ZEKARIYA
1 Mu mwezi wa 8, mu chaka chachiŵi cha ulamuliru waku Dariyo,+ Yehova wangulongoro ndi mchimi Zekariya,*+ mwana waku Berekiya, mwana waku Ido, ndipu wangukamba kuti: 2 “Yehova wanguŵakwiyiya ukongwa awusemwi.+
3 “Uŵakambiyi kuti, ‘Yehova wa mizinda wakamba kuti: “‘Weriyani kwaku ini,’ Yehova wa mizinda ndiyu wakamba, ‘ndipu ini ndiweriyengi kwaku yimwi,’+ Yehova wa mizinda ndiyu wakamba.”’
4 “‘Mungachitanga nge awusemwi cha, wo achimi akali aŵakambiyanga kuti: “Yehova wa mizinda wakamba kuti, ‘Chondi tuwaniku* ku nthowa zinu ziheni kweniso ku ntchitu zinu ziheni.’”’+
“‘Kweni yiwu anguvwiya cha ndipuso anguvwisiya cha kwaku ini,’+ Yehova ndiyu wakamba.
5 “‘Kumbi awusemwi ŵe pani sonu? Ndipuso kumbi achimi anguja kwamuyaya? 6 Kweni mazu ngangu ndipuso marangu ngo ndingupaska ateŵeti ŵangu achimi, asi vingufiskika kwa awusemwi?’+ Mwaviyo, yiwu anguwere kwaku ini ndipu angukamba kuti: ‘Yehova wa mizinda watichitiya mwakukoliyana ndi nthowa zidu kweniso ntchitu zidu, nge mo wangukambiya kuti wachitiyengi.’”+
7 Pa zuŵa la 24, mu mwezi wa 11, wo ndi mwezi wa Shebati,* mu chaka chachiŵi cha ulamuliru waku Dariyo,+ Yehova wangulongoro ndi mchimi Zekariya, mwana waku Berekiya, mwana waku Ido. Zekariya wangukamba kuti: 8 “Ndinguwona chiwona ndi usiku. Ndinguwona munthu yo wangukwera pahachi yiyera ndipu wanguma muvimiti va mirito pamalu ngakusendemuka; kuvuli kwaki kwenga mahachi ngayera, ngakhofi kweniso ngatuŵa.”
9 Sonu ini ndingufumba kuti: “Ambuya, kumbi mbayani ŵenaŵa?”
Mungelu yo walongoronga nani wangundimuka kuti: “Ndikukambiyengi kuti mbayani.”
10 Pavuli paki, munthu yo wanguma muvimiti va mirito wangukamba kuti: “Yaŵa mbanthu wo Yehova waŵatuma kuti ayendiyendi pacharu chapasi.” 11 Ndipu yiwu angukambiya mungelu waku Yehova yo wanguma muvimiti va mirito kuti: “Tayendayenda pacharu chapasi, ndipu awonani! pacharu chosi chapasi pe chimangu ndipu palivi chakutimbanyizga.”+
12 Sonu mungelu waku Yehova wangukamba kuti: “Yehova wa mizinda, kumbi tawuni ya Yerusalemu kweniso matawuni nga ku Yuda,+ ngo mwangakwiyiya kwa vyaka 70 ivi, mungachitiyengi lisungu cha mpaka zuŵanji?”+
13 Yehova wangumuka mungelu yo walongoronga nani, ndipu wangumumuka ndi mazu ngamampha kweniso ngakupembuzga. 14 Pavuli paki, mungelu yo walongoronga nani wangundikambiya kuti: “Daniriza kuti, ‘Yehova wa mizinda wakamba kuti: “Nde wakunozgeka kuvikiliya Yerusalemu kweniso Ziyoni.+ 15 Ndayikwiyiya ukongwa mitundu yo yiwona kuti njakuvikilirika,+ chifukwa chakuti ndinguyikwiyiya kamanavi,+ kweni yinguŵalanga ukongwa ŵanthu ŵangu kuluska mo ndakhumbiyanga.”’+
16 “Mwaviyo, Yehova wakamba kuti: ‘“Ndimulongongi so lisungu Yerusalemu,+ ndipu nyumba yangu yizengekengi mwaku iyu,”+ Yehova wa mizinda ndiyu wakamba, “ndipu chingwi chakupimiya chitambasulikiyengi paku Yerusalemu.”’+
17 “Daniriza so ndipu kamba kuti, ‘Yehova wa mizinda wakamba kuti: “Mumatawuni ngangu mwazamuzaza vinthu vamampha; ndipu Yehova wazamupembuzga so Ziyoni,+ kweniso wazamusankha so Yerusalemu.”’”+
18 Pavuli paki, ndinguyunuka ndipu ndinguwona masengwi nganayi.+ 19 Sonu ndingufumba mungelu yo walongoronga nani kuti: “Ndi vinthu wuli venivi?” Iyu wangumuka kuti: “Yanga ndi masengwi ngo ngangumbininiska Yuda,+ Isirayeli+ kweniso Yerusalemu.”+
20 Pavuli paki, Yehova wangundilongo ŵanthu alusu anayi. 21 Ini ndingufumba kuti: “Kumbi ŵanthu yaŵa azamuchitanji?”
Iyu wangundimuka kuti: “Ŵanthu yaŵa ndi masengwi ngo ngangumbininiska Yuda mwakuti pengavi yo wangufiska kusoska mutu waki. Anyaki yaŵa azengi kuti azingawofyi, kuti aziwisiyi pasi masengwi nga mitundu ya ŵanthu yo yingusoske muchanya masengwi ngawu kuti yilimbani ndi charu cha Yuda ndi chilatu chakuti yichimbininiski.”
2 Ndinguyunuka ndipu ndinguwona munthu yo wenga ndi chingwi chakupimiya+ mujanja laki. 2 Sonu ndingufumba kuti: “Uluta pani?”
Iyu wangumuka kuti: “Ndiluta kuchipima Yerusalemu, kuti nkhaziŵi usani waki kweniso utali waki.”+
3 Ndipu awonani! mungelu yo walongoronga nani wangutuwaku kwaku ini, ndipu mungelu munyaki wanguza kuzikumana nayu. 4 Pavuli paki, wangumukambiya kuti: “Tchimbiriya kuwa ndipu ukakambiyi mnyamata yuwa kuti, ‘“Mu Yerusalemu mwazamuja so ŵanthu+ nge mizi yambula mipanda, chifukwa chakuti mwazamukuŵa ŵanthu anandi kweniso viŵetu vinandi.+ 5 Ndazakumuzingiliza nge mpanda wa motu,+ ndipu unkhankhu wangu wazamukuŵa pakati paki.”’+ Yehova ndiyu wakamba.”
6 “Zani! Zani! Thaŵani kucharu cha kunkhondi,”*+ Yehova ndiyu wakamba.
“Pakuti ndakumbininiskiyani ku mphepu zinayi zakuchanya,”+ Yehova ndiyu wakamba.
7 “Iza yiwi Ziyoni! Thaŵa yiwi uja ndi mwana munthukazi waku Babiloni.+ 8 Chiuta wati wakankhuskika, wandituma ku mitundu yo yakuphanganingi vinthu,+ pakuti Yehova wa mizinda wakamba kuti: ‘Weyosi yo wakukwaskani, wakwaska mboni ya jisu langu.+ 9 Pakuti ndiŵasoskiyengi janja langu, ndipu akapolu ŵawu aŵaphangengi vinthu.’+ Ndipu mwazamuziŵa kuti Yehova wa mizinda wandituma.
