MARCH 23-29, 2026
SUMU 18 Tiwonga Chifukwa Cha Sembi yo Yikutiwombo
Kumbi Yimwi Mungalongo Wuli Kuti Muwonga Sembi Yaku Yesu?
“Chanju cho Khristu we nachu chititichichizga.”—2 AKORI. 5:14.
FUNDU YIKULU
Vo tosi tingachita kuti tilongo kuti tiwonga sembi yaku Yesu.
1-2. Kumbi sembi yaku Yesu yititichiska kuchitanji, nanga ntchifukwa wuli? (2 Akorinto 5:14, 15) (Wonaniso chithuzi.)
TIYERUZGIYI kuti munthu munyaki wakutaskani mu chinyumba cho chingukudinikiriyani. Kumbi mungamuwona wuli munthu mwenuyu? Chinanga kuti pangaŵa ŵanthu anyaki wo nawu ataskika, kweni yimwi pakumwija mungamulongo kuti mutimuwonga ukongwa munthu yo kweniso mungamulongo kuti vo wakuchitiyani mutiviwona mwakupepuka cha.
2 Nge mo tingusambiriya munkhani yajumpha, taŵanthu tingajiwombo cha tija ku ubudi wo tikuhara kutuwa kwaku Adamu. Kweni sembi yaku Yesu ndiyu yingatiwovya kuti (1) tigowokerekengi maubudi ngidu, (2) tije ndi chilindizga kuti munthazi tazamuja so ŵanthu akufikapu kweniso (3) tije so pa ubwezi wakukho ndi Chiuta. Chifukwa cha sembi yaku Yesu, te ndi chilindizga chakuzija ndi umoyu wamuyaya mucharu chifya. Kukamba uneneska, sembi yaku Yesu yilongo kuti Yesu watiŵayanja ukongwa ŵanthu. Ndipu iyu wakwamba kwanja ŵanthu kali ukongwa wechendazi pacharu chapasi. (Nthanthi 8:30, 31) Wakutumika Paulo wangukamba kuti “chanju cho Khristu we nachu chititichichizga.” (Ŵerengani 2 Akorinto 5:14, 15.) Venivi ving’anamuwa kuti chanju chaku Yesu chitenere kutichiska kuchita vinthu vinyaki, kuti tilongo kuti sembi yo iyu wakutipaska titiyiwona mwakupepuka cha.
Asani munthu munyaki wataska umoyu winu, mutenere kumulongo kuti muwonga ukongwa. Nasi titenere kumuwonga ukongwa Yehova ndi Yesu wo akutitaska ku ubudi ndi nyifwa (Wonani ndimi 1-2)
3. Ntchifukwa wuli taŵanthu tipambana mo tingalongore kuti tiwonga sembi yaku Yesu?
3 Kumbi yimwi mungalongo wuli kuti muwonga sembi yaku Yesu? Vo yimwi mungamuka, vingapambana ndi vo munthu munyaki wangamuka. Kuti tivwisi fundu yeniyi, tiyeruzgiyi kuti ŵanthu atatu aja mumatawuni ngakupambana kweni wosi ŵe pa ulendu ndipu aluta kumalu ngakuyanana. Nthowa zo angaziya, zipambanengi. Mwakuyanana ŵaka, “nthowa” yo yimwi mungaziya pamwenga vo mungachita kuti mulongo kuti muwonga sembi yaku Yesu, vingatole mo ubwezi winu ndi Yehova uliri. Mwaviyo, munkhani iyi tikambiskanengi mo magulu ngatatu yanga ngangalongore kuti ngawonga sembi yaku Yesu: (1) wo asambira Bayibolu, (2) Akhristu akubatizika kweniso (3) mbereri zo zikulanda.
