Pafupi ndi Babele penga tawuni ya Uri. Ŵanthu a mutawuni iyi asopanga achiuta anandi aboza mumalu mwakusopa Yehova. Kweni penga munthu munyaki ku Uri yo wasopanga Yehova pe. Zina laki lenga Abrahamu.

Yehova wangukambiya Abrahamu kuti: ‘Tuwa mucharu chaku, kwa abali ŵaku kweniso kwa a munyumba ya awusu ndipu uluti mucharu cho ndikulongongi.’ Pavuli paki, Chiuta wangumulayizga kuti: ‘Ndazakukupanga kuja mtundu ukulu, ndazakukutumbika, ndazamuchitiska kuti zina laku lije likulu ndipuso ŵanthu azamutumbikika chifukwa chaku yiwi.’

Abrahamu waziŵangaku cha ko Yehova wangumukambiya kuti waluti kweni wangugomeza Yehova. Mwaviyo, Abrahamu, muwolu waki Sara, awisi a Tera ndi Loti mwana wa mku waki anguvwiya ndipu angupanganya vinthu vawu ndi kwamba ulendu wawu wo wenga utali.

Abrahamu wenga ndi vyaka 75 pa nyengu yo iyu ndi banja laki angufika mucharu cho Yehova wangulayizga kuti akajengemu. Charu ichi chadanikanga kuti Kanani. Kwenuku Chiuta wangulongoro ndi Abrahamu ndipu wangumulayizga kuti: ‘Ndiperekengi charu chenichi ku mphapu yaku.’ Abrahamu ndi Sara ŵenga akukota ndipu ŵengavi ŵana.Kumbi Yehova wanguchita wuli kuti wafiski vo wangulayizga?

Abrahamu ndi Sara anguja vyaka vinandi kutuliya po angutoliyana. Angusiya nyumba yawu yamampha ku Uri ndipu ajanga muhema. Sara wadandawulanga cha chifukwa wagomezanga Yehova.

Sara wakhumbisisanga kuja ndi mwana ndipu wangukambiya Abrahamu kuti: ‘Asani mteŵeti wangu Hagara wangaja ndi mwana, Panyaki ndingaja ndi mwana kuporote mwaku iyu.’ Pati pajumpha nyengu, Hagara wangubala mwana munthurumi. Zina laki wenga Ishimayeli.

Pati pajumpha vyaka vinandi, Abrahamu wati wafika vyaka 99 ndipuso Sara wati wafika vyaka 89, angulonde alendu atatu. Abrahamu wanguŵakambiya kuti apumuwi pachimiti ndipu wanguŵapasa chakurya. Kumbi uŵanaŵana kuti alendu ŵenaŵa ŵenga ayani? Ŵenga angelu! Yiwu angukambiya Abrahamu kuti: ‘Chaka chamawa nyengu nge yeniyi, ndipu wona! muwolu waku Sara wazamukuŵa ndi mwana munthulumi.’ Pa nyengu iyi Sara wenga muhema ndipu wavwisiyanga. Iyu wanguseka mumtima mwaki ndipu wangukamba kuti: ‘Kumbi ndingabala nadi mwana po ndakote panu?’

Chaka chakulondopu, Sara wangubala mwana munthulumi nge mo mungelu waku Yehova wangukambiya. Abrahamu wangudana mwana yo kuti Isaki. Zina lenili ling’anamuwa, “Kuseka.”

Isaki we pafupi kufika vyaka 5, Sara wanguwona kuti Ishimayeli wasekanga Isaki. Sara wakhumbanga kuvikiriya mwana waki ndipu wangukambiya Abrahamu kuti wadikisi Hagara ndi mwana waki Ishimayeli. Pakwamba, Abrahamu wakhumbanga cha kuŵadikisa. Kweni Yehova wangukambiya Abrahamu kuti: ‘Vwiya mazu ngaki. Ndimuphweriyengi Ishimayeli kweni layizgu langu lazamufiskikiya mwaku Isaki.’

Loti wajanga mucharu cha Kanani ndi awisi amana a Abrahamu. Pati pajumpha nyengu, Abrahamu ndi Loti ŵenga ndi viŵetu vinandi ukongwa ndipu malu ngakuti aliskengeku viŵetu vawu, ngenga ngamana. Abrahamu wangukambiya Loti kuti: ‘Tingaja so cha pamoza. Chondi usankhi malu ngo ungayanja kuchija, ini ndamuja kunyaki.’ Abrahamu wakhumbanga cha kuti vamampha vosi vije vaki. Asi viyo?

Loti wanguwona chigaŵa chakutowa cha charu cho kufupi ndi tawuni yo yadanikanga kuti Sodomu. Chigaŵa ichi chenga ndi maji nganandi ndipuso uteka unandi wakubiliŵira. Mwaviyo, wangusankha kuchija kuchigaŵa chenichi ndi banja laki.

