KALATA YAKWAMBA YAKU YOHANE

1 Titikulembiyani vakukwaskana ndi yo wengaku kutuliya pakwamba, yo tamuvwa, yo tamuwona ndi masu ngidu, yo tamuwonesesa ndipuso yo manja nginu ngamukwaska, yo watuza ndi mazu ngakupaska umoyu,+ 2 (umoyu wenuwu unguwoneke, ndipu isi tawona, tijaliya ukaboni+ kweniso titikukambiyani vakukwaskana ndi umoyu wamuyaya+ wo wenga ndi Ada ndipu unguwoneke so kwaku isi.) 3 Titikukambiyani vakukwaskana ndi yo tamuwona ndi kumuvwa,+ kuti namwi mukoliyani nasi. Ndipu isi tikoliyana ndi Ada kweniso Mwana wawu Yesu Khristu.+ 4 Ndipu titikulembiyani vinthu venivi kuti tije ndi likondwa likulu.

5 Uthenga wo tikuvwa kwaku iyu ndipuso wo titikupharazgiyani ngwakuti: Chiuta mbukweru,+ ndipu mwaku iyu mulivi mdima wewosi. 6 Asani tikamba kuti, “Tikoliyana ndi iyu,” kweni tilutirizga kwenda mu mdima, ndikuti tipusika ndipuso tichita vinthu mwakukoliyana ndi uneneska cha.+ 7 Kweni asani titenda mu ukweru nge mo iyu waliri mu ukweru ndikwesa te akukoliyana, ndipu ndopa za Mwana waki Yesu zitititowesa ku maubudi ngosi.+

8 Asani tikamba kuti, “Tilivi ubudi,” titijilandizga+ ndipu mwaku isi mulivi uneneska. 9 Asani tisumuwa maubudi ngidu, iyu ngwakugomezgeka kweniso ndi murunji, ndipu watigowokiyengi maubudi ngidu ndi kutitowesa ku vinthu vosi vambula urunji.+ 10 Asani tikamba kuti, “Tabuda cha,” ndikuti tikamba kuti iyu ngwaboza ndipu mwaku isi mulivi mazu ngaki.

2 Mwaŵana ŵangu akwanjiwa, nditikulembiyani vinthu venivi kuti muleki kuchita ubudi. Kweni asani munyaki wachita ubudi, te ndi wakovya* murunji+ yo ndi Yesu Khristu,+ mweniyo we kwa Ada. 2 Iyu ndi sembi yakupepese*+ maubudi ngidu,+ maubudi ngidu pe cha, kweni nga charu chosi.+ 3 Ndipu asani tilutirizga kusunga marangu ngaki, tilongo kuti tamuziŵa. 4 Munthu yo wakamba kuti, “Ndamuziŵa,” kweni wasunga cha marangu ngaki, ngwaboza, ndipu mwaku iyu mulivi uneneska. 5 Kweni munthu yo wasunga mazu ngaki, munthu mwenuyu watanja nadi Chiuta mwakufikapu.+ Ndipu asani tichita venivi, tilongo kuti te akukoliyana ndi iyu.+ 6 Mweniyo wakamba kuti walutirizga kukoliyana ndi iyu, watenere kulutirizga kwenda nge mo iyu wayendiyanga.+

7 Akwanjiwa, nditikulembiyani dangu lifya cha, kweni dangu lakali lo mwaja nalu kutuliya pakwamba.+ Dangu* lakali lenili, ndi mazu ngo mukuvwa. 8 Nditikulembiyani so dangu lifya, lo iyu walondonga kweniso lo yimwi mulondo,* chifukwa mdima uluta, ndipu ukweru wauneneska wayamba kali kuŵala.+

9 Munthu yo wakamba kuti we mu ukweru kweni watinkha+ mubali waki, weche mu mdima.+ 10 Yo watanja mubali waki walutirizga kuja mu ukweru,+ ndipu mwaku iyu mulivi chechosi cho chingamuguŵiska. 11 Kweni yo watinkha mubali waki, we mu mdima ndipu watenda mu mdima,+ kweniso waziŵaku cha ko waluta,+ chifukwa mdima wabulumutizga masu ngaki.

