KALATA YAKULUTA KWA AFILIPI

1 Ini Paulo nde limoza ndi Timote nge akapolu aku Khristu Yesu. Ndilembe akupaturika wosi akukoliyana ndi Khristu Yesu wo ŵe ku Filipi,+ limoza ndi akuwonere kweniso ateŵeti akovya kuti:+

2 Wezi ukulu kweniso chimangu vakutuliya kwaku Chiuta Awusefwi ndipuso Ambuya Yesu Khristu, viŵi namwi.

3 Nyengu zosi ndiwonga Chiuta wangu asani nditikukumbukani 4 mu pempheru langu lelosi lakuŵeyere chifukwa chaku yimwi mosi. Nyengu yeyosi yo ndipemphera mwakuŵeyere, ndikondwa,+ 5 chifukwa cha chovyu cho mupereka pa* uthenga wamampha kutuliya pa zuŵa lakwamba mpaka sonu. 6 Nde ndi chigomezgu chosi pa fundu iyi yakuti, yo wakwambisa ntchitu yamampha pakati pinu, ndiyu wazakuyimaliza+ mpaka mu zuŵa laku Khristu Yesu.+ 7 Mphakwenere kuti ndiŵanaŵanengi viyo vakukwaskana ndi yimwi mosi, pakuti mwe mumtima mwangu ndipuso yimwi musangana nani wezi ukulu mu kumangika kwangu+ ndipuso pakuvikiliya ndi kujalikiska mwadangu uthenga wamampha.+

8 Pakuti Chiuta ndi kaboni wangu kuti ndikhumbisiska kukuwonani mosi ndi chanju chikulu nge cho Khristu Yesu we nachu. 9 Ndipu venivi ndivu ndilutirizga kupemphere kuti chanju chinu chilutirizgengi kukuwa+ limoza ndi kuziŵa vinthu mwauneneska+ ndipuso kuvwisa vinthu vosi;+ 10 kuti musimikizi kuti vinthu vakukhumbika ukongwa ndi nivi,+ ndi chilatu chakuti muje ambula kalema kweniso ambula kuguŵiska ŵanthu anyaki+ mpaka mu zuŵa laku Khristu; 11 ndipuso kuti muzaziki ndi chipasu chaurunji, cho chiziya mwaku Yesu Khristu,+ kuti Chiuta wakankhuskiki kweniso wathamikiki.

12 Sonu ndikhumba kuti yimwi abali muziŵi kuti vo vandichitikiya vawovya kuti uthenga wamampha uluti panthazi, 13 mwakuti kumangika kwangu+ chifukwa chaku Khristu, kwaziŵika umampha+ pakati pa asilikali wosi wo avikiliya fumu* kweniso ŵanthu anyaki wosi. 14 Sonu abali anandi mwa Ambuya aja ndi chiganga chifukwa cha kumangika kwangu, ndipu alutirizga kulongo chiganga pakulongoro mazu ngaku Chiuta mwambula mantha.

15 Mbuneneska kuti anyaki apharazga Khristu chifukwa cha bina ndipuso mphindanu, kweni anyaki ŵe ndi maŵanaŵanu ngamampha. 16 Achiŵi yaŵa apharazga Khristu chifukwa cha chanju, pakuti aziŵa kuti ndikusankhika kuti ndivikiliyi uthenga wamampha.+ 17 Kweni akwamba yaŵa apharazga chifukwa cha mphindanu, ndipu ŵe ndi maŵanaŵanu ngaheni, pakuti akhumba kundiyambisiya masuzgu mu kumangika kwangu. 18 Sonu kumbi pakumaliya paki chichitika ntchinthu wuli? Cho chichitika ntchakuti mu nthowa yeyosi, kwali paŵi chinyengu pamwenga uneneska, Khristu wapharazgika, ndipu venivi vitindikondwesa ukongwa. Kukamba uneneska ndilutirizgengi kukondwa, 19 pakuti ndiziŵa kuti venivi vichitiskengi kuti nditaskiki kuporote mu mapempheru nginu ngakuŵeyere+ ndipuso chovyu cha mzimu waku Yesu Khristu.+ 20 Venivi vikoliyana ndi vo ndikhumbisiska kweniso vo ndilindizga vakuti ndazamuchitapu soni cha mu nthowa yeyosi, kweni nge mo vajaliya kuvuli kosi uku, mwakugwiriskiya ntchitu wanangwa wakulongoro, Khristu sonu wakuzgikengi mwakugwiriskiya ntchitu liŵavu langu, kwali ndingaja wamoyu pamwenga ndingafwa.+

