Yehova ndi Chiuta yo wakhumba kuti vinthu viyendengi mwandondomeku. (1 Akorinto 14:33) Venivi vilongo kuti ŵanthu ŵaki nawu akhumbika kuwonesesa kuti achita vinthu mwandondomeku. Kumbi vinthu vitenda wuli mumpingu wa Akaboni aku Yehova? Nanga isi tingawovya wuli kuti vinthu vilutirizgi kwenda umampha mumpingu?

1. Kumbi mutu wa mpingu ndiyani?

‘Khristu ndiyu mutu wa mpingu.’ (Aefeso 5:23) Chinanga kuti iyu we kuchanya, kweni wawonere ntchitu zosi zo ŵanthu aku Yehova achita pacharu chosi chapasi. Yesu wakusankha kagulu ka ŵanthu amanavi ko kaziŵika kuti “kapolu wakugomezgeka ndi wazeru.” Ŵanthu a mukagulu kenaka aziŵika so kuti Wupu Wakulongozga ndipu wosi mbara mumpingu. (Mateyu 24:45-47) Wupu Wakulongozga wenuwu ndiwu upereka ulongozgi ku mipingu yosi nge mo akutumika ndipuso ŵara ku Yerusalemu achitiyanga mu nyengu yakali. (Machitidu 15:2) Kweni anthulumi ŵenaŵa ndiwu alongozgi a gulu lidu cha. Yiwu athemba Yehova kweniso aŵerenga Mazu ngaki kuti aziŵi vo angachita ndipuso avwiya ulongozgi waku Yesu.

2. Kumbi ŵara mumpingu agwira ntchitu wuli?

Ŵara mbakhristu akukhwima mwauzimu wo agwiriskiya ntchitu Malemba pakusambiza kweniso aphwere ŵanthu aku Yehova mwakuŵawovya ndi kuŵachiska. Yiwu alipirika ndalama cha. Mumalu mwaki, yiwu ateŵete ‘mwakukhumbisiska pa masu paku Chiuta; kuti asaniriyepu phindu lachinyengu cha, kweni ndi mtima wosi.’ (1 Peturo 5:1, 2) Ŵara ŵe ndi ateŵeti akovya wo atiŵawovyaku ntchitu zinyaki. Kweni ateŵeti akovya ŵenaŵa nawu atazija so ŵara asani afiska vo Malemba ngakamba.

Wupu Wakulongozga usankha ŵara anyaki kuti aje akuwonere madera. Yiwu atende mipingu yakupambanapambana kuti apereki ulongozgi kweniso ayichiski. Akuwonere madera asankha abali wo afiska vo Malemba ngakamba kuti aje ŵara ndipuso ateŵeti akovya.—1 Timote 3:1-10, 12; Tito 1:5-9.

3. Kumbi Kaboni weyosi wagwira ntchitu wuli pa mpingu?

Weyosi mumpingu ‘wathamika zina laku Yehova’ mwa kukamba nkhani kweniso kumukapu pa maunganu ndipuso kupharazga mwakukoliyana ndi mo vinthu viliri pa umoyu waki.—Ŵerengani Salimo 148:12, 13.

SAMBIRANI VINANDI

4. Yesu ndi mulongozgi walisungu

Yesu watitipempha kuti tichiti chinthu chinyaki. Ŵerengani Mateyu 11:28-30, pavuli paki kambiskanani fumbu ili:

• Kumbi Yesu ndi mulongozgi wamtundu wuli, nanga wakhumba kuti isi tivwengi wuli?

VIDIYO: Vo Ŵara Anguchita ku Nepal Kwati Kwachitika Chidilirisi (4:56)

Bayibolu likamba mwakuvwika umampha mo ŵara atenere kuchitiya vinthu.

Ŵerengani Yesaya 32:2 ndipuso 1 Peturo 5:1-3, pavuli paki kambiskanani mafumbu yanga:

• Kumbi mutuvwa wuli kuziŵa kuti ŵara atesesa kusisipuwa anyawu nge mo Yesu wachitiyanga?

• Kumbi ndi nthowa zinyaki nizi zo ŵara alongore kuti ayezga Yesu?

5. Ŵara alongo chakuwoniyapu chamampha

VIDIYO: Ŵara Mujengi Panthazi! (7:39)

Yesu wakukamba mo ŵanthu wo alongozga mumpingu atenere kuchitiya vinthu. Ŵerengani Mateyu 23:8-12, pavuli paki kambiskanani fumbu ili:

• Kumbi mwawona mphambanu wuli pakati pa vo Bayibolu likamba kuti ŵara achitengi ndi vo alongozgi avisopa achita?