WO ASAMBIRA BAYIBOLU
4. Kumbi ŵanthu wo asambira Bayibolu Yehova watiŵawona wuli?
4 Asani musambira Bayibolu, mutenere kuziŵa fundu yakuti: Chifukwa chakuti musambira uneneska wa mu Bayibolu, vilongo kuti namwi mwe mugulu la ŵanthu wo Yehova watiŵaguza kuti aje mabwezi ngaki. (Yoha. 6:44; Machi. 13:48) Bayibolu likamba kuti “Yehova ndiyu wasanda mitima.” Venivi vilongo kuti Yehova wawona kuti mukhumbisiska kusambira vakukwaskana ndi iyu kweniso wakondwa asani watikuwonani kuti musintha vinthu pa umoyu winu kuti vikoliyanengi ndi fundu zaki. (Nthanthi 17:3; 27:11) Ndipu sembi yaku Yesu ndiyu yitikuwovyani kuti muje pa ubwezi wakukho ndi Yehova. (Aro. 5:10, 11) Mwaŵi wapade wenuwu, mutenere kuwuwona mwakupepuka cha.
5. Kumbi ŵanthu wo asambira Bayibolu angawugwiriskiya wuli ntchitu ulongozgi wo usanirika pa Afilipi 3:16?
5 Asani musambira Bayibolu, kumbi mungalongo wuli kuti muwonga sembi yaku Yesu? Nthowa yimoza yo mungachitiya venivi nkhulondo ulongozgi wo wakutumika Paulo wangulembe Afilipi wakuti: “Kwali taluta panthazi wuli, tiyeni tilutirizgi kwenda mwakwenere mu nthowa yeniyi.” (Afi. 3:16) Mwakukoliyana ndi ulongozgi wenuwu, mungazomerezanga cha kuti chinthu chinyaki chechosi chikutondekeseni kuluta panthazi mwauzimu po mutenda pa nthowa ya kuluta ku umoyu.—Mate. 7:14; Luka 9:62.
6. Kumbi wo asambira Bayibolu angachita wuli asani asuzgika kusintha vinthu vinyaki? (Dotoronome 30:11-14) (Wonaniso chithuzi.)
6 Kumbi mungachita wuli asani vitikusuzgani kugomezga fundu yinyaki ya mu Bayibolu yo mwasambira pambula kuswera? Mutenere kufufuza mwakukwana nkhani yo kweniso kupempha Yehova kuti wakuwovyeni kuyivwisa. (Salimo 86:11) Asani vitikusuzgani mbwenu kuyivwisa fundu yo, mungaleka dankha kuyiŵanaŵaniya ukongwa, kweni mungalekanga cha kusambira Bayibolu. Nanga mungachita wuli asani musuzgika kuleka jalidu linyaki lo Yehova watinkha? Kumbukani kuti Yehova watitipempha kuchita vinthu vakujumpha msinkhu widu cha. Mungafiska kuchita vinthu vo vitimukondwesa. (Ŵerengani Dotoronome 30:11-14.) Ndipu Yehova walayizga kuti wakuwovyeningi. (Yesa. 41:10, 13; 1 Akori. 10:13) Mwaviyo, mungaweriyanga vuli cha. Mumalu mwakuti mujaliyengi ŵaka kuŵanaŵaniya vinthu vo vitikusuzgani kusintha, muŵanaŵaniyengi ukongwa vinthu vo Yehova watikuchitiyani kusazgapu sembi yaku Yesu yo wakupereka. Asani mutimuyanja ukongwa Yehova, vikuwovyeningi kuwona kuti “marangu ngaki ngazitu cha.”—1 Yoha. 5:3.a
Yehova watitipempha kuchita vinthu vakujumpha msinkhu widu cha. Iyu watiwovyengi kuti tichitengi vinthu vo vitimukondwesa (Wonani ndimi 6)
