ku Babiloni,+
Ndipu wazamutaskika kweniko;+
Kweniko, Yehova wazakukuwombo mu manja mwa arwani ŵaku.+
11 Sonu mitundu yinandi ya ŵanthu yazamuwungana kuti yilimbani nawi;
Yiwu azamukamba kuti, ‘Wafipiskiki,
Ndipu masu ngidu ngawoni venivi vichichitikiya Ziyoni.’
12 Kweni atingaziŵa cha maŵanaŵanu ngaku Yehova,
Kweniso atiliziŵa cha khumbu laki;
Pakuti wazakuŵawunganisa pamalu ngakukhwemiyapu mbewu nge tirigu yo wasengeka ŵaka sonu.
13 Soka, khwema mbewu, yiwi mwana munthukazi wa ku Ziyoni,+
Pakuti masengwi ngaku ndazakungasambusa chisulu,
Vakukandiya vaku ndazakuvisambusa mkuŵa,
Wazamuvikita mitundu yinandi ya ŵanthu.+
Vinthu vo anguvisaniya mwachinyengu, wazakuvipereka kwaku Yehova,
Ndipu chuma chawu wazakuchipereka kwa Ambuya auneneska a charu chosi chapasi.”+
Yiwu apuma wakweruzga waku Isirayeli padakama ndi nthonga.+
2 Ndipu yiwi Betelehemu Efurata,+
Ndiwi mumana ukongwa pakati pa mafuku* nga ku Yuda,
Mwaku yiwi mwazamutuwa wakulamuliya yo wazamuchita khumbu langu mu Isirayeli,+
Iyu wakuŵaku nyengu zakali, mazuŵa ngakali.
3 Mwaviyo, wazakuŵajowo
Mpaka pa nyengu yo munthukazi yo wazamubala mwana wazibaliya.
Ndipu abali ŵaki wosi azamuwere kwa Ayisirayeli.
4 Iyu wazamukuma ndipuso wazamuliska mskambu mwakugwiriskiya ntchitu nthazi zaku Yehova,+
Kweniso unkhankhu wa zina laku Yehova Chiuta waki.
5 Ndipu wazamukuza ndi chimangu.+
Asani munthu wa ku Asiriya wayukiya charu chidu ndi kukandakanda tinyumba tidu takuthopoka takukho,+
Tazakumuyuskiya aliska 7, hinya, alongozgi 8 a ŵanthu.
Ndipu iyu wazakutitaska mu manja mwa munthu wa ku Asiriya,+
Asani waziyukiya charu chidu ndi kukandakanda chigaŵa chidu.
7 Ŵanthu akujaku aku Yakobe azamukuŵa pakati pa mitundu yinandi ya ŵanthu
Nge dungwi lakutuliya kwaku Yehova,
Nge vuwa yakumeme pa vakume
Yo yithemba munthu cha
Pamwenga kulindizga ŵana a ŵanthu.
8 Ŵanthu akujaku aku Yakobe azamukuŵa pakati pa mitundu ya ŵanthu,
Pakati pa mitundu yakupambanapambana,
Nge nkharamu pakati pa vinyama vamulisuwa,
Nge nkharamu yimana* pakati pa miskambu ya mbereri,
Yo yijumpha pakati pa miskambu ndipu yivwandamiya ndi kupaluwa;
Ndipu palivi yo watizitaska.
9 Janja linu lazamukwezeka pachanya pa arwani ŵinu,
Ndipu arwani ŵinu wosi azamumala.”
10 Yehova wakamba kuti, “Mu zuŵa lo,
Ndazamubaya mahachi nginu pakati pinu kweniso ndazamunanga magaleta nginu.
11 Ndazamunanga matawuni nga mucharu chinu
Ndi kuwisiya pasi malu nginu ngosi ngakuvikilirika.