10 “Yiwi mwana munthukazi wa ku Ziyoni, daniriza mwalikondwa;+ pakuti ndituza,+ ndipu ndazamuja pakati paku,”+ Yehova ndiyu wakamba. 11 “Mu zuŵa lo, mitundu yinandi ya ŵanthu yazakujibatika kwaku Yehova,+ ndipu azamukuŵa ŵanthu ŵangu; ndipu ini ndazamuja pakati pinu.” Mwazamuziŵa kuti Yehova wa mizinda wandituma kwaku yimwi. 12 Yehova wazamuto Yuda kuti waŵi chigaŵa chaki pamalu ngakupaturika, ndipu wazamusankha so Yerusalemu.+ 13 Vamoyu vosi vije* cheti pa masu paku Yehova, pakuti wachitapu kanthu kutuliya mumalu ngaki ngakujamu ngakupaturika.
3 Sonu iyu* wangundilongo Yoswa,+ wasembi mura yo wanguma pafupi ndi mungelu waku Yehova, ndipu Satana+ wanguma kujanja laki lamaryi kuti wamususki. 2 Pavuli paki, mungelu waku Yehova wangukambiya Satana kuti: “Yehova wakuchenyi, yiwi Satana,+ Yehova yo wakusankha Yerusalemu,+ wakuchenyi! Asi ichi ntchisindi chakukole cho achisonkho kumotu?”
3 Sonu Yoswa wanguvwala vakuvwala vawuyu ndipu wanguma pafupi ndi mungelu. 4 Mungelu yo wangukambiya wo anguma pafupi ndi iyu kuti, “Muzuweni vakuvwala vawuyu.” Pavuli paki, wangumukambiya kuti, “Awona, ndatuzgaku ubudi* waku kwaku yiwi ndipu akuvwalikengi vakuvwala vamampha.”*+
5 Sonu ndingukamba kuti: “Muvwalikeni mphumphu yakutowa kumutu kwaki.”+ Ndipu angumuvwalika mphumphu yakutowa kumutu kwaki kweniso angumuvwalika vakuvwala; ndipu mungelu waku Yehova wanguma pafupi. 6 Pavuli paki, mungelu waku Yehova wangukambiya Yoswa kuti: 7 “Yehova wa mizinda wakamba kuti, ‘Asani uyendengi mu nthowa zangu ndi kuchita ntchitu zaku pa masu pangu, uteŵetiyengi nge wakweruzga munyumba yangu+ ndipuso uphweriyengi* mabalaza ngangu; ndipu ndikuzomerezengi kufika pa masu pangu nge yaŵa, wo ama panu.’
8 “‘Chondi yivwa, yiwi Wasembi Mura Yoswa, yiwi kweniso anyaku wo aja pasi panthazi paku, pakuti ŵanthu yaŵa ŵe nge chisimikizu; awona! ndituza ndi mteŵeti wangu,+ Mphukira!+ 9 Wona mwa wo ndaŵika panthazi paku Yoswa! Pamwa wenuwu pe masu 7; ndipu ndilembengepu mazu mwakuchita kujoba,’ Yehova wa mizinda ndiyu wakamba, ‘ndipu ndituzgengepu ubudi wa charu cho, mu zuŵa limoza.’+
10 “‘Mu zuŵa lo, weyosi waku yimwi wazamudana munthu yo wakuzengezana nayu kuti wazije musina mwa chimiti chaki cha mphereska ndipuso musina mwa chimiti chaki cha mkuyu,’+ Yehova wa mizinda ndiyu wakamba.”
4 Mungelu yo walongoronga nani wanguza so ndipu wangundiyuska, nge kuti wayuska munthu yo we mu tulu. 2 Pavuli paki, wangundifumba kuti: “Uwonanji?”
Sonu ini ndingumuka kuti: “Awonani! ndiwona chakuŵikapu nyali cho chikupangika ndi golidi pe,+ ndipu pachanya paki pe mbali yabakuli. Pachakuŵikapu nyali cho pe nyali 7,+ hinya, nyali 7, ndipu nyali zo, zo ze pachanya pa chakuŵikapu nyali, ze ndi mapayipi 7. 3 Pafupi ndi chakuŵikapu nyali cho pe vimiti va maolivi viŵi,+ chimoza kumaryi kwa mbali yabakuli, chinyaki kumazge.”
4 Pavuli paki, ndingufumba mungelu yo walongoronga nani kuti: “Ambuya, kumbi vinthu venivi ving’anamuwanji?” 5 Sonu mungelu yo walongoronga nani wangundifumba kuti: “Kumbi uziŵa cha kuti vinthu venivi ving’anamuwanji?”
Ini ndingumuka kuti: “Ndiziŵa cha ambuya.”
6 Pavuli paki, wangundikambiya kuti: “Yehova wakambiya Zerubabeli kuti: ‘“Vinthu vosi venivi vichitikengi ndi asilikali cha pamwenga nthazi,+ kweni vichitikengi ndi mzimu wangu,”+ Yehova wa mizinda ndiyu wakamba. 7 Ndiwi yani, yiwi phiri likulu? Usambukengi malu ngachinyeti*+ pa masu paku Zerubabeli.+ Ndipu iyu wazengi ndi mwa wapachanya, uku ŵanthu adaniriza kuti: “Ngwakutowa! Ngwakutowa!”’”
8 Yehova wangulongoro so nani ndipu wangukamba kuti: 9 “Manja ngaku Zerubabeli ndingu ngazenga fawundeshoni ya nyumba iyi,+ ndipu wazakuyimaliza ndi manja ngaki.+ Mwazamuziŵa kuti Yehova wa mizinda ndiyu wandituma kwaku yimwi. 10 Pakuti ndiyani yo wayuyuwa zuŵa la vinthu vo vayamba kamanakamana?*+ Pakuti yiwu azamukondwa kweniso azamuwona chingwi chakupimiya* kujanja laku Zerubabeli. Masu 7 yanga ndi masu ngaku Yehova ngo ngalereska uku ndi uku pacharu chosi chapasi.”+
11 Pavuli paki, ndingumufumba kuti: “Kumbi vimiti viŵi va maolivi, cho che kumaryi kwa chakuŵikapu nyali kweniso cho che kumazge, ving’anamuwanji?”+ 12 Ndingumufumba so kachiŵi kuti: “Kumbi mphanda ziŵi za vimiti va maolivi zo zipunguwa mafuta nga golidi kuziya mumapayipi ngaŵi ngagolidi, zing’anamuwanji?”
13 Sonu wangundifumba kuti: “Kumbi uziŵa cha kuti vinthu venivi ving’anamuwanji?”
Ini ndingumuka kuti: “Ndiziŵa cha ambuya.”
14 Iyu wangukamba kuti: “Vinthu venivi vimiya akusankhika ŵaŵi wo atuma pafupi ndi Mbuya wa charu chosi chapasi.”+
5 Ndinguyunuka so, ndipu ndinguwona mpukutu wo waputanga. 2 Sonu iyu wangundifumba kuti: “Uwonanji?”
Ini ndingumuka kuti: “Ndiwona mpukutu wo uputa, mu utali ukwana mamita pafufupi 9* ndipu mu usani ukwana mamita pafufupi nganayi.”*
3 Pavuli paki, wangundikambiya kuti: “Ili ndi thembu lo liluta pacharu chosi chapasi chifukwa chakuti munthu weyosi yo watuba,+ nge mo kwalembeke kurwandi limoza la mpukutu wo, walangika cha; ndipuso weyosi yo walapizga vinthu vaboza+ nge mo kwalembeke kurwandi linyaki la mpukutu wo, walangika cha. 4 ‘Ini ndini ndatumiza thembu lo,’ Yehova wa mizinda ndiyu wakamba, ‘ndipu lazamusere munyumba ya munkhungu kweniso munyumba ya munthu yo walapizga vinthu vaboza mu zina langu. Thembu lo, lazamuja munyumba yaki ndipu lazakuyinanga limoza ndi mathabwa ngaki kweniso mya yaki.’”