12 Mwaŵana, nditikulembiyani pakuti maubudi nginu ngagowokereka chifukwa cha zina laki.+ 13 Nditikulembiyani yimwi mwaŵada, chifukwa mwamuziŵa yo wakuŵapu kutuliya pakwamba. Ndilembe yimwi anyamata, chifukwa mwamuthereska muheni yo.+ Ndilembe yimwi mwaŵana, chifukwa mwaziŵa Ada.+ 14 Ndilembe yimwi mwaŵada, chifukwa mwamuziŵa yo wakuŵapu kutuliya pakwamba. Ndilembe yimwi anyamata chifukwa mwe ndi nthazi+ ndipu mazu ngaku Chiuta ngalutirizga kuja mwaku yimwi,+ kweniso mwathereska muheni yo.+

15 Mungayanjanga charu cha pamwenga vinthu va mucharu.+ Asani munyaki watanja charu ndikuti watanja Ada cha;+ 16 chifukwa chechosi cha mucharu, kwali ndi khumbiru la liŵavu,+ khumbiru la masu+ kweniso kujiwonesa ndi vinthu vo munthu we navu pa umoyu,* vituliya kwa Ada cha, kweni kucharu. 17 Ndipuso charu ndi khumbiru laki viluta,+ kweni munthu yo wachita khumbu laku Chiuta, waŵengeku mpaka muyaya.+

18 Mwaŵana, ili ndi ora lakumaliya. Mukuvwa kuti wakususka Khristu watuza,+ ndipu chinanga ndi sonu panu akususka Khristu anandi awoneka.+ Venivi vititiwovya kuziŵa kuti ili ndi ora lakumaliya. 19 Yiwu akutuwaku kwaku isi chifukwa ŵenga mu gulu lidu cha,*+ pakuti asani ŵenga mu gulu lidu atingi alutirizgengi kuja ndi isi. Kweni akutuwaku kwaku isi kuti viziŵiki kuti ndi wosi cha wo ŵe mu gulu lidu.+ 20 Ndipuso mukusankhika ndi mtuŵa,+ ndipu yimwi mosi muziŵa. 21 Nditikulembiyani chifukwa chakuti muleka kuziŵa uneneska cha,+ kweni chifukwa chakuti mutiwuziŵa ndipuso chifukwa chakuti palivi boza lo lituliya mu uneneska.+

22 Kumbi waboza ndiyani, asi ndi yo wakana kuti Yesu ndi Khristu?+ Mweniyo ndiyu wakususka Khristu,+ yo wakana Ada ndi Mwana. 23 Weyosi yo wakana Mwana, walivi so Ada.+ Kweni weyosi yo wazomera Mwana,+ we so ndi Ada.+ 24 Kweni yimwi, vo mukuvwa kutuliya pakwamba, vilutirizgi kuja mwaku yimwi.+ Asani vo mukuvwa kutuliya pakwamba vilutirizga kuja mwaku yimwi, ndikuti mulutirizgengi kukoliyana ndi Mwana kweniso kukoliyana ndi Ada. 25 Kweniso iyu wakutilayizga umoyu wamuyaya.+

26 Nditikulembiyani vinthu venivi chifukwa chakuti ŵanthu anyaki akhumba kukulandizgani. 27 Kweni yimwi, Chiuta wakukusankhani ndi mzimu waki+ wo ulutirizga kuja mwaku yimwi, ndipu mukhumbika so munthu weyosi cha kuti wakusambizeni; kweni mzimu wo wangugwiriskiya ntchitu pakukusankhani, utikusambizani vinthu vosi,+ ndipu ngwauneneska, ngwaboza cha. Nge mo wakusambiziyani, lutirizgani kuja akukoliyana ndi iyu.+ 28 Mwaviyo, mwaŵana, lutirizgani kukoliyana ndi iyu kuti po wazamuwoneke, tizije ndi wanangwa wakulongoro+ ndipuso kuti tizileki kuchita soni ndi kutuwaku kwaku iyu pa nyengu ya kuŵapu kwaki. 29 Asani muziŵa kuti iyu ndi murunji, ndikuti muziŵa so kuti weyosi yo wachita vinthu mwaurunji, wabalika kutuliya kwaku iyu.+

3 Ŵanaŵaniyani chanju cho Ada akutilongo,+ kuti tidaniki ŵana aku Chiuta!+ Ndipu te ŵana ŵaki nadi. Ndichu chifukwa chaki charu chititiziŵa cha,+ pakuti iyu chitimuziŵa cha.+ 2 Akwanjiwa, sonu te ŵana aku Chiuta+ kweni vechendaziŵiki kuti tazamukuŵa amtundu wuli.+ Tiziŵa kuti asani iyu waziwoneke, tazamukuŵa nge iyu, chifukwa tazakumuwona mo waliri. 3 Ndipu weyosi yo we ndi chilindizga chenichi mwaku iyu,+ watijitowesa pakuti iyu ngwakutowa.

