Fundu yikulu mu Bayibolu losi njakukwaskana ndi Ufumu waku Chiuta. Yehova wagwiriskiyengi ntchitu Ufumu wenuwu kuti wasinthi charu chosi kuti chije paradayisu nge mo wakhumbiyanga pakwamba. Kumbi Ufumu wenuwu ntchinthu wuli? Kumbi tiziŵa wuli kuti ukwamba kulamuliya? Kumbi ndi vinthu wuli vo wachitapu kali? Nanga ndi vinthu wuli vo wazamuchita kunthazi? Sambiru ili kweniso nganyaki ngaŵi nga panthazi, ngamukengi mafumbu ngenanga.

1. Kumbi Ufumu waku Chiuta ntchinthu wuli, nanga Fumu yaki ndiyani?

Ufumu uwu ndi boma lo Yehova Chiuta wakujalikiska. Fumu ya Ufumu wenuwu ndi Yesu Khristu, ndipu walamuliya kutuliya kuchanya. (Mateyu 4:17; Yohane 18:36) Bayibolu likamba kuti Yesu “wazamulamuliya nge Fumu kwamuyaya.” (Luka 1:32, 33) Nge Fumu ya Ufumu waku Chiuta, Yesu wazamulamuliya weyosi pacharu chapasi.

2. Mbayani wo alamuliya ndi Yesu?

Yesu walamuliya yija cha. Ŵanthu anyaki “akutuliya mu fuku lelosi, lilimi lelosi, [ndipuso] mtundu wewosi . . . azamulamuliya charu chapasi nge mafumu.” (Chivumbuzi 5:9, 10) Kumbi mbalinga wo amulamuliya ndi Khristu? Kutuliya po Yesu wanguziya pacharu chapasi, pe Akhristu mamiliyoni nganandi wo atimulondo. Kweni mbakhristu 144,000 pe wo amulamuliya limoza ndi Yesu kuchanya. (Ŵerengani Chivumbuzi 14:1-4.) Akhristu anyaki wosi azamuja zika za Ufumu wenuwu pacharu chapasi.—Salimo 37:29.

3. Kumbi Ufumu waku Chiuta upambana wuli ndi maboma nga ŵanthu?

Chinanga kuti ŵanthu anyaki wo alamuliya ayesesa kuchita vinthu vamampha, kweni atondeka kufiska vosi vo akhumba. Asani yiwu alamuliyapu, patuza munyawu yo watiŵatoliyaku kanthu cha ŵanthu. Kweni palivi munthu yo wazamusere mumalu mwaku Yesu yo ndi Fumu ya Ufumu waku Chiuta. Chiuta wakujalikiska “ufumu wo wazamubwangandulika cha.” (Daniyeli 2:44) Yesu wazamulamuliya charu chosi kwambula kwanjiya. Iyu ngwachanju, ngwalisungu kweniso watanja urunji, ndipu wazamusambiza ŵanthu kuti nawu achitiyengi anyawu vinthu mwachanju, mwalisungu kweniso mwaurunji.—Ŵerengani Yesaya 11:9.

4. Boma lanthazi ukongwa ndilu lazamulamuliya charu chosi

Yesu Khristu we ndi mazaza ngosi ngakulamuliya kuluska munthu weyosi yo wakulamuliyapu. Ŵerengani Mateyu 28:18, pavuli paki kambiskanani fumbu ili:

• Kumbi mazaza ngaku Yesu ngapambana wuli ndi nga munthu weyosi yo wakulamuliyapu pacharu?

Maboma nga ŵanthu ngasinthasintha, ndipu munthu weyosi yo walamuliya, waja ndi mazaza pa kachigaŵa kamanavi waka kacharu. Kumbi ndimu viliri ndi Ufumu waku Chiuta? Ŵerengani Daniyeli 7:14, pavuli paki kambiskanani mafumbu yanga:

• Ntchifukwa wuli fundu yakuti Ufumu waku Chiuta “wazamubwangandulika cha” njakukondwesa ukongwa?