1. Ŵara asambira Mazu ngaku Chiuta kuti aje nayu pa ubwezi wakukho ndipuso atovya mabanja ngawu

2. Ŵara aphwere weyosi mumpingu

3. Ŵara apharazga

4. Ŵara asambiza. Kweniso agwiraku ntchitu zinyaki pa mpingu

6. Tikhumbika kukoliyana ndi ŵara

Bayibolu lititikonkhoske chifukwa chakuvwika umampha cho tikhumbikiya kukoliyana ndi ŵara. Ŵerengani Aheberi 13:17, pavuli paki kambiskanani mafumbu yanga:

• Bayibolu likamba kuti tivwiyengi kweniso tijithereskengi kwaku wo alongozga, kumbi muwona kuti venivi vakuvwika? Ntchifukwa wuli muwona viyo?

Ŵerengani Luka 16:10, pavuli paki kambiskanani fumbu ili:

• Ntchifukwa wuli tikhumbika kukoliyana ndi ŵara chinanga pangaŵa pa tinthu to tiwona kuti nthimanatimana?

KUMBI MWASAMBIRANJI?

Yesu ndiyu mutu wa mpingu. Tichita vinthu mwakukoliyana ndi ŵara chifukwa atitisisipuwa ndipuso atitisambiza kuziya mu vakuwoniyapu vawu.

Kuweriyamu

• Kumbi mutu wa mpingu ndiyani?

• Kumbi ŵara atiwuwovya wuli mpingu?

• Kumbi munthu weyosi yo wasopa Yehova wagwira ntchitu wuli mumpingu?

FUFUZANI

Wonani ukaboni wakuti Wupu Wakulongozga kweniso ŵara wosi atiŵafipiya mtima ukongwa Akhristu anyawu mazuŵa nganu.

Kuchiska Abali pa Nyengu yo Boma Lakaniza Ntchitu Yidu (4:13)

Wonani ntchitu zo akuwonere madera agwira.

Umoyu wa Wakuwonere Dera yo Wateŵete Kudera Lakumuzi (4:51)

Ŵerengani vakukwaskana ndi ntchitu zo anthukazi agwira mumpingu.

“Kumbi Akaboni aku Yehova Anthukazi Nawu Apharazga?” (Chigongwi cha Alinda, September 1, 2012)

Wonani mo ntchitu yo ŵara agwira yichiskiya Akhristu anyawu.

“Ŵara Achikhristu ‘Agwira Nasi Nchitu Kuti Tikondwengi’”(Chigongwi cha Alinda, January 1, 2013)

1. Kumbi Bayibolu litiŵapaska ulongozgi wuli anthulumi akuto?

Yehova wakuŵika munthulumi kuti ndiyu wajengi mutu wa banja. (Ŵerengani Aefeso 5:23.) Yehova wakhumba kuti munthulumi wasankhengi vakuchita vo vingawovya banja laki. Bayibolu likambiya anthulumi akuto kuti: “Lutirizgani kwanja awolu ŵinu.” (Aefeso 5:25) Kumbi venivi ving’anamuwanji? Munthulumi wachanju wachita vinthu mwaulemu ndi muwolu waki, kaya angaŵa kunyumba ndipuso pagulu. Iyu watimuvikiliya ku vinthu vakofya kweniso wayesesa kumuphwere. (1 Timote 5:8) Kuluska vosi, watimuwovya kuti waje pa ubwezi wakukho ndi Yehova. (Mateyu 4:4) Mwakuyeruzgiyapu, wangapemphera ndi kuŵerenge nayu limoza Bayibolu. Munthulumi wangalutirizga kuja pa ubwezi wakukho ndi Yehova, asani wayesesa kumuphwere mwachanju muwolu waki.—Ŵerengani 1 Peturo 3:7.

Yesu ndiyu Mutu wa mpingu wa Chikhristu. (Aefeso 5:23) Nge mutu, mazuŵa nganu Yesu walongozga Akhristu pacharu chapasi mwakugwiriskiya ntchitu “kapolu wakugomezgeka ndi wazeru.” (Ŵerengani Mateyu 24:45.) Yesu Khristu ndiyu wakusankha “kapolu” mwenuyu ndipu wakumupaska mazaza ngakusankha vakuchita vinyaki. Chinanga kuti veviyo, kapolu mwenuyu wakhumbika kumuvwiya mbwenu Yesu Khristu ndipuso kuteŵete abali aku Khristu. Kumbi kapolu mwenuyu ndiyani? Nanga watitiphwere wuli?