Kumbi Bayibolu Likambanji pa Nkhani ya Kuphoda ndi Kuvwala Vibangili, Ndeŵereŵi Pamwenga Majuda?
Vo Bayibolu limuka
Chinanga kuti Bayibolu likamba vinandi cha pankhani yeniyi, kweni likanizga cha kuphoda, kuvwala vibangili, majuda pamwenga ndeŵereŵi. Kweni m’malu mwakukonkhoska ŵaka za kawonekeru kakubwalu, Bayibolu lititichiska kuti tije ndi “mzimu wakufwasa ndi wakuzika.”—1 Peturo 3:3, 4.
Kujitowesa Nkhwakukanizgika cha
Anthukazi akugomezgeka wo azumbulika mu Bayibolu nawu ajitowesanga. Rebeka yo wangutolana ndi Isaki mwana waku Abrahamu, wavwalanga mpheti ya golidi pa mphunu, vibangili va golidi ndipuso vinthu vinyaki vakudula ukongwa vakujitowese vo wangupaskika nge mphasu kutuwa kwa awisi a mulumu waki. (Chiyambo 24:22, 30, 53) Mwakuyanana ŵaka Estere nayu wangulonde “vakujitowese” po wanozgekiyanga kuchija fumukazi ya Ufumu wa Perese. (Estere 2:7, 9, 12) Vakujitowese venivi vasazgangapu “mafuta” pamwenga “mitundu yinyaki ya vo ŵanthu aphode kumasu.”—New International Version; Easy-to-Read Version.
Bayibolu liyeruzgiya vibangili, ndeŵereŵi, kweniso majuda ndi vinthu vamampha. Mwakuyeruzgiyapu, munthu yo wapereka ulongozgi wamampha Bayibolu litimuyeruzgiya ndi “ndeŵereŵi ya golide . . . ku gutu lakuvwisiya.” (Nthanthi 25:12) Mwakuyanana waka, Chiuta wanguyeruzgiya vo wachitiyanga mtundu wa Yisrayeli ndi munthulumi yo watowesa mwali ndi vibangili, ndeŵereŵi ndipuso majuda mukhosi mwaki. Kujitowesa kwaviyo uku kunguchitiska mtundu wa Yisirayeli kuja “wakutowa ukongwa.”—Ezekiele 16:11-13.
Fundu zaboza pa nkhani ya kujitowesa ndipuso kuvwala vibangili, majuda, pamwenga ndeŵereŵi
Fundu yaboza: Pa lemba la 1 Peturo 3:3, Bayibolu likanizga “kuluka sisi ndipuso kuvwala vakujitowese vagolide pamwenga malaya ngamampha.”
Fundu yauneneska: Pa lemba ili, Bayibolu likonkhoska kukhumbika kwa kujitowesa mkati mumtima m’malu mwa kujitowesa ŵaka kubwalu kwa liŵavu. (1 Peturo 3:3-6) Fundu yeniyi, yisanirika so mu malemba nganyaki nga m’Bayibolu.—1 Samuele 16:7; Nthanthi 11:22; 31:30; 1 Timote 2:9, 10.
Fundu yaboza: Vakudyoŵe munkhopi, ndipuso muvikolongu nge vo Fumukazi yiheni Yezebelu yingugwiriskiya ntchitu, vilongo kuti kujitowesa nkhuheni.—2 Ŵakaronga 9:30.
Fundu yauneneska: Yezebelu yo wachitanga vamasenga ndipuso wabayanga ŵanthu wangulonde cheruzgu chifukwa cha kujitowesa kwaki kwa kubwalu cha kweni chifukwa cha vinthu viheni vo wachitanga.—2 Ŵakaronga 9:7, 22, 36, 37.