• Ntchifukwa wuli tikondwa kuziŵa kuti Ufumu wenuwu wazamulamuliya charu chosi?

5. Maboma nga ŵanthu ngakhumbika kutuzgikapu

Ntchifukwa wuli Ufumu waku Chiuta wazamutuzgapu maboma nga ŵanthu? Woneriyani VIDIYO, pavuli paki kambiskanani fumbu lo le mumphata.

VIDIYO: Kachigaŵa ka Vidiyo Yakuti Kumbi Ufumu Waku Chiuta Ntchinthu Wuli? (1:41)

• Kumbi ndi vinthu wuli vo vachitika pacharu chifukwa cha maulamuliru nga ŵanthu?

Ŵerengani Wakutawula 8:9, pavuli paki kambiskanani mafumbu yanga:

• Kumbi muwona kuti mphakwenere kuti Ufumu waku Chiuta utuzgepu nadi maboma nga ŵanthu? Ntchifukwa wuli muwona viyo?

6. Wo alamuliya mu Ufumu waku Chiuta atitivwisa

Yesu yo ndi Fumu yidu ‘watitivwiya lisungu pa vinthu vo tinangisa’ chifukwa chakuti wakujapu nge munthu pacharu. (Aheberi 4:15) Yehova wakusankha anthulumi ndi anthukazi akugomezgeka akukwana 144,000 kutuliya “mu fuku lelosi, lilimi lelosi, mtundu wewosi ndipuso charu chechosi,” kuti akalamuliyi limoza ndi Yesu.—Chivumbuzi 5:9.

• Kumbi muchiskika cha kuziŵa kuti Yesu kweniso wo alamuliya nayu aziŵa umampha mo tivwiya ndipuso masuzgu ngo tikumana nangu? Ntchifukwa wuli mwamuka viyo?

7. Ufumu waku Chiuta we ndi marangu ngamampha ukongwa

Maboma nga ŵanthu ngapanga marangu ngo aŵanaŵana kuti ngawovyengi kweniso ngavikiliyengi ŵanthu ŵawu. Ufumu waku Chiuta nawu we ndi marangu ngo ŵanthu ŵaki akhumbika kulondo. Ŵerengani 1 Akorinto 6:9-11, pavuli paki kambiskanani mafumbu yanga:

• Kumbi muwona kuti pacharu vinthu vazamukuŵa wuli asani ŵanthu wosi aziyamba kulondo marangu ngaku Chiuta?a

• Kumbi muwona kuti mphakuvwika kuti Yehova wakhumba kuti ŵanthu wo alamulika ndi Ufumu waki alondongi marangu ngenanga? Ntchifukwa wuli muwona viyo?

• Nanga ndi vinthu wuli vo vilongo kuti ŵanthu wo aleka kuvwiya marangu ngenanga angasintha?—Wonani vesi 11.

KUMBI MWASAMBIRANJI?

Ufumu waku Chiuta ndi boma chayilu lakuchanya lo lazamulamuliya charu chosi chapasi.

Kuweriyamu

• Kumbi Fumu ya Ufumu waku Chiuta ndiyani, nanga walamuliya limoza ndi ayani?

• Kumbi Ufumu waku Chiuta upambana wuli ndi maboma nga ŵanthu?

• Kumbi ndi marangu nanga ngo Yehova wakhumba kuti ŵanthu wo alamulika ndi Ufumu waki alondongi?

FUFUZANI

Wonani malu ngo Yesu wangukamba kuti kusanirika Ufumu.

“Kumbi Ufumu Waku Chiuta we Mumtima Winu?” (Nkhani ya pa webusayiti)

Ntchifukwa wuli Akaboni aku Yehova asankha kuja akugomezgeka ku Ufumu waku Chiuta mumalu mwakuja akugomezgeka ku maboma nga ŵanthu?

Te Akujipereka ku Ufumu waku Chiuta (1:43)

Wonani vo Bayibolu likamba vakukwaskana ndi ŵanthu 144,000 wo Yehova wakusankha kuti akalamuliyi ndi Yesu.