21 Pakuti kwaku ini, asani ndija ndi umoyu, ndijaliya Khristu,+ ndipu asani ndafwa, ndiyanduwengi.+ 22 Sonu asani ndingalutirizga kuja ndi umoyu mu liŵavu, ndipasengi vipasu pa ntchitu yangu, kweni cho ndingasankha ndingakamba cha. 23 Ini ndagaŵikana pa vinthu viŵi venivi, pakuti cho ndikhumba nkhufwatuka ndi kujaliya limoza ndi Khristu,+ ndipu chenichi ndichu ndisimikiza kuti ntchinthu chamampha ukongwa.+ 24 Kweni mphakwenere ukongwa kuti ini ndilutirizgi kuja mu liŵavu chifukwa chaku yimwi. 25 Mwaviyo, pakuti ndisimikiza venivi, ndiziŵa kuti ndilutirizgengi kuja ndi umoyu ndipu ndilutirizgengi kuja ndi yimwi mosi kuti muluti panthazi kweniso kuti mukondwengi mu chivwanu, 26 kuti likondwa linu lizazi ukongwa mwaku Khristu Yesu chifukwa chaku ini asani ndaza so kwaku yimwi.

27 Chakukhumbika ukongwa ntchakuti, muchitengi vinthu mwakukoliyana ndi* uthenga wamampha wakukwaskana ndi Khristu,+ kuti chinanga ndingaza kuzikuwonani pamwenga po nde kutali, ndivwengi vakukwaskana ndi yimwi kweniso ndiziŵengi kuti mwe ambula kunderezeka mu mzimu umoza ndi mtima umoza,*+ ndipu mosi pamoza mutesesa kuja ndi chivwanu cha uthenga wamampha, 28 ndipuso mutiŵawopa cha wo atikususkani. Venivi vilongore limu kuti azamubayika,+ kweni yimwi mwazamutaskika;+ ndipu venivi vatuliya kwaku Chiuta. 29 Pakuti yimwi mwapaskika mwaŵi chifukwa chaku Khristu kuti muje ndi chivwanu mwaku iyu, kweniso kuti musuzgiki chifukwa chaku iyu.+ 30 Chifukwa mukumana ndi masuzgu ngo munguwona ini ndichikumana nangu,+ ngeningo sonu mutuvwa kuti ndeche kukumana nangu.

2 Sonu kwali pe kuchiska kwekosi mwaku Khristu, kwali pe kupembuzga mwachanju kwekosi, kwali pe kuchitiya limoza vinthu vauzimu kwekosi,* kwali pe chanju chikulu pamwenga lisungu lelosi, 2 chitiskani kuti likondwa langu lizazi mwakuja ndi maŵanaŵanu ngamoza, chanju chakuyanana, mwakuja akukoliyana ukongwa, kweniso mwakulunguruka chinthu chimoza.+ 3 Mungachitanga cha chinthu chechosi mwamaphara+ pamwenga mwakujikuzga,+ kweni mwakujiyuyuwa, muwonengi kuti anyinu atikuluskani,+ 4 ndipuso mungaŵanaŵaniyanga vakukhumba vinu pe cha,+ kweni va ŵanthu anyaki so.+

