KALATA YACHIŴI YAKULUTA KWAKU TIMOTE

1 Ini Paulo, wakutumika waku Khristu Yesu mwa khumbu laku Chiuta, mwakukoliyana ndi layizgu la umoyu wo uŵapu kuporote mwaku Khristu Yesu,+ 2 ndilembe yiwi Timote, mwana wangu wakwanjiwa kuti:+

Wezi ukulu, lisungu ndipuso chimangu vakutuliya kwaku Chiuta, Ada kweniso kwaku Khristu Yesu Ambuyafwi, viŵi nawi.

3 Ndiwonga Chiuta mweniyo nditimuchitiya uteŵeti wakupaturika nge mo apapi ŵangu akali anguchitiya ndipu nditiwuchita ndi njuŵi yamampha kweniso ndileka cha kukukumbuka mu mapempheru ngangu ngakuŵeyere, msana ndi usiku. 4 Asani ndikumbuka masozi ngaku, ndikhumbisiska kukuwona, kuti ndije ndi likondwa likulu. 5 Pakuti ndikumbuka chivwanu chaku chambula chinyengu,+ cho chingwamba kuja mwa ambuyaku a Loyisi ndipuso anyoku a Yunisi, ndipu ndisimikiza kuti che so mwaku yiwi.

6 Pa chifukwa chenichi, nditikukumbusa kuti ulutirizgi kusonkha nge motu mphasu yaku Chiuta yo ye mwaku yiwi, yo unguyilonde ndati ndaŵika manja ngangu paku yiwi.+ 7 Pakuti Chiuta wakutipaska mzimu wa mantha cha,+ kweni wakutipaska mzimu wa nthazi,+ wa chanju ndipuso wakuŵanaŵana umampha. 8 Mwaviyo, ungachitanga soni cha ndi ntchitu yakupereka ukaboni wakukwaskana ndi Ambuyafwi,+ pamwenga ndi ini mukayidi chifukwa cha Ambuya. Kweni zomereza kusuzgika+ chifukwa cha uthenga wamampha, mwakuthemba nthazi zaku Chiuta.+ 9 Iyu wakutitaska kweniso wakutidana kuti tije akupaturika,+ chifukwa cha ntchitu zidu cha, kweni chifukwa cha khumbu laki ndipuso wezi waki ukulu.+ Wezi ukulu wenuwu ukuperekeka kwaku isi nyengu yakali ukongwa, mwakukoliyana ndi Khristu Yesu, 10 kweni sonu wezi ukulu walongoreka umampha kuporote mu kuwoneke kwa Mtaski widu, Khristu Yesu,+ yo wakutuzgapu nyifwa,+ wakuvumbuwa mo tingajaliya ndi umoyu+ kweniso liŵavu lo linganangika cha+ kuporote mu uthenga wamampha,+ 11 weniwo ndikusankhikiya kuti ndije mupharazgi, wakutumika ndipuso msambizi.+

12 Ndichu chifukwa chaki nani ndisuzgika ndi venivi,+ kweni ndichita soni cha.+ Pakuti ndiziŵa Yo ndigomezga, ndipu ndisimikiza kuti wavikiliyengi cho ndamusungisa mpaka pa zuŵa lo.+ 13 Lutirizga kukolesa fundu za* mazu ngamampha*+ ngo ukuvwa kutuliya kwaku ini we ndi chivwanu ndipuso chanju, vo viŵapu chifukwa chakukoliyana ndi Khristu Yesu. 14 Vikiliya chuma cho wasungizika mwakugwiriskiya ntchitu mzimu wakupaturika, wo we mwaku isi.+

15 Uziŵa kuti ŵanthu wosi a muchigaŵa cha Asia,+ apatukaku kwaku ini ndipu anyaki mwa ŵanthu ŵenaŵa ndi Fugelo kweniso Heremojeni. 16 Ambuya achitiyi lisungu a munyumba yaku Onesiforo,+ pakuti watindisisipuwa, ndipu wanguchita soni cha chifukwa cha ukayidi wangu. 17 Mumalu mwaki, pa nyengu yo wenga ku Roma, wangufwiyapu kundipenja ndipu wangundisaniya. 18 Ambuya amuzomerezi kuti wazilonde lisungu kutuliya kwaku Yehova* mu zuŵa lo. Ndipu yiwi utingaziŵa umampha mauteŵeti ngosi ngo wanguchita ku Efeso.

