Yonatani wenga mwana munthulumi wakwamba wa Fumu Sauli ndipu wenga msilikali wambula mantha. Davidi wangukamba kuti Yonatani watchimbiyanga ukongwa kuluska nombu ndipu wenga wanthazi kuluska nkharamu. Zuŵa linyaki, Yonatani wanguwona asilikali a Afisiti paphiri. Iyu wangukambiya munthu yo wangumupingiya vidya kuti: ‘Tiŵayukiyengi asani Yehova watilongo chisimikizu. Asani Afisiti atikambiya kuti tiluti ko kwe yiwu, tiziŵengi kuti tikhumbika kuŵayukiya.’ Afisiti angudaniriza kuti: ‘Zani kunu, tipumani!’ Mwaviyo, Yonatani ndi munthu yo wenga nayu, angukwera paphiri ndi kubaya asilikali 20.

Chifukwa chakuti Yonatani wenga mwana wakwamba, wenga wakwenere kuja fumu pavuli paku Sauli. Yonatani waziŵanga kuti Yehova wakusankha Davidi kuti ndiyu waje fumu yachiŵi ya Ayisirayeli kweni iyu wanguchita sanji cha. Yonatani ndi Davidi ayanjananga ukongwa. Yiwu angulayizgana kuti avikiliyanengi kweniso awovyanengi. Yonatani wangupereka chakuvwala chaki, mkondu, uta kweniso lamba kwaku Davidi kulongo kuti ayanjananga ukongwa.

Pa nyengu yo Davidi wathaŵanga Sauli, Yonatani wanguluta kwaku Davidi ndipu wangumukambiya kuti: ‘Uŵi wanthazi ndipu ukhwimi mtima. Yehova wasankha yiwi kuti uje fumu. Chinanga mbada nawu aziŵa.’ Kumbi ungayanja kuja ndi bwezi nge Yonatani?

Yonatani wanguŵika umoyu waki pangozi mwakuwerezawereza, chifukwa wakhumbanga kuwovya mubwezi waki. Iyu wanguziŵa kuti awisi a Sauli akhumbanga kubaya Davidi ndipu wanguŵakambiya kuti: ‘Munangengi asani mubayengi Davidi chifukwa palivi chiheni cho wachita.’ Sauli wangumukwiyiya ukongwa Yonatani. Pati pajumpha vyaka, Sauli ndi Yonatani angufwiya limoza ku nkhondu.

Yonatani wati wafwa, Davidi wakhumbanga kukumana ndi Mefiboseti yo wenga mwana waku Yonatani. Wati wamusaniya, Davidi wangumukambiya kuti: ‘Chifukwa chakuti ada ŵaku ŵenga anyangu ukongwa, ndikuphweriyengi kwa umoyu waku wosi. Ujengi mu nyumba yangu yachifumu ndipu uryengi pathebulu langu.’ Davidi wangumuluwa cha mubwezi waki Yonatani.

Sauli wati wafwa, Davidi wanguja fumu. Iyu wenga ndi vyaka 30. Wati walamuliya kwa vyaka vinandiku, wanguchita chinthu chinyaki chiheni ukongwa. Zuŵa linyaki ndi usiku we pachanya pa nyumba yaki yachifumu, wanguwona munthukazi wakutowa. Davidi wanguvwa kuti munthukazi yo wenga Betiseba, muwolu waku Uriya yo wenga msilikali. Davidi wangudanisa Betiseba kuti wazi kunyumba kwaki. Iyu wangugonana nayu ndipu wanguja ndi nthumbu. Davidi wanguyesesa kubisa vo wanguchita. Iyu wangukambiya mura wa asilikali kuti pa nyengu ya nkhondu, akaŵiki Uriya pa mzeri wakwamba wa asilikali ndipu wosi akawere vuli kuti wakaje yija. Uriya wati wabayika ku nkhondu, Davidi wangutorana ndi Betiseba.

Yehova wanguwona vinthu vosi viheni vo vinguchitika. Kumbi watingi wachitengenji? Yehova wangutuma mchimi Natani kwaku Davidi. Natani wanguti: ‘Penga munthu munyaki wakukhupuka yo wenga ndi mbereri zinandi ndipu munyaki mukavu wenga ndi mwana wa mbereri yumoza yo wamuyanjanga ukongwa. Munthu wakukhupuka wanguto mwana wa mbereri wa munthu mukavu.’ Davidi wangukwiya ndipu wangukamba kuti: ‘Munthu wakukhupuka yo ngwakwenere kubayika!’ Natani wangukambiya Davidi kuti: ‘Munthu wakukhupuka yo ndiwi!’ Davidi wanguchita chitima ndipu wangukambiya Natani kuti: ‘Ndanangiya Yehova.’ Ubudi uwu ungumuzisiya masuzgu nganandi Davidi ndi ŵanthu a mubanja laki. Yehova wangumulanga kweni wangumubaya cha chifukwa wangukamba uneneska ndipuso wangujiyuyuwa.

Davidi wakhumbanga kuzenga nyumba yakusopiyamu kweni Yehova wangusankha mwana waku Davidi, Solomoni kuti ndiyu wazengi. Davidi wangwamba kuwunganiska vinthu kuti wapasi Solomoni ndipu wangumukambiya kuti: ‘Nyumba yakusopiyamu Yehova yikhumbika kuja yakutowa ukongwa. Solomoni weche munamana kweni ndimuwovyengi kuwunganiska vinthu.’ Davidi wangupereka ndalama zinandi kuti ziwovyi pa ntchitu yakuzenga. Iyu wangusaniya ŵanthu alusu. Wanguwunganisa golidi ndi siliva ndipu wangudanisa mathabwa nga sidara kutuliya ku Turo ndi ku Sidoni. Davidi we pafupi kufwa, wangupasa Solomoni pulani kuti wazengi nyumba yakusopiyamu. Iyu wanguti: ‘Yehova wandikambiya kuti ndikulembe vinthu ivi. Yehova wakuwovyengi. Ungachitanga mantha cha. Uje ndi nthazi ndipu ugwiri ntchitu iyi.’