5 Jani ndi maŵanaŵanu ngenanga ngo Khristu Yesu nayu wenga nangu,+ 6 yo chinanga kuti wenga chikozgu chaku Chiuta,+ wanguŵanaŵanapu cha kuphanga udindu wakuti waje wakuyanana ndi Chiuta.+ 7 Wanguchita viyo cha, kweni wangujikhutuwa ndipu wanguja nge kapolu+ kweniso wanguja munthu.*+ 8 Kuluska vosi, wati waza nge munthu,* wangujiyuyuwa ukongwa ndipu wanguja wakuvwiya mpaka nyifwa,+ nyifwa yaki nayu yapachimiti chakutombozgekiyapu.*+ 9 Pa chifukwa chenichi, Chiuta wakumukweza ndi kumuŵika pamalu ngapachanya ukongwa+ ndipu mwachanju wakumupaska zina lo liluska mazina nganyaki ngosi,+ 10 kuti mu zina laku Yesu, gongonu lelosi lijikami, kwali ndaku wo ŵe kuchanya, wo ŵe pacharu chapasi ndipuso wo ŵe kusi kwa charu,+ 11 ndipuso kuti lilimi lelosi lizomerezi pakweru kuti Yesu Khristu ndiyu Ambuya,+ vo vichitiskengi kuti Chiuta, Ada wakankhuskiki.

12 Mwaviyo akwanjiwa, nge mo mwajaliya akuvwiya, pa nyengu yo ini ndilipu pe cha, kweni ukongwa sonu po ini kulivi, lutirizgani kugwiriya ntchitu utaski winu, mwamantha kweniso mwakumbwambwanthiya. 13 Pakuti Chiuta ndiyu watikupaskani nthazi mwakukhumba kwaki, watikupaskani vosi viŵi, khumbu kweniso nthazi zakuchitiya. 14 Lutirizgani kuchita vinthu vosi kwambula kudinginyika+ kweniso kwambula kususkana,+ 15 kuti muje ambula kalema kweniso ambula mulandu, ŵana aku Chiuta+ ambula donthu pakati pa mugonezi ukhuluku kweniso wakunyongoroka,+ weniwo muŵala pakati paki nge vakumbulikiya mucharu,+ 16 lutirizgani kukolesa mwanthazi mazu nga umoyu.+ Pavuli paki ini ndiŵengi ndi chifukwa chakukondwe mwaku Khristu, pakuziŵa kuti kutchimbiya kwangu nkhwaŵaka cha pamwenga ntchitu yo ndagwira mwaphamphu ndagwiriya paŵaka cha. 17 Kweni chinanga ndipungulika nge sembi ya chakumwa+ yo yipungulikiya pa sembi+ ndipuso pa uteŵeti wakupaturika* weniwo chivwanu chinu chakulongozgiyaniku, ndikondwa ndipu ndisekere limoza ndi yimwi mosi. 18 Mwakuyanana ŵaka, namwi so mukondwengi ndipuso musekeriyengi limoza ndi ini.

19 Sonu ndigomezga mwa Ambuya Yesu kuti ndikutumiziyeningi Timote+ pambula ku swera yapa, ndi chilatu cha kuti ndizichiskiki asani ndavwa vakukwaskana ndi yimwi. 20 Chifukwa ndilivi so munyaki wa maŵanaŵanu ngakuyanana ndi ngaki, yo wangaphwere nadi vaku yimwi, 21 pakuti anyaki wosi akhumba vaku yiwu ŵija, vaku Yesu Khristu cha. 22 Kweni muziŵa ukaboni wo wakulongo iyu mweneku, kuti nge mwana+ ndi wisi, iyu wateŵete nani limoza nge kapolu kuti uthenga wamampha uluti panthazi. 23 Mwaviyo, mwenuyu ndiyu ndikhumba kumutuma asani ndawona ŵaka mo vinthu vindiyendiyengi. 24 Ndipu ini ndamweni nani nde ndi chigomezgu chosi mwa Ambuya, kuti ndizengi pambula kuswera yapa.+

