KALATA YAKWAMBA YAKULUTA KWA ATESALONIKA

1 Ini Paulo, nde limoza ndi Silivano*+ kweniso Timote.+ Ndilembe mpingu wa Atesalonika wakukoliyana ndi Chiuta, Ada kweniso Ambuya Yesu Khristu kuti:

Wezi ukulu ndi chimangu viŵi namwi.

2 Nyengu zosi tiwonga Chiuta asani titikuzumbuwani mosi mu mapempheru ngidu,+ 3 pakuti tiluwa cha ntchitu zinu zakugomezgeka, ntchitu zinu za chanju ndipuso kukunthiyapu kwinu, chifukwa cha chilindizga+ cho mwe nachu mwa Ambuyafwi Yesu Khristu pa masu paku Chiuta widu ndipuso Awusefwi. 4 Pakuti yimwi abali akwanjika ndi Chiuta, tiziŵa mo iyu wakukusankhiyani, 5 chifukwa uthenga wamampha wo tipharazga ungufika kwaku yimwi mu mazu pe cha, kweni ungufika so ndi nthazi, ndi mzimu wakupaturika kweniso ndi ukaboni wanthazi. Pakuti namwi muziŵa mo tinguchitiya pakati pinu chifukwa chaku yimwi. 6 Ndipu munguyezga isi+ kweniso Ambuya+ chifukwa munguzomera mazu, muchikumana ndi masuzgu+ ngakulu limoza ndi likondwa la mzimu wakupaturika, 7 mwaviyo munguja chakuwoniyapu kwa akugomezga wosi ku Makedoniya ndi ku Akaya.

8 Fundu njakuti, mazu ngaku Yehova* ngakutuliya kwaku yimwi ngavwika ku Makedoniya ndi ku Akaya pe cha, kweni chivwanu chinu mwaku Chiuta chapharazgika muvigaŵa vosi,+ mwakuti tingakhumbika kukamba chechosi cha. 9 Pakuti yiwu ŵeneku alutirizga kukamba vakukwaskana ndi mo tingukumaniyana namwi kakwamba, kweniso mo munguleke angoza+ ŵinu ndi kwamba kuteŵete Chiuta wamoyu kweniso wauneneska. 10 Ndipuso kuti mulindizga Mwana waki kutuliya kuchanya+ mweniyo wangumuyuska ku nyifwa. Mwana mwenuyu ndi Yesu mweniyo watititaska ku ukali wo utuza.+

2 Abali, yimwi mwaŵeni muziŵa kuti kuza kwidu kwaku yimwi kwenga kwambula phindu cha.+ 2 Pakuti chinanga kuti pakwamba tingusuzgika ukongwa ndipu angutichitiya chipongu ku Filipi+ nge mo muziŵiya, tinguchita chiganga chifukwa chaku Chiuta widu kuti tikukambiyeni uthenga wamampha waku Chiuta+ ndipu tinguchita ivi tichisuskika* ukongwa. 3 Pakuti vo tingukuchiskani vingutuliya mumaŵanaŵanu ngakulandizgika cha, pamwenga mu unyakazi pamwenga uryarya, 4 kweni nge mo Chiuta wazomereze kuti watipaski ntchitu yakupharazga uthenga wamampha, nasi tilongoro kuti tikondwesi ŵanthu cha, kweni Chiuta yo wasanda mitima.+

5 Ndipu muziŵa kuti tingulongoro mwauryarya cha, pamwenga kukunyetani phula mumasu chifukwa cha mbunu;+ Chiuta ndi kaboni! 6 Ndipuso tingupenja unkhankhu kutuliya ku ŵanthu cha, kwali nkhwaku yimwi pamwenga ku ŵanthu anyaki, chinanga kuti tatingi tijengi mphingu yikulu pakuti te akutumika aku Khristu.+ 7 Kweni tinguja akuzika pakati pinu, nge mo munthukazi wakonkhesa wachitiya pakuphwere ŵana ŵaki mwachanju. 8 Sonu chifukwa chakuti titikuyanjani ukongwa, tingusimikiza* kukupaskani uthenga wamampha waku Chiuta pe cha, kweni kukupaskani ndi umoyu widu viyo,+ chifukwa titikuyanjani ukongwa.+

9 Abali, kukamba uneneska mukumbuka ntchitu yo tagwiranga mwaphamphu kweniso mwakufyoka nayu. Tagwiranga ntchitu msana ndi usiku tichikupharazgiyani uthenga wamampha waku Chiuta, kuti tileki kupereka mphingu yikulu kwaku weyosi waku yimwi.+ 10 Yimwi mwe akaboni ndipu Chiuta nayu so ndi kaboni, kuti tinguja akugomezgeka, arunji ndipuso ambula kafukwa tichichita vinthu ndi yimwi akugomezga. 11 Muziŵa kuti nge mo ada+ achitiya ndi ŵana ŵawu, tingulutirizga kukuchiskani, kukupembuzgani ndipuso kupereka ukaboni kwaku weyosi waku yimwi,+ 12 kuti mulutirizgi kwenda nge mo Chiuta wakhumbiya,+ yo watikudaniyani ku Ufumu waki+ ndipuso ku unkhankhu waki.+