12 Ndazamumalisa ufwiti wo muchita,
Ndipu wosi wo achita vamasenga azamumala.+
13 Ndazamunanga vikozgu vinu vakujoba kweniso vipilala vinu pakati pinu,
Ndipu mwazamusindamiya so cha ntchitu za manja nginu.+
14 Ndazamuchesuwa vipilala vinu vakupaturika*+ pakati pinu
Ndipuso ndazamubwanganduliya limu matawuni nginu.
15 Mwakukwiya kweniso mwaukali, ndazamuweze nduzga
Mitundu yo yaleka kundivwiya.”
6 Chondi, vwani vo Yehova wakamba.
Sokani, konkhoskani mulandu winu pa masu pa mapiri,
Ndipu mitunthu yivwi mazu nginu.+
2 Yimwi mapiri, vwani mulandu waku Yehova,
Yimwi mafawundeshoni ngakukho nga charu chapasi,+
Pakuti Yehova watumba mulandu ŵanthu ŵaki;
Iyu wasuskanengi ndi Ayisirayeli, ndipu waŵakambiyengi kuti:+
3 “Mwaŵanthu ŵangu, ntchinthu wuli cho ndakuchitiyani?
Ndakuvukisani wuli?+
Ndisimikizeni.
4 Pakuti ndingukutuzgani mucharu cha Ijipiti,+
Ndingukuwomboni munyumba ya ukapolu;+
Ndingukutumiyani Mozesi, Aroni ndi Miriyamu.+
5 Mwaŵanthu ŵangu, kumbukani vo Fumu Balaki ya ku Mowabu yingusachizga,+
Ndipuso vo Balamu mwana waku Beyori wangumumuka,+
Kumbukani vo vinguchitika kutuwa ku Sitimu+ mpaka ku Giligala,+
Kuti muziŵi ntchitu zaurunji zaku Yehova.”
6 Kumbi ndizengi ndi vinthu wuli pa masu paku Yehova?
Kumbi ndisindamengi ndi vinthu wuli pa masu paku Chiuta wakuchanya?
7 Kumbi Yehova wakondwengi ndi masawuzandi nga mbereri zinthulumi,
Kweniso ndi masawuzandi nganandi nga miyesu yikuluyikulu ya mafuta?+
Kumbi ndiperekengi mwana wangu wakwamba munthulumi chifukwa cha kugaruka kwangu,
Chipasu cha liŵavu langu chifukwa cha ubudi wangu?+
8 Iyu wakambiya yiwi wamunthu cho ntchamampha.
Kumbi Yehova wakhumbanji kwaku yiwi?
9 Mazu ngaku Yehova ngavwika mutawuni;
Ŵanthu wo ŵe ndi zeru zakovya azamuwopa zina linu.
Vwisiyani mazu nga nthonga kweniso vwisiyani mweniyo wakuyisankha.+
10 Kumbi munyumba ya munthu muheni mweche chuma cho wakuchisaniya chifukwa cha ntchitu zaki ziheni,
Kweniso mwesu wa efa* wambula kukwana wo ngwakuseruska?
12 Pakuti ŵanthu ŵaki akukhupuka mbankhaza ukongwa,
Ndipu ŵanthu wo aja mwaku iyu akamba boza;+
Lilimi lawu ndachinyengu.+
13 “Mwaviyo, ndikupumengi mpaka kukupweteka,+
Ndikusambusengi mahami chifukwa cha maubudi ngaku.
14 Wazamukurya kweni wazamuguta cha;
Wazamukuŵa ndi nja.+
Vinthu vo wato kuti ukavisungi, wakuvisunga cha,
Ndipu vinthu vo waluta navu, ndazakuvipereka ku lipanga.
15 Wazamumija mbewu kweni wazamuvuna cha.
Wazamukanda maolivi, kweni mafuta ngaki wazamugwiriskiya ntchitu cha;
Wazamupanga vinyu wasonu kweni wazamukumwa vinyu cha.+
16 Pakuti musunga marangu ngaku Omuri kweniso ntchitu zosi za nyumba yaku Ahabu,+
Ndipu mutenda mwakukoliyana ndi ulongozgi wawu.
