Chiyuka Chaku Yesu Kuzifika Panyengu yo Paulo Wanguŵikikiya M’jeri

Yesu wanguyuka pazuŵa lachitatu kutuliya po wangufwiya. Pazuŵa lenilo wanguyukiya, wanguwoneke kwa akumulondo ŵaki kakukwana kankhondi panyengu zakupambanapambana. Yesu wangulutirizga mbwenu kuwoneke kwaku yiwu kwa mazuŵa 40. Pavuli paki, Yesu wangukwera kuchanya akusambira ŵaki anyaki achiwona. Ndipu pati pajumpha mazuŵa 10, Chiuta wanguŵapaska mzimu waki utuŵa akulondo ŵaku Yesu wo alindizganga ku Yerusalemu.

Pavuli paki, arwani ŵaku Chiuta anguko akutumika ndipu anguŵaŵika m’jeri, kweni m’ngelu wanguŵafwatuwa. Wakusambira waku Yesu Stefano, wanguponyeka mya ndi ŵanthu akususka mpaka kufwa. Tisambirengi za mo Yesu wangusankhiya yumoza wa ŵanthu akususka yaŵa, kuja muteŵeti waki wapade, yo wanguzija wakutumika Paulo. Ndipu pati pajumpha vyaka vitatu ndi myezi 6, Yesu wati wafwa, Chiuta wangutuma wakutumika Petro kuti wakapharazgi kwaku Kornelio ndi banja laki wo ŵenga Ayuda cha.

Pati pajumpha vyaka pafupifupi 13, Paulo wangwenda ulendu waki wakwamba wa kuchipharazga. Paulendu waki wachiŵi, iyu wangwenda ndi Timote. Tisambirengi zaku Paulo ndi anyaki wo wayendanga nawu ndipuso vakuchitika vakukondweska vo akumananga navu pakuteŵete Chiuta. Pakumaliya, Paulo wanguŵikika m’jeri ku Roma. Vyaka viŵi vati vakapu iyu wangufwatulika, kweni wanguŵikika so m’jeri ndipu wangubayika. Vakuchitika va CHIGAŴA 7, vinguchitika mu vyaka vakujumpha pafupifupi 32.