Ŵanthu a ku Sodomu ndi a mutawuni yo yenga pafupi ya Gomora, achitanga vinthu viheni ukongwa. Yehova wanguŵanaŵana kuti wanangi matawuni ngenanga kweni wakhumbanga kutaska Loti ndi banja laki. Mwaviyo, wangutuma angelu ŵaŵi kuti akaŵatcheŵesi. Yiwu angukamba kuti: ‘Yendesani! Tuwanimu mutawuni iyi! Yehova wakhumba kuyinanga.’

Loti wazelezanga kuti watuwemu mutawuni yo. Mwaviyo, angelu anguto Loti, muwolu waki ndi ŵana ŵaki anthukazi ŵaŵi ndi kutchimbiriya nawu kubwalu kwa tawuni. Angelu anguti: ‘Tchimbiyani! Taskani umoyu winu, kulereska kuvuli cha. Asani muleresengi kuvuli, mufwengi!’

Ati afika mutawuni yo yadanikanga kuti Zowari, Yehova wanguchitisa kuti motu ndi sulufule vituwi kuchanya ndi kuwiya pa Sodomu ndi Gomora. Matawuni ngosi ngaŵi ngangupiriya ndi motu. Muwolu waku Loti wanguvwiya Yehova cha ndipu wangulereska kuvuli. Iyu wangusambuka chiduli cha muche! Loti ndi ŵana ŵaki anthukazi angufwa cha chifukwa anguvwiya Yehova. Yiwu atenere kuti angudandawula ukongwa chifukwa muwolu waku Loti wanguvwiya cha. Kweni angukondwa chifukwa anguvwiya vo Yehova wanguŵakambiya.

Abrahamu wangusambiza mwana waki Isaki kuti wayanjengi Yehova ndipuso wagomezengi vosi vo wakulayizga. Isaki we pafupi kukwanisa vyaka 25, Yehova wangukambiya Abrahamu kuti wachiti chinthu chinyaki chakusuzga ukongwa. Kumbi chenga chinthu wuli?

Chiuta wangukambiya Abrahamu kuti: ‘To mwana waku, mwana waku yumoza pe mweniyo utimuyanja ukongwa, Isaki. Luta kucharu cha Moriya ndipu kweniko ukamupereki nge sembi yakupiriza.’ Abrahamu waziŵanga cha chifukwa cho Yehova wangumukambiya kuti wachitiyi venivi. Chinanga kuti venga viyo, wanguvwiya.

Kwati kwacha ndi mulenjilenji, Abrahamu wanguto Isaki ndi ateŵeti ŵaki ŵaŵi ndipu anguluta ku Moriya. Ŵati ayenda kwa mazuŵa ngatatu angwamba kuwona mapiri. Ndipu ŵati afika pamalu nganyaki Abrahamu wangukambiya ateŵeti ŵaki kuti ami penipo. Iyu ndi Isaki anguluta kuchipereka sembi. Abrahamu wangukambiya Isaki kuti wapingi nkhuni ndipu iyu wapingengi chimayi. Isaki wangufumba awisi kuti: ‘Yepani nyama yo tamupereka sembi?’ Abrahamu wangumuka kuti: ‘Mwana wangu, Yehova waperekengi.’

Ŵati afika paphiri anguzenga guŵa la sembi. Pavuli paki, Abrahamu wangumanga Isaki manja ndi malundi ndipu wangumugoneka paguŵa.

Abrahamu wati wato chimayi, mungelu waku Yehova wangudaniriza kutuwa kuchanya kuti: ‘Abrahamu! Ungamubayanga cha mnyamata yo! Sonu ndaziŵa kuti we ndi chivwanu mwaku Chiuta chifukwa ungukana cha kupereka sembi mwana waku.’ Pavuli paki, Abrahamu wanguwona mbereri yo yinguwira ndipu masengwi ngaki ngangukoloŵeka muthundu. Iyu wangufwatuwa Isaki luŵiluŵi ndipu wangupereka sembi mbereri yo.

Kutuliya zuŵa lenili, Yehova wadananga Abrahamu kuti mubwezi waki. Kumbi uziŵa chifukwa chaki? Abrahamu wachitanga chechosi cho Yehova wamukambiyanga, chinanga kuti nyengu zinyaki waziŵanga cha chifukwa cho Yehova wakambiyanga viyo.

Yehova wanguwereza so layizgu laki ndipu wangukambiya Abrahamu kuti: ‘Ndazakukutumbika ndipuso ndazamuyandanisa ŵana pamwenga kuti mphapu yaku.’ Ivi vang’anamuwanga kuti ŵanthu wosi amampha atingi azilondiyengi vitumbiku kuziya mu ŵana aku Abrahamu.