Ndichu chifukwa chaki ndazakukusambusani chinthu chakuchitiska mantha
Ndipu ŵanthu ŵaki ndazakuŵasambusa chinthu chakuchimbiya khwelu;+
Ndipuso mitundu ya ŵanthu yazakukunyozani.”+
7 Soka ini! Nde nge munthu yo,
Asani vipasu va mu chihanya vawunjikika
Ndipuso asani munda wa mphereska watondoleka,
Wasaniyamu khoroza lelosi cha la mphereska kuti waryi,
Kweniso wasaniyamu cha vipasu va mkuyu vakwamba kucha vo ndikhumbira.
2 Ŵanthu akugomezgeka amala pacharu chapasi;
Pakati pa ŵanthu palivi munthu wakunyoloka.+
Wosi akhaza panthowa kuti abayi ŵanthu.*+
Weyosi watuthya mubali waki ndi chilepa.
3 Manja ngawu ngalusu pakuchita vinthu viheni;+
Mulongozgi walamula ŵanthu kuti amupaski mphasu,
Wakweruzga wapempha mphotu,+
Munthu wakutchuka wakamba vo wakhumba,+
Ndipu wosi achitiya limoza.*
4 Munthu wamampha ukongwa pakati pawu we nge minga,
Ndipu munthu wakunyoloka ukongwa pakati pawu ndi muheni ukongwa kuluska mpanda waminga.
Zuŵa la alonda ŵaku kweniso la chilangu chaku lizengi.+
Ndipu azamutimbanyizgika.+
5 Ungagomezganga munyaku cha
Pamwenga kuthemba mubwezi waku wapamtima.+
Phwere ndi vo ukambiya munthu yo wagona muchifuŵa chaku.
6 Pakuti mwana wayuyuwa awisi,
Mwana munthukazi wayukiya anyina,+
Ndipu mkumwana wayukiya apongozi ŵaki;+
Arwani a munthu mbanthu a munyumba yaki.+
7 Kweni ini ndilutirizgengi kulereska kwaku Yehova.+
Ndilindizgengi Chiuta wa utaski wangu.*+
Chiuta wangu wandivwengi.+
8 Ungakondwanga cha chifukwa chaku ini, yiwi murwani* wangu.
Chinanga kuti ndawa, ndazamuyuka;
Chinanga kuti ndija mu mdima, Yehova wazamukuŵa ukweru wangu.
9 Ndizizipizgengi ukali waku Yehova,
Pakuti ndamubudiya,+
Mpaka po iyu wayeruzgiya mulandu wangu kweniso mpaka po waziya ndi urunji kwaku ini.
Wandituzgiyengi ku ukweru;
Ndiwonengi urunji waki.
10 Murwani wangu nayu wazamuwona,
Ndipu soni zazakumuko yo wangundikambiya kuti:
“We pani Yehova Chiuta waku?”+
Masu ngangu ngazamuwona murwani wangu.
Sonu iyu wazamukandikakandika nge mathipa mumsewu.
11 Lazamukuŵa zuŵa lakuzenge mpanda waku wa mya;
Pa zuŵa lenilo, mphaka yazamusazgikiyaku.*
12 Pa zuŵa lenilo ŵanthu azamukuza kwaku yiwi
Kutuliya kucharu cha Asiriya ndipuso kumatawuni nga ku Ijipiti,
Kutuliya ku Ijipiti mpaka ku Msinji;*
Kutuliya kunyanja mpaka kunyanja ndipuso kutuliya kuphiri mpaka kuphiri.+
13 Ndipu charu chazamusambuka mahami chifukwa cha ŵanthu wo aja mwenimo,
Chifukwa cha vo achita.*
14 Liska ŵanthu ŵaku ndi nthonga yaku, mskambu wa chihara chaku,+
Wo wajanga wija mukati mwa munda wa vipasu.