7. Kumbi ŵana wo apapi ŵawu mbakaboni akhumbika kuŵanaŵaniyanji?
7 Kumbi yimwi mwaŵana wo apapi ŵinu mbakaboni mwe mugulu nili? Namwi mwe mugulu la ŵanthu wo asambira Bayibolu. Ndipu masambiru nga Bayibolu ngakukhumbika ukongwa ngo apapi ŵinu ŵe nangu, ndimwi. Bayibolu likamba kuti: “Ndereni kufupi ndi Chiuta, ndipu nayu wanderengi kufupi ndi yimwi.” (Yako. 4:8; 1 Mbiri 28:9) Asani mutamba ndimwi kundere kufupi ndi Yehova, nayu wanderengi kufupi ndi yimwi. Yehova watikuyanjani yimwi pakumwija, kwambula kutore kuti apapi ŵinu mbakaboni. Iyu waguza munthu weyosi pakuyija kuti waje mubwezi waki, kusazgapu yimwi. Kumbi ntchinthu wuli cho Yehova wakuchita kuti muje nayu pa ubwezi? Iyu wakupereka sembi yaku Yesu ndipu mungayiwonanga mwakupepuka cha mphasu yapade yeniyi. (Aro. 5:1, 2) Mwaviyo, mwechendachiti Chikumbusu cha chaka chinu, mutenere kuŵanaŵaniya vo Yehova ndi Yesu akukuchitiyani. Venivi vikuwovyeningi kuti muŵanaŵaniyi vilatu vinu vauzimu kuti mulongo kuti muwonga sembi yo Yehova wakupereka kuziya mwa Mwana waki.b
AKHRISTU AKUBATIZIKA
8. Kumbi Akhristu akubatizika akulongo wuli kuti ŵe ndi chivwanu mu sembi yaku Yesu?
8 Asani ndimwi Mkhristu wakubatizika, ndikuti mukulongo kali mu nthowa zakupambanapambana kuti mwe ndi chivwanu mu sembi yaku Yesu. Mwakuyeruzgiyapu, mukusintha vinthu vinyaki pa umoyu winu kuti mukondwesengi Yehova kweniso kuti muje nayu pa ubwezi. Mukuvwiya dangu laku Yesu lakuti tikapharazgengi ndi kusambiza ŵanthu. Mukujipereka kwaku Yehova kweniso mukubatizika. Kumbi ŵanthu anyaki akukususkanipu chifukwa chakuti muteŵete Yehova? (2 Timo. 3:12) Chinanga kuti ŵanthu anyaki akususkaningi, kweni mulutirizga kumuteŵete mwakugomezgeka. Venivi vilongo kuti mutimuyanja Yehova kweniso muwonga sembi yo wakupereka kuziya mwa Mwana waki.—Ahe. 12:2, 3.
9. Kumbi ntchinthu wuli cho Akhristu akubatizika atenere kutcheŵa nachu?
9 Pe chinthu chinyaki cho Akhristu wosi akubatizika atenere kutcheŵa nachu. Asani vyaka vijumphapu, tingayamba kuyiwona mwakupepuka sembi yaku Yesu. Kumbi venivi vingachitika wuli? Aŵanaŵaniyani vo vinguchitikiya Akhristu a ku Efeso mu nyengu yakali. Yesu wanguŵawonga chifukwa cha kukunthiyapu kwawu. Kweni wanguŵakambiya so kuti: “Nditikususka chifukwa chakuti waleka chanju cho wenga nachu pakwamba.” (Chivu. 2:3, 4) Vo Yesu wangukamba vilongo kuti kamana ndi kamana Mkhristu wangaleka kuteŵete Yehova ndi mtima wosi ndipu wangayamba ŵaka kuchita vinthu mwamwambu. Mkhristu waviyo, wangalutirizga kupemphera pakuyija, kuluta ku maunganu kweniso kupharazga chifukwa ndivu wakuziŵiriya. Kweni wachita venivi chifukwa cha kwanja Yehova cha. Kumbi mungachita wuli asani muwona kuti mukuleka kwanja ukongwa Yehova nge mo mwachitiyanga kali?
