Pangujumpha vyaka 10 kutuliya po Abrahamu ndi banja laki likulu anguyambukiya Msinji wa Efrate kuluta ku Kanani. Sara wawovyanga murumu waki ndi mtima wosi pa ulendu uwu wo akanga kumalu ngo aziŵangaku cha. Wanguchita viyo chifukwa wanguziŵa kuti wenga ndi udindu ukulu pakuwovya kuti chilatu chaku Yehova chakupanga mtundu ndi mphapu yapade chifiskiki. Kumbi Sara wenga ndi udindu wuli pa nkhani iyi? Iyu wabalanga cha ndipu pa nyengu iyi wenga ndi vyaka 75. Mwaviyo, Sara watenere kuti wajifumbanga kuti, ‘Kumbi chilatu chaku Yehova chifiskikengi wuli asani Abrahamu walekengi kuto munthukazi munyaki?’ Mphakuvwika asani ndimu waŵanaŵaniyanga ndipu panyaki wangutondeka kuzizipizga.

M’malu mwakuŵanaŵaniya vo wangusiya, Sara waŵanaŵaniyanga vamunthazi. Mwaviyo, wangulutirizga kuwovya murumu waki po ajanga umoyu wakusamasama. Iyu wamuwovyanga kujinthuwa mahema, kukhwema viŵetu ndi kuzenga so misasa. Sara wangukunthiyapu masuzgu nganyaki ndi vinthu vinyaki vo vingusintha pa umoyu waki. Yehova wanguwerezgapu so layizgu laki lo wangukambiya Abrahamu. Kweni pa nyengu iyi, Sara wangumuzumbuwa so cha.—Chiyambo 13:14-17; 15:5-7.

Pakumaliya, Sara wanguŵanaŵana kuti wakambiyi Abrahamu vo venga mumtima waki. Yeruzgiyani kuti mutimuwona wakambiya murumu waki mwakudandawula kuti: “Wona sonu! Yehova wandijala mphapu.” Pavuli paki wangupempha Abrahamu kuti wato kapolu waki munthukazi Hagara kuti wabaliyepu ŵana. Kumbi muŵanaŵana kuti Sara wanguvwa wuli mumtima po wakambiyanga murumu waki fundu iyi? Vo Sara wangukambiya Abrahamu, mazuŵa nganu vingaŵa vakuziziswa ukongwa. Kweni munyengu yakali, venga vakuziziswa cha asani munthurumi wato munthukazi wachiŵi, pamwenga mbiliya kuti wabaliyepu mwana kuti wazije wakuhala.b Kumbi Sara waŵanaŵananga kuti chilatu chaku Chiuta chakupanga mtundu kuziya mwaku Abrahamu chifiskikengi munthowa yeniyi? Tiziŵa cha, kweni Sara wenga wakunozgeka kupereka murumu waki. Kumbi Abrahamu wanguchita wuli? Bayibolu likamba kuti “wanguvwiya vo [Sara] wangukamba.”—Chiyambo 16:1-3.

Kumbi Yehova ndiyu wanguchitisa kuti Sara wapemphi murumu waki nkhani iyi? Awa. Vo Sara wanguchita vilongole limu kuti wawonanga vinthu mwakuliŵavu. Iyu waŵanaŵananga kuti Chiuta ndiyu wanguchitisa masuzgu ngo wakumananga nangu. Ndipu waziŵanga cha kuti Yehova wenga ndi nthowa yinyaki yakumalisiya masuzgu yanga. Kweni nthowa yaku Sara ndiyu yinguzisa masuzgu. Chinanga kuti venga viyo, vo wangupempha murumu waki vilongo kuti waŵanaŵaniyanga vakukhumba vaki pe cha. Kanandi ŵanthu adanjizga vakukhumba vawu kuluska vinyaki vosi. Mwaviyo, vo Sara wanguchita vakuziziswa ukongwa. Asani tikhumbisiska kudanjizga khumbu laku Chiuta, tiyezgengi chivwanu chaku Sara.