Ŵanthu a mu banja laku Yakobe wo ŵenga ku Ijipiti aziŵikanga ndi zina lakuti Ayisirayeli. Yakobe ndi Yosefi ŵati ŵafwa, Farawo munyaki wangwamba kulamuliya. Iyu wachitanga mantha chifukwa Ayisirayeli ayandananga kuluska Ijipiti. Mwaviyo, Farawo wanguchitisa kuti Ayisirayeli aje akapolu. Iyu waŵachichizanga kuti awumbengi vidina kweniso kuti agwirengi ntchitu muminda. Asani Ijipiti atiŵachitiya nkhaza, chiŵerengeru cha Ayisirayeli chakuwanga ukongwa. Venivi vamukondweskanga cha Farawo,ndipu wangulamula kuti asani Myisirayeli wabala mwana munthulumi wabayikengi nyengu yeniyo. Kumbi uŵanaŵana kuti Ayisirayeli anguvwa wuli?

Munthukazi munyaki wachiyisirayeli zina laki Yokibedi, wangubala mwana munthulumi wakutowa. Kuti wavikiliyi mwana waki, iyu wangumuŵika mubasiketi ndipu wanguchiyibisa mumateti mumusinji wa Nile. Miriyamu yo wenga mzichi waki wabonda mwenuyu, wanguja pafupi kuti wawoni vo vichitikengi.

Mwana munthukazi waku Farawo, wanguza kumusinji kuti wazisambi ndipu wanguwona basiketi. Mukati mwa basiketi wangusaniyamu mwana yo waliyanga ndipu wangumuvwiya lisungu. Miriyamu wangumufumba kuti: ‘Nkhakudaniyeni munthukazi kuti wakuleliyeni mwana uyu?’ Mwana waku Farawo wanguzomera ndipu Miriyamu wanguchidana anyina a Yokibedi. Yiwu ŵati ŵaza wanguŵakambiya kuti: ‘Mutoni mwana uyu, mundilere ndikulipireningi.’

Mwana yo wati wakuwa, Yokibedi wanguza nayu ku mwana munthukazi waku Farawo ndipu wangumudana kuti Mozesi. Mwana waku Farawo wangulera Mozesi nge mwana waki chayiyu. Mozesi wangukuwa nge mwana wa Fumu ndipu watingi wachitengi vosi vo watingi wakhumbengi. Kweni Mozesi wangumuluwa cha Yehova. Iyu waziŵanga kuti ndi mu Ijipiti cha kweni ndi mu Isirayeli. Mozesi wangusankha kuteŵete Yehova.

Mozesi wati wafika vyaka 40, wakhumbanga kuwovya ŵanthu a mtundu waki. Iyu wanguwona mu Ijipiti wachipuma kapolu wachiyisirayeli. Mozesi wangupuma mu Ijipiti mwenuyu ndipu wangufwa. Pavuli paki, wanguwundiya liŵavu la munthu yo mumuchenga. Farawo wati waziŵa venivi, wanguyesesa kuti wabayi Mozesi. Kweni Mozesi wanguthaŵiya kucharu cha Midiyani. We kweniko, Yehova wamuphweriyanga.

Mozesi wanguja mucharu cha Midiyani kwa vyaka 40. Iyu wanguto munthukazi ndipu wangubala ŵana. Zuŵa linyaki wachiliska mbereri za asibweni ŵaki a Yeteru pafupi ndi Phiri la Sinayi, wanguwona chinthu chakuziziswa. Chivwati chaminga chakoliyanga motu kweni chafyanga cha. Mozesi wati waluta pafupi kuti wakawoni vo vachitikanga, wanguvwa mazu kutuliya muchivwati ngakuti: ‘Mozesi! Ungazanga pafupi cha. Zuwa sapatu zaku chifukwa wama pamalu ngakupaturika.’ Wenga Yehova yo wakambanga mazu yanga kuporote mwa mungelu.

Mozesi wanguchita mantha, mwaviyo, wangujala chisku chaki. Yehova wangukamba kuti: ‘Ndawona mo Ayisirayeli asuzgikiya. Ndiŵatasengi ku Ijipiti ndipu ndizengi nawu mucharu chamampha. Iwi ndiwi uŵalongozengi pakutuwa mu Ijipiti.’ Kumbi uŵanaŵana kuti Mozesi wanguzizwa cha?