25 Kweni pasonu panu ndawona kuti mphakwenere kukutumiziyani Epafurodito, mubali wangu, wantchitu munyangu, kweniso msilikali munyangu. Iyu ndi nthumi yinu kweniso munthu yo watinditeŵete pa vo ndikhumba,+ 26 pakuti iyu wakhumbisiska kukuwonani ndipu wasuzgika maŵanaŵanu chifukwa munguvwa kuti wangutama. 27 Iyu wangutama nadi mpaka pafupi kufwa, kweni Chiuta wangumuchitiya lisungu ndipu wanguchitiya lisungu iyu pe cha, kweni wanguchitiya so ini, kuti chitima changu chileki kusazgikiyaku. 28 Mwaviyo nditimutuma mwaliŵiliŵi kwaku yimwi, kuti asani mwamuwona muje so ndi likondwa ndipuso kuti nani ndileki kufipa mtima ukongwa. 29 Sonu mumulondere nge mo muchitiya nyengu zosi mwa Ambuya ndipuso mwalikondwa, ndipu lutirizgani kuŵatumbika ukongwa ŵanthu aviyo,+ 30 pakuti wenga pafupi kufwa chifukwa cha ntchitu yaku Khristu,* ndipu wanguŵika umoyu waki pa ngozi kuti wanditeŵete mumalu mwaku yimwi, pakuti mwengaku cha kunu.+

3 Pakumaliya, lutirizgani kukondwa mwa Ambuya abali ŵangu.+ Kukulembiyani vi nthu venivi mwakuwerezawereza nkhwakusuzga cha kwaku ini, ndipuso venivi vitikuvikiliyani.

2 Phweriyani ndi agalu; phweriyani ndi ŵanthu wo achita vakupweteka ndipuso phweriyani ndi ŵanthu wo adumuwa liŵavu.*+ 3 Pakuti isi ndisi tidumulika mwauneneska,+ isi tichita uteŵeti wakupaturika mwakugwiriskiya ntchitu mzimu waku Chiuta ndipuso timalika mwaku Khristu Yesu,+ tithemba vinthu vakuliŵavu cha, 4  chinanga kuti ini ndini nde ndi vifukwa vakuthembe vinthu vakuliŵavu kuluska weyosi.

Asani walipu munthu munyaki yo waŵanaŵana kuti we ndi vifukwa vakuthembe vinthu vakuliŵavu, ini ndini nde ndi vinandi: 5 ndingudumulika pa zuŵa la 8,+ nde Myisirayeli, wa fuku laku Benjamini, nde Mheberi wakubalika ndi Aheberi;+ pa nkhani ya dangu nde Mfarisi.+ 6 Pa nkhani ya phamphu, ndatombozganga mpingu;+ pa nkhani ya urunji wakutuliya mu dangu, ndingulongo kuti ndenga wambula kafukwa. 7 Kweni vinthu vo ndaviwonanga kuti vaphindu kwaku ini, nditiviwona kuti vambula phindu* chifukwa chaku Khristu.+ 8 Ndipuso ndiwona kuti vinthu vosi vambula phindu chifukwa cha kuziŵa Khristu Yesu Ambuya, ndipu chenichi ntchinthu chakuzirwa ukongwa. Chifukwa chaku iyu, ndataya vinthu vosi ndipu nditiviwona nge vakunkhandu,* kuti ndisaniyi Khristu, 9 kweniso kuti ndije wakukoliyana ndi iyu, chifukwa cha urunji wangu wakutuliya mu kusunga Dangu* cha, kweni chifukwa cha urunji wo utuza chifukwa cha kuvwana+ mwaku Khristu,+ urunji wo utuliya kwaku Chiuta chifukwa cha chivwanu.+ 10 Chilatu changu ntchakuti ndimuziŵi, ndiziŵi nthazi ya chiyuka chaki,+ ndipuso ndisuzgikiyi nayu limoza,+ ndijipereki ndija ku nyifwa yakuyanana ndi yaki,+ 11 kuti ndiwoni asani vingachitika kuti ndiyuskiki ku nyifwa pa chiyuka chakwamba.+