4 Weyosi yo wachita ubudi, wavwiya so cha marangu, ndipu ubudi nkhuleka kuvwiya marangu. 5 Muziŵa so kuti iyu wanguwoneke kuti watuzgepu maubudi ngidu,+ ndipu mwaku iyu mulivi ubudi. 6 Weyosi yo walutirizga kukoliyana ndi iyu, wachita cha ubudi;+ palivi yo wachita ubudi yo wakumuwonapu pamwenga kumuziŵa. 7 Mwaŵana, munthu wangakulandizganingi cha; munthu yo wachita urunji ndi murunji nge mo iyu waliri murunji. 8 Yo wachita ubudi watuliya kwaku Dyaboli, chifukwa Dyaboli waja wachibuda kutuliya pakwamba.*+ Pa chifukwa chenichi, Mwana waku Chiuta wanguwoneke kuti wanangi ntchitu zaku Dyaboli.+

9 Weyosi yo wabalika kutuliya kwaku Chiuta walutirizga cha kuchita ubudi,+ pakuti mbewu* Yaki yilutirizga kuja mu munthu waviyo, ndipu wangachita cha ubudi pakuti wabalika kutuliya kwaku Chiuta.+ 10 Ŵana aku Chiuta ndi ŵana aku Dyaboli aziŵika ndi fundu yakuti: Weyosi yo waleka kuchita urunji, watuliya kwaku Chiuta cha, ndipu yo waleka kwanja mubali waki nayu watuliya kwaku Chiuta cha.+ 11 Pakuti uwu mbuthenga wo mukuvwa kutuliya pakwamba kuti, titenere kwanjana.+ 12 Tingajanga nge Kayini cha yo wangutuliya ku muheni yo ndipu wangubaya mvurwa waki.+ Ntchifukwa wuli wangumubaya? Chifukwa chakuti ntchitu zaki zenga ziheni,+ kweni za mvurwa waki zenga zamampha.+

13 Mungazizwanga cha abali kuti charu chitikutinkhani.+ 14 Tiziŵa kuti tajumpha nyifwa ndipu sonu tafika ku umoyu,+ chifukwa titanja abali.+ Yo walivi chanju, ngwakufwa.+ 15 Munthu weyosi yo watinkha mubali waki ngwakubaya ŵanthu,+ ndipu weyosi yo wabaya ŵanthu, wazamulonde cha umoyu wamuyaya.+ 16 Pa chifukwa chenichi, taziŵa chanju, pakuti iyu wangupereka umoyu waki chifukwa chaku isi,+ ndipu nasi tikhumbika kupereka maumoyu ngidu chifukwa cha abali ŵidu.+ 17 Kweni weyosi yo we ndi vinthu va mucharu ichi ndipu wawona kuti mubali waki wakavuka kweni wakana kumuchitiya lisungu, kumbi tingakamba kuti munthu waviyo watanja Chiuta?+ 18 Mwaŵana, tingayanjananga ŵaka ndi mazu cha pamwenga ndi lilimi,+ kweni tiyanjanengi mu vakuchita+ ndipuso mwauneneska.+

19 Mu nthowa yeniyi, tazamuziŵa kuti tikutuliya ku uneneska, ndipu tazamusimikiziya mitima yidu kuti Chiuta watitimba mulandu cha 20 pa chechosi cho mitima yidu yingatisuska, chifukwa Chiuta ndi mukulu kuluska mitima yidu, ndipuso waziŵa vosi.+ 21 Akwanjiwa, asani mitima yidu yititisuska cha, mbwenu te ndi wanangwa wakulongoro ndi Chiuta;+ 22 ndipu chechosi cho tipempha tilonde kutuliya kwaku iyu,+ chifukwa tisunga marangu ngaki ndipuso tichita vinthu vo vitimukondwesa. 23 Kukamba uneneska, dangu laki ndakuti: tije ndi chivwanu mu zina la Mwana waki Yesu Khristu,+ ndipuso kuti tiyanjanengi,+ nge mo iyu wakutipaskiya dangu. 24 Kweniso yo wasunga marangu ngaki wakoliyana ndi iyu, ndipu iyu wakoliyana ndi munthu waviyo.+ Ndipu chifukwa cha mzimu wo wakutipaska, tiziŵa kuti walutirizga kukoliyana ndi isi.+