5 Pavuli paki, mungelu yo walongoronga nani wanguza so kwaku ini, ndipu wangundikambiya kuti: “Yunuka, ndipu wona cho chiluta ko.”
6 Sonu ndingufumba kuti: “Ntchinthu wuli?”
Iyu wangumuka kuti: “Cho chiluta ko ntchiyaŵi chakupimiya cha efa.”* Iyu wangulutirizga kukamba kuti: “Umu ndimu ŵanthu aheni awoneke pacharu chosi chapasi.” 7 Ndipu ndinguwona kuti chibenekeleru chandolu chakuzunguliya cha chiyaŵi cho, chingubenulika, ndipu mukati mwaki mwenga munthukazi yo wanguja pasi. 8 Sonu wangundikambiya kuti: “Munthukazi uyu zina laki ndi Uheni.” Pavuli paki, wangumututuzgiya muchiyaŵi chakupimiya cha efa, ndipu wangujalapu ndi chibenekeleru chandolu.
9 Pavuli paki, ndinguyunuka ndipu ndinguwona anthukazi ŵaŵi wo azanga. Yiwu aphululukanga mumphepu. Anthukazi wo ŵenga ndi mapapa nge nga kakoŵa. Yiwu angunyamuliya chiyaŵi cho mude pakati pa charu chapasi ndi kuchanya. 10 Sonu ndingufumba mungelu yo walongoronga nani kuti: “Kumbi aluta nachu pani chiyaŵi chakupimiya cha efa?”
11 Iyu wangumuka kuti: “Aluta nachu kucharu cha Shinara*+ kuti munthukazi yo, akamuzenge nyumba; ndipu asani yanozgeka, akumuŵika kweniko pamalu ngaki ngakwenere.”
6 Pavuli paki, ndinguyunuka so ndipu ndinguwona magaleta nganayi ngachituwa pakati pa mapiri ngaŵi. Mapiri ngo, ngenga nga mkuŵa. 2 Galeta lakwamba lenga ndi mahachi ngayera, ndipu galeta lachiŵi lenga ndi mahachi ngafipa.+ 3 Galeta lachitatu lenga ndi mahachi ngatuŵa, ndipu galeta lachinayi lenga ndi mahachi ngakuŵalaŵata kweniso mahachi ngavibangavibanga.+
4 Ndingufumba mungelu yo walongoronga nani kuti: “Ambuya, kumbi ndi vinthu wuli venivi?”
5 Mungelu yo, wangundimuka kuti: “Ivi ndi mizimu yinayi+ yakuchanya yo yiluta yati yawoneke pa masu pa Ambuya a charu chosi chapasi.+ 6 Galeta lo le ndi mahachi ngafipa liluta kucharu cha kunkhondi;*+ mahachi ngatuŵa ngaluta kusirya linyaki la nyanja; ndipu mahachi ngakuŵalaŵata ngaluta kucharu cha kumwera. 7 Mahachi ngavibangavibanga ngakhumbisiskanga kwendakwenda pacharu chapasi.” Pavuli paki wangukamba kuti: “Lutani, yendaniyendani pacharu chapasi.” Ndipu mahachi ngo ngangwamba kwendakwenda pacharu chapasi.
8 Pavuli paki, wangudaniriza kwaku ini ndipu wangukamba kuti: “Awona, mahachi ngo ngaluta kucharu cha kunkhondi,* ngaweza* ukali waku Yehova mucharu cha kunkhondi.”
9 Yehova wangulongoro so nani ndipu wangukamba kuti: 10 “Luta kwaku Hedayi, Tobiya ndipuso Yedaya kuti ukato vinthu vo akuza navu kutuliya ku ŵanthu wo akutoleke ku ukapolu; ndipu pa zuŵa lenilo, uziluti kunyumba yaku Yosiya, mwana waku Zefaniya limoza ndi ŵanthu wo atuliya ku Babiloni. 11 Uto siliva ndi golidi ndipu upangi chisoti chaufumu.* Chisoti cho ukachivwaliki kumutu waku Yoswa,+ mwana waku Yehozadaki, wasembi mura. 12 Ndipu ukamukambiyi kuti,
“‘Yehova wa mizinda wakamba kuti: “Wona munthu uyu, yo zina laki ndi Mphukira.+ Iyu wazamuphuka pamalu ngaki, ndipu wazamuzenga nyumba yakusopiyamu yaku Yehova.+ 13 Iyu ndiyu wazamuzenga nyumba yakusopiyamu yaku Yehova, ndipu wazamulonde unkhankhu. Wazamuja pampandu waufumu kweniso wazamulamuliya. Iyu wazamukuŵa so wasembi pampandu waki waufumu,+ ndipu maudindu ngosi ngaŵi ngazamukoliyana.* 14 Ndipu chisoti chaufumu* chazamukuŵa chakukumbukiya Helemu, Tobiya, Yedaya+ ndi Heni, mwana waku Zefaniya munyumba yakusopiyamu yaku Yehova. 15 Ŵanthu wo ŵe kutali ukongwa azamukuza kuti azizengeku nyumba yakusopiyamu yaku Yehova.” Mwazamuziŵa kuti Yehova wa mizinda wandituma kwaku yimwi. Ndipu venivi vazamuchitika asani mwazivwiya mazu ngaku Yehova Chiuta winu.’”
7 Ndipu mu chaka chachinayi cha ulamuliru wa Fumu Dariyo, Yehova wangulongoro ndi Zekariya+ pa zuŵa lachinayi la mwezi wa 9, wo ndi mwezi wa Kisilevi.* 2 Ŵanthu a ku Beteli angutuma Shareza kweniso Regemu-meleki limoza ndi ŵanthu ŵaki kuti akapemphi Yehova kuti waŵachitiyi lisungu.* 3 Yiwu angukambiya asembi a panyumba* yaku Yehova wa mizinda kweniso achimi kuti: “Kumbi nditenere kuliya mu mwezi wachinkhondi+ kweniso kufunga, nge mo ndachitiya kwa vyaka vinandi?”
4 Yehova wa mizinda wangulongoro so nani, ndipu wangukamba kuti: 5 “Kambiya ŵanthu wosi a mucharu ichi kweniso asembi kuti, ‘Pa nyengu yo mwafunganga ndi kuliya mu mwezi wachinkhondi kweniso mu mwezi wa 7+ kwa vyaka 70,+ kumbi mwafungiyanga nadi ini? 6 Ndipuso pa nyengu yo mwaryanga ndi kumwa, asi mwajiryisanga ndi kujimwisa mwaŵeni? 7 Asi mwakhumbikanga kuvwiya mazu ngo Yehova wangupharazga kuporote mwa achimi akali,+ pa nyengu yo mu Yerusalemu kweniso mumatawuni ngapafupi mwenga ŵanthu, kweniso pa nyengu yo mwenga chimangu? Asi mwakhumbikanga kuvwiya Chiuta pa nyengu yo muchigaŵa cha Negebu kweniso cha Shefela mwenga ŵanthu?’”
