3. (a) Kumbi kamiti ko kangulembeka kuti “kaku Yuda,” kamiyanganji? (b) Ntchifukwa wuli “kamiti kaku Efurayemu” kamiyanga ufumu wa mafuku 10?

³ Yehova wangukambiya Ezekiyeli kuti wato timiti tiŵi. Kanyaki walembepu kuti “kaku Yuda,” ndipu kanyaki walembepu kuti “kaku Yosefi, kamiti kaku Efurayemu.” (Ŵerengani Ezekiyeli 37:15, 16.) Kumbi timiti teniti tamiyanganji? Kamiti ko wangulembapu kuti “kaku Yuda,” kamiyanga ufumu wa mafuku ngaŵi ngaku Yuda ndi Benjamini. Mafumu ngakutuliya mu fuku laku Yuda ndingu ngalamuliyanga mu ufumu wenuwu. Kweniso asembi akoliyananga ndi ufumu wenuwu, pakuti yiwu ateŵetiyanga pa nyumba yakusopiyamu yo yenga ku Yerusalemu. (2 Miko. 11:13, 14; 34:30) Mwaviyo, mu ufumu wa ku Yuda ndimu mwenga mafumu ngakutuliya mu banja laku Davidi kweniso asembi a mu fuku laku Levi. “Kamiti kaku Efurayemu” kamiyanga ufumu wa mafuku 10 wa ku Isirayeli. Ntchifukwa wuli kamiti kenaka kangulembeka kuti nkhaku Efurayemu? Ntchifukwa chakuti Yerobowamu yo wenga fumu yakwamba ya ufumu wa mafuku 10 wenuwu, wenga wakutuliya mu fuku laku Efurayemu. Pati pajumpha nyengu, fuku laku Efurayemu ndilu lenga ndi nthazi ukongwa mu Isirayeli. (Mara. 33:17; 1 Ŵakaro. 11:26) Ziŵani kuti mu ufumu wa mafuku 10 wa ku Isirayeli, mwengavi fumu yakutuliya mu banja laku Davidi pamwenga asembi a mu fuku laku Levi.

Yehova wangukambiya Ezekiyeli kuti pakamiti kamoza walembepu kuti “kaku Yuda,” ndipu pakamiti kanyaki walembepu kuti “kaku Yosefi, kamiti kaku Efurayemu.”

“kaku Yuda”

MU NYENGU YAKALI

Ufumu wa mafuku ngaŵi wa ku Yuda

MAZUŴA NGANU

Akhristu akusankhika

“kaku Yosefi, kamiti kaku Efurayemu”

MU NYENGU YAKALI

Ufumu wa mafuku 10 wa ku Isirayeli

MAZUŴA NGANU

Mbereri zinyaki