Nthanthi 16:3—“Pereka Kwaku Yehova Chechosi cho Uchita”

“Pereka kwaku Yehova chechosi cho uchita, ndipu vo ukhumba kuchita vifiskikengi.”—Nthanthi 16:3, Bayibolu la Charu Chifya.

“Pereka ntchitu yaku ku Ambuya, ndipu vyakulongoso vyako vikachitikanga.”—Nthanthi 16:3, Mazu Ghaku Chiuta.

Vo Lemba la Nthanthi 16:3 Ling’anamuwa

Pa lemba ili Chiuta wauneneska watiŵasimikiziya ŵanthu wo atimusopa kuti vinthu vo akhumba kuchita viŵayendiyengi umampha asani atimuthemba kweniso alondo ulongozgi waki.

“Pereka kwaku Yehova chechosi cho uchita.” Ŵanthu wo asopa Yehova,a afufuza dankha ulongozgi waki ŵechendasankhi vakuchita. (Yakobe 1:5) Ntchifukwa wuli achita venivi? Chifukwa chakwamba ntchakuti taŵanthu tiziŵa cha vo vichitikengi mawa. (Wakutawula 9:11; Yakobe 4:13-15) Chachiŵi, tingapereŵere zeru zakuchitiya vo tikhumba. Pa vifukwa venivi, ŵanthu anandi asankha kwende zeru zaku Chiuta pa vo akhumba kuchita. Yiwu achita venivi mwakupemphera kwaku iyu kweniso kwende fundu zaki zo zisanirika mu Mazu Ngaki Bayibolu.—Nthanthi 3:5, 6; 2 Timote 3:16, 17.

Mazu ngakuti “pereka kwaku Yehova chechosi cho uchita” ngangakambika so kuti “kunkhuziya kwaku Yehova chechosi cho uchita.” Buku linyaki lingukamba kuti mazu yanga ngangamiya vo vichitika asani “munthu wathula chinthu pamutu paki kuti wapingizi munthu munyaki wanthazi ukongwa yo wangafiska kuchinyamuwa.” Ŵanthu wo athemba Chiuta akayikiya cha kuti iyu waŵawovyengi kuti vinthu viŵayende umampha.—Masalimo 37:5; 55:22.

Kumbi mazu ngakuti “chechosi cho uchita” ngalongo kuti Chiuta wazomereza pamwenga kutumbika chechosi cho munthu wangaŵanaŵana kuti wachiti? Awa! Kuti Yehova watitumbiki, vo tikhumba kuchita vitenere kukoliyana ndi fundu zaki kweniso khumbu laki. (Masalimo 127:1; 1 Yohane 5:14) Chiuta watiŵatumbika cha ŵanthu wo aleka kumuvwiya ndipu Bayibolu likamba kuti “watimbanyizga vo munthu muheni wakhumba kuchita.” (Masalimo 146:9) Kweni iyu watiŵawovya ŵanthu wo atimuvwiya kweniso alondo fundu zaki zo ze mu Bayibolu.—Masalimo 37:23.

“Ndipu vo ukhumba kuchita vifiskikengi.” Mabayibolu nganyaki ngakufwatuliya mazu yanga kuti “vo ukhumba vijalikiskikengi.” Mu Malemba nga Chiheberi pamwenga kuti Chipanganu Chakali, mazu ngo mu Chitonga ngakufwatulikiya kuti vijalikiskikengi pa vesi ili, ngang’anamuwanga kuzenga fawundeshoni yakukho. Kanandi mazu yanga angagwiriskiyanga ntchitu asani apenja kukamba vakukwaskana ndi kukho kwa vinthu vo Chiuta wakulenga. (Nthanthi 3:19; Yeremiya 10:12) Mwakuyanana waka, Chiuta nayu wachitiska kuti mapulanu pamwenga kuti vo ŵanthu wo atimukondwesa akhumba kuchita vileki kutondeka pamwenga kuti vijalikiskiki mwakukho ndipu pakumaliya yiwu akondwa ndi umoyu.—Masalimo 20:4; Nthanthi 12:3.

Nkhani ya pa Nthanthi 16:3

Nthanthi iyi pamwenga kuti vesi ili likulembeka ndi Fumu Solomoni yo yikulemba buku losi la Nthanthi. Chifukwa chakuti Chiuta wangumupaska zeru Solomoni, iyu wangulemba nthanthi zinandi ukongwa.—1 Mafumu 4:29, 32; 10:23, 24.

Mu chaputala 16, Solomoni wangwamba dankha kuthamika Chiuta chifukwa chakuti we ndi zeru ukongwa kweniso wangukonkhoska kuti Chiuta watinkha ŵanthu akujitukumuwa. (Nthanthi 16:1-5) Pavuli paki mu chaputala chenichi, watitikumbuska fundu yakukhumbika ukongwa yo yizumbulika mwakuwerezawereza mubuku la Nthanthi. Fundu yaki njakuti: Taŵanthu tingaŵa ndi zeru chayizu kweniso vinthu vingatiyende umampha asani titijiyuyuwa kweniso titende ulongozgi waku Chiuta. (Nthanthi 16:3, 6-8, 18-23) Fundu yakukhumbika yeniyi yiwerezekawerezeka ukongwa mu Bayibolu.—Masalimo 1:1-3; Yesaya 26:3; Yeremiya 17:7, 8; 1 Yohane 3:22.

Woneriyani vidiyo iyi kuti muwoni vo ve mubuku la Nthanthi.