Wati walongozga ŵanthu aku Yehova kwa vyaka vinandi, Yoswa wangufwa we ndi vyaka 110. Pa nyengu yo wenga ndi umoyu, Ayisirayeli asopanga Yehova. Kweni Yoswa wati wafwa, yiwu angwamba kusopa angoza nge mo ŵanthu aku Kanani achitiyanga. Chifukwa chakuti Ayisirayeli anguleka kuvwiya Yehova, iyu wanguzomereza kuti fumu ya Akanani zina laki Yabini yiŵasuzgengi. Ayisirayeli angupempha Yehova kuti waŵawovyi. Mwaviyo, Yehova wanguŵapaska mulongozgi wasonu zina laki Baraki. Iyu wanguŵawovya kuti aje so pa ubwezi ndi Yehova.

Debora yo wenga mchimi munthukazi, wangudana Baraki. Debora wenga ndi uthenga wakutuliya kwaku Yehova wakuti: ‘Uto anthulumi 10,000 ndipu ukakumani ndi asilikali aku Yabini ku Msinji wa Kishoni. Kweniko, wakumuthereska Sisera, yo ndi mura wa asilikali aku Yabini.’ Baraki wangukambiya Debora kuti: ‘Ndilutengi pijapija asani nawi ulutengi nani.’ Iyu wanguti: ‘Ndilutengi nawi kweni uziŵi kuti ndiwi cha wamubaya Sisera. Yehova wakamba kuti munthukazi ndiyu wakumubaya.’

Baraki ndi gulu laki la nkhondu anguluta limoza ndi Debora ku Phiri la Tabori kuti akanozgeke nkhondu. Sisera wati wavwa ŵaka, wanguwunganisa magareta nga nkhondu ndi asilikali ŵaki mudambu. Debora wangukambiya Baraki kuti: ‘Msanawale ndi zuŵa lo Yehova wakuwovyengi kuti uphari nkhondu.’ Baraki ndi anthulumi ŵaki 10,000 angusika muphiri kuti akakumani ndi gulu lanthazi la asilikali aku Sisera.

Yehova wanguchitisa kuti maji nga mumsinji wa Kishoni ngasapaliyi. Magareta ngankhondu ngaku Sisera ngangutitimiya mu ulambwi. Sisera wangutuwamu mugareta laki ndipu wangwamba kutchimbiya. Baraki ndi asilikali ŵaki anguthereska asilikali aku Sisera kweni iyu wanguthaŵa. Sisera wanguchibisama muhema la munthukazi munyaki zina laki Yayeli. Iyu wangumupasa mkaka kuti wamwi ndipu pavuli paki wangumudika bulangeti. Sisera wangugona tulu chifukwa cha kuvuka. Pavuli paki, Yayeli wangupinga chisulu chakukhome hema ndipu wangwenda mwakunyanyamiya ndi kumukhoma nachu kumutu. Sisera wangufwa.

Baraki wanguza kuzipenja Sisera. Yayeli wangutuwa muhema waki ndipu wanguti: ‘Sereni ndikulongoni munthu yo mupenja.’ Baraki wati wasere, wanguwona kuti Sisera wafwa. Baraki ndi Debora angumba sumu yakulumba Yehova chifukwa chakovya Ayisirayeli kuthereska arwani ŵawu. Ayisirayeli anguja mwachimangu kwa vyaka 40.

Pa nyengu yo ku Isirayeli kwenga nja, Nawomi yo wenga MIsirayeli, wanguluta ku Mowabu ndi mulumu waki kweniso ŵana ŵawu ŵaŵi anthulumi. Pati pajumpha nyengu, mulumu waku Nawomi wangufwa. Mwana waki munyaki wanguto Ruti ndipu munyaki wanguto Oripa. Anthukazi yaŵa ŵenga achimowabu. Chakupasa chitima chenga chakuti, pati pajumpha nyengu ŵana anthulumi aku Nawomi angufwa.

Nawomi wati wavwa kuti nja yikumala ku Isirayeli, wanguŵanaŵana kuti wawere kwaki. Ruti ndi Oripa angusoke nayu limoza kweni ŵe munthowa, Nawomi wanguŵakambiya kuti: ‘Mwenga anthukazi amampha ku ŵana ŵangu kweniso mwenga akumwana ŵangu amampha. Ndikhumba kuti mosi muyirwi so. Weriyani kwinu ku Mowabu.’ Anthukazi wo anguti: ‘Titikuyanjani! Tikhumba cha kukusiyani.’ Nawomi wangulutiriza kuŵakambiya kuti awere kwawu. Pakumaliya, Oripa wanguwerere kweni Ruti wangukana. Nawomi wangumukambiya kuti: ‘Oripa waluta ku ŵanthu ŵaki ndi achiuta ŵaki. Nawiso luta.’ Ruti wangumuka kuti: ‘Ndikusiyeningi cha. Ŵanthu ŵinu amuja ŵanthu ŵangu ndipu Chiuta winu wamuja Chiuta wangu.’ Kumbi uwona kuti Nawomi wanguvwa wuli ndi vo Ruti wangumuka?

Ruti ndi Nawomi angufika ku Isirayeli pa nyengu yo ŵanthu ayambanga kuvuna balere. Zuŵa linyaki, Ruti wanguluta kuchitondoleza balere mumunda wa munthulumi munyaki zina laki Bowazi yo wenga mwana waku Rahabi. Iyu wanguvwa kuti Ruti wenga wachimowabu ndipu wenga wakugomezeka kwaku Nawomi. Bowazi wangukambiya antchitu ŵaki kuti asiyengi balere muvuli kuti Ruti watondongi.

Ndimazulu, Nawomi wangufumba Ruti kuti: ‘Kumbi wachitondolezanga mumunda waku yani msanawale?’ Ruti wangumuka kuti: ‘Ndachitondolezanga mumunda wa munthu munyaki zina laki Bowazi.’ Nawomi wangumukambiya kuti: ‘Bowazi njumoza mwa abali a mulumu wangu. Ulutirizgi kutondoleza mumunda wa munthu mwenuyu pamoza ndi antchitu ŵaki anthukazi. Akuchitiyengi chiheni chechosi cha.’

Ruti wangulutiriza kutondoleza mumunda waku Bowazi mpaka po angumaliya kuvuna. Bowazi wanguwona kuti Ruti walimbikiyanga kugwira ntchitu ndipu wenga munthukazi wamampha. Mu mazuŵa ngenanga, asani munthulumi wafwa ndipu walivi ŵana anthulumi, abali ŵaki atonga nthengwa munthukazi yo wasiya. Mwaviyo, Bowazi wanguto Ruti. Yiwu angubala mwana yo angumudana kuti Obedi, yo wanguzija mbuyaki waku Davidi. Anyaki aku Nawomi angukondwa ukongwa. Yiwu angukamba kuti: ‘Chakwamba, Yehova wakukupaska Ruti yo wakuchitiya vinthu vamampha ukongwa ndipu sonu we ndi mzuku munthulumi. Yehova watumbikiki.’