Mozesi wangufumba kuti: ‘Kumbi ndamukambanji asani ŵanthu achindifumba kuti ndiyani wandituma?’ Chiuta wangumuka kuti: ‘Ukaŵakambiyi kuti Yehova, Chiuta waku Abrahamu, Chiuta waku Isaki ndi Chiuta waku Yakobe, ndiyu wandituma.’ Pavuli paki, Mozesi wangufumba so kuti: ‘Ndamuchita wuli asani ŵanthu achindivwiya cha?’ Yehova wangulongo Mozesi ukaboni wakuti wakumuwovya. Iyu wangukambiya Mozesi kuti waponyi nthonga yaki pasi. Nthonga yo yingusambuka njoka! Mozesi wati wako njoka yo kumuchiya, yingusambuka so nthonga. Yehova wanguti: ‘Asani wachichita venivi, amuziŵa kuti ndini ndakutuma.’

Mozesi wanguti: ‘Nditondeka kulongoro umampha.’ Yehova wangumulayizga kuti: ‘Ndazakukukambiya vakuti ukakambi ndipu ndazakukutumiya muku waku Aroni kuti wakakuwovyi.’ Mozesi wanguziŵa kuti Yehova we nayu. Mwaviyo, wanguto muwolu waki ndi ŵana ŵaki ndipu wanguluta ku Ijipiti.

Ayisirayeli achichizikanga kuti agwirengi ntchitu nge akapolu. Yehova wangutuma Mozesi ndi Aroni kuti akakambiyi Farawo kuti: ‘Zomereza ŵanthu ŵangu kuti aluti kuchipululu kuti akandisopi.’ Farawo wangumuka mwakujikuzga kuti: ‘Ndilivi navu ntchitu vo Yehova wakamba, ndizomerezengi cha kuti Ayisirayeli aluti.’ Pavuli paki, Farawo wanguchitisa kuti Ayisirayeli agwirengi ntchitu ukongwa. Yehova wakhumbanga kumusambiza chinthu chinyaki Farawo. Uziŵa vo wanguchita? Wanguzisa miliri 10 ku ŵanthu a ku Ijipiti. Yehova wangukambiya Mozesi kuti: ‘Farawo watindivwiya cha. Ndimulenji, iyu walutengi kumsinji wa Nayelu. Uluti ndipu ukamukambiyi kuti chifukwa chakuti wakana kuzomereza ŵanthu ŵangu kuti aluti, maji ngosi nga mu msinji wa Nayelu ngasambukengi ndopa.’ Mozesi wanguvwiya ndipu wanguluta kuchikumana ndi Farawo. Farawo wanguwona Aroni wachipuma maji nga mu msinji wa Nayelu ndi nthonga ndipu ngangusambuka ndopa. Msinji wo ungwamba kununkha, somba zingufwa ndipu mwengavi maji ngamampha ngakuti angamwa. Farawo wanguŵazomereza mbwenu cha Ayisirayeli kuti aluti.

Pati pajumpha mazuŵa 7, Yehova wangutuma Mozesi kuti waluti so kwaku Farawo kuti wakamukambiyi kuti: ‘Asani uleka kuzomereza ŵanthu ŵangu kuti aluti, mucharu chosi cha Ijipiti muzazengi amuchuwa.’ Aroni wangusoska nthonga yaki muchanya ndipu amuchuwa angwamba kuzaza charu chosi cha Ijipiti. Ŵanthu angusaniya kuti munyumba zawu, pamabedi ngawu kweniso muviyaŵi vawu mwe amuchuwa. Peposi penga amuchuwa! Farawo wangukambiya Mozesi kuti wapemphi Yehova kuti amuchuwa wo amali. Farawo wangulayizga kuti wazomerezengi Ayisirayeli kuti aluti. Mwaviyo, Yehova wanguchitisa kuti muliri wo umali ndipu ŵanthu a ku Ijipiti anguwunjika amuchuwa wo mumilu. Charu cho chingwamba kununkha. Kweni Farawo wanguŵazomereza mbwenu cha Ayisirayeli kuti aluti.

