Kumbi nyengu yinyaki mwakhumbanga kuŵerenga Bayibolu, kweni mungufwa mphwayi chifukwa munguŵanaŵana nge mo ŵanthu wo akambika pachanya yapa aŵanaŵaniyanga? Anandi awona kuti kuŵerenga Bayibolu nkhwakukondwesa cha. Kweni mungachita wuli asani mungaziŵa kuti Bayibolu lingakuwovyani kuja ndi umoyu walikondwa? Nanga mungachita wuli asani mungasaniya kuti pe nthowa zo zingakuwovyani kuti kuŵerenga Bayibolu kukukondweseningi? Kumbi mukhumbengi kuziŵa vinandi vo Bayibolu lisambiza?

Wonani fundu zakukondwesa zo ŵanthu anyaki angukamba ŵati ayamba kuŵerenga Bayibolu.

Ezekiel, yo we ndi vyaka va m’ma 20 wanguti: “Kali ndenga nge munthu yo watendesa galimotu yo waziŵa cha ko waluta. Kweni kuŵerenga Bayibolu kwandiwovya kuti ndikondwengi. M’Bayibolu mwe ulongozgi wakovya wo ndingagwirisiya ntchitu zuŵa lelosi.”

Frieda, yo we ndi vyaka va m’ma 20 wanguti: “Kali ndachitanga vinthu kwambula kuŵanaŵana. Kweni kuŵerenga Bayibolu kwandiwovya kuti ndijikanizengi. Ivi vandiwovya kuti ndichezengi umampha ndi ŵanthu ndipu nde ndi anyangu anandi sonu.”

Eunice yo we ndi vyaka va m’ma 50 wanguti: “Bayibolu litindiwovya kusintha mijalidu yiheni ndi kuja ndi mijalidu yamampha.”

Nge mo ŵanthu yaŵa kweniso anyaki anandi wo aŵerengapu Bayibolu akambiya, kuŵerenga Bayibolu kungakuwovyani kuti mukondwengi. (Yesaya 48:17, 18) Mwakuyeruzgiyapu, Bayibolu lingakuwovyani kuti (1) musankhengi vinthu umampha, (2) muje ndi mabwezi ngamampha (3) mulekengi kusuzgika maŵanaŵanu ndipu (4) kuluska vosi, musambirengi uneneska wakukwaskana ndi Chiuta. Ulongozgi wa m’Bayibolu utuliya kwaku Chiuta. Mwaviyo, titenere kulondo ulongozgi uwu chifukwa iyu wapereka ulongozgi uheni cha.

Chinthu chakukhumbika ukongwa nkhwamba kuŵerenga Bayibolu. Kumbi mungachita wuli kuti muyambepu?

Kumbi mungachita wuli kuti kuŵerenga Bayibolu kukukondweseningi kweniso kuti muvwisengi vo muŵerenga? Wonani fundu 5 zo zawovyapu ŵanthu anandi.

Sankhani malu ngamampha. Saniyani malu ngambula chiwawa. Lekani kuchita vinthu vo vingakutimbanyizani kuti muŵiki maŵanaŵanu nginu ngosi pa vo muŵerenga. Kuja pa malu ngo pe ukweru kweniso po paputa kamphepu kamampha, kungakuwovyani kuti muvwisengi vo muŵerenga.

Jani ndi maŵanaŵanu ngakwenere. Pakuti Bayibolu ndakutuliya kwa Ada ŵidu akuchanya, muyanduwengi ukongwa asani mungaja nge mwana yo wakhumbisisa kuti apapi ŵaki amusambizi. Asani mwe ndi maŵanaŵanu ngaheni ngakukwaskana ndi Bayibolu, yesani kungaleka kuti Chiuta wakusambizeni.​—Sumu 25:4.

Pempherani mwechendayambi kuŵerenga. Bayibolu le ndi maŵanaŵanu ngaku Chiuta. Mwaviyo, vakuziziswa cha kuti tikhumbika kumupempha kuti watiwovyi kulivwisa. Chiuta walayizga kuti waperekengi ‘mzimu wakupaturika ku ŵanthu wo atimupempha.’ (Luka 11:13) Mzimu wakupaturika ungakuwovyani kuti muvwisengi maŵanaŵanu ngaku Chiuta. Mukuluta kwa nyengu, mzimu wenuwu wazakukuwovyani kuti muvwisengi “vinthu vandimba vaku Chiuta.”—1 Ŵakorinte 2:10.

Muvwisengi vo muŵerenga. Mungaŵerenganga kuti mumalizi ŵaka machaputala nganandi cha. Kweni muŵanaŵaniyengi vo muŵerenga. Mujifumbengi mafumbu nge yanga: ‘Kumbi munthu yo wakambika mu nkhani yo ndiŵerenga we ndi mijalidu niyi yamampha? Kumbi vo ndasambira ndingavigwirisiya wuli ntchitu pa umoyu wangu?’