8 Yehova wangulongoro so ndi Zekariya ndipu wangukamba kuti: 9 “Yehova wa mizinda wakamba kuti, ‘Muyeruzgengi ndi urunji wenechu,+ ndipuso muchitiyanengi vinthu ndi chanju chambula kumala+ kweniso ndi lisungu. 10 Mungabiyanga choko cha, mwana mulanda,+ mulendu+ pamwenga mukavu;+ ndipuso munganozgiyanga chiŵembu anyinu cha mumitima yinu.’+ 11 Kweni yiwu akananga kuvwiya,+ ndipu angulazgaku gonthu mwamtafu,+ yiwu angujala makutu ngawu kuti aleki kuvwa.+ 12 Angunonopesa mitima yawu nge mwa wa dayamondi*+ ndipu anguvwiya cha dangu* kweniso mazu ngo Yehova wa mizinda wangutuma mwakugwiriskiya ntchitu mzimu waki kuziya mwa achimi akali.+ Mwaviyo Yehova wa mizinda wangukwiya ukongwa.”+
13 “‘Nge mo yiwu anguleke kuvwisiya kwaku ini pa nyengu yo ndaŵadananga,+ nani ndinguvwisiya cha kwaku yiwu pa nyengu yo andidananga,’+ Yehova wa mizinda ndiyu wakamba. 14 ‘Ndipu mwakugwiriskiya ntchitu chimphunga, ndinguŵambininiskiya mu mitundu yosi ya ŵanthu yo ayiziŵanga cha,+ charu chawu anguchileka chabwangandulika, mwakuti pengavi yo wajumphangamu pamwenga kuweriyamu;+ pakuti yiwu angusambusa charu chakutowa kuja chinthu chakuchitiska mantha.’”
8 Yehova wa mizinda wangulongoro so nani, ndipu wangukamba kuti: 2 “Yehova wa mizinda wakamba kuti, ‘Ndasimikiza mtima kuvikiliya Ziyoni,+ ndasimikiza mtima kuti ndimuvikiliyi ndi ukali wangu ukulu.’”
3 “Yehova wakamba kuti, ‘Ndazamuwere ku Ziyoni+ kweniso ndazamuja mu Yerusalemu;+ ndipu Yerusalemu wazamudanika kuti tawuni ya uneneska,*+ kweniso phiri laku Yehova wa mizinda, phiri lakupaturika.’”+
4 “Yehova wa mizinda wakamba kuti, ‘Anthulumi ndi anthukazi akukota azamuja so mumabalaza nga tawuni ya Yerusalemu, weyosi wazamukoleze nthonga kujanja laki chifukwa cha kukota ukongwa.*+ 5 Mumabalaza nga tawuni mwazamuzaza asungwana ndi anyamata ndipu azamuseŵe mwenimo.’”+
6 “Yehova wa mizinda wakamba kuti, ‘Chinanga kuti mu mazuŵa ngo, vingaziwoneka nge kuti vakusuzga ukongwa ku akujaku a ŵanthu yaŵa, kumbi vingaziŵa so vakusuzga kwaku ini?’ Yehova wa mizinda ndiyu wakamba.”
7 “Yehova wa mizinda wakamba kuti, ‘Nditaska ŵanthu ŵangu kutuliya kuvyaru va kuvuma kweniso kuzambwi.*+ 8 Ndazamukuza nawu ndipu azamuja mu Yerusalemu;+ yiwu azamukuŵa ŵanthu ŵangu ndipu ini ndazamukuŵa Chiuta wawu+ wauneneska* kweniso murunji.’”
9 “Yehova wa mizinda wakamba kuti, ‘Manja nginu ngaŵi ndi nthazi,*+ yimwi sonu mutuvwa mazu yanga kutuliya pa mulomu wa achimi,+ ngo so munguvwa pa zuŵa lo fawundeshoni ya nyumba yaku Yehova wa mizinda yinguzengeke, kuti nyumba yakusopiyamu yizengeki. 10 Pakuti yechendafiki nyengu yeniyi, pengavi malipiru ngo nganguperekeka ku munthu pamwenga nyama;+ ndipu kusere ndi kutuwa kwenga kwakofya chifukwa cha murwani, pakuti ndinguchitiska kuti ŵanthu wosi ayukiyanengi ŵijaŵija.’
11 “‘Kweni sonu, akujaku a ŵanthu yaŵa ndichitengi nawu vinthu nge mo ndinguchitiya nawu mu mazuŵa ngakali cha,’+ Yehova wa mizinda ndiyu wakamba. 12 ‘Pakuti mbewu za chimangu zazamumijika; vimiti va mphereska vazamupasa vipasu vaki, charu chazamupereka vakukolola vaki,+ kweniso kuchanya kwazamupereka dungwi laki; ndipu ndazamuchitiska kuti akujaku a ŵanthu yaŵa ahari vinthu vosi venivi.+ 13 Ndipu nge mo mungujaliya chinthu chakutembeka pakati pa mitundu ya ŵanthu,+ yimwi a munyumba yaku Yuda kweniso yimwi a munyumba yaku Isirayeli, ndimu so ndazakukutaskiyani, ndipu mwazamukuŵa thumbiku.+ Mungawopanga cha!+ Manja nginu ngaŵi ndi nthazi.’*+
14 “Pakuti Yehova wa mizinda wakamba kuti, ‘“Nge mo ndingusimikiziya mtima kukuwisiyani masoka chifukwa chakuti apapi ŵinu akali angundikwiyisa,” Yehova wa mizinda ndiyu wakamba, “ndipu ndingusintha cha maŵanaŵanu,+ 15 ndimu so ndasimikiziya mtima kuchitiya vamampha Yerusalemu kweniso nyumba yaku Yuda.+ Mungawopanga cha!”’+
16 “‘Muchitengi vinthu ivi: Weyosi wakambengi uneneska ku munyaki,+ ndipu asani muyeruzga pamageti nga matawuni nginu, muchitengi vinthu mwauneneska kweniso muchiskengi chimangu.+ 17 Munganozgiyananga chiŵembu cha mumitima yinu,+ ndipuso mungalapizganga vinthu vaboza cha;+ pakuti nditinkha vinthu vosi venivi,’+ Yehova ndiyu wakamba.”
18 Yehova wa mizinda wangulongoro so nani, ndipu wangukamba kuti: 19 “Yehova wa mizinda wakamba kuti, ‘Kufunga kwa mwezi wachinayi,+ kufunga kwa mwezi wachinkhondi,+ kufunga kwa mwezi wa 7+ kweniso kufunga kwa mwezi wa 10,+ zazamukuŵa nyengu za kuzaya ndipuso kukondwa kwa a munyumba yaku Yuda, maphwandu nga likondwa.+ Mwaviyo, muyanjengi uneneska kweniso chimangu.’
20 “Yehova wa mizinda wakamba kuti, ‘Ŵanthu amitundu yakupambanapambana kweniso ŵanthu wo aja mumatawuni nganandi azamukuza; 21 ndipuso ŵanthu wo aja mutawuni yimoza azamuluta ku ŵanthu a mutawuni yinyaki ndi kukamba kuti: “Tiyeni tiluti ndi mtima wosi kuti tikapemphi Yehova kuti watichitiyi lisungu* kweniso kuti tikapenji Yehova wa mizinda. Ini nani ndiluta.”+ 22 Ndipu ŵanthu anandi amitundu yakupambanapambana kweniso ŵanthu anthazi, azamukuza kuti apenji Yehova wa mizinda ku Yerusalemu+ kweniso kuti apemphi Yehova kuti waŵachitiyi lisungu.’*
23 “Yehova wa mizinda wakamba kuti, ‘Mu mazuŵa ngo, anthulumi 10 akutuliya mu vineneru vosi va mitundu ya ŵanthu,+ azamukolesa mkhanju wa* Myuda, ndipu azamukamba kuti: “Tikhumba kuluta namwi mwaŵanthu yimwi,+ pakuti tavwa kuti Chiuta we namwi.”’”+
9 Uthenga wacheruzgu:
“Yanga ndi mazu ngaku Yehova ngakukwaskana ndi charu cha Hadiraki,
Pakuti jisu laku Yehova le pa ŵanthu+
Ndipuso pa mafuku ngosi ngaku Isirayeli.
