Pati pajumpha nyengu, Ayisirayeli anguleka so kuvwiya Yehova ndipu angwamba kusopa achiuta aboza. Kwa vyaka 7, Amidiyani abanga viŵetu va Ayisirayeli ndi kunanga mbewu zawu. Ayisirayeli abisamanga mumphaku kweniso mumapiri chifukwa chakuthaŵa Amidiyani. Yiwu angupempha Yehova kuti waŵataski. Mwaviyo, Yehova wangutuma mungelu kuti waluti ku mnyamata munyaki zina laki Gidiyoni. Mungelu yo wangukamba kuti: ‘Yehova wasankha yiwi kuti uje msilikali wanthazi.’ Gidiyoni wangufumba kuti: ‘Kumbi ndingaŵataska wuli Ayisirayeli? Nde yani ini?’

Kumbi Gidiyoni watingi waziŵengi wuli kuti Yehova wamusankha? Iyu wanguŵika weya wa mbereri pamalu ngakukhwemiyapu mbewu ndipu wangukambiya Yehova kuti: ‘Asani dungwi liwengi paweya wa mbereri pe, kweni padongu pajengi pakumira, ndazamuziŵa kuti mukhumba kuti ini nditaski Ayisirayeli.’ Mawa laki ndi mulenji, dungwi linguwiya nadi waka pa weya wa mbereri pe kweni padongu penga pakumira! Gidiyoni wangupempha so kuti zuŵa linyaki laki ndi mulenji, weya wa mbereri pe uje wakumira kweni padongu posi pawi dungwi. Ivi vati vachitika, Gidiyoni wanguziŵa kuti Yehova wamusankha nadi. Mwaviyo, iyu wanguwunganiska asilikali ŵaki kuti akachiti nkhondu ndi Amidiyani.

Yehova wangukambiya Gidiyoni kuti: ‘Ndiŵawovyengi Ayisirayeli kuti aphari nkhondu. Kweni chifukwa chakuti we ndi asilikali anandi, mungaziyamba kuŵanaŵana kuti mwaphara mwija nkhondu. Mwaviyo, kambiya weyosi yo we ndi mantha kuti wawere kunyumba.’ Asilikali 22 sawuzandi anguwere nadi kunyumba ndipu panguja asilikali 10 sawuzandi. Pavuli paki, Yehova wanguti: ‘Asilikali yaŵa ŵeche anandi mbwenu. Uluti nawu kumsinji ndipu ukaŵakambiyi kuti amwi maji. Asilikali wo amuleka kujikama pakumwa maji, ndiwu ukasankhi.’ Asilikali 300 pe ndiwu anguchita viyo. Yehova wangulayizga kuti anthulumi amanavi ŵenaŵa ndiwu amuthereska asilikali 135 sawuzandi a Amidiyani.

Mu usiku wenuwu, Yehova wangukambiya Gidiyoni kuti: ‘Sonu nyengu yakwana yakuti muthereski Amidiyani!’ Gidiyoni wangupasa mbata anthulumi wo wenga nawu kweniso viŵiya vikuluvikulu vo anguŵikamu malimbuni. Iyu wanguŵakambiya kuti: ‘Muwonengi ini ndipu muchitengi nge mo ini ndichitiyengi.’ Gidiyoni wanguliza mbata ndipu wanguphwanya chiŵiya cho wenga nachu, wangusoska limbuni laki ndipu wangudaniliza kuti: ‘Lipanga laku Yehova ndi laku Gidiyoni!’ Anthulumi 300 wo ŵenga nayu nawuso anguchita viyo. Amidiyani anguchita mantha ndipu angwamba kutchimbiriya uku ndi uku. Chifukwa chakutimbanyizgika, angwamba kubayana ŵijaŵija. Yapa napu, Yehova wanguwovya Ayisirayeli kuthereska arwani ŵawu.

Myisirayeli munyaki zina laki Elikana wenga ndi anthukazi ŵaŵi, Hana ndi Penina. Iyu wayanjanga ukongwa Hana. Nyengu zosi Penina wanyozanga Hana chifukwa wengavi ŵana ndipu Penina wenga ndi ŵana anandi. Chaka chechosi, Elikana ndi banja laki alutanga ku chihema ku Shilo kuchisopa. Zuŵa linyaki po ŵenga kweniko, Elikana wanguwona kuti Hana wenga wakukondwa cha. Iyu wangukamba kuti: ‘Chondi kuliya cha Hana. We ndi ini. Nditikuyanja.’

Pavuli paki, Hana wanguluta kwakuyija kuchipemphera. Iyu waliyanga wachipempha Yehova kuti wamuwovyi. Hana wangulayizga kuti: ‘Yehova asani mundipaskengi mwana munthulumi, ndazakumupereka kwaku yimwi, ndipu wazakukuteŵetiyani kwa umoyu waki wosi.’

Wasembi Mura Eli wanguwona Hana wachiliya ndipu wanguŵanaŵana kuti waloŵe. Hana wangumuka kuti: ‘Awa ambuya, ndaloŵe cha. Nde ndi suzgu yikulu ndipu ndipemphera kwaku Yehova.’ Eli wanguziŵa kuti wanguŵanaŵana umampha cha ndipu wangumukambiya kuti: ‘Chiuta wakupaski cho ukhumba.’ Hana wangukondwa ndipu wanguwere kwawu. Chaka chechendamali, wangubala mwana munthulumi ndipu wangumudana kuti Samuyeli. Kumbi uŵanaŵana kuti Hana wangukondwa wuli?

Hana wanguluwa cha vo wangulayizga Yehova. Samuyeli wati wakuwaku, Hana wanguluta nayu ku chihema kuti wakateŵetiyengi kweniko. Iyu wangukambiya Eli kuti: ‘Uyu ndiyu mwana yo ndingupempha Yehova kuti wandipaski ndipu ndamupereka kwaku Yehova kwa umoyu waki wosi.’ Elikana ndi Hana alutanga ku chihema chaka chechosi kuchiwona Samuyeli ndipu amupingiyanga laya lifya lakudumuwa manja. Yehova wanguchitisa so kuti Hana wabali ŵana anthulumi atatu ndi anthukazi ŵaŵi.