Jani ndi vilatu. Kuti muyanduwi ndi vo muŵerenga m’Bayibolu, jani ndi chilatu chakusambira nkhani zo zingakuwovyani pa umoyu winu. Mungaja ndi vilatu nge ivi: ‘Ndikhumba kusambira vinandi vakukwaskana ndi Chiuta.’ ‘Ndikhumba kuja munthu wamampha, munthurumi pamwenga munthukazi wamampha munthengwa.’ Pavuli paki, sankhani nkhani za m’Bayibolu zo zingakuwovyani kuti mufiski vilatu vinu.a

Fundu 5 izi zingakuwovyani kuti muyambepu kuŵerenga Bayibolu. Kweni mungachita wuli kuti kuŵerenga Bayibolu kukukondweseningi? Nkhani yakulondopu yikonkhosa fundu zinyaki zo zingakuwovyani.

Kumbi kuŵerenga Bayibolu nkhwakukondwesa pamwenga cha? Kumbi imwi kungakukondwesani? Vingathemba vo imwi muchita pakuŵerenga Bayibolu. Tiyeni tiwoni vo mungachita kuti kuŵerenga Bayibolu kukukondweseningi.

Saniyani Bayibolu lo likufwatulika mwakulondo ndipuso lo le ndi mazu ngapusu. Kuŵerenga Bayibolu kungakukondwesani cha asani Bayibolu lo muŵerenga mwe mazu ngakusuzga kweniso ngakali ngo imwi mutingaziŵa cha. Mwaviyo, mutenere kusaniya Bayibolu lo le ndi mazu ngapusu kuti muvwisengi vo muŵerenga. Kweniso litenere kuja Bayibolu lo likufwatulika mwakulondo.a

Mugwirisiyengi ntchitu vipangizu vamazuŵa nganu. Mazuŵa nganu, Bayibolu lisanirika so pa Intaneti. Mungaŵerenge pa Intaneti pamwenga kupanga dawunilodi ndi kuliŵika mukompyuta, mutabuleti pamwenga mufoni. Mabayibolu nganyaki nge ndi vinthu vo vingakuwovyani kuti muwoni mwaliŵi mavesi nganyaki ngo ngakamba nkhani yeniyo. Kweniso mungawona mo akulembe Mabayibolu nganyaki. Asani mutanja kuvwisiya vinthu m’malu mwakuŵerenga, mungavwisiya Bayibolu pa Intaneti mu vineneru vinyaki. Ŵanthu anandi atanja kuvwisiya vinthu asani akwera galimotu, achapa pamwenga asani achita vinthu vinyaki. Kumbi mungayesa cha nthowa yo muwona kuti yingaŵa yamampha kwaku imwi?

Mugwirisiyengi ntchitu vinthu vo vingakuwovyani kuti mulivwisengi Bayibolu. Mabuku nganyaki nge ndi mapu ngo ngalongo malu ngo ngazumbulika m’Bayibolu. Mapu ngenanga ngangakuwovyani kuti muziŵi ko nkhani yo yachitikiyanga kweniso kuti muchiŵerenga mujengi nge kuti muwona vo vachitikanga. Pe nkhani zinandi zo zingakuwovyani kuti muvwisengi vo muŵerenga m’Bayibolu, nge nkhani zo ze m’magazini iyi ndipuso zo zisanirika pa webusayiti yidu ya jw.org.

Sinthani nthowa zo mugwirisiya ntchitu. Asani kuŵerenga Bayibolu kutuwa kukwamba mpaka kukumaliya kutikukondwesani cha, mungachita umampha kwamba kuŵerenga nkhani yo yitikukondwesani ukongwa. Asani mukhumba kuziŵa vinandi vakukwaskana ndi ŵanthu wo aziŵika ukongwa m’Bayibolu, mungaŵerenga nkhani zakukwaskana ndi ŵanthu ŵenaŵa. Mubokosi la mutu wakuti “Ziŵani Ŵanthu wo Akambika M’Bayibolu,” mwe nthowa yo yingawovya kuti kuŵerenga Bayibolu kukukondweseningi. Kweniso mungasankha nkhani yeyosi yo mwayanja pamwenga mungaŵerenga nkhani mwakukoliyana ndi mo vinthu vachitikiyanga. Kumbi ndi nthowa niyi yo imwi mungayanja kugwirisiya ntchitu?