2 Mazu yanga ngakwaska so Hemati,+ yo wakupakana nayu,
Kweniso ngakwaska Turo+ ndi Sidoni,+ pakuti mbazeru ukongwa.+
3 Turo wangujizenge chimbumira.*
Wanguwunjika siliva nge fuvu
Kweniso wanguwunjika golidi nge dongu la mumisewu.+
4 Awona! Yehova wazakumulonda vinthu vaki,
Ndipu wazamubayiya asilikali ŵaki munyanja;*+
Ndipu wazamupiriya ndi motu.+
5 Ashikeloni wazamuwona ndipu wazamuchita mantha;
Gaza wazamukuvwa urwirwi ukulu,
Ekironi nayu wazamukuvwa urwirwi, chifukwa chakuti yo wathembanga walengeseka.
Mu Gaza mwazamukuŵa so fumu cha,
Ndipu mu Ashikeloni mwazamuja ŵanthu cha.+
6 Mwana wapadondu wazamuja mu Ashidodi,
Ndipu ndazamumalisa kunyada kwa Mfilisiti.+
7 Ndazamutuzgamu vinthu vakubikiriya ndopa mumulomu mwaki
Ndipuso ndazamutuzgamu vinthu vakuseruska muminyu ngaki,
Ŵanthu ŵaki wo ajaku azamukuŵa aku Chiuta widu;
Iyu wazamukuŵa nge mulongozgi wa fuku mu Yuda,+
Ndipu Ekironi wazamukuŵa nge Myebusi.+
8 Ndazamujintha msasa nge mlonda kuti ndivikiliyi nyumba yangu,+
Kuti paziŵevi munthu wakujumphamu kweniso wakuweriyamu;
Ndipu kapitawu* wazamujumphamu so cha,+
Pakuti ndawona* ndi masu ngangu.
9 Yiwi mwana munthukazi wa ku Ziyoni, kondwa ukongwa.
Yiwi mwana munthukazi wa ku Yerusalemu, daniriza mwalikondwa chifukwa chakuti wathereska.
Awona! Fumu yaku yituza kwaku yiwi.+
Njirunji ndipu yituza ndi utaski,
Njakujiyuyuwa+ ndipu yakwera pabulu,
Yakwera pakabulu kanthulumi,* pakamwana ka bulu munthukazi.+
10 Ndazamutuzgamu galeta la nkhondu mu Efurayemu
Ndipuso ndazamutuzgamu hachi mu Yerusalemu.
Uta wankhondu wazamutuzgikamu.
Ndipu iyu wazamupharazga chimangu ku mitundu ya ŵanthu;+
Ulamuliru waki wazamutuwa kunyanja mpaka kunyanja
Kweniso wazamutuwa ku Msinji* mpaka kuvigoti va charu chapasi.+
11 Kweni yiwi munthukazi, chifukwa cha ndopa za phanganu laku,
Akayidi ŵaku ndazakuŵatuzga muzenji lambula maji.+
12 Weriyani kumalu ngakuvikilirika, yimwi akayidi wo ŵe ndi chilindizga.+
Msanawale nditikukambiya kuti,
‘Yiwi munthukazi, ndazakukuweze vigaŵa viŵi.+
13 Pakuti Yuda ndazakumukunga* nge uta wangu.
Mu uta wo ndazamuŵikamu Efurayemu nge muvi,
Ndipu ndazamuyuska ŵana ŵaku, yiwi Ziyoni,
Kuti ayukiyi ŵana ŵaku, yiwi Girisi,
Ndipu ndazakukusambusa lipanga la chinkhara.’
14 Yehova wazamuwoneka pachanya pa ŵanthu ŵaki,
Ndipu muvi waki wazamuluta nge limphezi.
Yehova, Ambuya Fumu Yikulu wazamukumba mbata,+
Ndipu wazamuluta ndi vimphunga va kumwera.
15 Yehova wa mizinda wazakuŵavikiliya,
Ndipu azamumeza ndi kuthereska mya yakuponyeka ndi chakuponye.+
Azamukumwa ndi kuchita viwawa, nge kuti amwa vinyu;
Ndipu azamuzaza nge mbali zabakuli,
Nge makona nga guŵa la sembi.+
16 Yehova Chiuta wawu wazakuŵataska mu zuŵa lo
Nge mskambu wa ŵanthu ŵaki;+
Pakuti azamukuŵa nge mya yakuzirwa ya chisoti chaufumu, cho ching’anima padongu laki.+
17 Pakuti iyu ngwamampha ukongwa,+
Ndipuso ngwakutowa ukongwa!
Chakurya chazamuchitiska kuti anyamata aje ndi nthazi,
Ndipuso vinyu wazamuchitiska kuti amwali aje ndi nthazi.”+
10 “Pemphani Yehova kuti wakupaskeni vuwa mu nyengu ya vuwa yakumaliya.
Yehova ndiyu wapanga mitambu ya vuwa,
Iyu ndiyu watiŵawisiya vuwa,+
Wapereka vakume va mumunda ku munthu weyosi.
Yiwu akamba malotu ngambula fundu,
Apembuzga kweni afyoke paŵaka.
Ndichu chifukwa chaki azamulanda nge mbereri.
Yiwu azamusuzgika, pakuti kulivi mliska.
3 Ukali wangu ukole chifukwa cha aliska,
Ndipu alongozgi akukandirizga* ndazakuŵamba mulandu;
Pakuti Yehova wa mizinda wakumbuka mskambu waki,+ nyumba ya ku Yuda,
Iyu waŵachitiska kuti aŵi nge hachi yaki yaunkhankhu ku nkhondu.
4 Kwaku iyu kutuliya mulongozgi,*
Kwaku iyu kutuliya wakulamuliya wakovya,*
Kwaku iyu kutuliya uta wa nkhondu;
Kwaku iyu kutuliya wakuwonere* weyosi, wosi pamoza.
5 Ndipu yiwu azamukuŵa nge vinkhara,
Azamukandakanda dongu la mumisewu ku nkhondu.
6 Ndazamuchitiska kuti nyumba yaku Yuda yiŵi yakuzirwa,
Ndipu ndazamutaska nyumba yaku Yosefi.+
Ndazakuŵaweze kucharu chawu,
Pakuti ndazakuŵachitiya lisungu;+
Ndipu yiwu azamukuŵa nge kuti ndikuŵajowopu cha;+
Pakuti ini ndini Yehova Chiuta wawu, ndipu ndazakuŵamuka.
7 Ŵanthu aku Efurayemu azamukuŵa nge chinkhara chanthazi,
Ndipu mtima wawu wazamukondwa nge kuti amwa vinyu.+
Ŵana ŵawu azamuwona venivi ndipu azamukondwa;
Mtima wawu wazamukondwa mwaku Yehova.+
8 ‘Ndazakuŵambiya khwelu ndipu ndazakuŵawunganisa pamoza;
Pakuti ndazakuŵawombo,+ ndipu azamuyandana,
Yiwu azamulutirizga kuyandana.
9 Chinanga kuti ndaŵambininiska nge mbewu pakati pa mitundu ya ŵanthu,
Yiwu azakundikumbuka ŵe kuvigaŵa vakutali;
Yiwu ndi ŵana ŵawu azamukuŵa so ndi nthazi ndipu azamuwere kwawu.
10 Ndazakuŵaweze kwawu kutuliya kucharu cha Ijipiti
Ndipu ndazakuŵawunganisa kutuliya kucharu cha Asiriya;+
Ndazamukuza nawu kucharu cha Giliyadi+ kweniso Lebanoni,
Ndipu malu ngazakuŵakwana cha.+
11 Iyu wazamujumpha panyanja ndi suzgu;
Ndipu wazamupuma mayiŵa nga munyanja;+
Ndimba zosi za msinji wa Nayelu zazamukamuka.
