Nozgekani Kwambisa Sambiru la Bayibolo Nyengu Yeyosi
1. Kumbi nchinthu wuli cho chikhumbika kuti tifiski nchitu yo Yesu wakutipaska yo ye pa Mateyu 28:19, 20?
1 Yesu wakutipaska nchitu ya ‘kupanga akusambira ndi kuŵasambiza.’ (Mate. 28:19, 20) Mwaviyo, nyengu yeyosi titenere kunozgeka kwambisa sambiru la Bayibolo, kuruska kukhazga waka sabata yakwambisa masambiru nga Bayibolo. Masachizgu yanga ngangakuwovyani.
2. Kumbi mbayani wo tingaŵapempha kuti tisambirengi nawu Bayibolo?
2 Apempheni kuti Musambirengi Nawu: Asani titesesa kupempha ŵanthu kuti tisambirengi nawu, tikhoza kuja ndi mwaŵi wakusaniya sambiru. (Waku. 11:6) Kumbi mwayesapu kufikiya waka pakwambisa sambiru? Mu mpingu unyaki wa ku United States, abali ndi azichi anguyesesa kuchita venivi kwa mwezi wamphumphu. Yiwu angukondwa ukongwa kuti angwambisa masambiru nga Bayibolo ngakukwana 42. Lekani kuŵanaŵana kuti ŵanthu akunweka wo mutiŵapharazgiya aziŵa kuti musambiza ŵanthu Bayibolo. Asani mwaweriyaku, apempheni kuti musambirengi nawu. Asani akukaniyani, mungadandawulanga cha, kweni lutirizgani kuŵayende kuti aje ndi linweka. Kumbi mwayesapu kupempha azengezgani ŵinu, achibali, wo mugwira nawu nchitu ndipuso ŵana a sukulu anyinu kuti musambirengi nawu Bayibolo? Mukhoza so kufumba wo musambira nawu Bayibolo asani ŵe ndi achibali pamwenga anyawu wo angayanja kusambira Bayibolo.
3. Kumbi te ndi chidya nichi cho chingatiwovya kwambisa masambiru, nanga tingachigwiriskiya nchitu panyengu niyi?
3 Chidya Cho Chingatiwovya: Chidya chamampha cho chingatiwovya kwambisa masambiru nga Bayibolo nkhapepala kakuti, Kumbi Mungayanja Kuziŵa Uneneska? Mungapaska ŵeneku a nyumba wo alonde mabuku nganyaki pamwenga wo aleka kulonde. Mungakagwiriskiya nchitu pakupharazga kumalu ngakuguliskiya malonda, mumsewu, m’makalata ndipuso pa maulendu ngakuweriyaku. Mukhoza so kukasiya pa nyumba zo mwaleka kusaniyapu ŵanthu. Mungachita umampha kukapinga asani mwe paulendu, muluta kuchigula vinthu ndipuso kunchitu. Pa peji lakumaliya la kapepala yaka, pakonkhoska mo tisambiriya Bayibolo ndipuso vakukwaskana ndi kabuku kakuti Chiuta Wakhumbanji.
4. Kumbi tingakagwiriskiya wuli nchitu kapepala kakuti Kuziŵa Uneneska pakwambisa sambiru?
4 Asani mwapaska munthu kapepala, mungamulongo mafumbu ngo nge pa peji lakwamba ndi kumufumba kuti, “Ndi fumbu nili lo lakukondwesani ukongwa pa mafumbu yanga?” Pavuli paki, woniyani limoza kwamuka kwaki mukati mwa kapepala yaka ndipu ŵerengani pamwenga kukonkhoska munthowa yipusu vo ve pa peji lakumaliya po pakonkhoska va manozgeru nga sambiru la Bayibolo. Pakumaliya paki, mulongoni po nkhani yo wasankha yatuliya mu buku la Bayibulo Limaphunzitsa Chiyani, ndipu mupaskeni buku ili ndi kupanga manozgeru ngakuziweriyaku kuti muzilutirizgi kukambiskana.
5. Nchifukwa wuli titenere kunozgeke kwambisa sambiru la Bayibolo nyengu yeyosi?
5 Muchigaŵa chidu mweche ŵanthu wo akhumba kuziŵa vo Bayibolo lisambiza weniukongwa. Asani tinozgeka kwambisa sambiru la Bayibolo nyengu yeyosi, tiŵengi ndi mwaŵi ukuru wakuja ndi likondwa lakuwovya ŵanthu anyaki kusere panthowa ya ku umoyu.— Mate. 7:13, 14.