KALATA YACHIŴI YAKULUTA KWA ATESALONIKA

1 Ini Paulo, nde limoza ndi Silivano* kweniso Timote.+ Ndilembe mpingu wa Atesalonika wakukoliyana ndi Chiuta Awusefwi kweniso Ambuya Yesu Khristu kuti:

2 Wezi ukulu ndi chimangu vakutuliya kwaku Chiuta, Ada kweniso Ambuya Yesu Khristu, viŵi namwi.

3 Titenere kuwonga Chiuta nyengu zosi chifukwa chaku yimwi abali. Venivi vakwenere chifukwa chivwanu chinu chikuwa ukongwa ndipu chanju cho mwe nachu pakati pinu mosi, chilutirizga kusazgikiyaku.+ 4 Venivi vichitiska kuti timalikengi+ pakati pa mipingu yaku Chiuta chifukwa cha kukunthiyapu kwinu ndipuso chivwanu chinu muchitombozgeka kweniso mu masuzgu nginu ngosi ngo mukumana nangu.*+ 5 Uwu mbukaboni wakuti Chiuta wayeruzga mwaurunji, ndipu venivi vachitiska kuti yimwi muje akwenere Ufumu waku Chiuta wo mutiwusuzgikiya nadi.+

6 Pakuti mburunji nadi kuti Chiuta waweze suzgu kwaku wo atikusuzgani.+ 7 Kweni yimwi musuzgika, mwazamupumuwa limoza ndi isi pa nyengu yo Ambuya Yesu+ azamuvumbulikiya kutuliya kuchanya ndi angelu ŵawu anthazi,+ 8 mu motu wakulipuka, achiweze ŵanthu wo aleka kuziŵa Chiuta ndi wo aleka kuvwiya uthenga wamampha wakukwaskana ndi Yesu, Ambuyafwi.+ 9 Ŵanthu ŵenaŵa azamuyeruzgika kuti anangiki kwamuyaya+ ndi kutuzgikapu pa masu pa Ambuya ndi pa unkhankhu wa nthazi zawu. 10 Venivi vazamuchitika pa nyengu yo aziyengi kuti azikankhuskiki mwakukoliyana ndi akupaturika ŵawu ndipuso kuti wosi wo ŵe ndi chivwanu aziŵawoni kuti mbakuziziswa, chifukwa munguvwana ndi ukaboni wo tingukupaskani.

11 Mwaviyo nyengu zosi titikupempheriyani, kuti Chiuta widu wakuwoneni kuti mwe akwenere kudanika+ ndipuso kuti ndi nthazi zaki wagwiri mwakukwana ntchitu zosi zo zitimukondwesa kweniso ntchitu yeyosi ya chivwanu. 12 Ve viyo kuti mwakukoliyana ndi wezi ukulu waku Chiuta ndipuso wa Ambuya Yesu Khristu, zina la Ambuya Yesu likankhuskiki kuziya mwaku yimwi ndipuso namwi mwakukoliyana ndi yiwu.

2 Kweni abali, pa nkhani yakukwaskana ndi kuŵapu kwa Ambuyafwi Yesu Khristu+ kweniso kuwunganisika kwidu kwaku iyu,+ titikupemphani kuti 2 muleki kusukunyika pa maŵanaŵanu nginu, pamwenga kuchita mantha ndi mazu ngakuwoneka nge kuti ngakukambirika,*+ pamwenga uthenga wa pamulomu pamwenga wa mukalata yakuwoneka nge kuti yatuliya kwaku isi, wakukamba kuti zuŵa laku Yehova*+ lafika.

3 Paŵevi munthu wakukulandizgani* mu nthowa yeyosi, chifukwa zuŵa lo lizengi cha mpaka po wampatuku+ waziya dankha, ndipuso mpaka po munthu wambula kuvwiya marangu+ wavumbulikiya, yo ndi mwana wa pharanyiku.+ 4 Iyu ngwakususka ndipu watijikweza pachanya paku weyosi yo wadanika kuti chiuta, pamwenga chinthu cho chisopeka, mwakuti waja munyumba yakusopiyamu yaku Chiuta ndi kujilongo pakweru kuti ndi chiuta. 5 Kumbi mwaluwa kuti pa nyengu yo ndenga ndeche namwi ndakukambiyaningi vinthu venivi?

6 Ndipu sonu muziŵa cho chitimujaliza, ndi chilatu chakuti wazivumbuliki pa nyengu yaki. 7 Kukamba uneneska, chisisi ichi cha kuleka kuvwiya marangu, chigwira ntchitu+ mpaka po watuzgikiyapu yo sonu panu wachita nge chakujaliza. 8 Pavuli paki, wazamuvumbulika munthu wambula kuvwiya marangu, mweniyo Ambuya Yesu azakumubaya mwakugwiriskiya ntchitu mzimu wa mulomu wawu,+ ndi kumutuzgapu pa nyengu yo kuŵapu kwawu kwazamuwoneke.+ 9 Kweni kuŵapu kwa munthu wambula kuvwiya marangu kuchitika chifukwa chaku Satana+ mwa ntchitu zosi zanthazi, visimikizu vaboza, vakuziziswa,+ 10 kweniso chinyengu chechosi chambula urunji,+ ku ŵanthu wo anangika ndipu kunangika kwenuku ntchilangu chawu, chifukwa angukana chanju chauneneska kuti ataskiki. 11 Ndichu chifukwa chaki Chiuta wakuzomereza kuti alandizgiki, ndi chilatu chakuti agomezgengi boza,+ 12 kuti wosi aziyeruzgiki chifukwa anguwugomezga cha uneneska, kweni ayanjanga vinthu vambula urunji.