12 Kuti ndalonde kali cha mphotu ndipuso ndaja kali cha wakufikapu, kweni ndiyesesa+ kuti ndiwoni asani panyaki ndingachisaniya cho Khristu Yesu wakundisankhiya.*+ 13 Abali, nditijiwona kuti ndalonde kali cha mphotu, kweni chinthu chimoza cho ndisimikiza ntchakuti: Ndiluwa vinthu vakuvuli+ ndipu nditesesa kuti ndisaniyi vinthu vakunthazi.+ 14 Nditesesa kuti ndifiski chilatu changu cha kulonde mphotu+ ya mdanu wakuchanya+ waku Chiuta kuporote mwaku Khristu Yesu. 15 Mwaviyo, tosi isi te akukhwima,+ tije ndi maŵanaŵanu ngenanga, ndipu asani pamalu panyaki muŵanaŵana mu nthowa yinyaki, Chiuta wakuvumbuliyeningi maŵanaŵanu ngakuluska ngenanga. 16 Kweni kwali taluta panthazi wuli, tiyeni tilutirizgi kwenda mwakwenere mu nthowa yeniyi.

17 Mwakukoliyana, muyezgengi ini+ abali, ndipu mulereseskengi ŵanthu wo atenda mu nthowa yo yikoliyana ndi chakuwoniyapu cho tikukulekiyani. 18 Pakuti pe ŵanthu anandi wo atenda nge arwani a chimiti chakutombozgekiyapu* chaku Khristu, ŵeniwo kali ndayanjanga kuŵazumbuwa kaŵikaŵi kweni sonu nditiŵazumbuwa ndi masozi. 19 Umaliru wawu ndi nyifwa, ndipu chiuta wawu ndi malufu ngawu, unkhankhu wawu ndi soni zawu, ndipu aŵika maŵanaŵanu ngawu pa vinthu va mucharu.+ 20 Kweni isi, kwidu+ nkhuchanya+ ndipu tilindizga ndi mtima wosi mtaski wakutuliya kweniko, Ambuya Yesu Khristu,+ 21 yo wazamusambusa maliŵavu ngidu ngakuyuyulika kuti ngaje nge* ndi liŵavu laki launkhankhu+ mwakugwiriskiya ntchitu nthazi zaki zikulu zo zitimuchitiska kuti wathereske vinthu vosi kwaku iyu mweneku.+

4 Mwaviyo, abali ŵangu yimwi nditikuyanjani ndipu ndikhumbisiska kukuwonani, ndimwi likondwa langu ndi chisoti changu chaunkhankhu.+ Akwanjiwa ŵangu, munganderezekanga cha+ mu nthowa yeniyi mwa Ambuya.

2 Ndipempha Yudiya ndi Suntuke kuti aje ndi maŵanaŵanu ngamoza mwa Ambuya.+ 3 Ndipu ini nge wantchitu munyinu* chayiyu, ndipempha so yimwi kuti mulutirizgi kovya anthukazi ŵenaŵa, wo agwiriya nani limoza ntchitu mwaphamphu chifukwa cha uthenga wamampha, limoza ndi Kilementi kweniso antchitu anyangu wosi, wo mazina ngawu nge mubuku la umoyu.+

4 Mukondwengi mwa Ambuya nyengu zosi. Ndiwerezapu so kuti, Kondwani!+ 5 Ŵanthu wosi aziŵi kuti mwe akoloŵa.*+ Ambuya ŵe pafupi. 6 Mungafipanga mtima ndi chinthu chechosi cha,+ kweni pa chinthu chechosi, mwa pempheru ndi kuŵeyere limoza ndi kuwonga, vo mupempha viziŵiki kwaku Chiuta;+ 7 ndipu chimangu+ chaku Chiuta cho chiluska kuziŵa vinthu kosi, chivikiliyengi mitima yinu+ ndi maŵanaŵanu nginu kuporote mwaku Khristu Yesu.