4 Akwanjiwa, ndi mazu ngosi cha ngakukambirika ngo* mutenere kungagomezga,+ kweni mungayesengi dankha kuti muwoni asani ngakutuliya nadi kwaku Chiuta,+ pakuti achimi aboza anandi asere mucharu.+

2 Nthowa yo mungaziŵiya kuti mazu ngakukambirika ngatuliya kwaku Chiuta, ndi iyi: Mazu ngakukambirika ngengosi ngo ngazomereza kuti Yesu Khristu wanguza mu liŵavu, ngakutuliya kwaku Chiuta.+ 3 Kweni mazu ngakukambirika ngengosi ngo ngaleka kuzomereza Yesu, ngakutuliya kwaku Chiuta cha.+ Ndipuso mazu ngenanga nga ŵanthu akususka Khristu, wo munguvwa kuti atuza+ ndipu sonu ŵe mucharu kali.+

4 Mwaŵana, yimwi mutuliya kwaku Chiuta, ndipu mwaŵathereska,+ chifukwa yo wakoliyana ndi yimwi+ ndi mukulu kuluska yo wakoliyana ndi charu.+ 5 Yiwu mbakutuliya kucharu+ ndichu chifukwa chaki alongoro vakutuliya kucharu ndipu charu chitiŵavwiya.+ 6 Isi te akutuliya kwaku Chiuta. Weyosi yo waziŵa Chiuta watitivwiya;+ weyosi yo waleka kutuliya kwaku Chiuta, watitivwiya cha.+ Venivi ndivu vititiwovya kupambanisa pakati pa mazu ngakukambirika ngauneneska ndi mazu ngakukambirika ngaboza.+

7 Akwanjiwa, tiyeni tilutirizgi kwanjana+ chifukwa chanju chituliya kwaku Chiuta, ndipu weyosi yo we ndi chanju wabalika kutuliya kwaku Chiuta ndipuso waziŵa Chiuta.+ 8 Weyosi yo walivi chanju watimuziŵa cha Chiuta, pakuti Chiuta ntchanju.+ 9 Chanju chaku Chiuta chivumbulika kwaku isi, mu nthowa yakuti Chiuta wangutumiza Mwana waki wapade+ mucharu kuti isi tisaniyi umoyu kuporote mwaku iyu.+ 10 Chanju chaki ching’anamuwa kuti isi ndisi tikwanja Chiuta cha, kweni kuti iyu ndiyu wakwanja isi ndipu wangutumiza Mwana waki nge sembi yakupepese+ maubudi ngidu.*+

11 Akwanjiwa, asani Chiuta wakutiyanja viyo, ndikuti isi nasi titenere kwanjana.+ 12 Palivi munthu yo wakuwonapu Chiuta.+ Asani tilutirizga kwanjana, Chiuta walutirizga kuja mwaku isi ndipuso chanju chaki chija chakufikapu mwaku isi.+ 13 Chifukwa chakuti watipaska mzimu waki, tiziŵa kuti tilutirizga kukoliyana ndi iyu, ndipuso kuti iyu ngwakukoliyana ndi isi. 14 Kweniso isi taŵeni tawona ndipuso tijaliya ukaboni kuti Ada angutuma Mwana wawu nge mtaski wa charu.+ 15 Weyosi yo wazomereza kuti Yesu ndi Mwana waku Chiuta,+ Chiuta walutirizga kukoliyana nayu munthu waviyo, ndipu iyu nayu wakoliyana ndi Chiuta.+ 16 Ndipu isi taziŵa kweniso tagomezga kuti Chiuta watitiyanja.+

Chiuta ntchanju,+ ndipu munthu yo walutirizga kuja ndi chanju, walutirizga so kukoliyana ndi Chiuta, ndipu Chiuta nayu walutirizga kukoliyana nayu.+ 17 Mu nthowa yeniyi chanju chaŵa chakufikapu mwaku isi kuti tizije ndi wanangwa wakulongoro*+ mu zuŵa la cheruzgu, chifukwa nge mo iyu waliri, ndimu so nasi tiliri mucharu ichi. 18 Mu chanju mulivi mantha,+ kweni chanju chakufikapu chituzgapu* mantha, chifukwa mantha ngatitichitiska kuti tije akumangika. Kukamba uneneska, yo we ndi mantha, walivi chanju chakufikapu.+ 19 Te ndi chanju chifukwa iyu ndiyu wangwamba kutiyanja.+

20 Asani munthu wakamba kuti, “Nditanja Chiuta,” kweni watinkha mubali waki, ngwaboza.+ Pakuti munthu yo waleka kwanja mubali waki+ yo watimuwona, wangamuyanja cha Chiuta yo waleka kumuwona.+ 21 Ndipu te ndi dangu ili lakutuliya kwaku iyu, lakuti weyosi yo watanja Chiuta, watenere so kwanja mubali waki.+