Mskambu wo ukaryengi mu Bashani ndipuso mu Giliyadi+ nge mo venge mu mazuŵa ngakali.
15 “Ndazakuŵalongo vinthu vakuziziswa,
Nge mo venge mu mazuŵa ngo ungutuliya mucharu cha Ijipiti.+
16 Mitundu ya ŵanthu yazamuwona ndipu yazamuchita soni chinanga kuti ye ndi nthazi.+
Yiwu azamuko janja lawu pamulomu;
Makutu ngawu ngazamunyota.
17 Yiwu azamunyanganga fuvu nge njoka;+
Azamutuwa mumalu ngawu ngakuvikilirika achimbwambwanthiya nge vinyama vakukwaŵa va pacharu chapasi.
Azamukuza kwaku Yehova Chiuta widu ndi mantha,
Ndipu azamutenthema chifukwa chaku yiwi.”+
18 Ndi Chiuta nuyu yo wayanana ndi yimwi,
Yo wagowoke kunanga kweniso mphulupulu+ za akujaku a chihara chaki?+
Iyu wasunga ukali waki mpaka muyaya cha,
Pakuti wakondwa ndi chanju chambula kumala.+
19 Iyu wazakutilongo so lisungu;+ wazamuthereska* kunanga kwidu.
Maubudi ngawu ngosi mwazakungaponya mundimba ya nyanja.+
20 Mwazamugomezgeka kwaku Yakobe,
Mwazamulongo chanju chambula kumala kwaku Abrahamu,
Nge mo mungulapizgiya kwa apapi ŵidu akali kwambiya mu mazuŵa ngakali.+
Ili ndi zina lakudumuwa lakutuliya ku zina lakuti Mikayeli pamwenga Mikaya, ndipu ling’anamuwa kuti, “Ndiyani yo Wayanana ndi Yehova?”
Pamwenga kuti, “vidika vazamugaŵikana.”
Mazu ngaki chayingu, “ndazakuyipunguliya.”
Pamwenga kuti, “malipiru ngosi nga uhuli waki ngazamuwotcheka.”
Pamwenga kuti, “munyumba yaku Afira.”
Pamwenga kuti, “wazakukulondani vinthu.”
Yapa pangafwatulikiya so kuti, “Mutuzgaku vakujitowese vakuzirwa ku vakuvwala.”
Pamwenga kuti, “mumumphika wa mulomu usani.”
Yapa pangafwatulikiya so kuti, “pa nyengu yo ŵe ndi chinthu chakuti atafunyi.”
Pamwenga kuti, “azamubenekere milomu yawu.”
Pamwenga kuti, “siliva.”
Pamwenga kuti, “phiri la nyumba yakusopiyamu.”
Pamwenga kuti, “ulongozgi wazamutuwa.”
Pamwenga kuti, “wazamunozga.”
Pamwenga kuti, “wakali.”
Mazu ngaki chayingu, “masawuzandi.”
Mazu ngaki chayingu, “azamuliska.”
Pamwenga kuti, “nkharamu yimana yanthazi.”
Wonani Mazu ngo Ngakonkhoskeka.
Matholi mbana a ng’ombi.
Wonani Fundu Zakukumaliya B14.
Pamwenga kuti, “wambula kafukwa.”
Mazu ngaki chayingu, “kuti adiri ndopa.”
Mazu ngaki chayingu, “wosi ativilukiya limoza.”
Pamwenga kuti, “Ndilindizgengi Chiuta wa utaski wangu mwakuzikira.”
Mu Chibeberi mazu ngakuti “murwani” pa lemba ili ngakamba va chinthu chinthukazi.
Yapa pangafwatulikiya so kuti, “dangu lazamukuŵa kutali.”
Kung’anamuwa Msinji wa Yufureti.
Mazu ngaki chayingu, “Chifukwa cha vipasu va ntchitu zawu.”
Pamwenga kuti, “wazamukandakanda.”