Kunyada kwa charu cha Asiriya kwazamumala,
Ndipu nthonga yaku Ijipiti yazamutuwapu.+
12 Ini Yehova ndazakuŵachitiska kuti aŵi ndi nthazi,+
Ndipu yiwu azamukwendakwenda mu zina langu,’+ Yehova ndiyu wakamba.”
11 “Jula makhomu ngaku, yiwi Lebanoni,
Kuti motu uwotchi vimiti vaku va sidara.*
2 Tenje, yiwi chimiti cha junipa, pakuti chimiti cha sidara chawa;
Vimiti vaunkhankhu vanangika!
Tenjeni yimwi vimiti va oku va ku Bashani,
Pakuti lisuwa lakukho lanangika!
3 Vwani! Chitenje cha aliska,
Pakuti unkhankhu wawu wamala.
Vwani! Kubangula kwa nkharamu zimanazimana,*
Pakuti vivwati vakukho va mumphepeti mwa msinji wa Yorodani vanangika.
4 “Yehova Chiuta wangu wakamba kuti, ‘Liskani mskambu wakwenere kubayika,+ 5 wo akugula atiwubaya+ ndipu ambika mulandu cha. Ŵanthu wo atiwugulisa+ akamba kuti, “Yehova wathamikiki pakuti ndikhupukengi.” Ndipu aliska a mskambu wo atiwuchitiya lisungu cha.’+
6 “‘Pakuti ndiŵachitiyengi so lisungu cha ŵanthu a mucharu ichi,’ Yehova ndiyu wakamba. ‘Mwaviyo, ndichitiskengi kuti munthu weyosi waje mu manja mwa munthu yo wakuzengezana nayu kweniso fumu yaki; ndipu azamunanga charu ichi. Ini ndazakuŵataska cha mu manja mwawu.’”
7 Ndipu ndingwamba kuliska mskambu wakwenere kubayika,+ mumalu mwaku yimwi, yimwi ŵanthu akusuzgika a mumskambu. Mwaviyo, ndinguto nthonga ziŵi, yimoza ndinguyidana kuti Wakukondwesa, yinyaki ndinguyidana kuti Kukoliyana,+ ndipu ndingwamba kuliska mskambu. 8 Ndingudikisa aliska atatu mu mwezi umoza, pakuti ndingutondeka kuŵazizipizga ndipu nawu angunditinkha. 9 Sonu ndingukamba kuti: “Ndilekengi kukuliskani. Yo watufwa wafwi, yo wamala wamali. Ndipu wo ajaku, aryani ŵijaŵija.” 10 Mwaviyo, ndinguto nthonga yangu yo ndinguyidana kuti Wakukondwesa,+ ndipu ndinguyidumuwa, vo vinguchitiska kuti phanganu lo ndinguchita ndi mitundu yosi ya ŵanthu lisweki. 11 Mwaviyo, phanganu lo, lingusweka pa zuŵa lo ndipu ŵanthu akusuzgika a mumskambu ŵeniwo andiwonanga, anguziŵa kuti wenga uthenga wakutuliya kwaku Yehova.
12 Pavuli paki, ndinguŵakambiya kuti: “Asani muwona kuti ve umampha kwaku yimwi, ndipaskeni malipiru ngangu; kweni asani muwona kuti ve umampha cha mbwenu lekani.” Ndipu angundipaska* malipiru ngangu, ndalama 30 zasiliva.+
13 Pavuli paki, Yehova wangundikambiya kuti: “Ziponyi muchakusungamu chuma. Wenuwu ndiwu mtengu wasuwi wo anguwona kuti andilipiri.”+ Mwaviyo ndinguto ndalama 30 zasiliva ndipu ndinguziponya muchakusungamu chuma munyumba yaku Yehova.+
14 Pavuli paki, ndingudumuwa nthonga yangu yachiŵi, yo ndinguyidana kuti Kukoliyana,+ vo vinguchitiska kuti ubali pakati paku Yuda ndi Isirayeli umali.+
15 Sonu Yehova wangundikambiya kuti: “Sonu uto vidya va mliska wambula fundu.+ 16 Pakuti ndizomerezengi kuti mucharu cho muyuki mliska. Iyu wazakuziphwere cha mbereri zo zinangika;+ wazamupenja cha mbereri zimanazimana pamwenga kuchizga zo zapwetekeka+ kweniso kuliska zanthazi. Mumalu mwaki, waturya mbereri zakututuŵa+ ndi kulamatuwa vakukandiya va mbereri.+
17 Soka mliska wangu wambula fundu,+ yo wajowo mskambu!+
Lipanga lazamupweteka janja laki kweniso jisu laki lakumaryi.
Janja laki lazamuphaphiya limu,
Ndipu jisu laki lakumaryi lazamuleke limu kuwona.”
12 Uthenga wacheruzgu:
“Yanga ndi mazu ngaku Yehova ngakukwaskana ndi Isirayeli,” Yehova ndiyu wakamba,
Yo wakutambasuwa kuchanya,+
Yo wakujalikiska fawundeshoni ya charu chapasi,+
Kweniso yo wakupanga mzimu* wa munthu.
2 “Ndisambusengi Yerusalemu kuŵa kapu* yo yichitiskengi mitundu yosi ya ŵanthu yo ye pafupi ndi iyu kuti yimbendyimbendyi; ndipu murwani wazamuzingiliza Yuda ndi Yerusalemu.+ 3 Mu zuŵa lo, ndazamuchitiska kuti Yerusalemu waŵi mwa uzitu ku mitundu yosi ya ŵanthu. Ŵanthu wosi wo azamuyesa kuwunyamuwa, azamupwetekeka nadi;+ ndipu mitundu yosi pacharu chapasi yazamuwungana kuti yimuyukiyi.+ 4 Mu zuŵa lo,” Yehova ndiyu wakamba, “Ndazamutimbanyizga hachi yeyosi ndipuso ndazamufunthisa yo wakwerapu. Masu ngangu ngazamukuŵa pa a munyumba yaku Yuda, kweni ndazamuchitiska kuti hachi yeyosi ya mitundu yinyaki yiŵi yachibulumutiya. 5 Alongozgi* a ku Yuda azamukamba mumitima yawu kuti, ‘Ŵanthu wo aja mu Yerusalemu ndi nthazi zangu zakutuliya kwaku Yehova wa mizinda, Chiuta wawu.’+ 6 Mu zuŵa lo, ndazamuchitiska kuti alongozgi a ku Yuda aŵi nge mumphika wakuzaza motu pakati pa vimiti kweniso nge limbuni pakati pa ntchinda za tirigu yo wasengeka ŵaka sonu,+ ndipu azamuwotcha mitundu yosi ya ŵanthu yo ye pafupi ndi yiwu kumaryi kweniso kumazge;+ ndipu ŵanthu a mu Yerusalemu azamuja so mumalu ngawu,* mu Yerusalemu.+
7 “Ndipu Yehova wazamutaska dankha mahema ngaku Yuda, kuti unkhankhu wa nyumba yaku Davidi kweniso wa ŵanthu wo aja mu Yerusalemu uzileki kuŵa ukulu ukongwa kuluska unkhankhu waku Yuda. 8 Mu zuŵa lo, Yehova wazamuvikiliya ŵanthu a mu Yerusalemu;+ mu zuŵa lo, munthu yo waguŵa* pakati pawu wazamukuŵa nge Davidi, ndipu a munyumba yaku Davidi azamukuŵa nge Chiuta, nge mungelu waku Yehova yo watenda panthazi pawu.+ 9 Mu zuŵa lo, ndazamuwonesesa kuti ndapulutuwa mitundu yosi yo yazamukuza kuti yiyukiyi Yerusalemu.+
10 “Ndazamupunguliya mzimu wangu pa a munyumba yaku Davidi kweniso pa ŵanthu wo aja mu Yerusalemu; ndazakuŵayanja ndipuso azamuŵeyere kwaku ini. Yiwu azamulereska kwaku yo angumugwaza,+ ndipu azakumutenje nge kuti atenje mwana wawu yumoza pe. Azakumuliya ukongwa nge kuti aliya mwana wakwamba. 11 Mu zuŵa lo, mu Yerusalemu mwazamukuŵa chitenje chikulu, nge chitenje cha pa Hadadirimoni mu Chidika cha Megido.+ 12 Ndipu charu cho chazamutenje, banja lelosi pakulija; banja la nyumba yaku Davidi lazamutenje pakulija, ndipu anthukazi ŵawu azamutenje pakuŵija; banja la nyumba yaku Natani+ lazamutenje pakulija, ndipu anthukazi ŵawu azamutenje pakuŵija; 13 banja la nyumba yaku Levi+ lazamutenje pakulija, ndipu anthukazi ŵawu azamutenje pakuŵija; banja la Ashimeyi+ lazamutenje pakulija, ndipu anthukazi ŵawu azamutenje pakuŵija; 14 ndipuso mabanja ngosi ngo ngajaku, banja lelosi lazamutenje pakulija, ndipu anthukazi ŵawu azamutenje pakuŵija.