10. Kumbi mungachita wuli kuti mugwiriskiyi ntchitu ulongozgi wo Paulo wangupaska Timote? (1 Timote 4:13, 15)
10 Wakutumika Paulo wangukambiya Timote kuti ‘walungurukengi’ kweniso ‘watangwanikengi’ ndi vinthu vauzimu. (Ŵerengani 1 Timote 4:13, 15.) Mwakukoliyana ndi ulongozgi wenuwu, namwi muyesesengi kuŵanaŵaniya vo mungachita kuti mulutirizgi ‘kukole ndi mzimu.’ (Aro. 12:11) Mwakuyeruzgiyapu, muyesesengi kunozgeke mwakukwana maunganu. Venivi vakukuwovyani kuti mukavwisiyengi mwakuphwere asani mwe pa maunganu. Pamwenga asani musambira Bayibolu pakumwija, mujengi pamalu ngambula vakutimbanyiza kuti mulungurukengi vinthu vo musambira. Venivi vikuwovyeningi ukongwa kuti muyanduwengi ndi sambiru la pakumwija. Mwakuyeruzgiyapu, asani mukhumba kuti motu uleki kuzimwa, mulutirizga kusonkhaku nkhuni. Mwakuyanana ŵaka, mukhumbika kulutirizga kuchita vinthu vo tavikonkhoska mundimi iyi kuti mulutirizgi kuwonga sembi yaku Yesu ndipuso vinthu vinyaki vo Yehova watikuchitiyani. Kweniso asani kwaja masabata ngamanavi kuti Chikumbusu chichitiki, mungachita umampha kuŵanaŵaniya vitumbiku vo mwasaniya chifukwa chakuja Kaboni waku Yehova. Tikayika cha kuti kuchita venivi kukuwovyeningi kuti muwongengi sembi yaku Yesu yo yitikuwovyani kuti muje pa ubwezi ndi Yehova.
11-12. Asani nyengu zinyaki muchita phamphu cha nge mo mwachitiyanga kali, kumbi ving’anamuwa kuti Chiuta wakuleka kukupaskani mzimu waki wakupaturika? Konkhoskani. (Wonaniso chithuzi.)
11 Asani nyengu zinyaki muchita phamphu cha pakuchita vinthu vakukwaskana ndi kusopa nge mo mwachitiyanga kali, mungagongowanga cha pamwenga kuŵanaŵana kuti Chiuta wakuleka kukupaskani mzimu waki. Kumbukani vo wakutumika Paulo wangulembe Akhristu a ku Korinto vakukwaskana ndi uteŵeti waki. Iyu wanguti: “Chinanga ndingachita mwambula kukhumba napu, uteŵeti wakuwonere wo ndikupaskika ndeche nawu mbwenu.” (1 Akori. 9:17) Kumbi yapa Paulo wang’anamuwanganji?
12 Nyengu zinyaki Paulo waŵangavi mtima wakukhumba kupharazga. Kweni iyu wapharazganga mbwenu chinanga kuti waŵangavi mtima wakukhumba kupharazga. Namwi mutenere kuchita venivi. Mutenere kusimikiza kuti muchitengi cho ntchakwenere chinanga kuti mulivi mtima wakukhumba kuchita chinthu cho. Mwaviyo, mupemphengi Yehova kuti wakupaskeni “khumbu kweniso nthazi zakuchitiya.” (Afi. 2:13) Lutirizgani kuchita vinthu vo vingakuwovyani kuti mujengi pa ubwezi wakukho ndi Yehova. Ndipu mugomezgengi kuti asani pajumpha nyengu, muyambengi so kuchita phamphu kweniso kumuyanja ukongwa Yehova.
