² Ezekiyeli wawona kuti msinji uwu usere mu Nyanja Yakufwa ndipu maji nga mu nyanja ngachira, vinthu vosi vo ve mwenimo vo vakwaskana ndi maji yanga visambuka vamoyu, muja somba zinandi ukongwa. Iyu wawona so vimiti vakupambanapambana vo vame mumphepeti mwa msinji wenuwu. Mwezi wewosi, vimiti venivi vipasa vipasu vamampha, ndipu mani ngaki ngatovya pa kuchizga. Ezekiyeli wati wawona vosi venivi, watenere kuti wenga ndi chimangu cha mumtima kweniso chilindizga. Kumbi chigaŵa cha chiwona chenichi cha nyumba yakusopiyamu, chang’anamuwanganji kwaku iyu kweniso anyaki wo wenga nawu ku ukapolu? Kumbi ching’anamuwanji kwaku isi mazuŵa nganu?

6. (a) Kumbi uchimi waku Ezekiyeli wenga ndi layizgu wuli? (b) Kumbi chiwona chenichi chenga so ndi uthenga wakutcheŵeska nuwu? (Wonani so mazu ngamumphata.)

⁶ Maji ngakupaska umoyu. Mu chiwona chaku Ezekiyeli, msinji waserenga mu Nyanja Yakufwa, ndipu wachizganga chigaŵa chikulu cha nyanja yeniyi. Wonani kuti maji yanga ngachizganga somba zinandi, mwakuti unandi wa somba izi zayanananga ndi zo zasanirikanga mu Nyanja Yikulu pamwenga kuti Nyanja ya Meditereniyani. Mwakuti bizinesi ya somba yayendanga ukongwa mumphepeti mwa Nyanja Yakufwa pakati pa matawuni ngaŵi ngo ngawoneka kuti ngenga patalipatali ukongwa. Mungelu wangukamba kuti: “Kwekosi ko msinji uluta, vinthu vosi vazamukuŵa vamoyu.” Kweni kumbi venivi ving’anamuwa kuti maji ngo ngatuliyanga munyumba yaku Yehova ngafikanga ku vigaŵa vosi va Nyanja Yakufwa? Awa. Mungelu wangukonkhoska kuti vigaŵa vinyaki va mathaŵali, maji ngakupaska umoyu ngamufikaku cha. Malu ngenanga ‘ngangujowoleka kuti ngaje malu ngamche.’b (Ezeki. 47:8-11) Mwaviyo, uchimi wenuwu wenga layizgu lakuti kusopa kwauneneska kwakuŵachizga so ŵanthu ndipu vinthu vamukwamba kuŵayende umampha. Kweni penga so uthenga wakutcheŵeska wakuti: Mbanthu wosi cha wo amulonde vitumbiku vaku Yehova kweniso wo amuchizgika.

Maji Ngakupaska Umoyu

MU NYENGU YAKALI: Yehova wanguŵatumbika ukongwa ŵanthu ŵaki akuvwiya chinanga mphanyengu yo chiŵerengeru chawu chingukuwa ukongwa, ndipu wanguŵatumbika mwauzimu

MAZUŴA NGANU: Mu paradayisu wauzimu, ŵanthu anandi ayanduwa ndi uneneska wa mu Bayibolu ndipu asambira vakukwaskana ndi Yehova kweniso akoliyana ndi ŵanthu ŵaki wo atimusopa mu nthowa yo iyu wazomereza

KUNTHAZI: Ŵanthu wo azamutaskika pa Aramagedoni, azamuja limoza ndi ŵanthu mamiliyoni nganandi wo azamuyuskika ndipu wosi azamulonde vitumbiku vinandi kutuliya kwaku Yehova

12. (a) Kumbi ntchinthu wuli cho chititisimikiziya kuti uthenga wauneneska upereka umoyu wauzimu ku ŵanthu? (b) Kumbi mu chiwona ichi mwe uthenga wuli wakutcheŵeska mazuŵa nganu? (Wonani so mazu ngamumphata.)

¹² Maji ngakupaska umoyu. Ezekiyeli wangukambirika kuti: “Kwekosi ko msinji uluta, vinthu vosi vazamukuŵa vamoyu.” Ŵanaŵaniyani mo uneneska ufikiya ŵanthu wosi wo ŵaza mucharu chidu chauzimu cho chikuwezekiyapu. Uneneska wa mu Bayibolu upereka umoyu wauzimu ku ŵanthu mamiliyoni nganandi a mtima wamampha. Kweni chiwona chenichi che ndi so uthenga wakutcheŵeska wa pa nyengu yaki wakuti: Mbanthu wosi cha wo alutirizga kwanja uneneska. Mwakuyanana ndi mathaŵali kweniso madambu nga mu Nyanja Yakufwa ngo ngenga mu chiwona chaku Ezekiyeli, nyengu yinyaki ŵanthu anyaki aleka kwanja uneneska wa mu Bayibolu ndipu atimuleka Yehova.c Tingazomerezanga cha kuti venivi vitichitikiyi!—Ŵerengani Dotoronome 10:16-18.