MALAKI

1 Uthenga wacheruzgu:

Yanga ndi mazu ngaku Yehova ngakukwaskana ndi Ayisirayeli kuziya mwaku Malaki:*

2 “Mwaŵanthu yimwi ndakuyanjani,”+ Yehova ndiyu wakamba.

Kweni yimwi mukamba kuti: “Mwatiyanja wuli?”

“Asi Esawu wenga mku waku Yakobe?”+ Yehova ndiyu wakamba. “Kweni ini ndingwanja Yakobe, 3 Esawu ndingumutinkha;+ mapiri ngaki ndingungasambusa mahami+ ndipu chihara chaki ndinguchipereka kwa akambwi amuchipululu.”+

4 “Chinanga kuti Edomu wakamba kuti, ‘Tavikitika kweni tiwengeku ndipu tamuzenga so mahami,’ Yehova wa mizinda ndiyu wakamba, ‘Azamuzenga kweni ini ndazamuwisiya pasi, ndipu yiwu azamudanika kuti “chigaŵa cha uheni” kweniso “ŵanthu wo Yehova waŵakana kwamuyaya.”+ 5 Mwazamuwona ndi masu nginu, ndipu mwazamukamba kuti: “Yehova wakwezeki pa chigaŵa cha Ayisirayeli.”’”

6 “‘Mwana watumbika awisi,+ ndipu mteŵeti watumbika ambuyaki. Sonu asani ini nde wusemwi,+ we pani ulemu wo nditenere kupaskika?+ Asani nde mbuyamwi,* mulekiyanji kundiwopa?’* Ini Yehova wa mizinda ndikambiya yimwi asembi, yimwi muyuyuwa zina langu.+

“‘Kweni yimwi mukamba kuti: “Taliyuyuwa wuli zina linu?”’

7 “‘Mupereka chakurya* chakufipiskika paguŵa langu la sembi.’

“‘Ndipu yimwi mukamba kuti: “Takufipiskani wuli?”’

“‘Mukamba kuti: “Thebulu laku Yehova+ ntchinthu cho chitenere kuyuyulika.” 8 Ndipu asani mupereka nyama yachibulumutiya nge sembi, mukamba kuti: “Palivi suzgu.” Ndipu asani mupereka nyama yakupunduka pamwenga yo yitama, mukamba kuti: “Palivi suzgu.”’”+

“Yesani kupereka nyama zenizi kwa nduna yinu. Kumbi yikondwengi namwi pamwenga kukulondiyani umampha?” Yehova wa mizinda ndiyu wakamba.

9 “Sonu chondi ŵeyeriyani* Chiuta kuti wakuchitiyeni lisungu. Kumbi wakulondiyeningi umampha asani mutimupaska sembi zaviyo?” Yehova wa mizinda ndiyu wakamba.

10 “Kumbi ndiyani pakati pinu yo wakhumba kujala visasa?*+ Pakuti mungapemba cha motu paguŵa langu la sembi kwambula malipiru.+ Ndikondwa namwi cha,” Yehova wa mizinda ndiyu wakamba, “ndipuso ndikondwa cha ndi sembi yeyosi yo mutindipaska nge mphasu.”+

11 “Pakuti kwambiya ko kutuliya lumwi mpaka ko liselere,* zina langu lazamutumbikika pakati pa mitundu ya ŵanthu.+ Pamalu ngengosi pazamuwotcheka sembi kuti zisunkhi josi, kweniso sembi zazamuperekeka ku zina langu nge mphasu zamampha; chifukwa chakuti zina langu lazamutumbikika pakati pa mitundu ya ŵanthu,”+ Yehova wa mizinda ndiyu wakamba.

12 “Kweni yimwi mutilifipiska*+ mwakukamba kuti, ‘Thebulu laku Yehova lafipiskika ndipu vipasu vaki, vakurya vaki, vitenere kuyuyulika.’+ 13 Mukamba so kuti, ‘Awonani! Vakuvukisa!’ ndipuso mutivinuska mwakuviyuyuwa,” Yehova wa mizinda ndiyu wakamba. “Ndipu mutuza ndi nyama zo mwaba, zakupunduka ndipuso zo zitama. Hinya, mutuza ndi vinthu venivi nge mphasu! Kumbi nditenere kulonde vinthu venivi kutuliya kwaku yimwi?”+ Yehova ndiyu wakamba.

