Ayisirayeli anguleka so kusopa Yehova ndipu angwamba kusopa achiuta aboza. Pa nyengu yo Aamoni achitanga nkhondu ndi Ayisirayeli, achiuta aboza ŵenaŵa anguŵawovya cha. Ayisirayeli angusuzgika kwa vyaka vinandi. Pavuli paki, angukambiya Yehova kuti: ‘Takunangiyani. Chondi titaskeni kwa arwani ŵidu.’ Ayisirayeli anguphwanya angoza ŵawu ndipu angwamba so kusopa Yehova. Yehova wakhumbanga cha kuti alutirizgi kusuzgika.

Msilikali wachiyisirayeli zina laki Yefita wangusankhika kuti walongozgi Ayisirayeli kuchichita nkhondu ndi Aamoni. Iyu wangukambiya Yehova kuti: ‘Asani mwatiwovya kuphara nkhondu iyi, ndilayizga kuti asani ndaziwere kunyumba, ndazakukupaskani munthu wakwamba yo wazamutuwa munyumba mwangu kuzikumana nani.’ Yehova wanguvwa pempheru laku Yefita ndipu wangumuwovya kuphara nkhondu.

Yefita wati wawere kunyumba, munthu wakwamba yo wanguza kuzimulondere wenga mwana waki yumoza pe munthukazi. Iyu wavinanga ndi kumba kang’oma. Kumbi Yefita wanguchita wuli? Iyu wangukumbuka layizgu laki ndipu wangukamba kuti: ‘Mwana wangu! Wandipweteka mtima. Ndingulayizga kwaku Yehova. Kuti ndifiski vo ndingulayizga, ndikhumbika kukutuma ku chihema ku Shilo kuti ukateŵetiyengi kweniko.’ Mwana waki wangumukambiya kuti: ‘Ada, asani mukulayizga kwaku Yehova, mutenere kufiska layizgu linu. Ndipempha kuti ndiluti ku mapiri ndi anyangu kwa myezi yiŵi. Pavuli paki ndilutengi.’ Mwana waku Yefita wanguteŵete Yehova mwakugomezeka ku chihema kwa umoyu waki wosi. Chaka chechosi, anyaki alutanga ku Shilo kuchimuwona.

Wasembi Mura Eli wenga ndi ŵana ŵaŵi anthulumi wo ateŵetiyanga nge asembi pachihema. Mazina ngawu ngenga Hofini ndi Finihasi. Yiwu avwiyanga cha marangu ngaku Yehova ndipu achitiyanga ŵanthu vinthu viheni ukongwa. Asani Ayisirayeli ŵaza kuzipereka sembi kwaku Yehova, Hofini ndi Finihasi, atonga nyama yamampha ukongwa kuti yije yawu. Eli wavwanga vo ŵana ŵaki achitanga kweni pengavi cho wachitangapu. Kumbi Yehova watingi wazomerezengi kuti venivi vilutirizgi kuchitika?

Chinanga kuti Samuyeli wenga munamana kwaku Hofini ndi Finihasi kweni wangutoliyaku cha mijalidu yawu. Yehova wakondwanga ndi vo Samuyeli wachitanga. Zuŵa linyaki ndi usiku Samuyeli wati wagona, wanguvwa kudana. Iyu wanguyuka ndi kuluta kwaku Eli ndipu wangukamba kuti: ‘Ndaza ambuya!’ Kweni Eli wangumuka kuti: ‘Ndakudana cha, luta kagoni so.’ Samuyeli wanguluta kuchigona. Pavuli paki, wanguvwa so kudana. Samuyeli wati wadanika kachitatu, Eli wanguziŵa kuti Yehova ndiyu wadananga Samuyeli. Iyu wangukambiya Samuyeli kuti asani wavwa so kudana, ukakambi kuti: ‘Longoroni Yehova, chifukwa mteŵeti winu watuvwa.’

Samuyeli wanguluta so kuchigona. Pavuli paki wanguvwa kudana kuti: ‘Samuyeli! Samuyeli!’ Iyu wangumuka kuti: ‘Longoroni, chifukwa mteŵeti winu watuvwa.’ Yehova wangumukambiya kuti: ‘Umukambiyi Eli kuti ndimulangengi pamoza ndi banja laki. Iyu waziŵa kuti ŵana ŵaki achita vinthu viheni muchihema changu kweni palivi cho wachitapu.’ Ndimulenji waki, Samuyeli wangujula visasa va chihema, nge mo wachitiyanga nyengu zosi. Iyu wachitanga mantha kukambiya wasembi mura vo Yehova wangukamba. Kweni Eli wangumudana ndi kumufumba kuti: ‘Wamwana wangu, Yehova wakukambiyanji? Ndikambiyi vosi.’ Mwaviyo, Samuyeli wangukambiya Eli vosi vo Yehova wangukamba.

Samuyeli wachikuwa, Yehova wangulutiriza kumulongozga. Mucharu chosi cho Ayisirayeli ajanga, wosi anguziŵa kuti Yehova wasankha Samuyeli kuti waje mchimi kweniso wakweruzga.