2 Mwaviyo, yiwi wamwana wangu+ lutirizga kusaniya wezi ukulu wo we mwaku Khristu Yesu; 2 ndipu vinthu vo ukuvwa kwaku ini, venivo akaboni anandi anguvizomereza,+ uvisambizi ku ŵanthu akugomezgeka, wo nawu so azamukuŵa akwenere kusambiza ŵanthu anyaki. 3 Nge msilikali+ wamampha waku Khristu Yesu, zomereza kukumana ndi masuzgu.+ 4 Palivi munthu yo wateŵete nge msilikali, mweniyo wachitaku* malonda nga* mu umoyu wunu. Iyu wachita venivi kuti wakondwesi yo wakumulemba ntchitu nge msilikali. 5 Ndipu chinanga mpha maphara, weyosi yo wachitaku maphara walonde nkhata* pijapija asani wachita maphara ngo mwakulondo marangu ngaki.+ 6 Mlimi yo wagwira ntchitu mwaphamphu ndiyu watenere kwamba kurya vipasu. 7 Lutirizga kuŵanaŵaniya vo ndikamba; Ambuya akuwovyengi kuti uvwisengi* vinthu vosi.

8 Kumbuka kuti Yesu Khristu wakuyuskika ku nyifwa+ ndipu wenga mphapu* yaku Davidi,+ mwakukoliyana ndi uthenga wamampha wo ndipharazga,+ 9 wo ini ndisuzgikiya ndipuso wo ndimangikiya nge wakuchita vinthu viheni.+ Kweni mazu ngaku Chiuta ngamangika cha.+ 10 Pa chifukwa chenichi ndilutirizga kukunthiyapu vinthu vosi chifukwa cha akusankhika,+ kuti nawu alonde utaski wo uŵapu kuporote mwaku Khristu Yesu, limoza ndi unkhankhu wamuyaya. 11 Mazu yanga ngakugomezgeka: Kukamba uneneska, asani tikufwiya nayu limoza, tazamuja so ndi umoyu limoza nayu;+ 12 asani tilutirizga kukunthiyapu, tazamulamuliya so nayu limoza nge mafumu;+ asani titimukana, nayu so wazakutikana;+ 13 asani te ambula kugomezgeka, iyu walutirizga kuja wakugomezgeka, pakuti iyu wangajikana cha.

14 Lutirizga kuŵakumbusa vinthu venivi ndi kuŵalunguchizga* pa masu paku Chiuta kuti angalimbananga cha pa mazu, kuchita viyo kulivi phindu lelosi chifukwa kunanga* ŵanthu wo avwisiya. 15 Yesesa kuja wakuzomerezeka ndi Chiuta, wantchitu wambula chifukwa chakuchitiya soni, wakusambiza umampha mazu ngauneneska.+ 16 Kweni ukanengi nkhani zambula fundu zo zinanga chinthu chakupaturika,+ pakuti nkhani zenizi zingachitiska kuti kuleka kopa Chiuta kulutiriyi ukongwa, 17 ndipu mazu ngawu ngazamusapaliya nge chilonda cha zoza. Anyaki mwa ŵanthu ŵenaŵa, ndi Hemenayo kweniso Fileto.+ 18 Ŵanthu ŵenaŵa atuwaku ku uneneska ndipu akamba kuti chiyuka chikuchitika kali,+ ndipuso ananga chivwanu cha ŵanthu anyaki. 19 Chinanga kuti ve viyo, fawundeshoni yakukho yaku Chiuta yisukunyika cha, ndipu ye ndi chidindu cha mazu ngakuti, “Yehova* waziŵa ŵanthu wo mbaki,”+ ndipuso “Weyosi yo wadaniya pa zina laku Yehova,*+ waleki kuchita vinthu vambula urunji.”

20 Sonu munyumba yikulu muja viyaŵi vagolidi ndi vasiliva pe cha, kweni muja so vachimiti ndipuso vadongu. Ndipu vinyaki vigwira ntchitu yakuzirwa, penipo vinyaki vigwira ntchitu yambula kuzirwa. 21 Sonu asani munthu wakhwecha viyaŵi vo vigwira ntchitu yambula kuzirwa, wajengi chidya* cho chigwira ntchitu yakuzirwa, chakutoweseka, chakukhumbika ku mweneku, chakunozgeke ntchitu yeyosi yamampha. 22 Mwaviyo thaŵa makhumbiru nga unyamata, kweni penja urunji, chivwanu, chanju ndipuso chimangu, limoza ndi ŵanthu wo adaniya pa Ambuya ndi mtima wakutowa.

