³ Yesaya wangukamba kuti: “Ehe, munthukazi mwali wakazuukanga wapapengi mwana munthurumi, ndi wadanengi zina laki Immanuele. . . . Mwana yo wenga wandaziŵi kukana uheni ndi kusankha umampha, charu cho cha ŵakaronga ŵaŵi wo utopa [Siriya ndi Yisraele] chikajoworekanga.” (Yes. 7:14, 16) Kanandi chigaŵa chakwamba cha uchimi uwu chikwaskana ndi kuwaku kwaku Mesiya, ndipu uwu mbuneneska nadi. (Mat. 1:23) Kweni chifukwa chakuti “ŵakaronga ŵaŵi,” karonga wa Siriya ndi wa Yisraele, awofyanga so Ayuda cha m’nyengu yaku Yesu, uchimi wakukwaskana ndi Immanuele utenere kuti ungufiskika kakwamba m’nyengu yaku Yesaya.

⁴ Pechendajumphi nyengu yitali kutuliya po Yesaya wangukambiya mazu ngenanga, muwolu waki wanguzuwuka ndipu wangubala mwana munthurumi zina laki Mahera-shalala-hashibazi. Akhumba mwana mwenuyu ndiyu Yesaya wangumudana zina lakuti “Immanuele.”a Mu nyengu yakali, nyengu zinyaki asani mwana wawaku ŵanthu amudananga zina linyaki ndi chilatu chakuti akumbukiyengepu chinthu chinyaki, kweni apapi ŵaki ndi abali ŵaki amudananga zina linyaki. (2 Sam. 12:24, 25) Kweni palivi ukaboni wewosi wakuti Yesu wadanikanga ndi zina lakuti Immanuele.—Ŵerengani Yesaya 7:14; 8:3, 4.