14 “Ngwakutembeka munthu muryarya yo we ndi nyama yinthulumi yambula kalema mu mskambu waki, kweni walayizga ndi kupereka kwaku Yehova nyama yo ye ndi kalema. Pakuti ini ndini Fumu yikulu,”+ Yehova wa mizinda ndiyu wakamba, “ndipu zina langu lazamukuŵa lakuchitiska mantha pakati pa mitundu ya ŵanthu.”+

2 “Sonu dangu ili liluta kwaku yimwi asembi.+ 2 Asani mulekengi kuvwiya ndi kusunga dangu ili mumitima yinu kuti mukankhuski zina langu,” Yehova wa mizinda ndiyu wakamba, “ndazakukutumiyani matembu,+ ndipu vitumbiku vinu ndazakuvisambusa matembu.+ Vitumbiku vinu ndavisambusa matembu chifukwa chakuti musunga cha dangu mumitima yinu.”

3 “Awonani! Chifukwa cha vo muchita, ndazamunanga* mbewu zo mwapanda,+ ndipu ndazakukumbatiyani mavi nga viŵetu pavisku vinu, mavi nga viŵetu vo mupereka sembi pa maphwandu nginu; ndipu mwazamuponyeka pandundu ya mavi nga viŵetu.* 4 Asani venivi vazikuchitikiyani, mwazamuziŵa kuti ndakupaskani dangu ili kuti phanganu lo ndikuchita ndi Levi lilutiriyi,”+ Yehova wa mizinda ndiyu wakamba.

5 “Phanganu lo ndinguchita nayu lenga la umoyu kweniso lachimangu, ndinguchita nayu phanganu lenili kuti wandiwopengi.* Iyu wangundiwopa, ndipu wachitanga mantha ndi zina langu. 6 Dangu launeneska lenga* mumulomu mwaki,+ ndipu mumulomu mwaki mukusanirikapu vinthu vambula urunji cha. Iyu wayendanga ndi ini mwachimangu kweniso ndi mtima wakunyoloka,+ ndipu wanguwovya ŵanthu anandi kuti atuweku ku ubudi. 7 Pakuti mulomu wa wasembi utenere kuvikiliya zeru, ndipu ŵanthu atenere kupenja dangu lakutuliya* mumulomu mwaki,+ chifukwa chakuti iyu ndi muthenga waku Yehova wa mizinda.

8 “Kweni yimwi mwatuwapu panthowa. Mwachitiska kuti ŵanthu anandi atondeki kulondo dangu.*+ Mwananga phanganu laku Levi,”+ Yehova wa mizinda ndiyu wakamba. 9 “Mwaviyo, ndazakukuyuyuwani ndi kukusisani pa masu pa ŵanthu wosi chifukwa chakuti mungusunga cha nthowa zangu kweni mwayanjiyanga pakugwiriskiya ntchitu dangu.”+

10 “Asi tosi awusefwi mbamoza?+ Asi tikulengeka ndi Chiuta yumoza? Sonu ntchifukwa wuli tichitiyana vinthu mwachinyengu,+ ndi kufipiska phanganu la apapi ŵidu akali? 11 Yuda wachita vinthu mwachinyengu ndipu mu Isirayeli kweniso mu Yerusalemu mwachitika chinthu chakuseruska; pakuti Yuda wafipiska utuŵa waku Yehova+ wo watanja,* ndipu Yuda wato mwana munthukazi waku chiuta wachilendu kuti waŵi muwolu waki.+ 12 Munthu weyosi wa mumahema ngaku Yakobe yo wachita venivi, Yehova wazakumubaya, vilivi kanthu kuti ndiyani,* chinanga kuti wapereka sembi nge mphasu kwaku Yehova wa mizinda.”+