“Kumbi Mbayani wo Aluta Kuchanya?” (Nkhani ya pa webusayiti)

Kumbi ntchinthu wuli chinguchitiska munthukazi munyaki yo wenga mujeri kuti wayambi kugomezga kuti ndi Chiuta pe yo wanganozga vinthu kuti pacharu chosi paje urunji?

“Mo Ndinguziŵiya Yo Wazamumalisa Vinthu Vambula Urunji” (Jani Masu!, November 2011)

Yesu wangukamba kuti akusambira ŵaki atenere kuja “a charu cha.” (Yohane 15:19) Ivi ving’anamuwa kuleka kuchitaku ndali kweniso nkhondu. Kukamba uneneska vakusuzga ukongwa kuti munthu waleki kuselere ndali. Ŵanthu anyaki angatinena chifukwa chakuti tichitaku nawu cha vandali. Kumbi tingachita wuli kuti tilekengi kuchitaku vandali ndi kulutirizga kuja akugomezgeka kwaku Yehova Chiuta?

1. Kumbi Akhristu auneneska atingawona wuli maboma nga ŵanthu?

Akhristu auneneska atumbika boma. Tilondo vo Yesu wangukamba kuti, “perekani vinthu vaku Kayisara kwaku Kayisara.” Venivi ving’anamuwa kuvwiya marangu nga mucharu cho tija, nge kupereka msonkhu. (Mariko 12:17) Bayibolu likamba kuti maboma nga ŵanthu ngalamuliya chifukwa chakuti Yehova wangazomereza. (Aroma 13:1) Mwaviyo, tiziŵa kuti ulamuliru waku Chiuta ngwapachanya ukongwa kuluska maboma nga ŵanthu. Isi tilindizga kuti Chiuta widu ndi Ufumu waki wakuchanya ndiyu watuzgengepu masuzgu ngosi ngo taŵanthu tikumana nangu.

2. Kumbi tingalongo wuli kuti tichitaku cha vandali?

Nge mo Yesu wanguchitiya, nasi tichitaku cha vandali. Ŵanthu ŵati awona chakuziziswa chinyaki cho Yesu wanguchita, akhumbanga kumuvwalika ufumu, kweni iyu wangukana. (Yohane 6:15) Ntchifukwa wuli wangukana? Pati pajumpha nyengu iyu wangukamba kuti, “Ufumu wangu ngwacharu ichi cha.” (Yohane 18:36) Nge akusambira aku Yesu, pe nthowa zinandi zo tilongore kuti tichitaku cha vandali. Mwakuyeruzgiyapu, tichitaku cha nkhondu. (Ŵerengani Mika 4:3.) Titumbika mbendera ndipuso vinthu vinyaki va boma, kweni titivisopa cha. (1 Yohane 5:21) Tisapota pamwenga kususka chipani chechosi cha pamwenga munthu weyosi wandali. Asani tichita venivi tilongo kuti te akugomezgeka ku boma laku Chiuta pamwenga kuti Ufumu waki.

SAMBIRANI VINANDI

3. Akhristu auneneska achitaku cha vandali

Yesu ndi akusambira ŵaki akutisiliya chakuwoniyapu. Ŵerengani Aroma 13:1, 5-7 ndipuso 1 Peturo 2:13, 14. Pavuli paki, woneriyani VIDIYO ndi kukambiskana mafumbu yanga:

VIDIYO: Akhristu Auneneska Achitaku Cha Vandali—Chigaŵa 1 (4:28)

• Ntchifukwa wuli tikhumbika kutumbika maboma nga ŵanthu?

• Kumbi tingalongo wuli kuti tivwiya ulamuliru wa maboma ngenanga?