13 Kukamba uneneska, ndichu chifukwa chaki titimuwonga nadi Chiuta mwambula kulekeza,+ pakuti mwati mwalonde mazu ngaku Chiuta ngo munguvwa kwaku isi, mungungalonde nge kuti ndi mazu nga ŵanthu cha, kweni nge mazu ngaku Chiuta, ndipu ndimu ngaliri nadi. Mazu ngenanga ngagwira so ntchitu mwaku yimwi akugomezga. 14 Pakuti yimwi abali munguyezga mipingu yaku Chiuta yakukoliyana ndi Khristu Yesu yo ye ku Yudeya, chifukwa mungutombozgeka mu manja mwa ŵanthu amtundu winu,+ nge mo nawu so atombozgeke mu manja mwa Ayuda. 15 Ayuda ŵenaŵa angufika mpaka pakubaya Ambuya Yesu,+ achimi ndipuso angutitombozga.+ Kweniso akondwesa Chiuta cha, ndipu vo achita vakovya cha ku ŵanthu wosi. 16 Achita venivi kuti atitondekesi kulongoro ndi ŵanthu amitundu yinyaki, ndi chilatu chakuti ŵanthu ŵenaŵa aleki kutaskika.+ Achichita viyo, atijizaziya mwesu wa maubudi ngawu. Kweni sonu ukali waki waza paku yiwu.+

17 Kweni tati tatuzgikaku kwaku yimwi abali kwa nyengu yimanavi (pa masu ndi pa masu, kweni mumitima yidu cha), tinguyesesa kuti tikuwoneni pa masu ndi pa masu,* chifukwa takhumbisiskanga ukongwa. 18 Pa chifukwa chenichi, takhumbanga kuza kwaku yimwi ndipu ini Paulo, ndingwesapu kamoza pe cha, kweni kaŵi. Kweni Satana wangutijaliza nthowa. 19 Kumbi chilindizga chidu, likondwa lidu pamwenga chisoti chidu chakumalikiya pa masu pa Ambuya Yesu pa nyengu ya kuŵapu kwawu, ndi vinthu wuli? Asi ndimwi?+ 20 Yimwi ndimwi nadi unkhankhu widu ndi likondwa lidu.

3 Sonu tati tatondeka kukunthiyapu, tinguwona kuti nkhwakwenere kulutirizga kuja tija ku Atene.+ 2 Ndipu tingutumiza mubali widu Timote+ mweniyo ndi mteŵeti waku Chiuta* pa uthenga wamampha wakukwaskana ndi Khristu, kuti wazikuchiskeni* ndi kukupembuzgani pa chivwanu chinu, 3 kuti paŵevi wakusukunyika* ndi masuzgu ngenanga. Chifukwa yimwi muziŵa kuti tingavikhwecha cha venivi.*+ 4 Pakuti po tenga namwi limoza, takukambiyaningi limu kuti tikumanengi ndi masuzgu, ndipu nge mo muziŵiya, venivi ndivu vachitika.+ 5 Ndichu chifukwa chaki ndati ndatondeka kukunthiyapu, ndingukutumiziyani Timote kuti ndiziŵi vakukwaskana ndi kugomezgeka kwinu,+ kuti panyaki Wakwesa yo,+ wangaŵa kuti wakuyesani ndipuso kuti panyaki ntchitu yidu, yingaŵa kuti yaluta paŵaka.

6 Kweni Timote wafika ŵaka sonu kunu kutuliya kwaku yimwi,+ ndipu watikambiya nkhani yamampha yakukwaskana ndi kugomezgeka kwinu ndipuso chanju chinu, kuti nyengu zosi mutitikumbuka mwachanju, ndipuso kuti mukhumbisiska kuzitiwona nge mo nasi so tikhumbisiskiya kuzikuwonani. 7 Ndichu chifukwa chaki abali, chinanga kuti titimbanyizgika maŵanaŵanu* ndipuso te ndi masuzgu, tapembuzgika chifukwa chaku yimwi ndipuso chifukwa cha kugomezgeka ko mulongo.+ 8 Pakuti tija so ndi nthazi* asani yimwi muleka kusukunyika mwa Ambuya. 9 Kumbi isi tingalongo wuli kuti tiwonga Chiuta pa nkhani yakukwaskana ndi yimwi, kuti tiwezi likondwa lo te nalu pa masu paku Chiuta widu chifukwa chaku yimwi? 10 Usiku ndi msana tiŵeyere Chiuta ndi mtima wosi kuti tizikuwoneni pa masu ndi pa masu* ndi kukupaskani vo musoŵa pa chivwanu chinu.+