13 “Pe so chinthu chinyaki* cho muchita, cho chichitiska kuti guŵa la sembi laku Yehova lizazi ndi masozi, kutenje kweniso kutamantha, mwakuti iyu walivi nazu ntchitu sembi zo mupereka nge mphasu ndipuso wakondwa cha ndi chechosi cho mutimupaska.+ 14 Ndipu mukamba kuti, ‘Chifukwa wuli?’ Chifukwa chakuti Yehova waŵa kaboni pakati paku yimwi ndi munthukazi wa pa unyamata winu, yo mwamuchitiya vinthu mwachinyengu, chinanga kuti ndi munyinu kweniso ndi muwolu winu wa phanganu.*+ 15 Kweni penga munthu munyaki yo wanguchitaku cha venivi, pakuti wenga ndi mzimu wo ungujaku. Kumbi iyu wapenjanganji? Mphapu* yaku Chiuta. Mwaviyo, phweriyani ndi vo muŵanaŵana mumitima yinu ndipu munthukazi wa pa unyamata winu mungamuchitiyanga chinyengu cha. 16 Pakuti nditinkha* kupatana,”+ Yehova Chiuta waku Isirayeli ndiyu wakamba, “kweniso nditinkha munthu yo chakuvwala chaki chazaza ndi chiwawa,”* Yehova wa mizinda ndiyu wakamba. “Ndipuso phweriyani ndi vo muŵanaŵana mumitima yinu ndipu mungachitiyananga vinthu mwachinyengu cha.+

17 “Mwavukisa Yehova ndi mazu nginu.+ Kweni yimwi mukamba kuti, ‘Tamuvukisa wuli?’ Mukamba kuti, ‘Weyosi yo wachita vinthu viheni ngwamampha mu masu mwaku Yehova ndipu wakondwa nayu,’+ pamwenga mukamba kuti, ‘We pani Chiuta waurunji?’”

3 “Awonani! Nditumiza muthenga wangu, ndipu iyu wazamunozga nthowa panthazi pangu.+ Mbuya wauneneska yo mutimupenja, wazamukuza mwamabuchibuchi kunyumba yaki yakusopiyamu;+ ndipu muthenga wa phanganu yo mukondwa nayu wazamukuza. Awonani! Iyu wazamukuza nadi,” Yehova wa mizinda ndiyu wakamba.

2 “Kweni ndiyani yo wazamukunthiyapu zuŵa la kuza kwaki, ndipuso ndiyani yo wazamufiska kuma asani iyu waziwoneke? Pakuti iyu wazamukuŵa nge motu wa wakuyengetuwa kweniso wazamukuŵa nge sopu+ wa ŵanthu akuchapa vakuvwala. 3 Iyu wazamuja pasi nge wakuyengetuwa kweniso wakutowesa siliva,+ ndipu wazamutowesa ŵana aku Levi. Iyu wazakuŵatowesa* nge golidi kweniso siliva ndipu yiwu azamukuŵa ŵanthu wo azamuperekanga sembi nge mphasu kwaku Yehova mu urunji. 4 Sembi zo Yuda ndi Yerusalemu azamuperekanga kwaku Yehova nge mphasu, wazamukondwa nazu, nge mo venge mu mazuŵa ngakali kweniso mu vyaka vamwaka.+

5 “Ndazamukuza pafupi ndi yimwi kuti ndipereki cheruzgu, ndipu mwaliŵi ndazamukuŵa kaboni wakususkana ndi akuwombeza,+ achigololu, ŵanthu wo alapizga vinthu vaboza,+ ŵanthu wo abiya munthu waganyu,+ choko, kweniso mwana mulanda,+ ndipuso ndazamususka ŵanthu wo akana kuwovya mulendu.*+ Yiwu andiwopa cha.” Yehova wa mizinda ndiyu wakamba.

6 “Pakuti ini ndini Yehova; ndisintha cha.*+ Yimwi ndimwi ŵana aku Yakobe; ndipu mwechendamali. 7 Kwambiya mu mazuŵa nga apapi ŵinu akali, mwatuwaku ku marangu ngangu ndipu mwangasunga cha.+ Weriyani kwaku ini, ndipu nani ndiweriyengi kwaku yimwi.”+ Yehova wa mizinda ndiyu wakamba.

Kweni yimwi mukamba kuti: “Kumbi tiweriyengi wuli kwaku yimwi?”

8 “Kumbi munthu wangabiya Chiuta? Kweni yimwi mwandibiya.”

Ndipu mukamba kuti: “Takubiyani wuli?”