Asani kwe nkhondu, vyaru vinyaki vikamba kuti vichitaku cha nkhondu yo, kweni vitovya mbwenu magulu ngo ngayambana. Kweni kumbi kuleke limu kuchitaku vandali kung’anamuwanji? Ŵerengani Yohane 17:16. Pavuli paki, woneriyani VIDIYO ndi kukambiskana fumbu ili:

VIDIYO: Akhristu Auneneska Achitaku Cha Vandali—Chigaŵa 2 (3:11)

• Kumbi kuleka kuchitaku vandali kung’anamuwanji?

Kweni kumbi mungachita wuli asani akulamuliya a boma akhumba kuti muchiti vinthu vo visuskana ndi marangu ngaku Chiuta? Ŵerengani Machitidu 5:28, 29. Pavuli paki, woneriyani VIDIYO ndi kukambiskana mafumbu yanga:

VIDIYO: Akhristu Auneneska Achitaku Cha Vandali—Chigaŵa 3 (1:18)

• Kumbi mungachita wuli asani marangu nga ŵanthu ngasuskana ndi marangu ngaku Chiuta?

• Kumbi ndi vakuchitika nivi vo muwona kuti Akhristu akhumbika cha kuvwiya akulamuliya?

4. Maŵanaŵanu ndipuso vakuchita vinu vilongongi kuti museleriyapu cha vandali

Ŵerengani 1 Yohane 5:21. Pavuli paki, woneriyani VIDIYO ndi kukambiskana mafumbu yanga:

VIDIYO: Akhristu Auneneska Akhumbika Kuja ndi Chiganga—Kuti Alekengi Kuchitaku Nkhondu Pamwenga Ndali (2:49)

• Nge po tawone mu vidiyo, ntchifukwa wuli Ayenge wangusankha kuleka kusere chipani chechosi chandali pamwenga kugwadiya mbendera ndi vinyaki va viyo?

• Kumbi muwona kuti wangusankha umampha?

Kumbi ndi vinthu vinyaki nivi vo vingachitiska kuti tiyambi kuchitaku vandali? Woneriyani VIDIYO, pavuli paki kambiskanani mafumbu yanga:

VIDIYO: Vo Tisambira mu Chigongwi cha Alinda—Lutirizani Kuleka Kuseleriyapu mu va Charu (5:16)

• Kumbi tingachita wuli kuti tileki kuselere ndali asani tiwonere bola kweniso masaza nganyaki nga matimu ngakutuliya vyaru vakupambana?

• Kumbi tingachita wuli kuti tileki kuselere ndali chinanga kuti tingakwaskika ndi vo andali akhumba kuchita?

• Kumbi vinthu vo tingavwa pa wayilesi, pa TV ndipuso kutuliya ku ŵanthu wo ticheza nawu, vingatichitiska wuli kuti tiyambi kuselere vandali?

KUMBI MWASAMBIRANJI?

Akhristu ayesesa kuleka kuselere ndali zacharu mu vakuchita vawu, vo alongoro kweniso vo aŵanaŵana.

Kuweriyamu

• Kumbi ndi vinthu wuli vo tikhumbika kupereka ku boma?

• Ntchifukwa wuli tikhumbika cha kuchitaku vandali?

• Kumbi ndi vinthu nivi vo vingachitiska kuti tiyambi kuchitaku vandali?

FUFUZANI

Kumbi ndi vinthu wuli vo tikhumbika kuleka kuti tileki kuselere vandali?

Yehova Wakutijowopu Cha (3:14)

Kumbi mabanja ngangachitanji kuti nganozgeke limu vakuchitika vo vingachitiska kuti aselere vandali?

Tingasereriyangamu cha mu Vacharu Asani te Pagulu (4:25)

Kumbi ulemu wo munthu walonde chifukwa chakumiya charu chaki ndiwu ngwakukhumbika ukongwa?

“Palivi Cho Chiuta Wangatondeka Kuchita” (5:19)

Wonani vo mungachita kuti mulutirizgi kuleka kuja a charu asani musankha ntchitu.

“Weyosi Wazamunyamuwa Katundu Waki” (Chigongwi cha Alinda, March 15, 2006)