Pavuli paki, Yehova wangukambiya Mozesi kuti: ‘Aroni wapumi pasi ndi nthonga yaki ndipu fuvu lisambukengi tividononu takuluma.’ Nyengu yeniyo, peposi penga tividononu. Ŵanthu anyaki a ku Farawo angumukambiya kuti: ‘Muliri uwu watuliya kwaku Chiuta.’ Kweni Farawo wanguŵazomereza mbwenu cha Ayisirayeli kuti aluti.

Mozesi ndi Aroni anguluta kuchikambiya Farawo vo Chiuta wanguŵatuma kuti: ‘Asani ulekengi kuzomereza ŵanthu ŵangu kuti aluti, nditumizengi viphanga mucharu cha Ijipiti.’ Viphanga vinandi pamwenga kuti vinyezi vikuluvikulu vakuluma vingusere mu nyumba za Ijipiti, akukhupuka ndi akavu viyo. Mucharu cho munguzaza viphanga. Kweni muchigaŵa cha Gosheni cho mwajanga Ayisirayeli mwengavi viphanga. Mulili wachinayi wenuwu kweniso yinyaki yo yinguchitika pavuli paki, yingukwaska Ayijipiti pe. Farawo wangukambiya Mozesi kuti: ‘Pempha Yehova kuti watuzgepu viphanga ivi. Ŵanthu ŵinu angaluta.’ Kweni Yehova wati wamalisa mulili wa viphanga, Farawo wangusintha maŵanaŵanu ngaki. Kumbi Farawo wangusambirapu kanthu?

Yehova wanguti: ‘Asani Farawo waleka kuzomereza ŵanthu ŵangu kuti aluti, viŵetu va Ayijipiti vitamengi ndi kufwa.’ Mawa laki, viŵetu va Ayijipiti vingwamba kufwa. Kweni va Ayisirayeli vingufwa cha. Chinanga kuti venga viyo, Farawo wangukana kuthera ndipu wanguŵazomereza cha kuluta.

Pavuli paki, Yehova wangukambiya Mozesi kuti waluti kwaku Farawo ndipu wakawulusiyi chotu muchanya. Chotu chingusambuka fuvu ndipu fuvu lo lingudikiya Ayijipiti wosi. Fuvu lenili linguchitiska kuti Ayijipiti wosi ndi viŵetu vawu aje ndi vilonda vakuŵaŵa ukongwa. Kweni Farawo wangulutirizga kunonopesa mtima waki ndipu wanguzomereza cha kuti Ayisirayeli aluti.

Yehova wangutuma Mozesi kuti waluti so kwaku Farawo. Mozesi wangukamba kuti: ‘Kumbi ukana mbwenu kuzomereza ŵanthu ŵangu kuti aluti? Mawa ndiwisengi vuwa yikulu.’ Mawa laki, Yehova wanguwisa chivuwa chikulu chamalimphezi ndi motu. Chenga chivuwa cho chenga chechendawepu mucharu cha Ijipiti. Vimiti vosi kweniso mbewu vingunangika kupatuwaku va ku Gosheni. Farawo wangukambiya Mozesi kuti: ‘Pempha Yehova kuti vuwa yimali! Pavuli paki mulutengi.’ Kweni vuwa ya chimphepu yati yamala, Farawo wangusintha maŵanaŵanu ngaki.

Pavuli paki, Mozesi wangukamba kuti: ‘Sonu, azombi aryengi mbewu zosi zo zingujaku chimphepu chati chamala.’ Azombi anandi angurya chechosi cho chinguja muminda ndi muvimiti. Farawo wangukambiya Mozesi kuti: ‘Pempha Yehova kuti watuzgepu azombi.’ Kweni Yehova wati watuzapu azombi, Farawo wangukana mbwenu.

Yehova wangukambiya Mozesi kuti: ‘Tambasuliya janja laku kuchanya.’ Nyengu yeniyo, kuchanya kunguchita mdima. Ayijipiti awonanga chechosi cha kwa mazuŵa ngatatu kweni Ayisirayeli pe ndiwu ŵenga ndi ukweru munyumba zawu.