Bayibolu ndi buku waka cha, kweni le ndi ulongozgi wakutuwa kwa Mulengi widu. (2 Timote 3:16) Uthenga waki ungatiwovya ukongwa. Bayibolu likamba kuti: “Mazu Ngaku Chiuta ngamoyu ndipuso nganthazi.” (Ŵahebere 4:12) Bayibolu le ndi nthazi yakusintha umoyu widu mu nthowa ziŵi. Nthowa yakwamba, lingatilongozga pa umoyu widu. Ndipu nthowa yachiŵi, lingatiwovya kuti tiziŵi Chiuta kweniso malayizgu ngaki.—1 Timote 4:8; Yakobe 4:8.

Lingakuwovyani pa umoyu winu. Bayibolu lingawovya munthu weyosi pakuyija. Le ndi ulongozgi wamampha pa nkhani izi.

• Mo mungachitiya vinthu umampha ndi anyinu.—Ŵaefesu 4:31, 32; 5:22, 25, 28, 33.

• Mo mungajaliya ndi umoyu wamampha.—Sumu 37:8; Nthanthi 17:22.

• Mo mungajaliya ndi mijalidu yamampha.—1 Ŵakorinte 6:9, 10.

• Vo mungachita kuti musaniyengi vinthu vakukhumbika.—Nthanthi 10:4; 28:19; Ŵaefesu 4:28.a

Banja linyaki la ku Asia linguwona kuti ulongozgi wa m’Bayibolu ngwakukhumbika ukongwa. Nge mo ŵanthu wo atolana waka asuzgikiya, nawu asuzgikanga kuti aziŵiriyani kweniso kuti akambisanengi mwakufwatuka. Kweni angwamba kugwirisiya ntchitu ulongozgi wo aŵerenganga m’Bayibolu. Kumbi ulongozgi uwu unguŵawovya wuli? Vicent wangukamba kuti: “Vo ndinguŵerenga m’Bayibolu vandiwovya kusaniya nthowa zamampha zakumalisiya masuzgu m’nthengwa yidu. Kwende fundu za m’Bayibolu kwatiwovya kuti tikondwengi m’nthengwa yidu.” Muwolu waki nayu Annalou wangukamba kuti: “Kuŵerenga nkhani za ŵanthu wo azumbulika m’Bayibolu, kwatiwovya ukongwa. Sonu ndikondwa ukongwa kuti vinthu vitenda umampha m’nthengwa yidu kweniso vilatu vidu vifiskika.”

Lingakuwovyani kuziŵa Chiuta. Vicent wangukamba so kuti: “Kuŵerenga Bayibolu kwandiwovya kuja pa ubwezi wakukho ndi Yehova kuluska kali.” Vo Vicent wangukamba, vakukhumbika ukongwa. Bayibolu lingakuwovyani kuti mumuziŵi Chiuta. Asani mwamuziŵa, muyanduwengi ndi ulongozgi waki kweniso mujengi nayu pa ubwezi. Kweniso muziŵengi kuti wavumbuwa vinthu vo vichitikengi kunthazi, nyengu yo mwazamukondwa ndi “umoyu weneku.” (1 Timote 6:19) Palivi buku linyaki lo likamba venivi.

Asani mungayamba kuŵerenga Bayibolu kweniso kulutiriza, namwi mungasaniya vitumbiku venivi. Lingakuwovyani pa umoyu winu ndipuso lingakuwovyani kuti muziŵi Chiuta. Kweni asani muŵerenga Bayibolu, mungaŵa ndi mafumbu nganandi. Asani mwasaniya mafumbu, mutenere kuchita nge mo nduna ya ku Etiopia yo yengaku vyaka 2,000 vajumpha yinguchitiya. Iyu yenga ndi mafumbu nganandi ngakukwaskana ndi Bayibolu. Filipu wati wayifumba asani yivwisa vo yaŵerenganga m’Bayibolu, iyu yingumuka kuti: “Ndingavwisa wuli kwambula munthu munyaki kundilongozga?”b Pavuli paki, iyu yinguzomera kuti Filipu yo waliziŵanga umampha Bayibolu wayisambizi. Filipu wenga wakusambira waku Yesu. (Machitidu 8:30, 31, 34) Asani namwi mukhumba kuziŵa vinandi vakukwaskana ndi Bayibolu, mungalemba fomu pa www.jw.org yakupempha kuti musambirengi Bayibolu pamwenga mungalembe ku ofesi ya Akaboni aku Yehova yakufupi ndi ko muja pa ma adiresi ngo nge mu magazini yeniyi. Mungakambiya so Kaboni weyosi pamwenga mungaluta ku Nyumba ya Ufumu ya Akaboni aku Yehova kufupi ndi ko muja. Asani mungayambapu sonu kuŵerenga Bayibolu, muwonengi mo likuwovyiyeningi pa umoyu winu.