Kuwovya Anthukazi wo Akuŵachitiyapu Nkhaza

Mazu ngo nge pachanya yapa, ngasanirika kukwamba kwa nkhani ya pa jw.org yamutu wakuti “Kuteteza Akazi—Zimene Baibulo Limanena.” Mungapanga dawunilodi nkhani yeniyi, ndipu pepala laki mungalipulinta ndi kulipinda pakati kuti mupangi kapepala ka mapeji nganayi. Mzichi munyaki wa ku United States zina laki Stacy wangukamba kuti: “Ndingupulita nkhani yeniyi pa timapepala tinandiku ndipu ini ndi mzichi munyaki tinguluta kumalu nga boma ngo asungiyaku anthukazi wo alivi pakuja nga muchigaŵa cha mpingu widu.”

Munthukazi munyaki yo wagwira ntchitu kwenuku wangupempha asani pangasanirika so timapepala tinyaki kuti wagaŵiyi ŵanthu anyaki wo asungika kwenuku. Mwaviyo, azichi yaŵa angupereka timapepala tinyaki 40 kweniso timakadi 30 takuziŵisa ŵanthu va webusayiti ya jw.org. Nyengu yinyaki, bwana wa kumalu kwenuku wangupempha Akaboni aku Yehova kuti alongo anthukazi wo asungika kwenuku mo angasambiriya Bayibolu.

Stacy kweniso azichi anyaki ŵaŵi anguluta so kumalu nganyaki ngakuyanana ndi ngenanga ndipu anguchigaŵiya timapepala 5 ku ŵanthu wo agwira ntchitu kwenuku ndipu yiwu angupempha so timapepala tinyaki. Munthukazi munyaki yo wagwira ntchitu kwenuku wangukamba kuti: “Timapepala teniti tiwovyengi anthukazi wo asungika kunu.” Iyu wangukamba so kuti: “Tikhumbika nadi timapepala teniti.” Ŵati alutaku so ulendu unyaki, anthukazi anandi anguwungana pamoza kuti awoni mo sambiru la Bayibolu lichitikiya. Ndipu anthukazi ŵaŵi angukamba kuti akhumba kuluta ku maunganu ngakukumaliya kwa sabata ku Nyumba ya Ufumu sabata yakulondopu.

Stacy wangukamba kuti: “Tinguzizwa ukongwa kuwona mo ŵanthu angukondwe kulonde timapepala teniti. Vakukondwesa ukongwa kuŵakambiya uthenga wamampha wa Ufumu anthukazi ŵenaŵa wo atiŵachitiya nkhaza. Tingukwaskika ukongwa kuwona mo anguchitiya ŵati alonde timapepala teniti. Ndipu tilindizga ndi mtima wosi kuti tiwoni mo Yehova watumbikiyengi phamphu lidu po tilutirizga kuŵapharazgiya uthenga wamampha anthukazi ŵenaŵa.”