23 Kweniso ukanengi suskanu zakupusa ndipuso zambula zeru,+ pakuziŵa kuti zitambisa ndewu. 24 Pakuti kapolu wa Ambuya wakhumbika cha kuchita ndewu, kweni wakhumbika kuja wakuzika ku* ŵanthu wosi,+ wakwenere kusambiza, wakuwuko mtima asani ŵanthu amunangiya,+ 25 walunguchizgengi mwakuzika ŵanthu wo atimususka.+ Panyaki Chiuta wangaŵawovya kuti alapi,* vo vingachitiska kuti awuziŵi umampha uneneska,+ 26 ndipuso kuti panyaki angawamu ndi kupona ku chiŵana chaku Dyaboli, pakuwona kuti Dyaboli waŵako amoyu kuti achiti khumbu laki.+

3 Kweni ziŵa chenichi, kuti mu mazuŵa ngakumaliya,+ kuŵengi nyengu zakusuzga ukongwa. 2 Pakuti ŵanthu azamuja akujiyanja, akwanja ndalama, akujiŵikamu, akujikuzga, akunyoza, ambula kuvwiya apapi, ambula kuwonga, ambula kugomezgeka, 3 ambula chanju chakuwa nachu, ambula kukoliyana ndi anyawu, akukamba vinthu viheni va ŵanthu anyaki, ambula kujiko, akofya, akutinkha vamampha, 4 akupereka anyawu, ambula kuvwa va anyawu, akujitukumuwa chifukwa cha kunyada, akwanja vakukondwesa mumalu mwakwanja Chiuta, 5 akuwoneka nge mbakujipereka kwaku Chiuta kweni nthazi yakujipereka kwenuku atiyikana;+ ndipu ku ŵanthu ŵenaŵa, upatukeku. 6 Pakati pa ŵanthu ŵenaŵa payuka ŵanthu anyaki wo asere mwauryarya munyumba zakupambanapambana ndipu akopa anthukazi akulopwa wo akuzitiskika ndi maubudi, wo alongozgeka ndi makhumbiru ngakupambanapambana, 7 ndipuso wo nyengu zosi asambira kweni atondeka kuwuziŵa umampha uneneska.

8 Ndipu nge mo Yane ndi Yambure angususkiya Mozesi, ŵanthu ŵenaŵa nawu alutirizga kususka uneneska. Maŵanaŵanu ngawu nganangika ukongwa ndipu mbakuzomerezeka cha pa nkhani ya chivwanu. 9 Kweni alutengi patali cha, pakuti uzereza wawu wazamuziŵika ku ŵanthu wosi, nge mo vinguchitikiya ndi ŵanthu ŵaŵi ŵa.+ 10 Kweni yiwi wayesesa kulondo chisambizu changu, umoyu wangu,+ chilatu changu, chivwanu changu, kuzikira kwangu, chanju changu, kukunthiyapu kwangu, 11 kutombozgeka kweniso masuzgu nge ngo ndingukumana nangu mu Antiyoke,+ Ikoniyo+ ndi mu Lusitara.+ Ndingukunthiyapu kutombozgeka kwenuku, ndipu Ambuya angunditaska ku vinthu vosi venivi.+ 12 Kukamba uneneska, ŵanthu wosi wo akhumba kuja ndi umoyu wakujipereka kwaku Chiuta mwakukoliyana ndi Khristu Yesu, nawu azamutombozgeka.+ 13 Kweni ŵanthu aheni kweniso akunyenga, azamuhenekeheneke, azamulandizga ŵanthu anyaki ndipuso azamulandizgika.+

14 Kweni yiwi, lutirizga kuchita vinthu vo ukusambira ndipuso vo ukuvigomezga wati wakhorwa navu,+ pakuti utiŵaziŵa ŵanthu wo akukusambiza venivi. 15 Ndipuso kutuliya pa ulitema+ wasambira malemba ngakupaturika,+ ngo ngangakuwovya kuti uje ndi zeru zakuti utaskikiyi, chifukwa chakuja ndi chivwanu mwaku Khristu Yesu.+ 16 Malemba ngosi ngakukambirika ndi Chiuta,+ ndipu ngatovya pakusambiza,+ pakuchenya, pakunyoloska* vinthu ndipuso pakulunguchizga mu urunji,+ 17 kuti munthu waku Chiuta waje wakwenere nadi, wakunozgeka kugwira ntchitu yeyosi yamampha.