11 Yiwu ŵeneku Awusefwi kweniso Chiuta widu limoza ndi Ambuyafwi Yesu, atijuliyi nthowa, kuti tizi kwaku yimwi. 12 Ndipuso Ambuya akuwovyeni kuti chanju chinu chikuwi, hinya kuti muyanjanengi ukongwa+ ndipuso muyanjengi ŵanthu anyaki wosi, nge mo tichitiya ndi yimwi, 13 ndi chilatu chakuti akhwimisi mitima yinu, kuti yije yambula kafukwa ndipuso yakupaturika pa masu paku Chiuta widu+ Awusefwi, pa nyengu ya kuŵapu kwaku Ambuyafwi Yesu,+ limoza ndi akupaturika ŵawu wosi.

4 Pakumaliya abali, nge mo mukulonde ulongozgi kutuliya kwaku isi wakukwaskana ndi mo mutenere kuchitiya kuti muyendengi mwakukondwesa Chiuta,+ nge mo muchitiya nadi, titikupemphani kweniso kukuŵeyeriyani mwa Ambuya Yesu kuti lutirizgani ndipuso sazgiyaniku kuchita venivi. 2 Chifukwa mutiwuziŵa ulongozgi wo* tingukupaskani kuziya mwa Ambuya Yesu.

3 Pakuti khumbu laku Chiuta ndakuti muje akupaturika+ ndipuso mungachitanga ureŵi cha.*+ 4 Weyosi waku yimwi waziŵi mo wangalamuliya liŵavu laki*+ mu nthowa yakupaturika+ kweniso mwaulemu, 5 mwambunu cha, pamwenga mwakuja ndi khumbiru liheni lakugonana+ nge mo achitiya ŵanthu amitundu yinyaki wo aleka kuziŵa Chiuta.+ 6 Paŵevi munthu wakuchita vinthu mwakujumphisa, pamwenga wakugolore mubali waki pa nkhani iyi, chifukwa Yehova* wazamulanga ŵanthu wosi wo achita venivi, nge mo tikukukambiyani kali kweniso mo tikukutcheŵeskiyani mwanthazi. 7 Pakuti Chiuta wakutidaniya ku ukazuzi cha, kweni kuti tije akupaturika.+ 8 Mwaviyo, munthu yo wayuyuwa venivi, wayuyuwa munthu cha, kweni wayuyuwa Chiuta+ yo wapereka mzimu waki wakupaturika.+

9 Kweni pa nkhani ya kwanja abali,+ tikhumbika kuchita kukulembiyani cha, pakuti yimwi mwaŵeni musambizika ndi Chiuta kuti muyanjanengi.+ 10 Ndipu venivi ndivu muchitiya abali wosi ku Makedoniya kosi. Mwaviyo abali, nditikupemphani kuti mulutirizgi kweniso sazgiyaniku kuchita viyo. 11 Yesesani kuja mwachimangu+ ndipuso mungaseleriyangapu cha pa nkhani zo zileka kukukwaskani.+ Mugwirengi ntchitu ndi manja nginu+ nge mo tingukulunguchizgiyani. 12 Ndipu venivi vikuwovyeningi kuti muyendengi mwakwenere pa masu pa ŵanthu akubwalu+ kweniso kuti muleki kusoŵa kanthu.

13 Kweniso abali, tikhumba cha kuti muleki kuziŵa va ŵanthu wo akugona tulu ta nyifwa,+ kuti muleki kuchita chitima nge mo achitiya ŵanthu anyaki wosi wo alivi chilindizga.+ 14 Pakuti asani tivwana kuti Yesu wangufwa ndi kuyuskika,+ ndikuti Chiuta wazamuwunganisa wo akugona tulu ta nyifwa kuti azije limoza ndi Yesu, ndipu wazamuchita ivi kuziya mwaku Yesu.+ 15 Pakuti venivi ndivu titikukambiyani mwakugwiriskiya ntchitu mazu ngaku Yehova,* kuti isi amoyu wo tilutirizgengi kuja ndi umoyu mpaka mu nyengu ya kuŵapu kwa Ambuya, tazakuŵadanjiriya cha wo akugona tulu ta nyifwa. 16 Chifukwa Ambuya yiwu ŵeneku azamusika kutuliya kuchanya ndi kudaniriza mwakulamula, mwakugwiriskiya ntchitu mazu nga mura wa angelu+ kweniso mbata* yaku Chiuta, ndipu wo akufwa mwakukoliyana ndi Khristu ndiwu azamudankha kuyuka.+ 17 Pavuli paki, isi wo tazamulutirizga kuja ndi umoyu, tazamukwamphulikiya mumitambu+ limoza ndi yiwu, kuti tikakumani ndi Ambuya+ mude ndipu tamukuŵa ndi Ambuya nyengu zosi.+ 18 Mwaviyo lutirizgani kupembuzgana ndi mazu ngenanga.