Farawo wangukambiya Mozesi kuti: ‘Iwi ndi ŵanthu ŵaku mungaluta. Kweni viŵetu vinu muvisiyi.’ Mozesi wanguti: ‘Titenere kuluta ndi viŵetu vidu kuti tikavipereki sembi kwaku Chiuta widu.’ Farawo wangukwiya ukongwa. Iyu wangudaniriza kuti: ‘Tuwapu pa masu pangu! Asani ndakuwona so, ndikubayengi.’

Mozesi wangulayizga Farawo kuti wazengeku so cha kuzikumana nayu. Kweni wechendatuweku kwaku Farawo, wangumukambiya kuti: ‘Pakati pa usiku, mwana weyosi wakwamba wa Ayijipiti, kwambiya mwana munthulumi waku Farawo mpaka mwana munthurumi wa akapolu ŵaki, wafwengi.’

Yehova wangukambiya Ayisirayeli kuti aryi chakurya chapade. Wanguŵakambiya kuti: ‘Mubayi mwana wa mbereri pamwenga wa mbuzi wa chaka chimoza ndipu zinyaki mwa ndopa zaki muzipaki pafulemu ya khomu linu. Muwotchi nyama yo ndipu muryi limoza ndi chiŵandi chambula vakufufumisa. Muvwali vakuvwala ndi sapatu ndipu muje akunozgeka kuluta. Usiku weniwunu, ndikufwatuweningi.’ Kumbi uŵanaŵana kuti Ayisirayeli angukondwa wuli?

Pakati pa usiku, mungelu waku Yehova wanguluta kunyumba zosi mucharu cha Ijipiti. Munyumba zo anguleka kupaka ndopa pafulemu, mwana wakwamba wangufwa. Pa nyumba zo angupaka ndopa pa fulemu, mungelu wangujumphapu ŵaka. Mubanja lelosi la ku Ijipiti kwali lenga lakukhupuka pamwenga likavu, mungutayika mwana. Kweni pengavi mwana wa Ayisirayeli yo wangufwa.

Mwana waku Farawo nayu wangufwa ndipu ivi vingumupweteka ukongwa. Nyengu yeniyo, Farawo wangukambiya Mozesi ndi Aroni kuti: ‘Sokani. Tuwaniku kunu. Lutani kuti mukasopi Chiuta winu. Toni viŵetu vinu, kaningi!’

Mwezi uchiŵala, Ayisirayeli angutuwamu mucharu cha Ijipiti. Yiwu anguŵagaŵa mu mabanja kweniso mafuku. Penga anthulumi 600 sawuzandi, kweniso anthukazi ndi ŵana anandi. Ŵanthu anyaki anandi wo ŵenga Ayisirayeli cha nawu anguluta kuti akasopengi Yehova. Ayisirayeli angufwatulika!

Kuti akumbukengi mo Yehova wanguŵataskiya, chaka chechosi Ayisirayeli aryanga chakurya chapade nge cho angurya ŵe ku Ijipiti. Chakurya ichi chadanikanga kuti Pasika.

Farawo wati wavwa ŵaka kuti Ayisirayeli atuwamu mu Ijipiti, wangusintha maŵanaŵanu ngaki ngakuti Ayisirayeli akengi. Iyu wangulamula asilikali ŵaki kuti: ‘Toni magaleta ngangu ngosi ngankhondu ndipu tiyeni tiŵalondo! Mphanyi tinguŵazomereza cha kuti aluti.’ Iyu ndi asilikali ŵaki angwamba kulondo Ayisirayeli.

Yehova walongozganga ŵanthu ŵaki mwakugwirisiya ntchitu mutambu ndimusana kweniso motu ndi usiku. Iyu wanguŵalongozge ku Nyanja Yiyera ndipu wanguŵakambiya kuti azengi misasa.

Pavuli paki, Ayisirayeli anguwona kuti Farawo ndi asilikali ŵaki atiŵandondoloska. Yiwu ŵenga pakati pa Asilikali a ku Ijipiti ndi nyanja. Ayisirayeli angwamba kuliriya Mozesi kuti: ‘Tifwengi! Mphanyi ungutileka ku Ijipiti.’ Mozesi wanguti: ‘Mungawopanga cha. Lindizani kuti muwoni mo Yehova watitaskiyengi.’ Mozesi wangugomeza ukongwa Yehova, asi viyo?