4 Nditikulamula pa masu paku Chiuta ndipuso pa masu paku Khristu Yesu yo wazamuyeruzga+ amoyu ndi akufwa+ pa nyengu yo wazamuwoneke+ kweniso pa nyengu yo wazamulamuliya mu Ufumu waki, kuti:+ 2 Pharazga mazu;+ pharazga mwaliŵi, mu nyengu yamampha kweniso mu nyengu yakusuzga; chenya,+ tcheŵeska ndipuso chiska. Chita vosi venivi mwakuzikira ukongwa ndipuso mwakusambiza umampha.+ 3 Pakuti yituza nyengu yo ŵanthu azamukana chisambizu chamampha,*+ kweni azakujiwunjikiya asambizi kuti azinyenyeresengi makutu ngawu,* mwakukoliyana ndi makhumbiru ngawu.+ 4 Azamuleka kuvwisiya uneneska, ndipu azamung’anamukiya ku nkhani zaboza. 5 Kweni yiwi, uŵanaŵanengi umampha mu vinthu vosi, kunthiyapu masuzgu,+ gwira ntchitu ya mupharazgi,* fiska uteŵeti waku mwakukwana.+

6 Pakuti ndipungulika ndikali nge sembi ya chakumwa,+ ndipu nyengu yakufwatulika kwangu+ ye pafupi. 7 Ndachita nkhondu yamampha,+ ndatchimbiya maphara mpaka kumaliza,+ ndasunga chivwanu. 8 Kwamba sonu, andisungiya chisoti* chaurunji,+ cho Ambuya wo ayeruzga mwaurunji+ azakundipaska nge mphotu mu zuŵa lo.+ Azamupaska ini pe cha, kweni azamupaska so wosi wo akhumbisiska kuti yiwu awoneki.

9 Yesesa kuti uzi kwaku ini mwaliŵi. 10 Pakuti Demasi+ wandisiya chifukwa cha kwanja vinthu va mu nyengu yinu,* ndipu waluta ku Tesalonika, Khreseni waluta ku Galatiya, Tito waluta ku Dalamatiya. 11 Luka pe ndiyu we ndi ini, uzi so ndi Mariko, pakuti ngwakovya kwaku ini mu uteŵeti. 12 Kweni Tukiko+ ndamutuma ku Efeso. 13 Uchiza, undipingiyi chakuvwala champhepu cho ndikuchileka ku Trowa kwaku Kapasi. Upingi so mipukutu, ukongwa yavikopa.

14 Alekizanda yo wasula mkuŵa, wangundichitiya vinthu viheni vinandi. Yehova* wamuweziyengi mwakukoliyana ndi ntchitu zaki.+ 15 Yiwi nawi uphwere nayu ukongwa, chifukwa wangususka uthenga widu mwakujumphisa.

16 Po ndajivikiliyanga kakwamba, pengavi yo wenga kuchigaŵa changu, kweni wosi angundijowo. Yiwu aŵevi mulandu. 17 Kweni Ambuya anguma nani pafupi ndipu angundipaska nthazi, kuti kuporote mwaku ini, uthenga upharazgiki mwakukwana ndipuso kuti ŵanthu amitundu yosi awuvwi,+ ndipu angunditaska mumulomu mwa nkharamu.+ 18 Ambuya anditaskengi ku ntchitu ziheni zosi ndipu andisungengi chifukwa cha Ufumu wawu wakuchanya.+ Kwaku yiwu kuŵi unkhankhu muyaya mpaka muyaya. Ame.

19 Unditawuzgiyeku Purisika ndi Akula,+ kweniso a munyumba yaku Onesiforo.+

20 Erasito+ wangujaliya ku Korinto, kweni Tirofimo+ ndingumusiya watama ku Mileto. 21 Uyesesi kufika kunu chipwepwi chechendayambi.

Ebulo watikutawuzga, Pudesi, Linasi, Kilawudiya, ndi abali wosi, nawu atikutawuzga.

22 Ambuya aŵi ndi mzimu wo ulongo. Wezi wawu ukulu uŵi namwi.