5 Weyosi yo wagomezga kuti Yesu ndi Khristu, wabalika kutuliya kwaku Chiuta,+ ndipu munthu weyosi yo watanja Ada, watanja so Mwana yo wakubalika kutuliya kwaku yiwu. 2 Tiziŵa kuti titanja ŵana aku Chiuta+ asani titanja Chiuta ndipuso tivwiya marangu ngaki. 3 Pakuti kwanja Chiuta kung’anamuwa kusunga marangu ngaki;+ ndipu marangu ngaki ngazitu cha,+ 4 chifukwa weyosi yo wabalika kutuliya kwaku Chiuta, wathereska charu.*+ Ndipu chivwanu chidu ndichu chatiwovya kuti tithereski charu.+

5 Kumbi ndiyani yo wangathereska charu?+ Asi ndi yo we ndi chivwanu kuti Yesu ndi Mwana waku Chiuta?+ 6 Yesu Khristu ndiyu wakuza kuporote mu maji ndi ndopa, kuporote mu maji pe cha,+ kweni mu maji ndi ndopa.+ Ndipu mzimu ujaliya ukaboni,+ chifukwa mzimu ndiwu uneneska. 7 Pakuti pe akaboni atatu: 8 mzimu,+ maji+ ndipuso ndopa;+ ndipu vosi vitatu vikoliyana.

9 Asani tizomereza ukaboni wa ŵanthu, ndikuti ukaboni waku Chiuta ngukulu ukongwa. Chifukwa wenuwu ndiwu ukaboni wo Chiuta wapereka, ukaboni wo iyu wapereka wakukwaskana ndi Mwana waki. 10 Munthu yo wavwana mu Mwana waku Chiuta, we ndi ukaboni mwaku iyu. Munthu yo wavwana cha mwaku Chiuta, wamuchitiska kuŵa waboza,+ chifukwa wavwana cha mu ukaboni wo Chiuta wapereka wakukwaskana ndi Mwana waki. 11 Ndipu ukaboni waki ngwakuti, Chiuta wakutipaska umoyu wamuyaya,+ ndipu wakutipaska umoyu wenuwu kuporote mu Mwana waki.+ 12 Munthu yo wazomera* Mwana, we ndi umoyu wenuwu; ndipu munthu yo wakana* Mwana waku Chiuta, walivi umoyu wenuwu.+

13 Nditikulembiyani vinthu venivi yimwi muvwana mu zina la Mwana waku Chiuta,+ kuti muziŵi kuti mwe ndi umoyu wamuyaya.+ 14 Ndipu te ndi chigomezgu mwaku iyu,*+ kuti chechosi cho tingapempha mwakukoliyana ndi khumbu laki watitivwa.+ 15 Ndipu asani tiziŵa kuti watitivwa pa chechosi cho tipempha, tiziŵa kuti watipaskengi cho tapempha, pakuti tapempha kwaku iyu.+

16 Asani munthu wawona mubali waki wachichita ubudi wo uleka kuchitiska nyifwa, wamupemphere, ndipu Chiuta wamupaskengi umoyu munthu yo,+ kweni wapaskengi munthu yo wachita ubudi wo uchitiska nyifwa cha. Pe ubudi wo uchitiska nyifwa.+ Ndikamba kuti wapempheriyengi munthu yo wachita ubudi wamtundu uwu cha. 17 Vinthu vambula urunji vosi mbubudi,+ kweni pe ubudi wo uchitiska nyifwa cha.

18 Tiziŵa kuti weyosi yo wabalika kutuliya kwaku Chiuta, walivi chiziŵiliza chakuchita maubudi, kweni yo wakubalika kutuliya kwaku Chiuta* watimuwona, ndipu muheni wangamuko cha.*+ 19 Tiziŵa kuti tikutuliya kwaku Chiuta, kweni charu chosi che mu nthazi ya muheni yo.+ 20 Kweni tiziŵa kuti Mwana waku Chiuta wakuza,+ ndipu wakutipaska zeru* kuti tiziŵi yo ngwauneneska.+ Ndipu kuporote mu Mwana waki Yesu Khristu, isi te akukoliyana ndi yo ngwauneneska. Iyu ndi Chiuta wauneneska ndipuso umoyu wamuyaya.+ 21 Mwaŵana, jivikiliyeni kwa angoza.+