Kumbi Vakuchitika Ivi, Nchilatu Chaku Chiuta?

ŴERENGANI nyuzipepala yeyosi. Woneriyani TV pamwenga vwisiyani wayilesi. Muvwengi nkhani zinandi zakukwaskana ndi kuswa marangu, nkhondu, ndipuso uchigeŵenga! Ŵanaŵaniyani so masuzgu nginu. Akhumba vinthu nge matenda pamwenga nyifwa ya wakwanjiwa winu vitikuchitiskani kuti musuzgikengi maŵanaŵanu. Mungajivwa nge mo munthu wamampha Jobu wangujivwiya, iyu wanguti, “masuzgu ngatindiziya ndipu ndilivi chipumulu.”—Jobu 3:26.

Jifumbeni kuti:

Kumbi nchilatu chaku Chiuta kuti ivi vindichitikiyengi kweniso kuti vichitikiyengi mtundu wosi wa ŵanthu?
Kumbi ndi nunkhu ko ndingasaniya chovyu kuti ndimalani ndi masuzgu ngo ndikumana nangu?
Kumbi pe chilindizga chechosi chakuti tazamuja mwachimangu pacharu chapasi?

Bayibolo limuka mwakukhorweska mafumbu yanga.

BAYIBOLO LISAMBIZA KUTI CHIUTA WAZAMUSINTHA VINTHU IVI PA CHARU.

“Waleskengeku sozi losi ku masu ngawu, ndi nyifwa kuti yikaŵangapu so cha; chingana nchitenje, chingana ndi nkhuta, chingana mburwirwi, kuti vikaŵangapu so cha.”—Chivumbuzi 21:4
“Ŵakupunduka ŵakaurukanga, uli ndi mphoyo.”—Yesaya 35:6
“Masu nga ŵachiburumutiya ngakabanukanga.”—Yesaya 35:5
“Wosi ŵamu miunda . . . ŵakatuwangamu.”—Yohane 5:28, 29
“Pakaŵangavi wakujamu mu muzi wo yo wakakambanga kuti, ‘Ndatama.’”—Yesaya 33:24
“Mu charu muŵi kurya kwakuzara.”—Sumu 72:16

Vinthu visintha pacharu kuti vije nge mo Chiuta wakhumbiya: Akukota awere ku unyamata, akutama achizgika ndipu achibulumutiya aleresa, akufwa ayusika, chakurya nchinandi

YANDUWANI NDI VO BAYIBOLO LISAMBIZA

Mungathaŵiriyanga cha kuwona nge kuti vo valembeka mu mapeji ngakuvuli uku, ndi maŵanaŵanu waka ngakukhumba vinthu vamampha. Chiuta walayizga kuti wazamufiska vinthu ivi, ndipu Bayibolo likonkhoska mo iyu wazamuchitiya.

Ŵanthu ŵaŵi asambira Bayibolu mwakugwirisiya ntchitu buku lakuti, Bayibolu Lisambizanji

Kweni Bayibolo ndakwanduliska so munthowa zinandi. Likonkhoska nthowa yo yingakuwovyani kuti mukondwi ndi umoyu wakukhorweska nadi chinanga ndi mazuŵa nganu. Aŵanaŵaniyani dankha vinthu vo vitikufipiskani mtima kweniso masuzgu nginu. Vinthu ivi vingasazgapu kusoŵa ndalama, masuzgu nga m’banja, kutamatama pamwenga nyifwa ya wakwanjiwa winu. Bayibolo lingakuwovyani mo mungachitiya ndi masuzgu ngo mukumana nangu mazuŵa nganu ndipu lingakusisipuwani mwa kumuka mufumbu nge yanga:

Kumbi nchifukwa wuli tisuzgika?
Kumbi tingachita wuli ndi vinthu vo vititifipiska mtima paumoyu widu?
Kumbi tingachitanji kuti banja lidu lije ndi umoyu wakukondweska?
Kumbi nchinthu wuli cho chichitika asani munthu wafwa?
Kumbi akwanjiwa ŵidu wo akufwa tazakuŵawona so?
Kumbi tingasimikizga wuli kuti Chiuta wazamufiska vo walayizga kuzichita kunthazi?

Ukaboni wakuti mukhumba kuziŵa vo Bayibolo lisambiza ngwakuti sonu mwayamba kuŵerenga buku ili. Buku ili likuwovyeningi. Wonani kuti ndimi yeyosi ye ndi fumbu laki pakumaliya pa peji. Ŵanthu mamiliyoni nganandi akondwa kugwiriskiya nchitu nthowa ya mafumbu ndi kwamuka pakusambira Bayibolo ndi Akaboni aku Yehova. Te ndi chigomezgu chosi kuti namwi mukondwengi. Chiuta wakutumbikeni po mukondweskeka ndipuso kukhorwa pakusambira vo Bayibolo lisambiza weniukongwa!

LIZIŴENI UMAMPHA BAYIBOLO LINU

BAYIBOLO likupangika ndi mabuku kweniso makalata ngakukwana 66. Mabuku yanga ngakugaŵika mu machaputala ndi mavesi kuti tingasaniyengi mwambula kusuzga. Po paŵikika lemba mu buku ili, nambala yakwamba yimiya chaputala cha buku pamwenga kalata ya m’Bayibolo, ndipu nambala yachiŵi yimiya vesi. Mwakuyeruzgiyapu, asani palembeka kuti “2 Timote 3:16,” ving’anamuwa kalata yachiŵi yakuluta kwaku Timote, chaputala 3 vesi 16.

Muswelengi cha kuliziŵiriya Bayibolo asani mujula ndi kuŵerenga malemba ngo ngaŵikika m’buku ili. Kweniso mungachita umampha ukongwa kuja ndi ndondomeku yakuŵerenge Bayibolo zuŵa lelosi. Asani mungaŵerenga machaputala ngatatu mpaka ngankhondi zuŵa lelosi, mumalizengi kuŵerenga Bayibolo losi lamphumphu mu chaka chimoza.