Yehova wangukambiya Samuyeli kuti: ‘Luta kunyumba yaku Jese. Yumoza mwa ŵana ŵaki anthulumi ndiyu wajengi fumu yachiŵi ya Ayisirayeli.’ Mwaviyo, Samuyeli wanguluta kunyumba yaku Jese. Samuyeli wati wawona mwana munthulumi wakwamba waku Jese, wanguŵanaŵana kuti: ‘Mnyamata uyu watenere kuti ndiyu Chiuta wasankha.’ Yehova wangukambiya Samuyeli kuti ndiyu cha. Yehova wanguti: ‘Ini ndiwona mo munthu wawoneke kubwalu cha kweni ndiwona mtima wa munthu.’

Jese wanguza ndi ŵana anthulumi anyaki 6 kwaku Samuyeli. Kweni Samuyeli wanguti: ‘Palivi yo Yehova wasankha. Kumbi we ndi ŵana anyaki anthulumi?’ Jese wanguti: ‘Kwaja yimoza mumana ukongwa munthulumi Davidi. Iyu wamuliska mbereri zangu.’ Davidi wati waza, Yehova wangukambiya Samuyeli kuti: ‘Ndi mweniyo!’ Samuyeli wangupunguliya mafuta pamutu paku Davidi, kumusankha kuti kunthazi wazije fumu ya Ayisirayeli.

Nyengu yinyaki, Ayisirayeli anozgekiyanga kuchita nkhondu ndi Afilisiti. Yiwu ŵenga ndi msilikali wanthazi zina laki Goliyati yo amuthembanga ukongwa. Zuŵa lelosi Goliyati wanyozanga Ayisirayeli. Iyu wadanilizanga kuti: ‘Nditumiziyeni munthu kuti wapumani nani. Asani wandithereska, tijengi akapolu ŵinu. Kweni asani ndamuthereska mujengi akapolu ŵidu.’

Davidi wanguluta kumusasa wankhondu wa Ayisirayeli kuti wakapereki chakurya kwa abali ŵaki wo ŵenga asilikali. Iyu wanguvwa vo Goliyati wakambanga ndipu wanguti: ‘Ndipumanengi nayu.’ Fumu Sauli yingukamba kuti: ‘Kweni ndiwi mwana.’ Davidi wangumuka kuti: ‘Yehova wandiwovyengi.’

Sauli wakhumbanga kuti Davidi wagwiriskiyi ntchitu chakuvwala chaki chankhondu. Kweni Davidi wanguti: ‘Ndingachita cha nkhondu ndi vakuvwala ivi.’ Mwaviyo, wanguto legeni ndipu wanguluta ku msinji. Wangusankha mya yinkhondi yakusililika ndipu wanguyiŵika mukachikwama kaki. Pavuli paki, Davidi wangutchimbiriya ko kwenga Goliyati. Goliyati wangudaniriza kuti: ‘Zanga wamwana. Ndikuperekengi ku viyuni vamude kweniso ku vinyama vamudondu kuti vikuryi.’ Davidi wanguchita mantha cha. Nayu wangudaniriza kuti: ‘Yiwi utuza ndi lupanga kweniso mukondu kweni ini ndituza mu zina laku Yehova. Uchita nkhondu ndi isi cha kweni ndi Chiuta. Weyosi yo we panu waziŵengi kuti Yehova ngwanthazi ukongwa kuluska lupanga pamwenga mkondu. Iyu wakuperekeningi mu manja mwidu.’

Davidi wanguŵika mwa mu legeni laki ndipu wanguwuzunguza ndi kuwuponya mwanthazi. Ndi chovyu chaku Yehova mwa wo ungupuma pachisku chaku Goliyati ndipu ungusere mukati. Munthu wanthazi mwenuyu wangufwa. Pavuli paki, Afilisiti wosi anguthaŵa. Kumbi ugomezga Yehova nge mo Davidi wanguchitiya?

Davidi wati wabaya Goliyati, Fumu Sauli yingumuŵika kuja mura wa asilikali ŵaki. Davidi wanguphara nkhondu zinandi ndipu wangutchuka ukongwa. Asani Davidi waweku kunkhondu, anthukazi azanga kuzimuviniya ndi kuzimumbiya sumu. Yiwu ambanga kuti: ‘Sauli wabaya ŵanthu masawuzandi kweni Davidi wabaya ŵanthu masawuzandi nganandi!’ Sauli wangwamba kuchitiya sanji Davidi ndipu wakhumbanga kumubaya.

Davidi wenga ndi lusu lakumba bangu. Zuŵa linyaki Davidi wambiyanga Sauli bangu. Sauli wanguponya mkondu kuti wabayi Davidi kweni wanguŵeka nyengu yeniyo ndipu ungulasa pachimati. Pavuli paki, Sauli wanguyesesa kanandi ŵaka kuti wamubayi. Pakumaliya, Davidi wanguthaŵa ndi kuchibisama kuchipululu.

Sauli wanguluta ndi asilikali ŵaki 3 sawuzandi kuchipenja Davidi. Mwambula kuziŵa, wangusere ku mphanji ko Davidi ndi ŵanthu ŵaki angubisama. Ŵanthu wo ŵenga nayu angumutokotose kuti: ‘Uwu ndi mwaŵi waku wakuti ubayi Sauli.’ Davidi wangwenda kamanakamana kuluta ko kwenga Sauli ndipu wangucheketaku chakuvwala chaki. Sauli wanguziŵa cha. Pavuli paki, Davidi wangujimba mulandu kuti wanguyitumbika cha fumu yakusankhika ndi Yehova. Iyu wanguzomereza cha kuti ŵanthu ŵaki ayibayi. Sauli wati watuwaku kumphanji, Davidi wangumudaniliziya ndipu wangumukambiya kuti, watingi wamubayengi chifukwa wenga ndi mwaŵi wakuchita viyo. Kumbi Sauli wanguleka kukhumba kubaya Davidi?

Awa. Sauli wangulutirizga kupenja Davidi. Zuŵa linyaki ndi usiku, Davidi ndi muphwa waki Abishayi angusere mumsasa waku Sauli kwambula weyosi kuziŵa. Chinanga ndi Abineri yo wavikiliyanga Sauli, nayu wangugona. Abishayi wanguti: ‘Uwu ndi mwaŵi widu! Agani ndimubayi.’ Davidi wangumuka kuti: ‘Yehova ndiyu wamalanengi ndi Sauli. Tiyi tito ŵaka mkondu ndi kachiŵiya kaki kakumwiya maji, tikengi.’

Davidi wangukwera phiri lo lenga pafupi ndi musasa waku Sauli. Iyu wangudaniriza kuti: ‘Abineri, ntchifukwa wuli unguleka kuvikiriya fumu yaku? Kepani kachiŵiya kaku Sauli kakumwiya maji ndi mkondu waki?’ Sauli wangungaŵanika mazu ngaku Davidi ndipu wanguti: ‘Watingi undibayengi kweni wandibaya cha. Ndiziŵa kuti yiwi ndiwi ujengi fumu ya Ayisirayeli pavuli pangu.’ Sauli wanguwere kunyumba yaki yachifumu. Kweni ndi wosi cha a mu banja laku Sauli wo atinkhanga Davidi.