“Pa vatchumi kweniso pa vakupereka. 9 Ndimwi akutembeka,* chifukwa mutindibiya, ndipu mtundu wosi uchita venivi. 10 Zani ndi vatchumi vosi munyumba yakusungamu vinthu,+ kuti munyumba yangu muŵi chakurya;+ chondi ndiyeseni pa nkhani yeniyi,” Yehova wa mizinda ndiyu wakamba, “kuti muwoni asani ndingatondeka kukujuliyani mageti nga kuchanya+ ndi kukupunguliyani* vitumbiku mpaka musoŵi pakuti muvisungi.”+

11 “Ndazamuchenya wakukumezani,* ndipu wazamunanga cha vipasu va mucharu chinu, kweniso mphereska za muminda yinu zazamutondeka cha kupasa,”+ Yehova wa mizinda ndiyu wakamba.

12 “Mitundu yosi ya ŵanthu yazamukamba kuti ndimwi akukondwa,+ pakuti charu chinu chazamukuŵa charu chakukondwesa.” Yehova wa mizinda ndiyu wakamba.

13 “Mwakamba mazu nganthazi ngakususkana nani,” Yehova ndiyu wakamba.

Ndipu yimwi mukamba kuti: “Kumbi takamba mazu wuli ngakususkana namwi pakati pidu?”+

14 “Mukamba kuti, ‘Kuteŵete Chiuta kulivi phindu.+ Kumbi tayanduwa wuli chifukwa chakumuteŵete kweniso chifukwa chakwenda mwachitima pa masu paku Yehova wa mizinda? 15 Sonu tiwona kuti ŵanthu akujikuzga akondwa. Ndipuso ŵanthu wo achita vinthu viheni, vinthu vitiŵayende umampha.+ Yiwu ayesa Chiuta kweni alangika cha.’”

16 Pa nyengu yo, ŵanthu wo atopa Yehova akambiskananga, weyosi wakambiskananga ndi munyaki, ndipu Yehova wakhazangaku gutu ndi kuvwisiya. Buku la chikumbusu lingulembeka pa masu paki.+ Buku lo, lenga ndi mazina nga ŵanthu wo atopa Yehova kweniso wo alunguruka pa* zina laki.+

17 Yehova wa mizinda wakamba kuti: “Yiwu azamukuŵa ŵanthu ŵangu+ pa zuŵa lo ndazakuŵasambusa chuma chapade.*+ Ndazakuŵachitiya lisungu nge mo munthu wachitiya lisungu mwana waki yo watimuteŵete.+ 18 Ndipu mwazamuwona so mphambanu pakati pa munthu murunji ndi munthu muheni,+ kweniso pakati pa munthu yo wateŵete Chiuta ndi munthu yo waleka kumuteŵete.”

4 “Pakuti awonani! zuŵa lituza, lakukole nge ng’anju ya motu,+ po ŵanthu wosi akujikuzga ndipuso wosi wo achita vinthu viheni azamukuŵa nge mapesi. Zuŵa lo lituza lazakuŵameza nadi,” Yehova wa mizinda ndiyu wakamba, “ndipu lazakuŵaleke msisi cha pamwenga mphanda. 2 Kweni yimwi mutumbika* zina langu, lumwi laurunji lazakukuŵaliyani, malazi* ngaki ngazakukuchizgani; ndipu mwazamundwikandwika nge matholi* ngakututuŵa.”

3 “Mwazamukandakanda ŵanthu aheni ndi maphazi nginu, pakuti yiwu azamukuŵa nge fuvu kusi kwa maphazi nginu pa zuŵa lo ndazamuchitapu kanthu,” Yehova wa mizinda ndiyu wakamba.

4 “Kumbukani Dangu laku Mozesi mteŵeti wangu, fundu kweniso vyeruzgu vo ndingupereka paphiri la Horebu kuti Ayisirayeli wosi avilondongi.+

5 “Awonani! Nditikutumiyani mchimi Eliya+ lechendazi zuŵa likulu kweniso lakuchitiska mantha laku Yehova.+ 6 Ndipu iyu wazamung’anamuliya mitima ya awusewu ku ŵana,+ kweniso mitima ya ŵana kwa awusewu, kuti ndileki kupweteka charu chapasi ndi kuchinanga.”

(Malemba nga Chiheberi kweniso Chiaramu ngamaliya penapa, ndipu Malemba nga Chigiriki Ngachikhristu ngatambiya panthazi yapa)