13 “Mu zuŵa lo, chisimi chazamukumbika kuti a munyumba yaku Davidi kweniso ŵanthu wo aja mu Yerusalemu azitoweseki ku ubudi kweniso ku ukazuzi.+
2 “Mu zuŵa lo,” Yehova wa mizinda ndiyu wakamba, “Ndazamusisita mazina nga angoza mucharu cho+ ndipu azamukumbukika so cha; mucharu cho ndazamutuzgamu achimi+ kweniso mzimu wa ukazuzi. 3 Ndipu asani munthu wazikamba so uchimi, awisi kweniso anyina wo akumubala azakumukambiya kuti, ‘Ufwengi, chifukwa chakuti wakamba vinthu vaboza mu zina laku Yehova.’ Ndipu anyina ndi awisi wo akumubala azakumugwaza chifukwa chakuti wakamba uchimi.+
4 “Mu zuŵa lo, mchimi weyosi wazamulengeseka chifukwa cha viwona vaki asani wazikamba mauchimi; ndipu yiwu azamuvwala cha chakuvwala chaweya cha mchimi+ kuti apusiki ŵanthu. 5 Iyu wazamukamba kuti, ‘ndini mchimi cha, ndini mlimi, chifukwa chakuti munthu wangundigula pa nyengu yo ndenga mwana.’ 6 Ndipu asani munthu wazimufumba kuti, ‘Ndi vilonda wuli vo ve pakati pa mapewa ngaku?’* iyu wazamumuka kuti, ‘Nde ndi vilonda chifukwa chakuti abwezi ŵangu* angundipweteka munyumba yawu.’”
7 “Yiwi lipanga, yuka kuti ubayi mliska wangu,+
Ubayi mubwezi wangu,” Yehova wa mizinda ndiyu wakamba.
8 “Ndipu mucharu chosi,” Yehova ndiyu wakamba,
“Vigaŵa viŵi mucharu cho, vazamudumulika ndi kubayika;
Chigaŵa chachitatu chazamulekeka mwenimo.
9 Ndipu chigaŵa chachitatu chenichi ndazakuchijumphisa pamotu;
Ndazakuŵayengetuwa nge mo siliva wayengetulikiya,
Ndazakuŵayesa nge mo golidi wayeseke.+
Yiwu azamudaniya pa zina langu,
Ndipu ini ndazakuŵamuka.
Ndazamukamba kuti, ‘Mbanthu ŵangu,’+
Ndipu yiwu azamukamba kuti, ‘Yehova ndi Chiuta widu.’”
14 “Awonani! Zuŵa lituza, zuŵa laku Yehova, po vinthu vo vaphangika mwaku yiwi* vazamugaŵikiya pakati paku. 2 Ndazamuwunganisa mitundu yosi ya ŵanthu kuti yichiti nkhondu ndi tawuni ya Yerusalemu; tawuni yo yazamuthereskeka, arwani azamuphanga katundu wa munyumba, ndipuso azamukolere anthukazi. Hafu ya ŵanthu a mutawuni yo, azamutoleke ku ukapolu, ndipu ŵanthu wo ajaku azamutuzgikamu cha mutawuni yo.
3 “Yehova wazamuluta ndi kuchichita nkhondu ndi mitundu yo,+ nge mo warwiya mu zuŵa la nkhondu.+ 4 Pa zuŵa lo, malundi ngaki ngazamukuma pa Phiri la Maolivi,+ lo lilereska ku Yerusalemu kuvuma; ndipu Phiri la Maolivi lazamugaŵika paŵi, kwambiya kuvuma* mpaka kuzambwi,* pakati paki pazamukuŵa dambu likulu; ndipu hafu ya phiri lo lazamundere kunkhondi,* hafu yinyaki yazamundere kumwera. 5 Mwazamuthaŵiya mudambu la mapiri ngangu, pakuti dambu la mapiri ngo lazamufika ku Azeli. Mwazamukhumbika kuthaŵa, nge mo munguthaŵiya chifukwa cha chidilirisi mu nyengu ya Fumu Uziya ya ku Yuda.+ Yehova Chiuta wangu wazamukuza, ndipu akupaturika wosi azamukuŵa ndi iyu.+
6 “Mu zuŵa lo, kwazamuŵavi ukweru ukulu,+ vinthu vazamukhoma.* 7 Lazamukuŵa zuŵa lo liziŵika kuti ndaku Yehova.+ Kwazamuŵavi msana pamwenga usiku; ndipu ndi mazulu kwazamukuŵa ukweru. 8 Mu zuŵa lo, mu Yerusalemu+ mwazamutuwa maji nga umoyu,+ hafu ya maji ngo ngazamulazga kunyanja* ya kuvuma,+ ndipu hafu yinyaki yazamulazga kunyanja* ya kuzambwi.+ Venivi vazamuchitika mu chihanya kweniso mu chipwepwi. 9 Yehova wazamukuŵa Fumu pacharu chosi chapasi.+ Pa zuŵa lo Yehova wazamukuŵa yumoza,+ ndipu zina laki lazamukuŵa limoza.+
10 “Charu chosi chazamukuŵa nge chigaŵa cha Araba,+ kutuwa ku Geba+ mpaka ku Rimoni+ kumwera kwa Yerusalemu; Yerusalemu wazamukwezeka ndipu mwaku iyu mwazamuja ŵanthu,+ kwambiya ku Geti laku Benjamini+ mpaka kuchigaŵa cha Geti Lakwamba, mpaka ku Geti la Pakona, ndipuso kutuwa ku Kanyumba Kakuthopoka ka Hananeli+ mpaka ku malu ngakukandiyapu mphereska nga fumu. 11 Ŵanthu azamuja mwaku iyu; mwazamuŵavi so thembu la pharanyiku,+ ndipu ŵanthu azamuja mwakuvikilirika mu Yerusalemu.+
12 “Milili yo Yehova wazamuwisiya ŵanthu amitundu yakupambanapambana wo achita nkhondu ndi Yerusalemu ndi iyi:+ Mnofu wawu wazamuvunda ŵe wima, masu ngawu ngazamuvunda nge mumalu ngaki, ndipu malilimi ngawu ngazamuvunda mumilomu yawu.