8 Pakumaliya abali, vinthu vevosi vauneneska, vevosi vakukhumbika ukongwa, vevosi vaurunji, vevosi vakutowa,* vevosi vakwanjika, vevosi vakulumbika, vevosi vamampha, vevosi vakuthamikika, lutirizgani kuŵanaŵaniya* vinthu venivi.+ 9 Vinthu vosi vo munguvisambira ndi kuvilonde, kweniso vo munguwona ndi kuvwa vakukwaskana ndi ini, muchitengi venivi,+ ndipu Chiuta wachimangu waŵengi namwi.

10 Nde wakukondwa ukongwa mwa Ambuya kuti sonu mwayamba so kundiŵanaŵaniya.+ Chinanga kuti mwandiŵanaŵaniyanga, kweni mwasoŵanga mpata wakulongore venivi. 11 Ndikamba venivi chifukwa chakukhumba chovyu cha, pakuti ndasambira kukhorwa mwemosi mo vinthu viliri pa umoyu wangu.+ 12 Ndiziŵa mo ndingajaliya ndi vinthu vimanavi+ ndipuso mo ndingajaliya ndi vinthu vinandi. Mu vinthu vosi kweniso mwemosi mo vinthu vingaŵiya, ndasambira chisisi cha mo ndingajaliya wakuguta ndipuso mo ndingajaliya ndi nja, mo ndingajaliya ndi vinthu vinandi kweniso mo ndingajaliya kwambula vinthu. 13 Mu vinthu vosi ndija ndi nthazi kuporote mwaku yo watindipaska nthazi.+

14 Kweni chinanga kuti vingaŵa viyo, munguchita umampha kundiwovya pa masuzgu ngangu. 15 Ndipu yimwi Afilipi muziŵa so kuti mwati mwavwa kakwamba uthenga wamampha ndichituwa ku Makedoniya, palivi mpingu wo ungundiwovya pa nkhani ya kupaska ndi kulonde, kupatuwaku yimwi pe.+ 16 Pakuti po ndenga ku Tesalonika, mungunditumiziya chovyu ndipu mungunditumiziya kamoza pe cha, kweni kaŵi. 17 Kuti ndikhumba mphasu cha, kweni ndikhumba chipasu cho chingasazgiyaku chuma cho mwe nachu. 18 Kweni nde ndi chechosi cho ndikhumbika ndipu nde ndi vinandi ukongwa. Ndapaskika vinandi ukongwa, pakuti sonu ndalonde kwaku Epafurodito+ vo mwanditumiziya, vo ve nge fungu lamampha,+ sembi yakuzomerezeka kweniso yakukondwesa kwaku Chiuta. 19 Ndipu Chiuta wangu nayu wakuzazeningi ndi vosi vo mukhumbika+ mwakukoliyana ndi chuma chaki mu unkhankhu, kuporote mwaku Khristu Yesu. 20 Sonu kwaku Chiuta widu kweniso Ada, kuŵi unkhankhu muyaya mpaka muyaya. Ame.

21 Mundipereke moni kwaku weyosi yo ngwakupaturika mwakukoliyana ndi Khristu Yesu. Abali wo nde nawu limoza, atikutawuzgani. 22 Akupaturika wosi, ukongwa a munyumba yaku Kayisara,+ atikutawuzgani.

23 Wezi ukulu wa Ambuya Yesu Khristu, uŵi ndi mzimu wo mulongo.