Kumbi Akaboni aku Yehova Achitiska Kuti Mabanja nga Ŵanthu Ngamali Pamwenga Ngaje Ngakukho?

Nge Akaboni aku Yehova, titesesa kuti tije ndi mabanja ngakukho ndipuso tichiska anyidu kuti ajengi ndi mabanja ngakukho. Titumbika Chiuta, Mlengi wa banja. (Genezesi 2:21-24; Aefeso 3:14, 15) Mu Bayibolu, mwe fundu zo iyu wakupereka zo zawovya ŵanthu kuzunguliya charu chosi kuti aje ndi mabanja ngakukho kweniso ngalikondwa.

Kumbi Akaboni aku Yehova Atovya Wuli Kuti Mabanja Ngaje Ngakukho?

Titesesa kulondo ulongozgi wa mu Bayibolu ndipu ulongozgi wenuwu utitiwovya kuti tije anthulumi, anthukazi ndipuso apapi amampha. (Nthanthi 31:10-31; Aefeso 5:22–6:4; 1 Timote 5:8) Zeru zo zisanirika mu Bayibolu zitovya chinanga ndi mabanja ngo ngapambana visopa. (1 Peturo 3:1, 2) Wonani chakuyeruzgiyapu chinyaki cho chilongo vo ŵanthu wo Mbakaboni cha akamba vakukwaskana ndi alumu pamwenga awolu ŵawu wo Mbakaboni aku Yehova:

• “Kwa vyaka 6 kutuliya po tingutoliyana tajaliyanga waka kupwakasana kweniso kuguŵisana. Muwolu wangu Ivete wati waja Kaboni waku Yehova, wachitanga vinthu mwachanju kweniso mwakuzikira kuphara mo wachitiyanga kali. Venivi vinguchitiska kuti banja lidu lije lakukho.”—Clauir, wa ku Brazil.

• “Mulumu wangu Chansa, wati wayamba kusambira Bayibolu ndi Akaboni aku Yehova, ndamukanizanga kusambira chifukwa ndaŵanaŵananga kuti Akaboni amalisa mabanja nga ŵanthu. Kweni mukuluta kwanyengu ndinguwona kuti fundu za mu Bayibolu zinguwovya kuti banja lidu lije lakukho.”—Agness, wa ku Zambia.

Asani tipharazga, tilongo mo ŵanthu angagwiriskiya ntchitu ulongozgi wa mu Bayibolu kuti uŵawovyi

• Kusankha munthu wakutolana nayu mwazeru

• Kumalana ndi masuzgu muchaka chakwamba cha nthengwa yawu

• Kuti ajengi mwachimangu ndi apapi

• Kuti aphweriyengi ndalama

• Kuti amalisi mphindanu

• Kuti agowokiyanengi

• Kuti asambizengi ŵana

Kumbi kusintha chisopa kuzisa mphindanu mubanja?

Nyengu zinandi vichitika. Mwakuyeruzgiyapu, lipoti la 1998 lo kampani ya Sofres yingufufuza yingukamba kuti, pa mabanja 20 ngengosi ngo yimoza wa mubanja wenga Kaboni, banja limoza lingukumana ndi masuzgu ngakulu pa nyengu yo munyaki wasambiranga Bayibolu ndi Akaboni.

Yesu wangukambiya limu kuti ŵanthu wo azamumulondo iyu, azamususkika ndi ŵanthu a mubanja lawu. (Mateyu 10:32-36) Kaswiri munyaki wakali zina laki Will Durant, wangukamba kuti mu Ufumu wa Roma, “Chikhristu chapatuskanga mabanja,”a ndipu mazuŵa nganu ŵanthu anyaki akamba kuti Akaboni aku Yehova ndiwu achitiska kuti mabanja ngamali. Kumbi venivi ving’anamuwa kuti Akaboni ndiwu amalisa mabanja?

Pakuyeruzga mulandu wakuti Akaboni aku Yehova ndiwu achitiska kuti mabanja nga ŵanthu ngamalengi, Khoti la ku Europe (European Court of Human Rights) lingukamba kuti: Ŵanthu amubanja la munthu yo ndi Kaboni cha kanandi ndiwu atambisa mphindanu. Ndipu akana kuzomereza ndipuso kutumbika wanangwa wa kusopa wo mubali wawu wenawu.” Khoti lenili lingukamba so kuti: “Masuzgu ngenanga ngachitikiya Akaboni aku Yehova pe cha kweni ngachitikiya mabanja ngosi ngo ngapambana visopa.”b Chinanga kuti Akaboni aku Yehova asuskika chifukwa cha chisopa chawu, ayesesa kulondo ulongozgi wa mu Bayibolu wakuti: “Mungaweziyanga cha chiheni pa chiheni ku munthu weyosi. . . . Asani nkhwamachitika, jani mwachimangu ndi ŵanthu wosi, nge mo mungafiskiya.”—Aroma 12:17, 18.

Ntchifukwa wuli Akaboni aku Yehova agomezga kuti atolanengi muchisopa chawu pe?

Akaboni alondo dangu lo le Mubayibolu lakuti atolanengi “mwa Ambuya pe,” kung’anamuwa kutolana ndi munthu yo nayu wagomezga vinthu vakuyanana ndi vo yiwu agomezga. (1 Akorinto 7:39) Dangu lenili ndakutuliya mu Bayibolu ndipu ndakovya ukongwa. Mwakuyeruzgiyapu, nkhani yinyaki yo yingutuwa mu chaka cha 2010 yingukamba kuti: “Ŵanthu achisopa chimoza asani atolana,” akoliyana ukongwa.c—Journal of Marriage and Family

Mwaviyo, Akaboni aku Yehova achiska anyawu cha kuti apatani ndi munthu yo akutolana nayu chifukwa chakuti ndi Kaboni cha. Bayibolu likamba kuti: “Asani mubali we ndi munthukazi wambula kugomezga ndipu munthukazi yo wazomera kuti wajengi nayu, wangamulekanga cha. Ndipuso asani munthukazi we ndi munthulumi wambula kugomezga, ndipu munthulumi yo wazomera kuti wajengi nayu, munthukazi yo wangamulekanga cha mulumu waki.” (1 Akorinto 7:12, 13). Akaboni aku Yehova alondo dangu lenili.