Lutirizgani kuchita vinthu vo vingakuwovyani kuti muje pa ubwezi wakukho ndi Yehova chinanga kuti nyengu zinyaki mulivi mtima wakukhumba kuchita vinthu vo (Wonani ndimi 11-12)
13. Kumbi tingachita wuli kuti tilutirizgi kujiyesa kuti tiwoni asani ‘te mu chivwanu’?
13 Mwakukoliyana ndi ulongozgi wo usanirika pa 2 Akorinto 13:5, tingachita umampha kuti nyengu ndi nyengu tijifufuzengi. Lemba ili likamba kuti: “Lutirizgani kujiyesa kuti muwoni asani mwe mu chivwanu. Lutirizgani kusimikiza kuti ndimwi munthu wamtundu wuli.” Mwaviyo, nyengu ndi nyengu tijifumbengi mafumbu yanga: ‘Kumbi ndiŵika vinthu va Ufumu pakwamba pa umoyu wangu?’ (Mate. 6:33) ‘Kumbi vakukondwesa vo ndisankha, vilongo kuti nditinkha vinthu viheni?’ (Salimo 97:10) ‘Kumbi vo ndichita vitovya kuti abali ndi azichi alutirizgi kuja mwachimangu kweniso mwakukoliyana mumpingu?’ (Aefe. 4:2, 3) Nyengu ya Chikumbusu ndi nyengu yamampha ukongwa yakuti tiŵanaŵaniyengi vinthu venivi. Asani tiŵanaŵaniya vo Yehova ndi Yesu akutichitiya, vitiwovyengi kuti tilongongi kuti titimuwonga Yehova kweniso tija umoyu wakukondwesa Khristu mumalu mwakujikondwesa tija.c
MBERERI ZO ZIKULANDA
14. Kumbi ndi vinthu wuli vo vingachitiska Akhristu anyaki kuti alandi?
14 Akhristu anyaki akuleka kuwungana ndi mpingu chinanga kuti aja achiteŵete Yehova mwakugomezgeka kwa vyaka vinandi. Chifukwa wuli? Anyaki atangwanika ukongwa ndi “vinthu vakufipiska mtima pa umoyu.” (Luka 21:34) Anyaki akuguŵa chifukwa cha vo Akhristu anyawu anguŵakambiya pamwenga kuchita. (Yako. 3:2) Anyaki akuchita ubudi ukulu ndipu achita soni kupempha chovyu. Kwali mukuleka kuwungana pa chifukwa wuli, kumbi mungachita wuli asani mukutuwapu pa mskambu wa mbereri zaku Chiuta ndipu mukulanda? Kumbi sembi yaku Yesu kweniso chanju cho Yehova ndi Yesu alongo kutikuchiskani kuchitanji?
15. Kumbi Yehova walongo wuli kuti waŵanaŵaniya mbereri zo zikulanda? (Ezekiyeli 34:11, 12, 16)
15 Muŵanaŵaniyengi mo Yehova wawone ŵanthu wo akulanda. Iyu watiŵajowo cha pamwenga kuŵaluwiya limu. Mumalu mwaki, Yehova wapenjapenja mbereri zo zikulanda. Ndipu asani wazisaniya, watiziwovya kuti ziwere kwaku iyu kweniso watiziryisa. (Ŵerengani Ezekiyeli 34:11, 12, 16.) Kumbi venivi ndivu so Yehova wachita ndi yimwi? Hinya! Chifukwa chakuti yapa muŵerenga nkhani iyi, vilongore limu kuti mtima winu ukhumbisiska kuchita vinthu vo vikondwesa Yehova. Yehova wanguwona vinthu vamampha mwaku yimwi, ndichu chifukwa chaki wangukuguziyani kwaku iyu. Mwaviyo, pasonu panu napu, weche kuwona vinthu vamampha mwaku yimwi, ndipu watikuguzani kuti muwere mubanja laki.