Yehova wangukambiya Ayisirayeli kuti ajinthuwi mahema ngawu. Usiku wenuwu, Yehova wangundereza mtambu ndipu unguma pakati pa Ayisirayeli ndi Ijipiti. Ko ŵenga Ijipiti kwenga mudima kweni ko ŵenga Ayisirayeli kwenga ukweru.

Yehova wangukambiya Mozesi kuti watambasuliyi janja laki panyanja. Pavuli paki Yehova wanguchitisa kuti panyanja paputi chimphepu chikulu usiku wosi. Nyanja yingugaŵikana paŵi ndipu pakati pangupangika nthowa. Ayisirayeli angwenda pamalu ngakumila kuluta kusirya linyaki.

Asilikali aku Farawo angulondo Ayisirayeli wo ŵenga mamiliyoni. Yiwu angusere munyanja ndipu nawu ayendanga pamalu ngakumila. Pavuli paki Yehova wanguchitisa kuti asilikali wo atimbanyizgiki. Vingelengeli va magaleta ngawu vingwamba kukhwetuka. Asilikali angudaniriza kuti: ‘Tiyeni tituwemu! Yehova watiŵarwiya nkhondu.’

Yehova wangukambiya Mozesi kuti: ‘Tambasuliya janja laku panyanja.’ Nyengu yeniyo, maji nga munyanja ngangukumana so pakati ndipu nganguŵabiza. Farawo ndi asilikali ŵaki wosi angufwa. Pengavi yo wangupona.

Kusirya linyaki la nyanja, chigulu cha Ayisirayeli chingwamba kulumba Yehova ndi sumu yakuti: “Ndimumbiyi Yehova, pakuti iyu wakwezeka ukongwa.Waponya munyanja hachi ndi wakukwerapu waki.” Po ŵanthu ambanga, anthukazi avinanga ndipuso ambanga ting’oma. Weyosi wangukondwa ukongwa kuti ataskika.

Pati pajumpha pafupifupi myezi yiŵi kutuliya po Ayisirayeli angutaskikiya ku Ijipiti, yiwu angufika ku phiri la Sinayi ndipu anguzenga mahema ngawu kweniko. Yehova wangukambiya Mozesi kuti waluti pachanya pa Phiri ndipu wanguti: ‘Ndaŵataska Ayisirayeli. Asani andivwiyengi ndi kusunga marangu ngangu, ajengi ŵanthu ŵangu apade.’ Mozesi wangusika muphiri ndipu wangukambiya Ayisirayeli vo Yehova wangukamba. Kumbi yiwu angumukanji? Angumuka kuti: ‘Tichitengi vosi vo Yehova watikambiya kuti tichiti.’

Mozesi wanguluta so paphiri. Yehova wangukamba kuti: ‘Asani pajumpha mazuŵa ngatatu, ndikambisanengi namwi. Ukatcheŵeski ŵanthu kuti angazanga cha kufupi ndi Phiri la Sinayi.’ Mozesi wangusika ndi kukambiya Ayisirayeli kuti anozgeke kuti azivwisiyi vo Yehova wakhumbanga kuŵakambiya.

Pati pajumpha mazuŵa ngatatu, Ayisirayeli anguwona limphezi liching’anima kweniso mtambu ufipa paphiri. Yiwu anguvwa kuliya kwa limphezi ndi mbata. Pavuli paki, Yehova wanguza paphiri lo mumotu. Ayisirayeli anguchita mantha ukongwa ndipu anjekemiyanga. Phiri losi lasukunyikanga ndipu lenga ndi josi. Kuliya kwa mbata kwasazgikiyangaku. Pavuli paki, Chiuta wanguti: ‘Ini ndini Yehova. Mungasopanga achiuta anyaki cha.’

