Mo Tingasazgiyaku Lusu Lidu mu Uteŵeti—Wovyani Akusambira Bayibolu Kuti Ayanjengi Kusambira Pakuŵija

Nchifukwa Wuli Nkhwakukhumbika?: Kuti wakusambira Bayibolu wakuwi mwauzimu wakhumbika kusambira vinthu vikuluvikulu vo ve m’Mazu Ngaku Chiuta. (Ŵah. 5:12–6:1) Kusambira kukhumbika phamphu. Ivi ving’anamuwa kuti tikhumbika kuwona kukoliyana kwa vinthu vo tiziŵa kali ndi vo tasambira sonu ndipuso kuzirwa kwaki. (Nthanthi 2:1-6) Asani akusambira aziŵa mo angafufuziya nkhani, angasuzgika cha kufufuza m’mabuku ngidu kuti aziŵi vo Bayibolu likamba. Kuyesesa kugwiriskiya ntchitu vo asambira kungaŵawovya kuti apundi mayeseru ngo angakumana nangu.—Luka 6:47, 48.

Mo Mungachitiya:

Mukambiyeni wakusambira kuti wakhumbika kuromba nyengu zosi wechendayambi kusambira.—Yoh. 14:26; 1 Ŵakor. 2:10.
Asani mwayamba ŵaka kusambira nayu, muchiskeni kuti wanozgekiyengi limu sambiru. Mulongoni mo mugwaliya mzeri m’buku linu po pe fundu yikulu pamwenga kwamuka ndipu musambizeni mo wangachitiya.
Muwovyeni kuti wamukengi m’mazu ngaki. Mukhumbika cha kumufumba mafumbu ngo ngangamuchitiska kuti wamukengi mwakuchita kuŵerenga pabuku. M’malu mwaki, mumufumbengi mafumbu ngo ngangamuwovya kuti waŵanaŵaniyengepu vo wasambira.
Muchiskeni kuti waŵerengengi Bayibolu zuŵa lelosi. Mulongoni ndondomeku yakuŵerenge Bayibolu pa jw.org yo yilongo vo wangachita kuti wafiski venivi. Kuti waŵerengengi Bayibolu zuŵa lelosi, wakhumbika phamphu. Venivi vingamuwovya ukongwa!—Sumu 1:2, 3.
Mulongoni mo wangasaniriya vo Bayibolu likamba pa layibulare ya pa intaneti. Muwovyeni kuti waziŵengi vilembu vo vimiya mabuku ngidu ngakupambanapambana ngo mutuliya nkhani zo tisambira pa maunganu.

Yesani Kuchita ivi Mwezi Wunu:

Asani mwamaliza ŵaka kamutu kamana pamwenga mutu wosi, mufumbeni kuti wakonkhoski mwakudumuwa vo wasambira. Asani mulivi wakusambira, yeseriyani kukonkhoska pakumwija vo mwasambira m’Bayibolu pamwenga mu Chigongwi cha Alinda. Ivi vikuwovyeningi kuti muyanduwengi ndi vo musambira.