16. Kumbi ntchinthu wuli cho chingawovya mbereri zo zikulanda kuwere kwaku Yehova? (Wonaniso chithuzi.)
16 Mu kabuku kakuti Weriyani Kwaku Yehova mwe mazu ngakuchiska ukongwa ngakuti: “Mutenere kuziŵa kuti Yehova wangakuwovyani kuti muwere kwaku iyu, muleki kusuzgika maŵanaŵanu, kuguŵa ndipuso kuti muje ndi njuŵi yamampha yo yikuwovyeningi kuleka kujimba mulandu. Pavuli paki, muchiskikengi kwamba so kuteŵete Yehova limoza ndi ateŵeti anyinu.” Kumbukani kuti ŵara akhumbisiska kukuwovyani. Yiwu angaja nge “malu ngakubisamiyapu mphepu, [ndipuso] malu ngakuthaŵiyaku pa nyengu ya chimphunga.” (Yesa. 32:2) Kuti mulongo kuti muwonga sembi yaku Yesu mutenere kujifumba kuti, ‘Kumbi pasonu panu nditenere kuchitanji kuti “ndinyoloski vinthu” ndi Yehova?’ (Yesa. 1:18; 1 Petu. 2:25) Mwakuyeruzgiyapu, mungachita umampha kwamba so kuwungana ndi abali ndi azichi ku Nyumba ya Ufumu. Kweniso mungakumana ndi mura yumoza ndi kumukambiya kuti mukhumba kuwere kwaku Yehova. Iyu wanganozga vakuti kwa kanyengu, munthu munyaki wakusambizeningi Bayibolu. Ndipu mutenere kusimikiza kuti Yehova watumbikengi vo mutesesa kuchita kuti mulongo kuti muwonga sembi ya Mwana waki.
Jifumbeni kuti, ‘Kumbi pasonu panu nditenere kuchitanji kuti “ndinyoloski vinthu” ndi Yehova?’ (Wonani ndimi 16)
KUMBI MUCHITENGENJI?
17-18. Kumbi tingachita wuli kuti tiyigwiriskiyi ntchitu mwazeru nyengu yidu techendachiti Chikumbusu cha chaka chinu?
17 Yesu wangukamba kuti Yehova wangumutuma kuti wazipereki sembi umoyu waki “kuti weyosi yo wavwana mwaku iyu waleki kunangika, kweni waje ndi umoyu wamuyaya.” (Yoha. 3:16) Sembi yaku Yesu ndi nthowa yo Yehova watititaskiya ku ubudi ndi nyifwa. Mwaviyo, titenere kuyiwona mwakupepuka cha sembi yeniyi. (Aro. 3:23, 24; 2 Akori. 6:1) Pa mazuŵa ngo ngajaku kuti tichiti Chikumbusu, tiyeni tiŵanaŵaniyengi ukongwa chanju cho Yehova ndi Yesu akutilongo ndipu chanju chenichi chitichiskengi kuchitapu kanthu kuti tilongo kuti tiwonga.
18 Kumbi yimwi mungalongo wuli kuti muwonga sembi yeniyi? Vo yimwi mungamuka vingapambana ndi vo munthu munyaki wangamuka. Kweni mutenere kusimikiza kuti Yehova watumbikengi phamphu linu kweniso la abali ndi azichi pacharu chosi wo nawu akuleka “kuja umoyu wakujikondwesa ŵeneku,” kweni aja umoyu wakukondwesa Yesu “yo wakuŵafwiya ndi kuyuskika.”—2 Akori. 5:15.
SUMU 14 Thamikani Fumu Yasonu ya Charu Chapasi
a Kuti mugwiriskiyengi ntchitu fundu zo musambira mu Bayibolu, mugwiriskiyengi ntchitu kabokosi kakuti, “Vo Mungachita” ko kasanirika chakukumaliya kwa sambiru lelosi mu mubuku la Kondwani Ndi Umoyu Kwamuyaya!
b Kuti muziŵi vinthu vinyaki vo vingakuwovyani kuti muluti panthazi mwauzimu wonani nkhani yakuti, “Achinyamata—‘Lutirizgani Kugwiriya Ntchitu Utaski Winu’” mu Chigongwi cha Mlinda cha December 2017.
c Kuti muziŵi vo mungachita kuti mulutirizgi kumuwonga Yehova, wonani nkhani yakuti, “Kodi Nchiyani Chimakusonkhezerani Kutumikira Mulungu?” mumagazini ya Chigongwi cha Mlinda ya Chichewa ya June 15, 1995.