Mozesi wanguwere paphiri ndipu Yehova wangumupaska marangu kuti wakapaski ŵanthu. Marangu yanga, ngenga ngakukwaskana ndi mo atenere kumusope kweniso kuchitiya vinthu. Mozesi wangulemba marangu ngenanga ndipu pavuli paki wanguŵerenge Ayisirayeli. Yiwu angulayizga kuti: ‘Tichitengi vosi vo Yehova watikambiya kuti tichiti.’ Ayisirayeli angulayizga kwaku Chiuta. Kumbi yiwu angufiska vo angulayizga?

Yehova wangukambiya Mozesi kuti: ‘Uzi kwaku ini kunu kuphiri. Ndilembengi marangu ngangu pa mya ndipu ndikupasengi.’ Mozesi wanguluta kuphiri ndipu wanguja kweniko mazuŵa 40, usiku ndi msana. Pa nyengu yo wenga kweniko, Yehova wangulemba Marangu 10 pa mya yiŵi ndipu wanguyipereka kwaku Mozesi.

Pati pajumpha nyengu, Ayisirayeli aŵanaŵananga kuti Mozesi waŵathaŵa. Yiwu angukambiya Aroni kuti: ‘Tikhumba munthu munyaki kuti watilongozgengi. Utipangiyi chiuta!’ Aroni wanguti: ‘Ndipaseni golidi winu.’ Iyu wangusungunuwa golidi yo ndi kupanga chikozgu cha mwana wa ng’ombi. Ŵanthu wo angukamba kuti: ‘Mwana wa ng’ombi uyu ndiyu Chiuta widu yo wakutituzga ku Ijipiti!’ Yiwu angwamba kusopa mwana wa ng’ombi mwenuyu ndipuso anguchita phwandu. Kumbi yiwu angunangisa? Hinya, chifukwa angulayizga kuti asopengi Yehova pe kweni pa nyengu iyi anguleka kuchita vo angulayizga.

Yehova wanguwona vo vachitikanga ndipu wangukambiya Mozesi kuti: ‘Luta kwa Ayisirayeli. Yiwu aleka kundivwiya ndipu ayamba kusopa chiuta waboza.’ Mozesi wangusika muphiri ndipu wangupinga mya yiŵi.

Mozesi wati wafika kufupi ndi msasa, wanguvwa ŵanthu achimba. Iyu wanguŵawona achivina kweniso achigwadiya mwana wa ng’ombi. Mozesi wangukwiya ukongwa. Iyu wanguponya pasi mya yiŵi yo wangupinga ndipu yingusweka. Mozesi wanguphwanya mwaliŵiliŵi mwana wa ng’ombi mwenuyu. Pavuli paki, wangufumba Aroni kuti: ‘Kumbi ŵanthu angukambanji kuti upangi chinthu chiheni chenichi?’ Aroni wangukamba kuti: ‘Ungakwiyanga cha. Utiŵaziŵa umampha mo ŵanthu yaŵa aliri. Yiwu akhumbanga chiuta, ndichu chifukwa chaki ndinguto golidi yo angundipasa ndi kumuponya pamotu ndipu ndinguŵapangiya mwana wa ng’ombi.’ Aroni wakhumbikanga kuchita ivi cha. Mozesi wanguluta so kuphiri ndipu wangupempha Yehova kuti waŵagowoke ŵanthu yaŵa.

Yehova wangugowoke ŵanthu wo ŵenga akunozgeka kumuvwiya. Kumbi wawona chifukwa cho Ayisirayeli akhumbikiyanga kuvwiya vo Mozesi waŵakambiyanga?

Pa nyengu yo Mozesi wenga paphiri la Sinayi, Yehova wangumukambiya kuti wapangi chihema cho Ayisirayeli atingi amusopiyengemu. Yiwu atingi apingengi chihema chenichi kwekosi ko atingi akengi.

Yehova wangukamba kuti: ‘Kambiya ŵanthu kuti apereki vinthu vo angafiska kuti viwovyi pakupanga chihema.’ Ayisirayeli angupereka golide, siliva, mkuŵa, mya yakuzirwa ndipuso ndeŵereŵi. Yiwu angupereka so thonji, salu, vikopa va nyama ndi vinthu vinyaki vinandi. Ayisirayeli angupereka vinthu vinandi mwakuti Mozesi wanguŵakambiya kuti: ‘Mbwenu vakwana! Mungazanga ndi vinyaki so cha.’

