Nkharu Yakutowa Ndipuso Ulemu Ukulu Vingawovya yo Mukutorana Nayu Kuti Wasambiri Uneneska

Munthulumi wangayamba kusambira uneneska asani muwolu waki yo ndi Mkhristu we ndi nkharu yamampha. Kuti venivi vichitiki, iyu wangakhumbika kukunthiyapu kwa vyaka vinandi. (1 Petu. 2:21-23; 3:1, 2) Asani alumu ŵinu atikuchitiyani vinthu vambula urunji, lutirizgani kuthereska vinthu viheni mwakuchita vamampha. (Aro. 12:21) Vo mungakamba vingamuwovya viŵi cha mulumu winu kuti wasinthi. Kweni vakuchita vinu vamampha ndivu vingamuwovya ukongwa.

Muyesesengi kuwona vinthu nge mo wativiwone munthu yo mukutorana nayu. (Afi. 2:3, 4) Mulongongi kuti mutimuŵanaŵaniya kweniso kuti mutimuchitiya lisungu ndipu muyesesengi kufiska udindu winu nge munthukazi wakuyirwa. Mumuvwisiyengi mulumu winu asani walongoro namwi. (Yako. 1:19) Muchitengi vinthu mwakuzika kweniso mulongongi kuti mutimuyanja. Vingachitika kuti munthu yo mukutorana nayu watikuchitiyani lisungu cha pamwenga kukutumbikani, kweni ziŵani kuti Yehova wawonga kugomezgeka kwinu.—1 Petu. 2:19, 20.

WONERIYANI VIDIYO YAKUTI YEHOVA WATITIPASKA NTHAZI KUTI TINYAMUWI KATUNDU WIDU, PAVULI PAKI MUKANI MAFUMBU YANGA:

• Kumbi vinthu venga wuli pa umoyu waku Grace Li wati wayirwa ŵaka?

• Kumbi ntchinthu wuli cho chingumuchitiska kuti wasambiri uneneska?

• Kumbi Mzichi Li wangukunthiyapu wuli masuzgu ngo wangukamana nangu wati wabatizika?

• Kumbi Mzichi Li wamupempheriyanganji mulumu waki?

• Kumbi Mzichi Li watumbikika wuli chifukwa chakulongo nkharu yamampha kweniso ulemu ukulu?