13 Kweni titenere kuwonga Chiuta nyengu zosi chifukwa chaku yimwi abali akwanjika ndi Yehova,* chifukwa Chiuta wakukusankhani kutuliya pakwamba+ kuti wakutaskeni mwakukutowesani+ ndi mzimu waki, kweniso chifukwa chakuti muvwana mu uneneska. 14 Wakukudaniyani ku utaski wenuwu kuziya mu uthenga wamampha wo tipharazga kuti musaniyi unkhankhu wa Ambuyafwi Yesu Khristu.+ 15 Mwaviyo abali, jani akukho+ ndipu lutirizgani kukolesa midawuku yo mungusambizika,+ kwali mwa uthenga wa pamulomu pamwenga mukalata yakutuliya kwaku isi. 16 Kweniso, yiwu ŵeneku Ambuyafwi, Yesu Khristu ndipuso Chiuta Awusefwi yo wangutiyanja+ ndi kutipembuzga kwamuyaya ndipuso kutipaska chilindizga chamampha+ mwakugwiriskiya ntchitu wezi ukulu, 17 apembuzgi mitima yinu ndi kukuwovyani kuti muje akukho,* kuti nyengu zosi muchitengi ndi kulongoro vinthu vamampha.

3 Pakumaliya abali, lutirizgani kutipemphere+ kuti mazu ngaku Yehova* ngalutirizgi kuwanda liŵi+ ndipuso kukankhuskika, nge mo ngachitiya pakati pinu, 2 kweniso kuti titaskiki ku ŵanthu akupweteka ndi aheni,+ pakuti mbanthu wosi cha wo ŵe ndi chivwanu.+ 3 Kweni Ambuya mbakugomezgeka, ndipu akupaskeningi nthazi ndi kukuvikiliyani ku muheni yo. 4 Kweniso tigomezga mwa Ambuya kuti yimwi musunga ulongozgi wo tikukupaskani, ndipu mulutirizgengi kuwusunga. 5 Ambuya alutirizgi kulongozga mitima yinu, kuti muyanjengi Chiuta+ kweniso kuti mukunthiyengepu+ chifukwa chaku Khristu.

6 Abali, sonu titikupaskani ulongozgi mu zina la Ambuyafwi Yesu Khristu, kuti mukhwechengi mubali weyosi yo watenda mwambula kwenere+ ndipuso mwambula kukoliyana ndi midawuku yo* mukulonde* kwaku isi.+ 7 Pakuti yimwi mwaŵeni muziŵa mo mutenere kutiyezge,+ chifukwa tikuchitapu cha vinthu mwambula kwenere pakati pinu, 8 pamwenga kurya chakurya cha munthu weyosi kwawezi.*+ Kweni usiku ndi msana tagwiranga ntchitu mwaphamphu ndipuso mwakufyoka, kuti tileki kupereka mphingu yikulu kwaku weyosi waku yimwi.+ 9 Kuti tilivi mazaza cha,+ kweni takhumbanga kuti tilongo chakuwoniyapu chamampha chakuti yimwi muyezgengi.+ 10 Ndipu po tenga namwi limoza, tayanjanga kukupaskani dangu lakuti: “Asani munthu munyaki wakhumba cha kugwira ntchitu, wangaryanga cha.”+ 11 Pakuti tituvwa kuti anyaki pakati pinu atenda mwambula kwenere,+ agwira ntchitu cha chinanga nkhamanavi, kweni aselere ŵaka pa nkhani zo zileka kuŵakwaska.+ 12 Ŵanthu aviyo titiŵalamula kweniso kuŵapempha mwa Ambuya Yesu Khristu, kuti agwirengi ntchitu mwachimangu kweniso aryengi chakurya cho yiwu ŵeneku achigwiriya ntchitu.+

13 Kweni yimwi abali, mungavukanga cha kuchita cho ntchamampha. 14 Kweni asani munyaki waleka kuvwiya mazu ngidu ngo nge mukalata iyi, munthu waviyo mumudindi chidindu ndipu muleki kuchitiya nayu vinthu limoza,+ kuti wachiti soni. 15 Kweni mungamuwonanga nge murwani winu cha, mumalu mwaki mumulunguchizgengi+ nge mubali winu.

16 Sonu yiwu ŵeneku Ambuya achimangu, alutirizgi kukupaskani chimangu mu nthowa yeyosi.+ Ambuya aŵi namwi mosi.

17 Londiyani moni wangu wo ndalemba ndija,+ ini Paulo, weniwo ntchisimikizu cha kalata yangu yeyosi. Viyo ndimu ndilembe.

18 Wezi ukulu wa Ambuyafwi Yesu Khristu, uŵi namwi mosi.