Anthulumi ndi anthukazi anandi wo ŵenga ndi lusu, anguwovya pakupanga chihema. Yehova wanguŵapasa zeru zakugwiriya ntchitu yeniyi. Anyaki alukanga salu ndipu anyaki azidyoŵanga. Anyaki asemanga mya, aŵikanga golide ku vinthu ndipuso apanganga vinthu va mathabwa.

Ayisirayeli angupanga chihema nge mo Yehova wanguŵakambiya. Yiwu angupanga salu yakutowa yo yagaŵanga chihema kuti chije cha vipinda viŵi. Chipinda chinyaki chadanikanga kuti Malu Ngakupaturika ndipu chinyaki Malu Ngakupaturika Ukongwa. Muchipinda cha Malu Ngakupaturika Ukongwa mwenga bokosi laphanganu. Bokosi ili lingupangika ndi mathabwa nga vimiti va akeshiya ndi golidi. Muchipinda cha Malu Ngakupaturika mwenga chakuŵikapu nyali chagolidi, thebulu ndipuso guŵa lakuwotchiyapu vinthu vakununkhira. Pabwalu la chihema penga beseni la mkuŵa kweniso guŵa likulu la sembi. Bokosi laphanganu lakumbusanga Ayisirayeli za vo angulayizga kuti avwiyengi Yehova. Kumbi phanganu utiliziŵa? Phanganu ndi layizgu lapade.

Yehova wangusankha Aroni ndi ŵana ŵaki kuti ateŵetiyengi pa chihema nge asembi. Yiwu akhumbikanga kuphwere chihema kweniso kupereka sembi kwaku Yehova. Aroni pe yo wenga wasembi mura, ndiyu wazomerezekanga kusere muchipinda cha Malu Ngakupaturika Ukongwa. Waserengamu kamoza pachaka kuti wakapereki sembi chifukwa cha maubudi ngaki, nga banja laki ndipuso nga mtundu wosi wa Ayisirayeli.

Ayisirayeli angumaliza kuzenga chihema pati pajumpha chaka chimoza kutuliya po angutaskikiya ku Ijipiti. Sonu ŵenga ndi malu ngakusopiyamu Yehova.

Yehova wanguzaza chihema ndi unkhankhu waki ndipu wanguchitisa kuti pachanya pawonekengi mtambu. Asani mtambu we pachanya pa chihema, Ayisirayeli akhumbikanga kuja pamalu po ŵenga. Asani mtambu wayamba kukwere muchanya, aziŵanga kuti akhumbikanga kutuwapu. Yiwu akhumbikanga kuphwasuwa chihema ndi kulondo ko mtambu walutanga.

Ayisirayeli angutuwaku ku Phiri la Sinayi, ndipu angwenda muchipululu cha Parana ndi kuchifika kumalu ngo ngadanikanga kuti Kadeshe. Ŵe kweniko, Yehova wangukambiya Mozesi kuti: ‘Tuma anthulumi 12, mu fuku lelosi mutuwi munthulumi yumoza kuti akafufuzi charu cha Kanani, charu cho ndipasengi Ayisirayeli.’ Mwaviyo, Mozesi wangusankha anthulumi 12 ndipu wanguŵakambiya kuti: ‘Lutani ku Kanani ndipu mukafufuzi asani charu cho ntchamampha kulimamu vakurya. Mukawoni asani ŵanthu wo alivi nthazi pamwenga ŵe ndi nthazi ndipuso asani aja mumahema pamwenga mumatawuni.’ Mwaviyo, anthulumi 12 wo angutumika, anguluta ku Kanani. Pakati pawu penga Yoswa ndi Kalebe.

Pati pajumpha mazuŵa 40, anguweku ndipu angupinga nkhuyu, pomegiraneti ndi mphereska. Anthulumi 12 yaŵa angukamba kuti: ‘Charu cho ntchamampha kweni ŵanthu wo aja mwenimo mbanthazi ndipu matawuni ngawu nge ndi mipanda yitaliyitali.’ Pavuli paki Kalebe wanguti: ‘Tingaŵaphara nkhondu. Tiyeni tiluti, sonu viyo!’ Kumbi wachiziŵa chifukwa cho Kalebe wangukambiya viyo? Ntchifukwa chakuti iyu ndi Yoswa athembanga Yehova. Kweni anthulumi 10 angukamba kuti: ‘Tingalutanga cha! Ŵanthu a kweniko mbanthazi ukongwa ndipu ndi vinkhara. Isi tawonekanga nge azombi.’

