Heather Broccard-Bell/iStock via Getty Images
KUMBI VIKUJAKU WAKA VIJA?
Chikonkhombi cha Bingiza
Kuzambwi kwa North America kusanirika bingiza munyaki yo wadanika kuti Phloeodes. Mwakukoliyana ndi vo akufufuza akusaniya, viwoneka kuti bingiza mwenuyu wanganyamuwa vinthu vizitu maulendu pafufupi 39,000 kujumpha uzitu wa liŵavu laki ndipu wangafwa cha chinanga wangakandika ndi galimotu. Ntchinthu wuli cho chitovya bingiza mwenuyu kuti waleki kufwa ndi vinthu venivi?
Chikonkhombi chanena ndi champhata cha bingiza mwenuyu vikulumikizana pakati. Mtundu unyaki wa chikonkhombi cha bingiza uyu chithifuka cha ndipu venivi vivikiliya viŵalu vinyaki va mkati va chidononu chenichi. Ndipu chigaŵa chinyaki chithifuka kamanavi waka, ndipu venivi vitovya kuti bingiza wasinthengi kawonekeru kaki. Chigaŵa chachitatu chitovya kuti chikonkhombi chiyendengi. Chifukwa chakuti chigaŵa chachitatu ntchakufewa venivi vitovya kuti bingiza waserengi mumakungwa pamwenga kusi kwa mya.
Kusazgapu yapa, kamuzeri kapakati pa chikonkhombi cha bingiza, ke ndi tinthu tinyaki to tisereriyanasereriyana vo vitovya kuti bingiza waleki kutimbinyuka. Tinthu teniti tikuŵikika muvigaŵavigaŵa ndipu tikulumikizika ndi mapurotini. Asani tinthu teniti tafinyika, mapurotini ngo ngalimu ngapanga timalumwa timanatimana ndipu venivi vichitiska kuti bingiza wajichizgengi kweniso kuti wafiskengi kulimbana ndi vinthu vizitu kwambula kutimbinyuka.
Tinthu timanatimana ta chikonkhombi cha bingiza tikulumikizika
Kamuzeri kayera kalongo po palumikizana chigaŵa chanena ndi champhata cha chikonkhombi cha bingiza. Kamzeri ka chotuchotu kalongo po palumikizana tinthu pakatikati
Akufufuza akamba kuti ŵanthu angapanga vinthu vakukho ukongwa mwakutore vikonkhombi va bingiza, nge magalimotu, mabuliji ndipuso nyumba.
Kumbi yimwi muwona wuli? Kumbi chikonkhombi cha bingiza chikuchita kusambuka kutuwa ku chinthu chinyaki? Pamwenga walipu yo wakuchilenga?