13 “Mu zuŵa lo, chimtimbaheka chakutuliya kwaku Yehova chazamusapaliya pakati pawu; munthu weyosi wazamuko janja la munyaki, ndipu munthu weyosi wazamuyukiya munyaki.*+ 14 Yuda nayu wazamuchita nkhondu ku Yerusalemu; ndipu chuma cha mitundu yosi yapafupi chazamuwunjikika, golidi, siliva kweniso malaya nganandi.+
15 “Ndipu mulili nge weniwuwa, wazamuwiya so mahachi, nyulu, ngamila, abulu, kweniso viŵetu vosi vo ve mumisasa ya arwani.
16 “Ŵanthu wosi wo azamujaku mu mitundu yosi yo yazamuyukiya Yerusalemu, azamukweriyanga kweniko chaka chechosi+ kuti akasindamiyengi* Fumu, Yehova wa mizinda,+ kweniso kuti akachitengi Phwandu la Misasa.+ 17 Kweni asani munthu weyosi pakati pa mabanja nga pacharu chapasi wakweriyaku cha ku Yerusalemu kuti wakasindamiyi Fumu, Yehova wa mizinda, mbwenu vuwa yazamukuwa cha mucharu chawu.+ 18 Ndipuso asani banja la ku Ijipiti lakweriyaku cha ku tawuni yo ndi kuseremu, vuwa yazamukuwa cha mucharu chawu. Mumalu mwaki, yiwu azamulangika ndi milili yo Yehova wawisiya mitundu yo yikweriyaku cha ku tawuni yo, kuti yikachiti Phwandu la Misasa. 19 Chenichi ndichu chazamukuŵa chilangu cha ubudi wa charu cha Ijipiti kweniso ubudi wa mitundu yosi yo yikweriyaku cha ku Yerusalemu kuti yikachiti Phwandu la Misasa.
20 “Mu zuŵa lo, mazu ngakuti ‘Kupaturika nkhwaku Yehova!’+ ngazamulembeka pamabelu nga mahachi. Ndipu mimphika*+ ya munyumba yaku Yehova, yazamukuŵa yakupaturika nge mbali zabakuli+ panthazi pa guŵa la sembi. 21 Mumphika* wewosi mu Yerusalemu kweniso mu Yuda wazamukuŵa wakupaturika ndipuso wazamukuŵa waku Yehova wa mizinda. Ŵanthu wosi wo apereka sembi azamusere ndipu azamugwiriskiya ntchitu yinyaki mwa mimphika yo kuti abikiyemu sembi. Mu zuŵa lo, munyumba yaku Yehova wa mizinda mwazamusanirika so Mkanani* weyosi cha.”+
Kung’anamuwa kuti, “Yehova Wakumbuka.”
Pamwenga kuti, “weniku.”
Wonani Fundu Zakukumaliya B15.
Anyaki akamba kuti, “kumpotu.”
Pamwenga kuti, “ŵanthu wosi aje.”
Viwoneka kuti ndi Yehova.
Pamwenga kuti, “mulandu.”
Pamwenga kuti, “akuvwalikengi mikhanju yakuzirwa.”
Pamwenga kuti, “uwoneriyengi.”
Pamwenga kuti, “Usambukengi chidika.”
Pamwenga kuti, “zuŵa la vinthu vimanavimana.”
Mazu ngaki chayingu, “mwa, tini.”
Mazu ngaki chayingu, “manja 20.” Janja limoza layanananga ndi masentimita 44.5. Wonani Fundu Zakukumaliya B14.
Mazu ngaki chayingu, “manja 10.”
Mazu ngaki chayingu, “Ndi efa,” yapa efa wamiya chiyaŵi pamwenga sokola yakupimiya mwesu umoza wa efa. Mwesu umoza wa efa wayanananga ndi malita 22. Wonani Fundu Zakukumaliya B14.
Kung’anamuwa ku Babiloni.
Anyaki akamba kuti, “kumpotu.”
Anyaki akamba kuti, “kumpotu.”
Mazu ngaki chayingu, “ngapumuzga.”
Pamwenga kuti, “chisoti chikulu chaufumu.”
Kung’anamuwa maudindu ngaki nge fumu kweniso wasembi.
Pamwenga kuti, “chisoti chikulu chaufumu.”
Wonani Fundu Zakukumaliya B15.
Pamwenga kuti, “kuti akawoloŵesi chisku chaku Yehova.”
Pamwenga kuti, “panyumba yakusopiyamu.”
Yapa pangafwatulikiya so kuti, “mwa wakulama.”
Pamwenga kuti, “ulongozgi.”
Pamwenga kuti, “yakugomezgeka.”
Mazu ngaki chayingu, “chifukwa cha mazuŵa nganandi.”
Pamwenga kuti, “kutuliya kuvyaru va ko kutuliya lumwi kweniso ko kuselere lumwi.”
Pamwenga kuti, “wakugomezgeka.”
Pamwenga kuti, “Khwimani mtima.”
Pamwenga kuti, “Khwimani mtima.”
Pamwenga kuti, “kuti tikawoloŵesi chisku chaku Yehova.”
Pamwenga kuti, “kuti awoloŵesi chisku chaku Yehova.”
Pamwenga kuti, “azamukolesa mumphata mwa chakuvwala cha.”
Mazu ngaki chayingu, “Ndipu Damasiko ndi malu ngaki ngakupumuliyaku.”
Pamwenga kuti, “malu ngakuvikilirika.”
Yapa pangafwatulikiya so kuti, “panyanja.”
Pamwenga kuti, “wakukandirizga.”
Viwoneka kuti akamba kusuzgika kwa ŵanthu ŵaki.
Pamwenga kuti, “pabulu munthulumi.”
Kung’anamuwa Msinji wa Yufureti.
Mazu ngaki chayingu, “wazakumukanda.”
Pamwenga kuti, “achiuta a banja; angoza.”
Pamwenga kuti, “vinthu vakuziziswa.”
Mazu ngaki chayingu, “aphongu.”
Mazu ngaki chayingu, “kanyumba kakuthopoka kapakona,” kumiya munthu wakuzirwa pamwenga wakukhumbika; fumu.
Mazu ngaki chayingu, “chikhomu,” kumiya munthu yo watovya; wakulamuliya.
Pamwenga kuti, “kapitawu.”
Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
Pamwenga kuti, “nkharamu zimanazimana zanthazi.”
Mazu ngaki chayingu, “angundipimiya.”
Pamwenga kuti, “mvuchi.”
Pamwenga kuti, “mbali yabakuli.”
Yaŵa mbalongozgi a mafuku.
Pamwenga kuti, “mumalu ngawu ngakwenere.”
Pamwenga kuti, “munthu yo walivi nthazi ukongwa.”
Mazu ngaki chayingu, “pakati pa manja ngaku,” kung’anamuwa panganga pamwenga pamsana.
Pamwenga kuti, “ŵanthu wo atindiyanja.”
Pamwenga kuti, “mbereri zimbininiki.”
Mazu ngaki chayingu, “Ndipu ŵanthu ambula kuzirwa ndazakuŵang’anamuliya janja langu.”
Kung’anamuwa tawuni yo yazumbulika mu vesi 2.
Pamwenga kuti, “ko kutuliya lumwi.”
Mazu ngaki chayingu, “kunyanja.”
Anyaki akamba kuti, “kumpotu.”
Pamwenga kuti, “vazamuleka kugwira ntchitu,” vazamukuŵa nge kuti vamira chifukwa cha kuzizira.
Kung’anamuwa Nyanja Yakufwa.
Kung’anamuwa Nyanja ya Meditereniyani.
Mazu ngaki chayingu, “ndipu janja laki lazamuyukiya janja la munyaki.”
Pamwenga kuti, “akasopengi.”
Pamwenga kuti, “mimphika ya mulomu usani.”
Pamwenga kuti, “mumphika wa mulomu usani.”
Yapa pangafwatulikiya so kuti, “wakugulisa vinthu.”