Venivi vinguchitisa kuti Ayisirayeli achiti mantha. Yiwu angwamba kudandawula ndipu akambiyananga kuti: ‘Tiyeni tisankhi mulongozgi munyaki, tiwere ku Ijipiti. Tilutiyengenji kucharu ichi ndi kuchifwiya kweniko?’ Yoswa ndi Kalebe angukamba kuti: ‘Mungalekanga cha kuvwiya Yehova ndipu mungawopanga cha. Yehova wativikiliyengi.’ Ayisirayeli anguvwiya cha. Yiwu akhumbanga kubaya Yoswa ndi Kalebe.

Kumbi Yehova wanguchitanji? Iyu wangukambiya Mozesi kuti: ‘Chinanga kuti ndaŵachitiya vinthu vinandi Ayisirayeli kweni atindivwiya mbwenu cha. Mwaviyo, ajengi muchipululu kwa vyaka 40 ndipu afwiyengi mwenimo. Ŵana ŵawu pe kweniso Yoswa ndi Kalebe ndiwu amuja mucharu cho ndingulayizga kuti ndiŵapasengi.’

Pati pajumpha nyengu Ayisirayeli ŵe muchipululu, Kora, Datani, Abiramu ndi ŵanthu anyaki 250 angugalukiya Mozesi. Yiwu angumukambiya kuti: ‘Tavuka nawi! Ntchifukwa wuli utitilongozga kweniso ntchifukwa wuli Aroni ngwasembi mura? Yehova we ndi yiwi ndi Aroni pe cha kweni we ndi tosi.’ Ivi vingumukondwesa cha Yehova ndipu wanguwona kuti ŵanthu ŵenaŵa angumugalukiya!

Mozesi wangukambiya Kora ndi ŵanthu wo ŵenga ku chigaŵa chaku Kora kuti: ‘Mawa muzi ku chihema, muto mbali zakotchiyamu vakununkhira ndipu muyikemu libani. Yehova wazakutilongo yo wasankha.’

Mawa laki, Kora ndi anthulumi 250, anguluta kuchikumana ndi Mozesi ku chihema. Yiwu anguwotcha libani nge kuti nawu ŵenga a sembi. Yehova wangukambiya Mozesi ndi Aroni kuti: ‘Jipatuweni kwaku Kora ndi anthulumi wo wenawu.’

Chinanga kuti Kora wanguluta kwaku Mozesi kuchihema kweni Datani, Abiramu ndipuso mabanja ngawu angukana kuluta. Yehova wangukambiya Ayisirayeli kuti atuweku ku mahema ngaku Kora, Datani ndi Abiramu. Nyengu yeniyo, Ayisirayeli angutuwaku. Datani, Abiramu ndipuso mabanja ngawu anguma kubwalu kwa mahema ngawu. Mwamabuchibuchi charu chingugaŵikana ndipu chinguŵameza. Nanga ntchinthu wuli cho chinguchitikiya Kora ndi anthulumi 250 wo ŵenga pa chihema? Motu ungutuwa kuchanya ndipu unguŵawotcha.

Pavuli paki, Yehova wangukambiya Mozesi kuti: ‘Uto nthonga ku mulongozgi wa fuku lelosi ndipu ulembepu zina laki. Pa nthonga ya fuku la Levi ulembepu zina laku Aroni. Nthonga zosi uziyiki muchihema ndipu nthonga ya munthu yo ndasankha yimengi maluŵa.’

Mawa laki, Mozesi wangutuza nthonga zosi ndipu wangulongo alongozgi wo. Nthonga yaku Aroni yingume maluŵa kweniso yenga ndi vipasu vakufya va alimondi. Yehova wangulongo kuti Aroni ndiyu wenga wasembi mura yo iyu wangusankha.