“[Ada] atuzgamu mphanda yeyosi mwaku ini yo yileka kupasa vipasu ndipu atowesa yeyosi yo yipasa vipasu, kuti yipasi vipasu vinandi. . . . Mwakuyanana ŵaka, yimwi namwi mungapasa cha vipasu kwambula kulutirizga kukoliyana ndi ini. Ini ndini chimiti cha mphereska ndipu yimwi ndimwi mphanda.”—Yohane 15:2-5.

Iyu wangukamba kuti: “Weyosi yo walutirizga kukoliyana ndi ini ndipu ini ndikoliyana nayu, wapasengi vipasu vinandi, chifukwa kwambula ini palivi cho mungachita.” Mwaviyo, akusambira akugomezgeka aku Yesu wo ŵenga nge “mphanda,” atingi apasengi vipasu vinandi asani aja ndi mijalidu yaku Yesu, apharazga vakukwaskana ndi Ufumu waku Chiuta ndipuso apanga akusambira anandi. Kumbi ntchinthu wuli cho chatingi chichitikengi asani munthu munyaki waleka kukoliyana ndi Yesu kweniso waleka kupasa vipasu? Yesu wangukamba kuti: “Asani munthu waleka kukoliyana ndi ini, watayika kubwalu.” Iyu wangukamba so kuti: “Asani mulutirizga kukoliyana ndi ini ndipu mazu ngangu ngalutirizga kuja mwaku yimwi, mungapempha chechosi cho mukhumba ndipu chazakukuchitikiyani.”—Yohane 15:5-7.