5 Kweni abali, vakukwaskana ndi nyengu ndipuso mazuŵa ngakuŵikika mukhumbika kuti tichiti kukulembiyani cha. 2 Pakuti yimwi mwaŵeni muziŵa umampha kuti zuŵa laku Yehova*+ lizengi ndendende nge munkhungu ndi usiku.+ 3 Pa nyengu yo azamukambiya kuti, “Chimangu ndi kuvikilirika!” penipo, pharanyiku lamabuchibuchi lazakuŵawiya+ nge mo uchitiya urwirwi wa pakubala wa munthukazi wanthumbu, ndipu azamuthaŵa cha. 4 Kweni yimwi abali, mwe mu mdima cha kuti zuŵa lo likubuchizgeni nge mo lingachitiya kwa ankhungu. 5 Pakuti mosi mwe ŵana a ukweru, kweniso ŵana a msana.+ Te a usiku cha pamwenga a mdima.+

6 Mwaviyo, tingalutirizganga cha kugona nge mo anyaki wosi achitiya,+ kweni tije masu+ ndipu tilutirizgi kuŵanaŵana umampha.+ 7 Pakuti wo agona, agona ndi usiku, ndipu wo aloŵe, aloŵe ndi usiku.+ 8 Kweni isi a msana, tilutirizgi kuŵanaŵana umampha, tivwali chivwanu ndi chanju nge chakuvikiliya pachifuŵa, ndipuso chilindizga cha utaski nge chisoti.+ 9 Pakuti Chiuta wakutisankha kuti tikumani ndi ukali waki cha, kweni kuti tisaniyi utaski+ kuziya mwa Ambuyafwi Yesu Khristu. 10 Yesu wakutifwiya+ kuti kwali tilutirizgi kuja masu, kwali tigoni,* tijengi ndi iyu.+ 11 Mwaviyo, lutirizgani kuchiskana* ndi kuzengana,+ nge mo muchitiya kali.

12 Abali, sonu titikupemphani kuti muŵatumbikengi ukongwa wo agwira ntchitu mwaphamphu pakati pinu ndipuso wo atikulongozgani mwa Ambuya ndi kukulunguchizgani. 13 Ndipuso muŵatumbikengi ndi kuŵayanja ukongwa chifukwa cha ntchitu yawu.+ Mujengi mwachimangu ndi anyinu.+ 14 Kweniso, titikupemphani abali kuti mutcheŵeskengi* wo achita vinthu mwambula kwenere,+ mupembuzgengi wo asuzgika maŵanaŵanu,* muwovyengi akulopwa, ndipu muzikirengi ku ŵanthu wosi.+ 15 Muwonesesi kuti paŵevi wakuweze chiheni pa chiheni ku munthu weyosi,+ kweni nyengu zosi muchitiyanengi vinthu vamampha ndipu muchitengi so venivi ku ŵanthu anyaki wosi.+

16 Nyengu zosi mukondwengi.+ 17 Mupempherengi nyengu zosi.+ 18 Muwongengi pa chinthu chechosi.+ Venivi ndivu Chiuta wakhumba kuti muchitengi mwaku Khristu Yesu. 19 Mungazimwanga cha motu wa mzimu.+ 20 Mungayuyuwanga mauchimi cha.+ 21 Musimikiziyengi vinthu vosi;+ mukolesengi cho ntchamampha. 22 Mungachitanga cha chiheni chamtundu wewosi.+

23 Chiuta wa chimangu wakutoweseni mwakufikapu. Ndipu abali, mzimu wo mulongo, umoyu winu kweniso liŵavu linu, vije vamampha mu kanthu kekosi ndipuso vilutirizgi kuja vambula kafukwa mu zuŵa la kuŵapu kwa Ambuyafwi Yesu Khristu.+ 24 Yo watikudanani ngwakugomezgeka ndipu wazamuchita nadi venivi.

25 Abali, lutirizgani kutipemphere.+

26 Tawuzgani abali wosi ndi kufyofyonthana mwakupaturika.

27 Nditikulamulani mwa Ambuya kuti kalata iyi yiŵerengeki kwa abali wosi.+

28 Wezi ukulu wa Ambuyafwi Yesu Khristu, uŵi namwi.